老sell遊記

2011 的 7件事 - 進度及結果

2011-11-24T16:51:00.000+08:00

潛水咗好一段日子，浮一浮上水面。好快又一年，望一望今年初既目標，不如寫一寫進度及結果。

1. 每日睇信報 - OK la....

2. 一年讀十二本書(一個月一本) - OK la....(已經超過十二本了)

3. 繼續用跑馬拉松籌募 - Keep going!

4. 可以一次過游750米 - 游咗三個Ocean Water Swims，最長一個2400米（吐露港渡海泳）

5. 參加一次兩鐵challenge組別 - 參加咗兩個兩鐵比賽，一個三鐵比賽。

6. 跑三個全馬，PB到3:45 - 只完成咗兩個：(1) 渣打馬拉松及(2) 首爾馬拉松。日本長野馬拉松因為三月日本東北大地震取消。最新時間：3:18 (首爾馬拉松)

7. 投資優於大市 - Ok la.. 錄得正回報（唔講幾多啦）。

Races in 2011

1. Jan 1 元旦冬泳 (600m)
2. Jan 12 Mizuno Half Marathon (21km)
3. Feb 5 Fat Choy Run (7km)
4. Feb 20 Standard Chartered Hong Kong Marathon (42.195km)
5. Apr 11 Tribal Enduro Aquathon Race 1
6. May 17 Tribal Enduro aquathon Race 2
7. Jun 22 Age Group Sprint Challenge (Relay) (5km)
8. Jul 6 Summer Ocean Swim (2km)
9. Jul 8 Nike Lunar Run (5km)
10. Aug 16 Summer Ocean Swim (1.4km)
11. Aug 28 2xTRI Triathlon
12. Sept 19 Coca Cola 10k Run (10km)
13. Oct 30 Tolo Harbour Ocean Water Challenge (2.4km)
14. Nov 6 JoongAng Seoul Marathon (42.195km)
15. Nov 13 Asics 10k Race (10km)
16. Nov 27 UNICEF Charity Run (21km) (Coming)
17. Dec 18 Gamma 30km Race (30km) (Coming)

2011 的 7件事

2011-01-07T16:04:00.001+08:00

每日睇信報
一年讀十二本書(一個月一本)
繼續用跑馬拉松籌募
可以一次過游750米
參加一次兩鐵challenge組別
跑三個全馬，PB到3:45
投資優於大市

2011年給自己的一個字

2011-01-03T23:31:00.000+08:00

實事求事，或者就是今年既大目標。

不過，可以實在地展示實力，一級一級地提升，一步一步步向目標，感覺既充實又滿足。

Tribute to Haile Gebrselassie

2010-11-10T11:29:00.002+08:00

上一篇講起小芳比賽時既情況令站喺旁邊打氣既肥龍有所啟發．又其實喺比賽場上，其他既故事亦存在著不少，而有另外一位好耐之前都寫過，就係至目前為止，男子馬拉松世界紀錄保持者Haile Gebrselassie．

想知道一些有關Haile既故事，可以留意一下肥龍呢篇舊文．今次再寫Haile，可惜唔係寫佢再次把自己做出既世界紀錄時間再推前一步，相反係從報導知道Haile喺剛過去週日既New York City marathon 比賽途中因傷退出，並且喺賽後宣佈退休．

"I have never thought about retiring before but now I am. I am not going to run anymore."

******************************

Haile, you are a real hero and inspirational person! All the best~

******************************

Update on 17 Nov 2010: 真係估唔到世事可以變化得咁快，啱啱寫完退休，八日後Haile已經決定復出。都好呀，肥龍好期待Haile可以SUB2完成全馬既一日！

支持者與參加者

2010-10-27T12:24:00.002+08:00

啱啱過去既週末，正正係三項鐵人比賽中一年一度盛事：香港ITU三項鐵人亞洲盃．比賽水平如何高，肥龍唔打算喺度描述．今次自己並冇報名參加任何比賽，不過因為有朋友分別報咗名玩隊伍接力及個人三鐵賽事，而自己又一直想拍攝一啲運動比賽相片，所以星期六一早就乘坐朋友安排既車跟大隊到迪士尼樂園去．

話說好耐前寫過，喺跑東京跑馬拉松時自己深深被由兩旁（素不相識）既支持者所發出既打氣聲及預先準傭既食物所感動，講過只要日後有機會的話，一定要掉轉角色，為所有比賽參加者打氣及加油．

估唔到，上次作為參加者被支持者所感動；今次到自己做支持者，反過來卻被又參加者所感動～

如果之前有收看過【香港事．情第1集 - 看不見的翅膀】既朋友，應該知道此集被訪者小芳既經歷及遭遇．如果未有看過的話，肥龍誠意推介各位花小小時間收看本集．對肥龍而言，重點不只在小芳之前發生既事件，最重要及感動既部份係透過及認識小芳既故事，令普通及四肢健全既自己明白到，如何體會甚麼叫做「將不可能成為可能」．

工作或生活上，包括自己，身邊既同事朋友可能都會遇到困難．但當留意事件本身周遭，各部份之間其實存在著唔少有效資源及可用能力，只可能有時因為心理上關係，又或者實際原因並冇使用出來．例如跑步／游泳，聽過唔少人講過自己唔識跑步／游泳又或者覺得自己跑／游得慢，就算開始跑，可能都會半途而癈．

當然任何人有選擇既自由，肥龍想講既只著眼說明「能力」一環．譬如沒有手臂既小芳，從外表睇，她冇既唔單止係能力（游泳），更甚至係冇可以使用能力既資源（雙臂）．There is no boundary or limition. 嗯，想深一層，有能力及資源既大部人，又正在想甚麼，做甚麼呢？

實不相瞞，當日每次當見小芳經過身旁時，除咗舉機拍照，有兩次自己更被感動得兩眼通紅，因為我覺得她實在了不起！作為一位運動既參與者，肥龍從來唔會覺得殘障人仕會比健全既參加者有任何分別，特別在兩鐵／三鐵／游泳／跑步比賽上，喺外在環境上，其實大家要做要面對既其實係一樣，而每人各有自己既長處短處及困難，要睇就係各自既賽前準備及平時練習所成既基本功．

而雖然沿途都有幫她打氣，又其實起步之前，本來肥龍有機會走到她前面親口講聲加油，不過因為當時有其他事處理，到後來完成後已經唔見咗小芳既蹤影～再有機會遇見，一定會再講啦！

所以有時唔做參加者，做支持者表達支持及打氣又會有另一種體會．就算素不相識，有機會可以考慮下到現場為參加者打氣啦！

我和我的主場

2010-10-19T20:09:00.005+08:00

旁邊既同事上星期收到確認電郵，下年二月有得去東京跑十公里賽事，又再觸動肥龍既神經啦！

其實喺同事報名之前，跟肥龍攞料問有關報名及比賽情況時，對於呢隻首馬既情意結，肥龍已經心癢癢都想一齊報名，打算抽籤真係抽到先算啦．不過諗到今年渣打馬拉松跟東京馬拉松舉行日子只係相差一個星期，就算未計交通時間，要八日內應付兩個馬拉松，除咗應該會好吃力，兩個比賽點樣分配及部署，休息時間等．．．真係想像唔到兼冇謂費精神，倒不如集中精力跑好指定既一個就好啦．最怕興奮開頭，到時最後兩個都跑得唔好既話就真係白費咗今年一直準備既汗水及心機．

更重要係今年早已跟同行練習既好友有個約定，2011年一齊上全馬！所以要選擇的話，諗都唔駛諗，當然係「朋友」那一方啦！

呢個主場一年一度兼唯一既大型全馬賽事（雖然總65,000名額中，兩組全馬只有10,000位，而半馬及十公里分別為18,000位及37,000位．實在好希望有朝一日全馬名額佔總名額大多數時，就可以叫做「真正」既馬拉松．），縱使大家（包括自己）都對其安排、路線有好多意見、願望及想法，不過一個賽事已辦咗十幾年而自己又將會係連續第六年參加（之前五年都係參加半馬），同聲同氣，果股歸屬感，除咗呢個主場比賽，難道有其他地方呢？

而原來自有本BLOG開始，自己一直有把每年渣馬既路線放到呢度(不過漏咗2006年呀~)。而由2009年開始，發現沿途已經唔再用涼亭去表達唔同既地標嚕～

2011年2月20日早上，尖沙咀彌敦道起點見！

Splash N Dash Aquathon Series Race 4 - The Finale: 自我感覺良好

2010-10-15T12:14:00.003+08:00

Race 4 October 10, 2010 (港島淺水灣)

Challenge: 500m swim; 5km run; 500m swim
Sprint: 375m swim； 2.5km run

上星期日，10年10月10日，終於黎到今年整個系列最後一場比賽，地點重回跟第一場比賽路線相同既淺水灣．可以話係巧合又或者十月既氣候應該如此，當日既天氣，由先前幾日風和日麗到當日忽然轉冷及有點微雨，感覺上水溫有點冷，不過就蠻適合跑步．情況跟四月時第一場好類似，只不過自己心情及準備都唔同咗．

上次提到，第三場比賽之後，一直為自己當日發揮唔出應有水平（起碼跟練習時情況大有分別）而耿耿於懷．另外自己都想知道，點解第三場時候臨場點解表現得咁論盡．結果喺第三及第四場之間既兩個週末，特別相約一樣有參加比賽，又比自己有經驗及技巧既朋友安排加操及請教．目標好簡單：我要游好呢場水及做好呢場比賽！

講番比賽情況，做好適當既熱身後，聽過工作人員講解比賽描述，緩緩行到起點區準備起步．或可以講成緊張或策略保守，自己選擇留喺較後位置起步．一來知道自己時間唔算快，避免被其他參加者帶快；二來留喺較後位置起步，游水爭位情況亦應該冇咁緊張，自己可以有更多空間去發揮．

跳進海內之後，之前兩個週末特訓既付出果然有用，今次終於可以用水自己既節奏去游，而且亦應用咗朋友指導既技巧（特別係如何保持向前面目標游）．至於爭位情況其實無可避免，特別係轉游泳方向時，會同時間大量參加者向浮泡附近爭線．有過前兩場既經驗，今次當發現身旁有其他參加者爭位時，適當地留意互相速度上既分別，配合划水動作，利用手部把對方推開，令自己原來游泳路線得以保持．結果大部份時間（九成）可以用上自由式完成游泳部份及轉項時既準備，以18'45"完成(9/14 或 34/44），時間上比第一場完成時間快咗差不多三分半鐘．

回顧番整個系列，參加比賽前，一直認定自己泳術不精：最遠都只係海灘游出過浮台；而中學時從未參加過游泳比賽，更甚至水運會報咗名做逃兵唔參賽；就算到今天，都係繼續用唔正確既蛙腳去踢水。我知自己游得唔快，但我會保持練習時既節奏及姿勢，堅持最後游到終點。所以到目前一刻，能夠做到呢個程度及克服呢個心理樽頸，自我感覺實在良好！

今年可以大膽踏出呢一步，參加咗呢三場兩項鐵人比賽又三場比賽共游咗375米加270米加375米，除咗自己貪玩兼心中有團火外，真係要多謝朋友既鼓勵及指導，同埋呢個比賽形式好適合肥龍呢類初哥及氣氛一流。我會更努力練習，下年再參加再做好啲！

向Anzenchitai 說再見

2010-10-03T23:17:00.002+08:00

當現場聽櫻井和壽既Mr. Children 已近乎mission impossible；而桑田佳佑既Southern All Stars 又因為桑田佳佑患上癌症而無限期停止活動；今趟玉置浩二既Anzenchitai 演唱會心想可能做一次就少一次（或者可能真係最後一次），不能錯過了！

因為只要少咗是但一位，就唔再係心目中嗰隊「安全地帶」啦！

Good Show! 可能有人會話玉置浩二當晚不在狀態，不過認真覺得事實又未必真係如此。其實唱至第三首歌左右，我覺得已經開始入佳境，而個Rundown亦唔錯，好歌一首接一首，而且大部份亦係一些為港人所熟悉既歌曲。

能夠現場聽著一首又一首熟悉又喜愛的歌曲，聽著每一粒由他們樂器所發出的聲音，一句又一句的歌聲，真滿足！有些歌無論幾耐聽一次或者應該係每次聽既時候都會覺得毛管戙一樣，特別當聽到他們唱出「ワインレッドの心（酒紅色的心）」、「恋の予感」及「悲しみにさよなら（向悲哀說再見）」時，肥龍真係變成小粉絲般隨著音樂拍手，更甚聽到有少少眼濕濕好激動！！

Unplugged既一段，真係至今回味又回味，只係稍稍覺得「恋の予感」唱咗半支有啲唔係好夠喉！不過唱完之後久久不絕既拍掌聲已經可以話俾台上五位成員知在場各位係如何期待及滿足此曲！

Are you ready?

2010-09-30T12:07:00.001+08:00

今日下午終於開始報名啦！

經過五年半馬，都係時候上呢隻主場全馬啦！

Splash N Dash Aquathon Series Race 1 & Race 3: 在水中那位不是我

2010-09-24T11:29:00.001+08:00

續上次所提及，講番比賽本身，賽事主要分少年組及成人組，而成人組再分長途(Challenge)及短途(Sprint)．

肥龍參加既係短途Sprint組，跑步及游泳部份都比Challenge組短．

Race 1及 Race 3 比賽情況報告如下．

Race 1 April 18, 2010 (港島淺水灣)

Challenge: 500m swim; 5km run; 500m swim
Sprint: 375m swim； 2.5km run

四月時第一次參加Race 1，由於同行朋友大家都係兩頂比賽既新手，有關比賽完成時間，並冇太大實際概念．處子比賽既目標定得好簡單，就係吸收經驗及可以安全完成比賽就得啦．所以除咗運動量既準備外（本應綽綽有餘），好多野（特別裝備上）都只係抱著「摸著石頭過河」既心態去處理，並冇因應比賽而去準備，更加對比賽時應有技巧及小秘技好明顯冇認真了解啦．

此站既安排係先游泳，後跑步．對於游泳一般既肥龍，比賽前心裡上既緊張及因不確認而產生既壓力可想而知．自知技巧及情況，基本上最關鍵係游泳部份，直接啲講，只要游畢全程，上到岸就ok．當聽過工作人員講解有關比賽距離、路線後，緩緩步行到淺水灣沙灘既起點區準備起步．

一如所料，落水游咗差不多四五十米左右，都唔知係技巧、氣力定外在環境關係，感覺上開始停滯不前，而且更覺距離完成位置遙遙無期．同時遇著新手所犯既困難，所處情況跟游泳池練習完全唔一樣，加上兩旁都係一同起步既參加者，因各自動作而激起既浪花及波浪，非常唔習慣．最後，只可以看著同一起步既參加者愈游愈遠，雖然心理上覺得唔好受，不過當時心中只好不斷安慰自己及保持本應有既節奏，慢慢一步一步向岸邊邁進．

結果，以最後名次完成游泳部份．游得上氣唔接下氣，五臟六腑彷彿倒轉，更帶著軟弱既步伐，向轉項區方向走．穿上上衣及跑鞋，立即走到賽道，繼續完成跑步部份．雖然依然上氣唔接下氣，始終跑步及比賽距離難度唔大，最後以22'19"完成(尾二，10/11 或 25/26）．雖然辛苦，但總算完成首個兩項比賽．

Race 3 Sept 19, 2010 (港島南灣)

Challenge: 4km run; 540m swim; 4km run

Sprint: 2km run; 270m swim; 2km run

今次肥龍參加既都係短途Sprint組，即先跑2km，然後游泳270m，最後再跑2km完成．

準備上面，特別由七月開始，針對游泳方面既弱點，已經安排每星期一課游泳練習，目標係要比上一次游得好．在於自己，運動精神除咗堅定不移及發揮所能外，還有克服困難．既然要參賽，當自知有所不足時，更應努力去預備．情況就如五年前首次參加半馬拉松到今天已經二次完成全馬拉松一樣，只要堅持，始終可以達到．

或者因為係第二次比賽，對各方面已有一定概念，心情比第一場輕鬆．今次跟第一場唔同，係先跑，後游，到最後再跑步．當中會有兩次轉項．作簡單既熱身及聽過工作人員講解比賽細節後，就到起點區準備起步．

比賽情況跟第一場差不多．不過游泳方面，今次因為先跑，而因此參加者因為完成時間唔同所以落水時間亦唔同，其實已經冇第一場幾十人爭先起步既情景出現，游泳起步相對比較容易．今次初段終於可以用自己賽前定下既節奏去游，亦游得算不錯．不過游到五十米左右時，遇上前面既人群，結果又犯上上一場同樣既錯誤，最後節奏亂了，更無奈係爭線途中被前面既參加者蹬咗一腳腹部（唔好奇怪呢個情況喺比賽時好平常及經常發生），慶幸尚可繼續比賽，一步一步繼續向岸邊游．最後一轉2km，除咗上水後跑沙灘一段，雖然已經爆爆地，不過都可以堅持跑哂返終點．

最後以31'07"完成(名次12/16 或 34/40）．

********************************************

肥龍會再努力，要喺下一場，亦即今季最後一場前，游泳方面再落苦功，己經相約朋友今個星期日早上到淺水灣加操，到時一定要發揮原來既自己！

********************************************

Race 3兩項比賽好特別，包括自己在內，共有十位朋友參加同一組別(Sprint Distance)（當然唔同年齡組別啦）同場較量，好好玩！更開心係有兩位中學同學首次參與及可以安全完成！讚！又有三位朋友獲得兩亞一季既成績，讚讚！

呢個比賽氣氛一流，作為一個星期日活動，好好～

Splash 'n Dash Aquathon Series：交學費

2010-09-20T10:47:00.000+08:00

呢一篇本來四月時Race 1完成後已經想寫，只不過因為當時工作忙及要準備五月既馬拉松，不了了之．到八月有時間寫既時候，心中覺得有點過氣及過時，所以決定都係等埋今次Race 3比賽後再寫好了．

本身並唔知道呢個賽事，第一次認識呢個賽事係因為有一個週日早上喺平日練習既路線（深水灣至南灣）上，剛巧遇著其中一站既賽事．由於當時參加人數有一定數目（大概一百幾十人吧），而平時練習路線只係一條闊六至八米既緩步徑，為免阻礙參加者，所以就停步兼順道觀看賽事．

觀看完後腦裡浮現一個問題：「其實，自己可唔可以應付兩頂/三項比賽呢?」相信肥龍想法跟大部份人差不多，認為要參與兩頂/三項比賽，首要條件當然係體能方面可以完成指定項目距離．有關技巧及時間，其實冇一定概念．反而最實際冒問題係如果而達致體能方面要求，究竟要練甚麼及練多少．

三項之中，跑步方面最冇問題．平時練習亦已經由10km至20km一課，比賽時跑4km或8km應付得來．而參加兩項主要係考慮到暫時唔需要準備及投資單車，而且家住範圍亦冇單車徑，要練習就只有到公路上練習，所以如果可以的話，留到最後先處理呢個安排及確認．至於游泳方面，對游泳技術只係好一般既肥龍黎講，可能係參加與否最決定性既一環．

咁游泳方面有幾一般？簡單而言咁大個人從未參加過任何游泳比賽，從未嘗試過一次性游超過150m距離，更未曾試過在open water下游泳．所以如果決定要參加兩項，除咗勇氣之外，應該都係勇氣，及喺未來日子，喺三方面(1)改善游泳技巧、(2)游長途時所需力氣及強度及(3)增加距離既決心處著手．

貼金的事情請找我，貼錢的事情請勿找我!

2010-09-04T00:07:00.001+08:00

巴菲特蓋茨將訪華部分中國富豪避席怕勸捐

是否捐款當然出於個人意願及自由，不過當第一次聽到這則新聞時，只好慨歎一聲。

莫非發財立品之前，都是發財先行？就算巴菲特蓋茨都係咁話！

Shin Zan Mono【新參者】

2010-09-02T00:37:00.000+08:00

「謊言有三種，第一種是為了保護自己；第二種是為了欺騙別人；第三種是為了包庇他人。」- 加賀恭一郎，【新參者】

****************
留意及收睇【新參者】當然係因為原作者東野圭吾既故事。

原以為推理劇既故事中卻充滿人性故事既描寫。而故事節奏彷彿漫不經心但其實一步一步走向中心。十集的故事，只是講述一宗案件。一位又一位的嫌疑者隨劇情逐一解除，而說謊背後竟另有故事。

當大家讚【神探伽利略】既湯川教授好有型及科學推理時，反而更覺得【新參者】裡警官加賀恭一郎的內歛，及從人性心態及細節中尋找線索，更令肥龍收看時加添興趣。

如果喜歡睇【神探伽利略】及東野圭吾的話，雖然風格不相同，但應該會覺得【新參者】不錯。

【新參者】Ending Song

秋季

2010-08-25T14:27:00.002+08:00

朋友提起，原來經已立秋．雖然日間氣溫依然酷熱，不過只要安排喺清晨或晚間練習，有時更會涼風陣陣，感覺其實還是適合去跑步．

利用電腦軟件幫助，把由今年三月起至最近的練習情況記錄下來．無可否認，以月計，練習量起落差甚大．八月尚未完結，不過根據目前進度，如果天氣上未致太差（其實可以安排到健身室跑步機練習，而且從記錄上亦留意到因為天氣炎熱關係，於五月份開始亦有將部份練習安排室內進行），八月份練習量及練習距離（13公里/課）應該可以回到四月時水平（約150公里/月，或45公里/週）．

今年跟去年最大的分別，應該在身體狀態及體重方面．肥龍身材不算高，只大概170公分左右，兩年前體重卻有80公斤，不問而知，BMI完全不合格．經過近一年多的練習及利用不同訓練配合（游泳及器械健身），最近體重應該回到71-72公斤附近．好處是身輕有利速度，身體肌肉亦扎實了．

再踏入九月，馬拉松練習記錄正式進入下一階段．

而今年目標，大致有下列幾項比賽：
1. Splash N Aquathon Series Race 3 (Aquathon) - Sept 2010
2. Splash N AQuathon Series Race 4 (Aquathon) - Oct 2010
3. UNICEF Charity Run (Half Marathon)- Nov 2010
4. Mizuno Half Marathon Challenge (Half Marathon)- Jan 2011
5. SC HK Marathon (Full Marathon)- Feb 2011
6.(Tentatively)Nagano Marathon (Full Marathon)- Apr 2011/ Seoul Marathon (Full Marathon)- Mar 2011

小結

2010-08-13T22:06:00.006+08:00

每次登上這個彷彿半荒廢既地方，都不時想起往日這裡既好日子。

最近發現腦筋有點退步，除了偶有執筆忘字既情況，有時總似缺少執筆寫字既動力。希望可以喺不久既日子，可以好似往時寫寫工作，寫寫跑步，寫寫比賽前既準備，及比賽時既情況與感受。

雖然沒有更新，其實一直保持練習，只不過喺五月尾比賽後，加上炎熱天氣，練習量只可以保持喺某一個水平。

又因為初涉足兩項鐵人比賽，而游泳方面一直係自己既弱項，所以喺七月初開始，特地每星期進行游泳練習，希望可以喺此方面表現可以提升，亦令馬拉松練習上加入其他要素，相輔相成，為未來既馬拉松比賽打好基礎，做好準備。

又，不知不覺間，日積月累，由三月份開始（因為習慣以渣打馬拉松為每年跑季既終結，即二月底）練習差不多約半年，就以下作為一個小結。

March: 103.50km
April: 158.82km
May: 230.39km
June: 52.30km
July: 111.70km

Total Mileage (March- July): 656.71km

八強

2010-06-30T09:35:00.003+08:00

上次烏鴉口話南韓可能有機會繼2002年果屆之後再入四強，結果即刻十六強止步．加上尋晚日本都出埋局，亞洲球隊正式全部宣佈畢業．

開賽前提及既四強（德國、荷蘭、阿根廷及西班牙），尚在競爭之列中，當中德國及荷蘭將面臨宿敵，分別與巴西及阿根廷爭入四強．

去到呢個階段，估邊隊可以成為冠軍都冇咩意思．不過有評述話如果巴西、阿根廷、烏拉圭及巴拉圭可以分別殺入四強，今屆隨時變成南美國家盃！@_@

十六強

2010-06-26T18:30:00.003+08:00

隨著德國隊喺分組賽第二場對塞爾維亞隊時輸波失去選擇首名／次名既主動權後，第三場喺不明朗因素及要穩奪出線權下，唯有打低加納隊，並以D組首名出線。

結果十六強即要對宿敵英格蘭。就算過關，就好大機會同阿根廷爭四強。

咁本來預測既四強（德國、荷蘭、阿根廷及西班牙），好大機會只會中其中三隊。

不過，都係一句，雖然困難重重，肥龍對德國隊有信心！

P.S. 而南韓隊好有機會繼2002年果屆之後，再入四強。信不信由你！

開波啦！

2010-06-11T01:13:00.002+08:00

黎緊呢個月，都話咗唔係三十出頭，當然冇可能可以睇足咁多場波！不過四年一度，而且波癮難耐，但要喺平時既練習時間表上再劃上分組賽呀，十六強賽呀。。。真係腦筋大作戰呀！

雖然有人話今屆氣氛好似嘛嘛，未開波啫～第一晚高潮應該係六月十二日晚，先黎南韓，再有阿根廷，尾場仲有英格蘭！

講番今屆四強心水，雖然睇落好大路，但如果睇完分組情況，對賽鄰組及進級路線，就揀咗呢四隊：

1.德國 (穩紮穩打，講往績及紀律已經足夠！萬一英格蘭首場有咩差錯，德國隨時初賽已經走線都唔定，後面就有光明前路！)
2.荷蘭 (呢個選擇四個之中風險最大！不過難得今屆比較低調，加上中場好似唔差，睇下過唔過到巴西／葡萄牙囉～)
3.阿根廷 (中前場火力強大！配合埋德國走線，應該冇問題！)
4.西班牙 (除咗後防，睇落真係好似好FIT！)

又睇下我估唔估得中～ ^^

Sundown Marathon 賽後成績初佈

2010-05-31T17:01:00.007+08:00

比賽完成後都未夠12小時，尋晚已急急腳搭飛機從新加坡回港．有關比賽情況，肥龍需要一點時間整理，然後再向大家報告．

就上一篇向各到訪敝blog既網友作出捐助呼籲，有責任盡快將完成成績在此公開，方便各位作好安排．

肥龍完成全馬成績為四小時三十三分鐘．

另把上篇有關目標捐助金額計算方法再提及：

－　每公里完成為港幣五元正，共四十二公里，即為港幣二百一十元正
－　如以四小時內完成全馬拉松的話，除每公里贊助外，額外捐助港幣一百九十元正　(註：因完成時間已超出此目標，所以此部份不適用）

按成績計算，如同意的話，煩請把所捐助款項(港幣二百一十元正)直接交往受助團體機構．肥龍不負責有關捐助事宜．若各位希望捐助到三個提議（即「土房子」，「無國界社工」或「眾膳坊」）以外既團體機構，亦可自行決定．

再次感謝各位支持肥龍此提議，用行動幫助有需要人仕！

醫生，醫生，可唔可以幫我打針呀？

2010-05-24T22:00:00.005+08:00

有謂「唔跑唔舒服」！如果有練習開跑步既朋友，一定明白此話箇中意思。

所以自從開始練習長跑後，對身體健康飲食著重咗，練習時亦做好熱身運動，凡事按步就班，避免受傷。

因此「受傷」及「生病」，往往係練習/跑步既大敵。

講到咁樣，冇得練已經咁無奈，更何況係比賽前夕？

當Sundown Marathon比賽到咗最後倒數階段既時刻，個心未跑已經飛咗一半過去既時候，剛過去既長假期，無奈發生及接受一個現實：

肥。龍。病。咗！

今日已經係星期一，星期四晚就要出發到新加坡。今晚放工去咗睇醫生，可以話肥龍心急，已經唔想等到星期四先打針，又或者希望可以快啲好番兼喺比賽前有幾日時間回復中氣。於是都唔理得太多，就主動要求醫生不如幫肥龍打支針。

醫生當然希望肥龍試下食幾日葯，到真係唔好時再決定有冇需要打針。

可能醫生都覺得奇怪，從來只有病人同醫生講：「醫生，醫生，可唔可以唔打針呀？」好少有人主動要求打針。最後，醫生問肥龍做咩咁想打針。

結果肥龍臉帶愜意，同醫生講因為星期六晚會到新加坡參加馬拉松比賽，之前已經準備及練習咗一段時間，實在唔想功虧一簣，到最後一刻先因為病而無緣比賽，再三懇下醫生終於肯幫肥龍打針。

雖然打完針手臂好痛，但總不及比賽時腳板起水泡痛，更不及冇得比賽時既痛。

Pain is temporary, quitting lasts forever!

想辦法的話，跑還是有可能！

Keep going! Sundown Marathon, 5 nights to go!

從跑步到幫助別人

2010-05-18T17:34:00.002+08:00

自從敝blog轉寫有關跑步情況後，加上目前寫blog氣候轉變，究竟尚有幾多人繼續到此遊覽，肥龍都唔係好清楚．或者，可以藉今個機會，會知道一點端兒．

*******************

自三年前開始跑步後，肥龍生活改變咗，心境亦隨之然有所變化．由從來唔去跑步，或者只可以跑幾公里，到一星期平常地練習三至四天，每星期按照計劃去完成．

然而每次既練習中，或有空閒時，都曾經反問自己，跑步之外，除咗成績時間，自己希望從中得到甚麼，做到甚麼．

*******************

之前睇過莊曉陽既經歷，欣賞莊君之餘，亦覺得其「讀萬卷書不如跑萬里路」中有趣之處．於是，去年2009年，膽粗粗到咗一個好喜歡既地方－「日本」，完成咗人生第一個馬拉松．

整件事對自己帶來既感受及得著，至今依然津津樂道．

亦由一刻開始，訂下一年到香港以外既地方跑一個馬拉松既目標．

十一日之後，肥龍就會踏足新加坡，準備迎接人生第二個馬拉松．

*******************

最近，睇過一套有關跑步既日本電影【強風正勁】．其中一段對白，感受至深．

「對長跑手最好的稱讚，你認為是什麼？」

「堅強．」

因為跑步，因而練習，無意間，肥龍吸引咗身邊朋友及同事開始接觸跑步，更甚每星期定時一同練習．同時，從各朋友同事口中知道其跑步既樂趣．

*******************

少時，記得龍媽既訓示：「當有能力既時候，儘量去幫助別人．」雖然講唔上係咩座右銘，但其實一直銘記在心．

講返對跑步既反思，如何令自己既參與更有意義，於是又把目標再向前踏多一步．

*******************

最近忽然有個念頭，思量如何可以將自己對跑步既堅持及過程，得到其他人既支持及認同，再將呢份支持實質地（如金錢捐助）幫助有需要既人仕，達到跑步之餘又可以幫助別人既目標．

由於肥龍係第一次發起此行動又唔屬於任何團體機構．關於捐助方法及受助團體機構，逐有以下建議：

目標捐助金額計算如下：
－　每公里完成為港幣五元正，共四十二公里，即完成為港幣二百一十元正
－　如以四小時內完成全馬拉松的話，除每公里贊助外，額外捐助港幣一百九十元正

即如肥龍可以四小時內完成全馬拉松的話，共捐助港幣四百元正．而所捐助款項，煩請直接交往受助團體機構．肥龍不負責有關捐助事宜．若各位希望捐助到上述三個以外既團體機構，亦可自行決定．

有關受助團體機構，肥龍心目中有下列三個建議：
(1)　「土房子」
(2)　「無國界社工」
(3)　「眾膳坊」

最後，肥龍多謝各位睇到呢度都未走開．更對支持此行動既善心人感激．

我的練習記錄 (Week 10: May 9 - May 15, 2010)

2010-05-16T19:54:00.003+08:00

有時會覺得一年52個星期，一星期一星期咁去練習，就好似跑馬拉松時一公里一公里去跑一樣，每一星期/一公里都係一種付出，一種堅持，一種紀律，可以係充滿目標又同時可以係漫無目的，過程最重要。

May 9 - 16.6km
May 11 - 10.0km
May 13 - 10.8km

Gym
May 12
Weight lifting, cycling for 16km
Run on Treadmill - 6.8km @6min/km

May 15
Weight lifting
Run on Treadmill - 10km @6min/km

Weekly mileage: 54.2km

Sundown Marathon, 13 days to go!

我的練習記錄 (Week 9: May 2 - May 8, 2010)

2010-05-08T10:14:00.001+08:00

今個星期因為工作關係，練習里數比上星期回落一點，幸尚可以保持55公里之上。不過可能今個星期天氣普遍比較朝濕及悶熱，總結為比較吃力既一週。

Week 9

May 2 - 16.6km
May 4 - 10.0km
May 5 - 3.6km
May 6 - 11.0km
May 8 - 16km

Weekly mileage: 57.2km

Sundown Marathon, 22 days to go!

Shameful!

2010-05-06T10:54:00.001+08:00

曾班子帶頭不投票

你怎樣去面對及教育下一代？

我的練習記錄 (Week 8: April 25 - May 1, 2010)

2010-05-01T10:43:00.003+08:00

正式進入倒數階段！

今個星期終於做到一星期60km既里數，而週末既兩課亦開始做到每課18km(5'25"/km)一課。希望可以保持呢個水平再跑兩星期做好準備！

而且，將會緊記肥龍比賽時三大要點：

1. 喺正常心情況下（即冇抽筋，冇受傷），馬拉松係「跑」既，一步都不能「行」；
2. 練習歸練習，目標均速及完成時間終係「目標」。具體情況係要留意比賽當日各環節（天氣，身體狀況，比賽時身體回饋及臨場發揮情況等），最終都係以當時情況作出調整。安全第一，完成第二，時間第三；
3. 享受比賽

Sundown Marathon, 29 days to go!

Week 8

April 25 - 16.6km
April 27 - 12.6km
April 29 - 10.4km
May 1 - 18.0km

Gym
April 28 - weight lifting, cycling for 16km
Run on Treadmill - 6.72km @6min/km

Weekly mileage: 64.3km
April 2010: 158.8km

馬拉松練習記錄 (Season 3)

2010-04-25T17:29:00.001+08:00

雖然好耐都冇在此更新，其實自渣打半馬比賽後一星期左右，已經開始為SEASON3做準備。

又因為要準備五月尾到新加坡參加sundown marathon，由三月開始時每星期跑總里數25至28公里（三課），已增加至每星期跑總里數40至45公里（四課）。

而週末既兩課，已開始增加距離。希望未來幾課當中，可以做到一課25公里或以上，作為最後耐力既準備。

最近七星期既練習記錄如下：

Week 1

Running
March 7 - 8.5km
March 11 - 9.5km
March 13 - 8.5km

Weekly mileage: 26.5km

Week 2

Running

March 16 - 8.4km
March 18 - 8.5km
March 20 - 9.5pm

Gym
March 17 - weight lifting, cycling for 5km

Weekly mileage: 26.4km

Week 3

Running

March 23 - 5.4km
March 25 - 10km
March 27 - 10km

Gym
March 24 - weight lifting, cycling for 10km
Run on Treadmill - 1km @6km/min

Weekly mileage: 26.4km

Week 4

March 28 - 10km
March 30 - 11km
April 3 - 11km

Gym
March 31 - weight lifting, cycling for 16km
Run on Treadmill - 3km @6min/km

Weekly mileage: 35km

Week 5

April 4 - 8.5km
April 6 - 8.5km
Aprill 8 - 11km
April 10 - 11km

Gym
April 7 - weight lifting, cycling for 16km
Run on Treadmill - 3km @6min/km

Swimming
April 5 - 600m

Weekly mileage: 42.2km

Week 6

April 11 - 10km
April 13 - 8.5km

Swimming
April 14 - 600m

Weekly mileage: 18.5km (因為April 18參加咗AQUATHON，賽前需要要休息，此星期只練習兩課。)

Week 7

April 18 - 2.5km
April 20 - 10km
April 22 - 8.5km
April 24 - 16.6km (SH SB ABD)

Gym
April 21 - weight lifting, cycling for 16km
Run on Treadmill - 3.2km @6min/km

Weekly mileage: 40.8km

2010年渣打半馬拉松　－　少少苦楚等於激勵！？

2010-03-03T12:26:00.002+08:00

如果你問今年渣打馬拉松既參加者既賽後感受時，相信有唔少人衝口第一句都係講：「好熱好濕，好辛苦！」

其實，潮濕（相對濕度約93%）及熱（攝氏25-27度）既天氣，對肥龍黎講未算係今次完成賽事前唯一需要面對既難題．事緣喺跑到約8至9公里位置時，隔著運動鞋發現，左腳腳底近中央偏右位置，大概因為襪既內部表面與皮膚磨擦而出現水泡．

由腳底傳來既痛楚感覺，真係一步一下一下咁直達腦神經，不停咁腦交戰．而且呢個聲音，到比賽末段，更愈來愈響亮！

可能有朋友會問，雖然知道肥龍並唔係專業跑者，但作為一位已經跑過四次渣打半馬拉松及其他比賽既超業餘跑者，呢個環節，應該早有對策或準備吧！況且差不多既情況，其實喺2007年那一次亦都出現過一次，理應有所警惕，唔會重犯呢個大概係初階跑者亦唔應該犯既問題．可能．．．有時事情就係如此，又或者咁樣可能令印象更深刻，所以就算賽前已經為雙腳腳底及身體各處容易磨擦位置搽上凡士林，但正因一時疏忽，未有好好檢查襪／運動／雙腳既情況，結果出現如此狀況．

講返比賽，其實喺比賽日之前既一星期，大概已經從天氣預報知道當日將會比較潮濕及熱（特別經過農曆新年期間既寒冷），加上好友傳來既一些就濕熱天氣下比賽既電郵，反正挑戰PB(1:46)不成，逐早已決定將原來均速調校至5’15”/km至5’20”/km（原目標均速為5’00”/km），按此推算半馬完成時間約為1:52-1:54左右．

但當實際比賽時，就算已經早有（心理）準備，發現身體狀態及速度受氣溫及濕度既影響比想像中大！當到達半馬折返點（約7km）時，時間為41’31”，從呼吸頻率中已覺得有點overspeed，於是再把均速放慢一點．奈何再跑多2km後，又感覺到腳底水泡情況，灰爆！

此刻心中泛起一個念頭，就係繼續跑還是就此完結呢！？又如果繼續跑，又可唔可以以目標時間完成呢？當時除咗腦交戰外，其實亦有一點自責，但無論如何，心諗比賽還是要完成呀！決定都係見步行步，而速度亦冇就腳底水泡情況刻意改善．就算每次上斜路段前都打算放慢腳步，結果一段又一段斜路被克服．到跑過最後一段銅鑼灣馬師道天橋後，進入駱克道至維園終點最後2km時，水泡痛楚、雙腳疲累、體溫過熱等一概拋諸腦後，亦因太集中去完成比例再空暇留意兩旁夾道支持者既打氣聲，向終點進發！

最後以1：53完成半馬！另外四位好友亦安全完成！

賽後回顧，能夠喺濕熱既天氣下，加上因為襪既關係令左腳腳底起咗水泡，可以由8公里開始一直奮鬥堅持到尾，雖然唔可以做到PB (1:46)，但以1：53完成呢次半馬（其實已經比去年完成時間快5分鐘），已相當叫自己感動呀！時間以外，亦令到對自己既堅持有更深體會．

另外，今次馬拉松既環境及氣候，對五月底將會到新加坡跑既SUNDOWN MARATHON有好大參考價值及啟示，特別係如何保持及分配體力方面，有更深了解，方便往後制定策略．

而今次已經係自2006年起連續5次半馬，時間由第一年2:41跑到今年既1:53，過程之久及當中付出，就算只計最近兩年既準備，對自己黎講，已經十分難得及寶貴．雖然半馬時間上，理應尚有好大既進步空間，但今次比賽過後，心理生理上似有團火一樣，或者都係時候挑戰香港這個主場既全馬啦！

「肥龍馬拉松戰記」Season 3即將今個星期日早上開始！

五條腿一條心

2010-03-02T20:23:00.002+08:00

下年一於上全馬。。。。

六萬人啊

2010-02-23T17:26:00.002+08:00

話咁快又一年！

今年將會係第五度出賽半馬，希望可以跑到心目中既成績外，更可以同其他好友同事有個安全又愉快既週日！

時間有限

2010-01-29T09:58:00.001+08:00

經常有朋友講起，如果人生將會活到七十歲的話，依家大概已經踼緊下半場．

另外，喺一次講座中，講者（已屆退休之齡既大學教授）提到佢依家專注既重點，唔係點樣工作（對佢黎講當然唔成問題啦），反而係如何善用時間，做更多自己想做、及對身邊人、其他人做更有意義及幫助他人既事．

唔講其他人，先講自己．

當然唔係想講Maslow既理論（人既需求／欲望如何如何會一個一個層次咁去提升），重點係「時間」或者再精確啲講係「時機」．

凡事講求天時地利人和，呢個「人和」，或者就係講緊自己．而呢個自己，又可能係講緊自己既身體及健康．

有一次跟舊同事見面，講到近況，肥龍提到最近幾年開始跑步既情況，及去年第一次跑馬拉松既經歷．舊同事反問一句，其實有咩驅使肥龍一直去做、去練習呢？

答案從減肥到挑戰自己，到希望可以藉雙腿一步一步去旅遊、去認識世界唔同地方之際，當中既變化，或者套用俗啲果一句：「精力有限之餘，時間／時機更有限囉！」更為合適．另外，背後可能仲有一句：「如果要做，唔趁身體健康冇病冇痛時去做，等幾時呀？」

畢竟有好些事情，並非簡單一句「想做就去做」，講得咁容易．

唔知咩既原因，又喺邊一年，大概兩三年前開始，發覺愈來愈知命（實情有冇人知咩叫知命呢？）．總覺得凡事總係有一個框框，在乎既唔係突破唔突破呢類問題（況且究竟有冇呢個框框，又呢個框框有幾大，最後又有邊個知呢？），重要問題反而落在如何盡好本份，把自己放入所做既事當中，做好自己既本份．反正能力所限，或者只此一次．而且心裡會覺得，今次唔做咩？咪又心思思．既然結果未必可以預期及控制，不如試一試，起碼過程中既心態及付出可以自己決定吧！

好啦，長篇大論完啦，其實肥龍想講咩呢？其實對於跑步呢個活動，原來不知不覺已經進入第五個年頭！由第一次(2006年)完全冇準備及練習下，傻下傻下學人跑半馬，死下死下咁用近三個鐘完成，到挑戰兩小時完成半馬，至去年完成第一個全馬，及今年第五度出戰渣打半馬，發覺時間原來過得真快！

究竟往後仲會有咩發生，真係諗都冇諗過．用番上面果一句，不如試一試先啦！今年除咗第五度出戰渣打半馬之外，仲有五月底會到新加坡跑Sundown Marathon (第二隻馬兼到時可以見識參加ultra-marathon(84km)既高手)．而完成之後將會轉去專心練水，目標係可以喺九月前一口氣游到五百米．到達標後再做其他事情啦！

我的練習記錄 - 差勁的準備，意料不及的成果

2010-01-12T09:31:00.019+08:00

剛星期日完成既Mizuno Half Marathon比賽，有一個意料不及既成績．

自從去年11月尾UNICEF半馬之後，經過十二月期間一連串假期飯局及旅行，令一直按照既練習時間表，基本上已經甩得七七八八．而練習量及距離，更差不多重回九月份時既量（退哂步囉～），即每星期總里數三十公里以下．

咁既情況，喺未跑呢次比賽之前，對於完成時間，早已經冇抱有太大期望．加上此比賽路程上有一定難度（全程喺唔同路段均有上斜部份），對耐力上要求會好嚴格．所以今次極其量只好視呢次比賽為六個星期後渣打半馬前一個練習指標．

希望利用今次比賽既成績及感覺，作為未來一段時間練習既方向及修正，並作最後既準備．

講番今次比賽，若果用先前練習開既均速（4:50/km)去跑，可能會太過進取～都係保守一點，策略上用5:30/km去跑完全程的話，應該會比較有把握，而預計大概完成時間為1:50-1:55左右．比剛完成既UNICEF半馬慢3-8分鐘．

一切按照原定計劃去跑，首10km用咗51分鐘完成，感覺尚且不俗，亦感到應該可以以1:50完成．後半段保持耐力，及或者已經吸收咗上年比賽經驗，喺適當地方保留氣力，最後以1:46完成．

對於呢個成績，相對今次所有準備，實在係意料不及．而最令自己滿意既地方，係比去年成績（2:03）快咗17分鐘，總算可以作為2009年既練習及準備既反映．

分段時間如下：

5'47" 4'58" 4'44" 5'28" 5'28" (5km: 25'26")
5'03" 4'59" 4'43" 5'09" 4'02" (10km: 50'25"/ 5km split: 24'59")
4'45" 5'02" 5'16" 4'59" 5'06" (15km: 1:15'35"/ 5km split: 25'10")
4'57" 5'19" 5'02" 5'30" 4'55" (20km: 1:41'20"/ 5km split: 25'45")
5'25"

Finish time: 1:46

兩套誠意推意推介既日劇

2010-01-02T10:16:00.002+08:00

【仁醫】

正！

【Rookies】

以下係劇場版（或者叫電影版）既片頭，但電視版更值得一再回味．絕對既熱血之劇集！

2010年給自己的一個字

2010-01-02T09:48:00.003+08:00

舊年肥龍喺呢度留咗一個「成」字俾自己，提醒自己喺2008年時做咗唔少決定，到2009年時一件一件咁去完成、去成全、去成為．

結果雖然唔可以做到十全十美，而且更有一兩項甚至未能完成，但大致已經可以做到八至九成，總算完成一個多變、忙碌又充實既牛年．

走過一大步之後，係時候保守、穩定既時候，應該踏實求穩，發揮先前爭取及建立既基礎．當然，性格使然，始終心思思留意眼前腦裡唔同既機會及事物，只好懷著開放既態度，作出嘗試並接受過程及結果，或者從中可以發現更多更大．

年將會發生既，將會係未來兩或三年間既一小步．究竟可以走到幾遠，自己都唔知道，不過相信只有放開腳努力去走出第一步，其他先有機會陸續有來．之前聽過一句說話，非常認同，就係「世上沒有無謂或多餘的努力」．或者，呢個說話會令今年自己做任何事更堅強．

所以今年為自己給一個字：「放」．

走在褔岡的清晨中

2009-12-17T20:55:00.003+08:00

只可以講。。。感覺超正！

除咗天都未光兼要克服寒冷刺骨既氣溫而需要比較大既勇氣之外（今朝大概只得3C左右），從起步一刻開始，由博多火車站出發，沿大博通走，轉到明治通，走過天神橋，到達大濠公園。。。愈跑愈有！

由去程時沿途只得三兩個穿得厚厚既途人開始，到回程時走到人來人往既火車站範圍。大概9公里既路程中，感覺實在愉快，又覺得以此方法及形式去認識一個陌生地方，的確深刻又回味。(不過認真講如果係好似日本治安比較好既地方呢種做法尚且可以。。。)

雖然言語不通兼素不相識，但當途中遇見一樣作練習既人時，好自然又互相點頭微笑打個招呼，繼續向應該既方向走。而呢個感覺又同時喚起跑東京馬拉松既回憶。。。

運動過後，再食兩碗日本米飯及味增湯，嗯。。。好滿足呀！

Nothing is impossible - Dec 12, 2009

2009-12-13T09:45:00.001+08:00

真係得咗喇！

我的練習記錄

2009-11-17T23:39:00.014+08:00

準備UNICEF半馬進入最後階段，雖然最近天氣轉冷，難得有兩位同事一齊練習，尋晚如常到跑馬地練習．做足準備及熱身後，首兩圈跟隨兩位同事速度作進一步熱身，至第三圈中段開始慢慢加速至目標速度(6'50"/lap).

由於上兩次經已用(7'00"/lap)做練習，感覺上應該可以再跑快一點，預算大概(6'45"/lap)左右，於是就用此速度跑三個圈．三個圈過後，身體感覺及呼吸情況不俗，再決定加速至(6'30"/lap)再跑三個圈.

最後一圈再以接近90%速度(6'15"/lap)完成.

Total: 74'43" (14km)

除咗喺速度上既練習，尋晚特地攜帶chest belt量度練習期間心跳既情況．又根據喺網上有關練習層次與心跳率之間既工具作比較，純以數字去睇，發覺各方面數據不媒而合．若果以%HRR 164-171計算，最有效速度應該介乎6'50"/lap至7'00"/lap之間，又即最近三次練習既速度，實在太好！

Training zones based on heart rates (http://www.runningforfitness.org/calc/hrtp.php)

我的練習記錄- 增加里數的一週

2009-11-11T02:18:00.000+08:00

都係時候講番練習既狀況．

繼約上星期開始把每課里數逐漸增加後，希望令每課不少於14km，令每週總里數可達55km或以上．

兩星期前開始把週中本來9km既一課增加至14km．對一次到跑馬地馬場跑10個圈，嘗試用5min/k（或7min/lap，因為馬場大約1.4km/lap）去跑，結果用咗約71min完成，時間初步達到目標，而且感覺唔錯．

尋晚因為本來約好練習既同事臨時有事，結果放工後一個人到跑馬地馬場練習．於是決定再次用7min/lap去跑10個圈．至於點解會試7min/lap，主要係之前試過用全速去跑一圈時間為6’15”，咁若果用約9成力去跑的話，得出既時間大概就係7min/lap．

可能剛過去既週末練習里數比之前明顯增加（由26km 增加至35km），雙腿未有如常有足夠時間適應及休息．雖然可以跑出預定時間，但喺跑頭一兩個圏時發現右邊小腿有少少痠痛，不過最後集中精神尚可以完成，而且時間更比上一次好．

每圈時間如下．第5圈時尾段發現好似跑快咗，於是意識下減慢步伐，結果反而仲係最慢既一圈．而第8圈時剛好遇到一組約5-6人既小組練習，覺得大家pacing差不多，於是尾隨直至第10圈．

Lap 1: 6'57"
Lap 2: 6'57"
Lap 3: 6'52"
Lap 4: 6'57"
Lap 5: 7'02"
Lap 6: 6'56"
Lap 7: 6'55"
Lap 8: 6'56"
Lap 9: 6'52"
Lap 10: 6:50"

Total: 69'20" (14km)

我的練習紀錄 - 幾段

2009-11-07T10:38:00.004+08:00

最近工作上實在忙忙忙忙忙忙．．．．不過心未亡，仲要趕埋個year end，好好醜醜，都要認真去完成，雖然有啲野未必在自己掌握．

慶幸有跑步既習慣，除咗身體健康，又可以減壓，更原來可以感染身邊人！

事源公司有四位同事都已報名參加月尾UNICEF既比賽，有報10km，又有報半馬．其中一位已為人母既同事更係第一次參加比賽．成績時間唔係重點，難得係從十月開始堅持每星期去練習．於是，每星期包括肥龍在內，五位每星期二／四放工後同到附近跑馬地馬場跑(馬)圈，各自為定下既目標努力！

肥龍今年目標希望喺耐力及速度上有所提升，令完成時間可以更進一步．以目前進度及情況而言，要跑得比上年跑渣馬好，基本上問題不大，重點反而落喺是否可以喺1hr45min內完成半馬．

上星期練咗一課14km，完成時間為71min，即約5min/k，跟心目中時間差不多．而身體感覺係應該可以維持此速度再跑多2-3km(即大概16-17km).

今個星期每週總里數已到達55km，而週末既兩課亦會加每課18km，為月尾UNICEF比賽作最後準備！

另一方面，經過幾位跑友既介紹，兩星期前亦而把Nike Free 5.0入手並使用練習，感覺唔錯！

EA Sports: Portsmouth 0 - 3 Arsenal

2009-10-25T11:58:00.000+08:00

EA Sports: Portsmouth 0 - 3 Arsenal

又一年

2009-10-15T16:00:00.001+08:00

原來已經係第五年．

今年將會第五度出戰半馬．上四年成績如下：

2006 2hr 39mins
2007 2hr 30mins
2008 2hr 08mins
2009 1hr 58mins

2010 ?hr ??mins

其實．．．除咗其他人預期，自己最初都有諗過今年會跑全馬．不過心諗跑渣打全馬呢個目標總有一日會完成（相信就係2011年），反而考慮到可以跟其餘四位好友一同再挑戰半馬，後者吸引力及意義更大．況且，自己亦可以為半馬PB而努力，跑半馬全馬，其實分別不大．

畢竟大家已經練習咗一段日子，經歷過又熱又濕既夏天，踏入清風送爽既秋天，一同準備下個月既UNICEF半馬，齊心去完成「所有人（五人）兩小時完成半馬」目標．然後2011年再一齊挑戰全馬！

距離2010年2月28日雖然不足五個月時間，假如由今日起開始練習，總有所得著吧！

各位加油！

都係時候啦～

2009-10-08T20:12:00.024+08:00

所穿既Mizuno Aero已經使用咗超過半年有多，雖然冇準確地記錄累積使用里數，但若果粗略以練習量計算（約每月100-120公里)，就算平時有另外一對練習鞋交替使用，保守估計大概至少都跑咗350-400公里吧！

而跑鞋跟車軩情況差不多，當跑到一定累積里數後，因為耗損關係，不論表現、保護及避震方面，已經大不如前，冇得拗頸．況且最近兩星期開始，同一距離及節奏下，練習後右腳踝位置明顯感到痛楚，都係時候換上新跑鞋再上路．

(1) Adidas Adizero (HK$380)

原價應該要HK$760，不過喺屋企附近既運動店搵到，加上再有5%會員折扣，實在超值．

三年前已經穿過一對Adizero，當時感覺鞋本身重量輕，物料比較軟，不過底部保護部份唔錯．唯一問題係自己腳板比較闊，穿著時與鞋頭前端位置比較時，會覺得緊咗少少，但若把鞋帶放鬆一啲就勉強ok啦．

尋日第一次試跑(15km)，保護及避震方面，表現唔錯．或者再跑多幾次，到鞋形及腳形再配合，或者會好一點．

評分：7/10

(2) Nike Free Everyday+ (HK$449)

喺觀塘Nike倉發現，原價要HK$749．

其實一直對Nike跑鞋有偏見，總覺得係「價錢貴、得個款，但功能欠奉」，加上之前一啲壞經驗，所以一直未再有買Nike跑鞋既意欲．

後來讀佐治講有關「不正確的跑姿!」時提及光腳跑及Nike Free時，心思思又想試及了解目前跑姿，所以當日見價格便宜就立刻買番一對試試．心諗如果試完唔適合的話，最多轉為行街鞋或日後到健身室時使用．

又，如果往網上尋找有關Nike Free Everyday+ 既用家評語時，會發覺意見都幾極端，鍾意既當然讚啦，唔鍾意既就彈到一文不值．

結果，上星期試跑咗兩次(9km 及 12km)，感覺意外地良好！重量亦可接受．保護方面不俗，特別腳弓位置弧度做得幾好，為該部份提供足夠支持及保護．作為練習用跑鞋，基本上各方面都好實在及平均．另外前端比較闊，與上面 Adizero 比較，穿得更舒服．又可能因為係Nike Free關係，跑步時亦覺得前部份比較「貼」地．所以有時甚至可以感受到用力時既情況，此為穿著其他品牌跑鞋時未曾有既感覺．

相信往後練習時亦會多利用此鞋，只不過略嫌外型線條比較粗，及只得紅色選擇，美中不足．

評分：8/10

我的練習記錄 - 天氣轉涼下試衝9K

2009-09-29T23:49:00.003+08:00

經過一輪整理，的起心肝向目標既里數進發。

雖然星期日晚突然吹起颶風，打風唔成諗住都會有三日雨。結果星期六日練習過後，尋日只好轉到健身室做負載練習去加強雙腿肌肉。今晚趁天色比較穩定，雨停咗立刻換上跑鞋，到平時屋苑旁既小徑繼續練習！

可能天氣明顯轉涼（今晚大概26C），加上覺得最近狀態正在提升，於是就即管試試放開腳步及增加頻繁去跑去衝呢條大約9KM既路線。除開始時首2-3KM覺得有少少過快及呼吸未能配合，而速度有所修正外，其餘過程感覺不俗，最後完成時間比之前有顯著進步。

分段時間如下（1 LAP = 1.8KM）

1 lap 9'04
2 lap 9'00
3 lap 9'05
4 lap 9'11
5 lap 9'18

Total time:45'39

第四、五圈體力開始下降，所以跑得稍為慢少少。不過比較意外係第五圈刻意放慢去跑，時間只比之前四圈慢十秒左右。而第五圈呢個時間，又比之前練習既時間實在。

除增加里數之外，另一個目標希望往後可以45分鐘內完成同一路線（其實只差39秒，再練習多些有信心可以做到！）。

我的練習記錄

2009-09-25T11:39:00.004+08:00

上次提及到既樽頸時間及情況，今個星期開始，決心要做個了斷．

本來平日（主要係星期一、三）係比較短途(7km)既練習及recovery run，反而週末集中長一啲既距離(10-13km)．由今個星期開始，繼續保持一星期四課，而平日既練習距離將增加至9km，週末就打算跑兩課13km (即共26km)，到時就可以做到每週44-45km 總里數．

今朝有少少時間，特地從電子腕表抄下最近幾次既練習記錄．路線係屋苑旁既沿海小徑，來回一程約1.8km．

尋根究底

2009-09-24T12:08:00.002+08:00

最近每個星期三晚既例牌節目，當然唔係跑夜馬，就係『TOP GEAR』．

如果你話鎖尼喎，我唔係車迷，所以我唔睇呢類節目架喎～咁講可能有少少言過其實，但真心講你可能錯失咗一個娛樂性高既電視節目．

一般汽車節目，一味係咁講汽車外型，講數據，往往缺乏提及駕駛既樂趣．

又如果講主持，三位主持性格分明，除咗汽車知識豐富，同時又可以互相擦出火花，為本來只可以好平鋪直序報導既資料，變得生動有趣．而且如果你喜歡英式幽默，一定buy！

有時又會好實驗性咁做一啲天馬行空既比較．．．總之絕對唔會簡單從汽車規格表上抽一句，然後話番你知一公里只係用幾多幾多加侖油，就話呢架車慳油．佢反而仲講俾你知點樣既駕駛習憤及情況，先可以慳油．

人地做車評，佢地都做車評，不過佢地就做到咁: (不過呢次車評唔可以完全作準，呢次擺明show quali俾來信果位觀眾睇!)

惡搞C朗

2009-09-18T15:51:00.001+08:00

得啖笑～

雖然聽唔明佢地講咩，斷估應該係爭緊邊個射罰球勁D！

我的練習紀錄

2009-09-14T12:32:00.002+08:00

今次其實唔係講練習紀錄．

最近不論公事私事，自覺總係已到達咗一個樽頸位置．情形係唔係做得唔好，只不過，發現自己進步既步伐慢咗，想再進步既心態及動力亦鬆懈咗．而練習既情況係，平均時間尚可保持，個別練習更表現不俗．基本上以五十分鐘至五十二分鐘去完成十公里，問題應該不大．

但若果希望可以五十分鐘內完成，就被呢個樽頸感覺令自己無所適從，又甚感氣餒．曾經試過改變練習時間表及頻率，希望增加新鮮感，不過效果暫時不甚顯著．

本來打算利用夏天期間開始循增加里數方面進發（當時約每週四十公里左右，目標係每週五十公里左右），藉此可以打好基礎，等到天氣轉涼時候再加強速度及耐力上既練習．可惜，除咗心態鬆懈之外，八月期間因為感冒關係，練習進度無可避免地受阻，而身體亦感到虛弱．所以往後三星期既練習，亦改為以恢復狀態為目標．

慶幸身體狀態大致已回復之前水平．

另外，每週四十公里既里數已經跑咗差不多六個星期，身體及各部肌肉亦漸漸習慣咗呢個運動量，逐漸變成一個comfort zone．因為里數冇隨時間及練習頻率增加，之前既動力突然彷彿變成今日既阻力，或者咁可以理解為最近樽頸情況既情況．

除咗里數，相信未來兩至三個星期，練習時更需要加強既要點，可能就係決心．自己已經唔係第一年練習及比賽，而不論練習及比賽距離，之前一定嘗試過，完成過．距離今日不過六個月既時候，正正為首個馬拉松全心全意去練習．現在面對既情況，其實非想像中大，只不過要憑自己，再重提之前有過既決心，付諸行動，打破目前呢個局面．

跑步實在係身體及心理既磨練．

繼續移軸

2009-08-28T17:15:00.003+08:00

TGIF，趁星期五放工前，望住畫面加上背景音樂，good!

Tilt Shift Lens Effects

2009-08-16T16:12:00.008+08:00

記得一年前左右從雜誌初次認識及接觸移軸鏡（Tilt Shift Lens）既介紹時，已經對其如小小世界般既畫面構圖及效果非常有興趣．

礙於當時只係啱啱開始用DSLR拍照，預算有限之餘，兼且好多基本功及攝影技術尚幼嫩，理應專注練習好快門及光圈既運用及其他光學既認識，所以移軸鏡方面只係喺心中留下深刻印象，有待日後跟進．

奈何難得遇見心頭好，心思思一直思量如何入手．

後來跟一位有資深拍攝經驗既舊同事請教有關移軸鏡既購買情況及注意事項．舊同事T除咗有攝影專業資格之外，間中亦有作品參與影展，所以意見比較中肯及實在（最近T鍾情黑白相沖印，追求原始既畫質）．T透露一般移軸鏡絕不平宜（新款動輒港幣一萬五千元一支），而且並非任何地方可以購買得到，通常須要到店舖先預訂比較有保障．不過，其實亦可以考慮購買舊款，雖然規格可能比較普通一啲或低一級，而且因為已經停產，只有二手市場一途可以搵得到，但因此價錢亦比較化算（港幣三至四千元一支）．

問題始終係移軸鏡屬於比較專門既鏡頭，而用家普遍惜售，所以貨源一向疏落．後來，經過兩個月喺各大攝影討論區既尋尋覓覓，只係搵到一支．又因為時機問題，物主已經聯絡買家，只好講句緣慳一面，唯有再繼續留意跟進．

有日網友on dog傳來一個網址，竟然係一個可以利用普通相機及鏡頭拍攝既相片，透過網上軟件，模擬移軸鏡效果．

雖然唔係咁公平，用軟件做出來既相片，當然唔可以直接同用移軸鏡拍攝出來既相片比較．不過平心而論，用軟件做出來既效果，其實唔太差，而且操作簡易，只需要控制三個參數，等大約半分鐘左右，一張擬似移軸鏡拍攝既相片就在眼前（雖然因為壓縮問題令畫質失真），兼且軟件屬免費使用，實在值得跟各位拍友介紹試用．

又喜歡拍照既朋友，如有興趣，可以到此處睇下肥龍之前拍攝既照片，大家交流一下．

反網絡暴力宣言

2009-08-12T11:10:00.002+08:00

互聯網是自由媒介，所有網民都享有言論和思想自由，不容干涉。

思想和言論自由，是香港社會的基石。網上網下，我輩都有責任好好維護這個權利。

反對一切防礙網絡自由的行為，包括：

1. 壓制甚至禁止反對意見
2. 利用軟/硬手段，甚至恐嚇，去令反對聲音消失。

本人對網絡暴力行為深表遺憾，故貼此宣言，希望網上的言論自由和人身安全，得到保障。

*****************

說來有點吊詭，生於香港長於香港既肥龍，一直覺得言論自由就如空氣一樣，與生俱來之餘又係重要既資源，從來未諗過沒有言論自由甚至言論受控制既日子係如何渡過。

而作為BLOGGER使用者，一直享用供應商提供既平台，暢所欲言，與網上不知姓名不知身份既各路人馬分享生活點滴，互相請教發問，就不同意見討論。

所以，對肥龍而言，言論自由不單止係一種要求，更視為一項重要資源，更應珍惜。

因此，當見有人有意識地，故意地去影響言論自由時，肥龍就會義不容辭站出來表態！

我等著你回來．．．

2009-08-09T09:44:00.001+08:00

第二階段練習：質與量的提升

2009-07-23T15:41:00.004+08:00

自從開始跑步後，生活習慣變得愈來有規律．

基本上一星期已安排三／四天跑步練習，兩天做器械鍛鍊及最後兩天休息．

肥龍為凡人一名、工作之外，尚有俗務纏身，需要休息之餘亦要認真處理各樣事項，每星期如是．

經過三個多月既練習，主要在於保持練習量（最初每星期二十至二十五公里，到近期約每星期四十公里）及改善步幅，初步已見成效．不論均速及耐力上都有實在既提升及改變．而至目前為止，十公里時間為五十分鐘左右（大概為全速85%左右）．相比一年多前既十公里自己最佳時間（五十四分鐘），呢個時間可以算為中規中矩．相信往後當氣溫漸漸涼快後，可以有更明顯既進步．而最終時間目標，暫時打算可以達到四十八分鐘線．．．．甚至以下．

另外，參考網友佐治既練習方式，喺平時既跑步練習中，加入recovery run，令可以保持里數之同時，亦可以令雙腿可以作輕度休息，非常有幫助．

至於減磅既安排，其實期間體重變動不大，大概只輕咗兩三磅，或者可以解釋成身體愈來愈扎實．如果要有明顯減磅的話，相信要再落不少功夫．但可以肯定既係，肚腩已經比之前消減咗不少．

踏入八月份，練習量將會一步一步咁增加，每星期練習總里數將會增加至每星期五十公里．而器械鍛鍊方面，不論負載及次數上亦同時會增加，希望有更強健既體魄去迎接增加中既運動量．

目光，暫時就放喺十月底十一月初既賽事上．

******************
星期一：器械練習＋5km (@5:45/k) (recovery run)
星期二：休息
星期三：9km (@5:00/k)
星期四：器械練習
星期五：休息
星期六：13km (@5:30/k) + 游泳
星期日：13km (@5:10/k)
******************

EAG

2009-07-08T09:58:00.006+08:00

最近收到有關2009東亞運動會義工計劃委派崗位通知．

＊＊＊＊＊＊＊＊＊

親愛的肥龍：

香港賽馬會2009東亞運動會義工計劃委派崗位通知　

多謝您成為「香港賽馬會2009東亞運動會義工計劃」的義工領袖／義工。根據每個崗位所需的義工人數及相關技能要求，我們將委任您擔任以下的崗位：崗位：活動及典禮　

獲委任以上服務崗位的義工領袖／義工，將獲電郵通知出席相關服務的專題培訓課程，讓義工更能掌握相關服務崗位的知識及技巧，並加深對服務情況的了解。

義工必須完成專題培訓方能參與服務，敬請預留時間出席。　

如有任何查詢，歡迎於辦公時間內 (星期一至五，上午九時至下午六時)致電2200 5720 與本計劃辦事處職員聯絡。

香港賽馬會2009東亞運動會義工計劃　
2009年7月6日

＊＊＊＊＊＊＊＊

經過幾個月前第一階段既基礎訓練後，最近終於收到有關服務崗位既通知．感覺到舉行日期愈來愈接近．

實際上做啲咩野及咩項目其實都未太清楚．

但正如面試時對評審員講肥龍今次決定參加呢次義工既原因，主要係因為自己平時參加長跑比賽時，不論喺比賽前、後及期間，其實一直得到各方義工提供支援及打氣，非常感動．咁如果有機會對調身份，可以為比賽選手及來之各方既來賓服務，亦可睇成一種回饋吧！

另外，對於有機會參與呢類大型運動會既機會其實並唔太多，難得今次喺香港舉辦，抱住見識及開眼界既心態去迎接，及認識唔同背景既朋友及義工，應該都會係一個唔錯既經驗吧！

好快就會進入第二階段既專題培訓課程，到時再留意會係咩項目都未遲～期待！

肥龍只係業餘跑者，雖然只係進行好基本既練習，已經需要唔少時間及心理上既堅持．對於全職運動員及比賽代表，背後所付出既一切，及經年累月既練習（包括受傷），可想而知！

所以不論係呢次運動及比賽項目，希望大家都可以留意及支持一下啦！

跑步。游水。再跑步

2009-07-03T21:32:00.006+08:00

天氣實在太熱，不過練習再進步既心更熾熱！

最近除咗練跑（約每週30／40公里）之外，亦加插一週兩次既舉鐵及腳部肌肉練習。而INTERVAL就主要跑4KM，時間約為19分鐘左右，跟之前定下既一公里INTERVAL時間（每公里4分鐘45秒）差不多。

之後既重點係，如何保持呢個速度，增強耐力，可以愈跑愈遠。

關於增強耐力既方法，藉天氣愈熱及練習路線安排下，最近跟好友興之所至，喺去程及回程之間，跳入大海游水兼作輕鬆休息。

剛過去既7月1日早上，天色出奇地藍，而海水更前所未有地清澈。當喺海中暢游時，除咗可以見到海底之外，有時更有一小群小魚喺身邊擦過，此情此境，仲以為自己身處PITTAYA／SABAH海灘，樂不可支！

「跑步。游水。再跑步。」每次跑到身水身汗然後跳入大海，或游水完畢再用凍水沖身，再穿上跑鞋上路跑步既感覺，實在清新、涼快。

退役

2009-07-02T20:13:00.004+08:00

不認不認還須認，初代機通常都係白老鼠，註定成為過渡既實驗品．

當日都唔理細硬盤容量，7"螢光幕，仲要只係行Linux（其實用過後仲覺得好用，起碼唔會成日左裝右裝軟件及driver有問題～），一出場立刻據為己有！

只為一個簡單不過既理由：便攜性．

因為便攜性，每次到外地旅遊及出差，總會留守喺身邊，形影不離，非常好用又幫手．

只不過．．．估唔到相處只有18個月，今日．．．「你」終於支持唔住．．．到咗退役既時候.

再見啦Eee PC 701!

另外，更唔捨得既．．．係有機面上既蒔絵貼紙呀！

好幫手：沒扣針的選擇

2009-06-28T12:27:00.003+08:00

有冇其他跑手同肥龍一樣，覺得將號碼布用扣針扣落件上衣時，會令原來無穿無爛既上衣無端端多咗幾個針窿，好唔靚呢？

又．．．
有冇其他跑手同肥龍一樣，鍾意將每次比賽完後既號碼布好好保存．奈何比賽期間，號碼布針孔位居與扣針經過一段時間磨擦，令號碼布有破碎呢？

另外．．．
有冇其他跑手同肥龍一樣，試過比賽期間扣針鬆開，更被扣針拮親呢？

咁．．．
其實有冇方法可以一次過解決以上情況呢？

登．登．登．登～～～～～

好駛好用，按照指示，對啱位一啪就攪掂！

一盒600 YEN就有十粒．而肥龍就買咗兩盒然後同四個朋友分咗佢，每人四粒．

上次東京馬拉松第一次試用，當然唔會有針拮．而且就算號碼布比較薄，都冇因為濕咗而破爛～　誠意推介！

最後，仲有．．．

一個可以令呢件物件變得獨一無二既方法！

肥龍上次參加東京馬拉松，喺等候起步時候，就留意到身旁果位哥仔將自己一家四口既容貌，打印成相同大細，然後逐一貼上表面！

好sweet啫～

I'll be back!

2009-06-27T09:05:00.007+08:00

現場既氣氛，接受沿途兩旁一百二十六萬觀眾打氣既誘惑．．．．就好似昨日既畫面及感受．．．

另外仲有當地既美食．．．

實在回味無窮呀！

雖然咁講，不過今年應該去唔成啦．因為賽期好大機會會同渣馬撞期，而渣馬始終都係每年必跑既比賽，主場嘛～

東京馬拉松，後會有期啦！I'll be back!

＝＝＝＝＝＝＝＝＝＝＝＝＝＝＝＝＝＝＝＝

Tokyo Marathon 2010

Events 1) Marathon 2) 10km Race
Date & Time Sunday, February 28, 2010

Course Marathon: Marathon: Tokyo Metropolitan Government building -- Iidabashi -- Imperial Palace -- Hibiya -- Shinagawa -- Ginza -- Nihombashi -- Asakusa Kaminari-mon -- Tsukiji -- Ariake (Toyosu) -- Tokyo Big Sight
10km Race:Tokyo Metropolitan Government building-- Iidabashi -- Imperial Palace -- Hibiya Park

Competition Rules The races are conducted in accordance with the rules and regulations of the JAAF and Race Organizer.
Time Limit Marathon : 7 hours
10km Race : 1 hour 40 minutes

Maximum number of entrants Marathon : 32,000 runners
10km Race 3,000 runners

Qualifications

1)Marathon: Must be at least 19 years of age on the race day

2) 10km Race: Must be at least 16 years of age on the race day

Entry Fee Marathon : Domestic 10000 Yen (from overseas:12000 Yen)
10km Race : Domestic 5000 Yen (from overseas:6000 Yen)

Application

1) Procedure
Through Internet
2) Application Period
From August 1, 2009 to August 31, 2009
3) Screening
In case the number of applicants exceeds the prescribed number, entrants will be decided by a lottery.

歡喜若狂

2009-06-23T23:30:00.003+08:00

近期其中一個好鍾意既廣告。

一個簡單既觀察，再運用一個恰到好處既對比表達。

內裡角色果種開心法，一下子與收看觀眾輕易連接起黎，訊息不言而諭。

大家又會為甚麼而歡喜若狂呢？

Cup of tea

2009-06-21T13:09:00.006+08:00

【My Sassy Girl】雖然已經睇過N次，不過都仲係一次又一次坐定定。故事當然好睇，車太弘都做得好好，不過肥龍目光始終停留喺全智賢上。

肥龍都明白搵突破係好既，不過只此一套又真係令粉絲失望囉。如果全小姐可以好似MEG RYAN咁索性成為愛情片女王的話，一套一套愛情片咁拍落去，肥龍呢類電車可能會一直追落去架。

總好過今次呢套，睇完TRAILER已經決定慳番。小夜。。。打打殺殺。。水手裝。。。殭屍。。。嗯，真係唔係肥龍果杯茶。

又喺一本雜誌既訪問中知道，原來全小姐出道十年都只係拍咗八套電影，可以算做唔多產。

咁。。。不如拍廣告啦～

最近又留意到電視廣告。LAST SHOT回眸果一下。。。收到！

不過。。。洗頭水肥龍鍾意用「霸王」喎！

再聚

2009-06-12T10:07:00.005+08:00

經過沙士，面對金融海嘯，又有最近既豬流感．

雖然仲差兩年先夠十年，不過可以一班舊同事兼上司（依家已經係朋友），每年（今年已經係第八年）都以相同理由出黎聚一聚，實屬難得．

又每次聚會，總會有一啲特別安排，令聚會留下回憶既註腳．

今年，將會食西餐，有人提議每人攜帶一支二百元以下既紅酒／白酒（佳釀？），然後席間逐一淺嘗，最後由廚神（肥龍前上司）選出今晚大家最喜愛既一支．

而肥龍所準備既就係呢一支．

最後都係一句：盡慶之餘，願友誼永固，各人身體健康！

多心惹事

2009-06-08T17:49:00.006+08:00

都係多心惹事．

最近一有空閒就積極去做健身，並增加練習距離及強度（每星期三課及總30公里以上）．希望多管齊下，可以加快減磅既成效．

又，如果時間容許的話，更希望可以加插其他運動作輕鬆活動，一方面可以保持運動量，另一方面可以令慣常用既肌肉得到休息，聽落都幾順理成章吖．

問題係，最近一年多都主要以跑步為主（>90%），間中都只係會去游下水或行山．又因為自覺平日已經都放咗唔少時間去做（單一）運動，自以為是地覺得自己“應該”好fit．問題係如果突然用唔係慣常既肌肉做運動的話，結果又會唔會所想一樣呢？

上星期三跟同事打羽毛球後，為此問題提供一個好好既答案．結果係．．．除咗跑步慣常用既肌肉之外，其他肌肉（手、腳）一侓非常痠痛！

同時，由於發生咗呢個情況（肌肉痠痛），其後既星期四及五身體痠痛疲累不堪．更令本來既練習時間表一下子被打亂咗！原來時間表係逢星期一、三及日做健身，星期二、四及六作跑步練習．

就算等到星期六既跑步練習，體能尚未完全恢復，及因為天氣炎熱關係（雖然只係早上8:30，不過陽光實在太猛烈），最終只跑咗7.5公里後，跟同伴決定停步終止練習．

終止後心中有結，有種半途而廢既感覺．而且身體感覺到如果當時堅持去跑的話，其實．．．其實可以完成呀．

有時，決心就係咁備受考驗．一念之間，好易輕易放棄．

練習之所以重要，除咗因為練習令表現提升及達成目標等好經驗之外；練習亦容許過程中失誤、放棄、面對逆境、身心疲累等等．呢啲所謂“壞”經驗，其實．．．比好經驗更加珍貴，更加能令自己喺往後既練習或比賽時，發揮水準．每當遇到逆境情況時，回想練習時既“壞”經驗，即時選擇合適既策略及相應方法，注入信心，並完成目標．

講番練習情況．結果，尋日（星期日）決定再跑一次，目標係10公里．並嘗試用比較輕鬆既均速去跑（每公里5分鐘20秒，約全速既80%至85%）．之前喺健身室既speedwork練習果然有幫助，最後用53分鐘20秒完成呢次練習，而且身體狀態除咗最後1公里有些少辛苦，大部份時間尚算不俗．同時更令今個星期總練習距離達到30公里之預期目標.

(4.47 | 4.54 | 5.13 | 5.36 | 5.20 | 5.41 | 5.25 | 5.19 | 5.52 | 5.13)

希望借呢次練習時既感覺成為記憶，並記錄喺身體肌肉入面．喺適當時候，可以大派用場．

下一步就會係喺speedwork練習同時，喺未來三個月間，逐步將練習距離升至長課距離（星期六／日一課25公里）．

我的練習記錄: SPEEDWORK 啟動！

2009-05-28T23:01:00.003+08:00

近日天氣非常唔穩定（唔到你唔信，真係次次約好時間先黎落雨，好難觸摸～不過練習點會咁易就受影響呢？），而原定練習場地（香港仔運動場）正進行跑道維修，只好轉場到健身室，開始進行INTERVAL 練習。

原本目標時間為每次每圈（四百米）時間為兩分鐘七秒，即每公里五分鐘十六秒，並跑共六次。跑機當然唔可以跟實質路面練習比較，索性為自己定下更進取既時間，就用每公里四分鐘四十五秒去跑，等遲啲天氣穩定返時到路面有更好既基礎再去練習啦！

由上星期開始到今日（五月二十八日），一共練習咗三次。由第一次（只能完成首五段，第六段唔可以喺指定時間完成），到今日已經可以完成全部六段練習。而且身體回饋既訊息都好正面，感覺到...應該仲可以再跑快／長少少。不過其實呢兩樣（再快／長）暫時黎講都係次要，都係專心啲，集中先令身體習慣目前目標時間（每公里四分鐘四十五秒），再逐步去提升啦！

另外既然身處健身室，當然唔會缺少針對性既肌肉鍛鍊。依家既安排係，先做約二十五分鐘既器械練習（約6至7組），然後進行上面所講既interval練習（約五十分鐘），再做另一輪亦係最後二十五分鐘既器械練習。

除咗希望有關肌肉可以更強壯及有力，更希望可以藉運動量增加同時，可以收減磅之效。

目標（PB）係：
10KM： 48 mins
半馬： 1 hr 45 mins
全馬：3 hr 45 mins

至於體重，目標就係兩個月內可以減到五磅左右，然後再作打算。

不要將手機扣在皮帶上!

2009-05-25T19:04:00.003+08:00

收到！

《廣州市公務員禮儀手冊》

減磅

2009-05-20T10:15:00.002+08:00

經過一星期密集式既飯局及宴會，令本來已經拜拜咗豬腩肉，喺呢兩三日，似蠢蠢欲動又想重出江湖，連同行練習既好友G亦不禁笑住口話「真係好快呀～」．

羅馬非一日建成，但係豬腩絕對可以兩三日煉成！

食果陣時大魚大肉，不亦樂乎．可惜現實真係好殘酷！如果要跑步，身重一定比身輕跑得辛苦．而且最近天氣已經明顯轉熱，就算晚間進行練習，氣溫隨時都有27-28度．只不過係平日慣常既練習距離及時間，經已唔易應付．

仲有，再係咁落去，之前買落既背心就著唔落架啦．

慶幸係經過一段時間既練習後，身體受外在因素影響既情況正在改善，暫時尚可以保持原來90%既表現，只係跑得辛苦咗啲．嗯．．．都唔知要額外跑多幾公里，先可以變回之前既身體狀態呀．

如果要回復並要再進一步，相信要再「的」起心肝，喺練習既同時，認真留意一下飲食．

我要減磅！

One summer's day

2009-05-16T11:00:00.004+08:00

實在好怕放低咗又要重新練習既感覺，自從去年夏天開始起，就算未有比賽既日子，都一直保持練習去保持狀態．

又或者，跑步已經成為生活上既習慣，唔跑唔舒服．而且因為持續去跑步關係，身體及各方面都比以前健康及有規律，實在意想不到．

上一篇提到既超級馬拉松人DEAN JARNAZES，有人問佢，跑步時，最享受既究竟係「咩野」呢？佢老哥竟然答係「痛楚」！

就算肥龍鍾意捱，斷估都未會有此位老哥咁瘋狂，將痛楚睇成享受～！如果真係講跑步時最享受既地方，肥龍就肯定會話係中途及完成後出一身汗既感覺．

而且特別係喺夏天，有時都唔知咩事，肥龍總係專揀啲酷熱天氣警報既日子，穿上跑鞋，向著離家冇幾遠既淺水灣跑呀跑（係咪好痴線呢～）！天氣雖熱，但當見到藍天無雲又旁邊一片大海時，真係跑緊咩都唔記得哂啦！

炎熱既夏天，有時覺得特別寧靜，靜到可以聽到風聲、船既摩打聲、鳥既叫聲、海既浪聲．．．仲有自己既呼吸聲及腳步聲！

呢種感覺．．．．嗯，真係好爽！

今年夏天只係啱啱開始，肥龍已經急不及待，想搵次跑到淺水灣沙灘，然後剝哂衫褲剝哂鞋（well....仲有泳褲），跳落海去游水囉！Hohoho～

距離比賽季節尚有大半年時間，除咗保持一星期練習三課，跑步有時都要講下輕鬆，講下新鮮感既．．．最近因為搬家關係，令之前既練習亦因而有所改變．

而最近就搵咗兩條新路線，希望將來可以多利用及練習！

Length: Approx. 7.5km
Finish time: 37 min 54 seconds

Length: Approx. 6.5km
Finish time: 33 min 45 seconds

點解要跑呢？（2009年5月10日更新）

2009-05-10T12:06:00.002+08:00

雖然肥龍最近（特別係近大半年）成日喺呢度成日均速前均速後，講到速度或時間就似係一直練習既目標，而且對完成時間好關注及重視！

咁，或者係一種錯覺吧．

點解要跑呢？同埋為咩去跑呢？答案其實始終如一．

雖然肥龍自己要求都幾高，不過重看約三年前既呢一篇，再留意自己最初跑步既原因及喜歡跑步既理由，到今天其實依然冇變．但係，唔可以否認既係，依家跑步既質素，比最初既時候，的確專業多咗，認真多咗及目標大咗．不過，無論情況是否專業認真或大小，肥龍跑步既目標，一直都係鎖定喺決定咗做一件事就要貫徹始終既精神上．而喺呢個過程入面，需要制訂目標，進行反覆練習，當中又會出發唔同幅度進步及提升．可以話成績及結果絕對係汗水加堅持既產品.

如果答案係咁，咁點解仲係要提及均速既練習呢？呢個問題冇幾耐先同好友傾過，大家得出既結論係當年紀去到某一程度時，速度或者已經變成一種奢侈及次要，而且亦唔可能無止境愈跑愈快．咁喺呢個情況出現之前，喺能力及身體狀況可以支持既情況下，加上適當既練習量，大家都想試下自己究竟可以跑得幾快，及可以再快多少．而呢個過程，可以睇為如何評估自己既極限．

呢種可見既提升感覺，非常良好，同時亦為下一次練習注入動力．

另外，更現實既考慮係，如果真係打算參加一部份需要提交比賽成績去確認比賽資格既比賽時，就別無他法，只好拼命練習去達到要求啦．

而且，撇除貫徹始終既精神及比賽資格，肥龍又特別鍾意感受比賽時既氣氛，更希望可以到（世界）唔同地方，旅遊之餘，更可以運用雙腿去認識世界及了解各地既文化．

Happy running，無論何時何地，由起點一直跑到終點，完成比賽，就會係比賽既目標．至於完成時間嘛，只要用合適既速度去完成就可以啦～

喺有生之年，多得家人支持及諒解，可以做自己開心既事，而且可以健健康康去做，係一件好滿足又幸福既事．

而肥龍自知貪心又心多多，不過生活上既平衡亦好重要！不要為一件事而忽略其他人及事，所以學習分配亦係練習時既目標．

（2009年5月10日更新）

最近睇過一篇有關電影【ULTRAMARATHON】既訪問，導演J.B. BENNA希望成立JOURNEYFILM並拍攝多套有關跑步既紀錄片，完全係因為想鼓勵地球人熱愛身邊既大自然及活得戶外一點，總好過經常留喺室內流連。

「愛上跑步，並有興趣參加世界各地既比賽，不但令你體會跑步既快樂，更令你有更多機會去睇到世界唔同既地方。希望透過我既電影及DEAN JARNAZES，令更多人愛上跑步，過著簡單直接既生活及保持健康！」(from Milk Magazine, Issue 407)

Initial D 4th Stage

2009-05-09T12:48:00.005+08:00

真係睇極都覺得咁好睇！

如果單純以為只係一套賽車卡通而走漏眼，快啲搵返套黎睇啦！特別係第四輯（電視已經做到第十九集），對車手心態及比賽部署既描寫，寫得好細緻呀～

誠意（電車與非電車）推介呀!

而呢個Extreme Stage既開場做得好好呀！

計於立夏

2009-05-06T10:11:00.006+08:00

雖然有人話一年之計在於春，而計劃及準備亦係目標既一部份．不過．．．跑步計劃呢．．．通常習慣將渣馬定為每年最重點及壓軸既賽事，所以新一季大都定喺渣馬之後，又由夏季開始．

尋日立夏，咁喺未來炎熱既夏天來臨之前，雖然早咗少少，而且仲有差不多半年時間，不過其實跑下講下，時間唔等人，好快話咁快就係到啦．

打算寫低今年度將會參加既比賽，令自己可以更專心去準備．

如果有留意右手面肥龍完成既比賽，由最初2006年開始只跑渣打半馬，到後來因為想以戰養戰及更想參與本地比賽，同埋想試下跑下唔同路線，咁就開始跑埋其他比賽！不過因為體力上既考慮，除咗渣馬，其他大部份都係以十五公里以下為主．

而2008年就跑咗兩個半馬（Mizuno及渣馬），今年再接再厲，除咗其餘比賽，希望可以跑夠三個半馬．至於全馬，會細心留意下其他地方賽事，又或者直接渣打跑全馬啦！

目標比賽如下：
1. 黃金海岸15km賽
2. Nike 10km賽
3. UNCEF迪士尼半馬拉松 (前年跑過10km，半馬拉松第一次參加！)
4. 香港15km挑戰賽
5. Mizuno半馬拉松
6. 渣打半馬拉松／馬拉松（到報名時再決定！）

如果時間許可既話，自己都好想似舊年一樣可以到外地跑一個馬拉松．不過地點及時間暫時未有頭緒及傾向（最理想係渣打比賽之後．因為經過大半年練習及幾個比賽，到時狀態應該係最好．又，本來打算想參加十二月頭新加坡馬拉松，不過日期上似乎唔係咁配合，都係唔去得），遲啲再慢慢搵．

我的練習記錄(SEASON 2): SPEEDWORK

2009-05-04T21:57:00.005+08:00

想達標就要付出。要得到某種東西，就必須付出同等代價。

今年既目標係將半馬全馬及時間定為一小時四十五分鐘及三小時四十五分鐘。咁如果要達到呢個成績水平，均速就要提升至每公里五分鐘十五秒左右。

要完成呢個時間，單靠如過往長距離既練習已經唔足夠，必須引入其他練習，並藉以提高肌肉強度及帶氧運動量，方可達成。

依家肥龍大概每星期跑三次，平均共跑三十公里左右，均速約為每公里五分鐘三十秒。

天氣開始回暖及轉熱，要保持相同運動量唔容易。而趁呢個情況，不如喺未來四個月加穿插SPEEDWORK練習，希望可以提高練習新鮮感，更希望令成績再有明顯進步。

喺呢度，藉此寫低SPEEDWORK目標，方便練習一段時間後再評估結果。

- 快跑一公里（共六次）
- 每次每圈（四百米）時間為兩分鐘七秒，即每公里五分鐘十六秒
- 每公里中間，慢跑約四百米作為休息，然後再進行下一輪快跑
- 完成六次一公里練習後，再安排兩次二百米衝刺，之間慢跑二百米作為休息
- 每次總練習距離為九點二公里

半桶水

2009-05-04T19:00:00.017+08:00

睇電影【葉問】，其中有一段講到葉問經友人提到每人各有使命，因此向好友工廠既工人教授詠春拳以自保，免於土匪再打擾。後來，土匪真係再次來騷擾。今次，工廠各人因為經過習武一段時間，信心大增，真係架起對抗之勢，準備與土匪一拼。

結果，比第一次默不作聲，今次打土匪不成，更被打到頭破血流！

肥龍想講既唔係甚麼應該忍氣吞聲，甚麼留得青山在。相反，如果道理喺己方，更應據理力爭，向對方說「不」。欺善怕惡、恃強凌弱，對肥龍黎講，從來只係弱者所為。

不過肥龍覺得，一個本來唔識功夫又從來唔習武既人，走去學功夫打功夫，甚至黎自衛，有時學得半桶水，又或者唔識評估情況的話，後果可能仲「大鑊」。

再走到現實中，呢種情況，更加每日每刻在發生。武術半桶水可能只會傷及自己，知識半桶水可能誤導他人。

一個人知識半桶水其實冇問題，因為學習從來都係持續性，又會因為時間、環境及其他因素，而逐漸成長、經驗累積及沈澱。重點係發言前知道自己當時位置係邊度，同講緊咩。

錯估形勢，一支半解，又或者只係瞎子摸象，對己對人，影響/損失可能更大更痛。可能有人話人人有權發言，why so serious? 問題在於發言及聆聽兩方。

經常警惕自己，對於知識，應該虛心學習，對自己所知抱有懷疑，不作（疑似）專家，說話更應有根有據。而喺批評及比較之前，定應對所提及有充分了解，先可以作評論。

Onwards

2009-05-03T15:16:00.003+08:00

講既，大概係作畫者自己跑步既經驗。

不過，對自己，又何嘗不是呢？

披星戴月咁去練習，途中又遇到天氣所影響，雖然有時只得一人，只要堅持不回頭望，一直往前跑就可以啦～

(特別係組熱身動作。。。我覺得作畫者應該有跑開步!)

尋找合適自己既既均速

2009-05-02T10:20:00.010+08:00

喺跑步練習方面，除非只係跑一百幾十米，只講求短時間既爆炸力。但當要考慮到要跑五公里、十公里甚至更長距離時，爆炸力就變得次要，相反耐力及均速既保持更顯得重要。

均速有幾重要？或者肥龍之前呢一篇『天才白癡線』可以有更實在既例子。It's all about the steady pace!

因此，若要跑得更快，均速既提升不可避免。而且了解自己既均速除咗係表現既指標外，更加係評估唔同練習及比賽完成時間既重要數據。

至於點樣量度均速？其實好簡單，只要知道練習距離及完成時間就可以。不過，隨練習既質素提高，對均速既定義亦隨之而更細緻，咁又會開始計算LAP TIME（所指未必一定係運動場每圈時間，主要係指重複同一距離下既完成時間），咁一隻可以記錄LAP TIME既計時器就唔少得啦。

到知道自己既均速後，就可以著手評估完成時間及提升既方向。

從過往既比賽中，肥龍得出自己既均速約為每公里五分鐘三十秒左右。而呢個均速，大概可以跑三十公里左右（當然，路線只有普通既上斜難度）。而三十公里後既均速，由於體力下降，大致跌至約每公里六分鐘三十秒。

肥龍今年既目標係將均速提升至每公里五分鐘十五秒左，並可以保持至全馬距離。如以此表現，半馬全馬及時間為一小時四十五分鐘及三小時四十五分鐘。

喺網上有各別工具協助跑者計算均速（仲有呢個，可以根據情況及跑步策略，定下前後段時間），非常方便實用。又見喺The RUNNER'S WORLD有一篇就初跑者提供不少方法，值得參考。

Confusion

2009-04-29T21:49:00.005+08:00

如果喺未開始之前，同你講其實可以用同一方法，完成圖中兩款RUBIKS，你會覺得可能嗎？

當分辨兩者間相同(3x3)與不同(顏色、高度及位置)既特徵變得模糊時，會覺得手足無措嗎？

New Gear

2009-04-27T23:09:00.007+08:00

上次提及既頸膊痛已經超過一星期，期間各位慰問及提供有關減輕痛楚方案（特別係CM兄），實在令肥龍感激不已。

經過一段時間休息及接受按摩後，頸膊情況基本上已經完全復原。不過當呢邊OK之時，果股唔跑唔舒服既感覺，又再發作～

雙腳已經蠢蠢欲動，急不及待立即重回練習路線上再次出發。

既然好友H有特別折扣，今晚就特別添加一套新運動服（呢啲係咩既理由呢！？），準備為明晚復操時可以穿得整整齊齊，醒醒目目咁去跑一轉！

芒果就唔係啦。。。another OJ is coming to town!~

（原來不知不覺間，竟然可以著細一個碼。。。）

跑道

2009-04-26T23:00:00.004+08:00

「究竟呢度同我自己，係咪只有跑步一樣野寫／講呢？」

最近肥龍正思考緊一個關乎呢個BLOG既問題，同時又再重睇自己呢一篇。

發現雖相隔一年有多，原來曾為馬拉松所做既準備及心中想法，依然不變．當然，從最近一年起，跑步已經由最初希望保持身體健康、減肥既一項運動，逐漸轉變成依家生活上既一種習慣，果種唔跑唔舒服既感覺，甚或講成「三日不跑步，頓感生活乏味」一樣!

同時正因如此，每星期付出既時間，亦相應在提高。

既然要趕客，一於做得徹徹底底，繼續講跑步。不過，呢篇想講既「跑道」同上一篇所講既跑「道」不盡相同。

不曾有過「愈跑愈快」既想法，而之前有篇亦有講過「跑」其實並無快與慢之分，跟大部份喺路面上既跑者一樣，肥龍都只為自己而「跑」，只與更好狀態既自己去比較。有時跑到一個地步，情況就如有兩個自己正在比賽，又有時正在尋找上一次跑得舒暢時既感覺。

又，自己既性格及處事手法，透過馬拉松，有著更深了解及反省既機會．可能係就算係做運動，所思所想都係性格既投射及延續吧～　對於自己要走既路，自己有一個慣性，就係對熟悉既跑道練習到一個程度及次數後，就會蠢蠢欲動又心思思去尋找另一新路線，情況就如把之前喺某一路線練習時既基礎一夜間完全拋棄，並走到新路線既起點，重新再起步。

(photo: official Tokyo Marathon 2009)

夢？

2009-04-25T08:49:00.006+08:00

Some things require faith, can't be bought...

心知路途依然遙遠，希望有朝一日，可以在那處地平線上走！

頸膊痛

2009-04-20T10:35:00.002+08:00

都怪上星期懶勇猛，一連兩晚捱更抵夜睇歐聯比賽，再加上可能坐姿麻麻兼虛火上升，結果由上星期五開始，頸膊痛到不得了．就算星期六早上既跑步練習亦被迫暫停一次．

後來雖然已經用咗藥貼及按摩噐，情況亦些微好轉及（短暫）舒緩．不過瞓覺時打側瞓時，頸背兩旁亦有隱隱作痛，好彩係冇咩影響到睡眠質素，尚可以一覺瞓到天光．

而到咗今朝，頸膊依然傳來陣陣痠痛，工作時非常唔方便．

咁如果可以的話，儘量都唔想服用止痛藥．

其實．．．我想問既係，除咗藥貼及按摩噐，有冇咩其他好方法可以試下呢？

關於「跑」，我其實想講．．．

2009-04-09T12:23:00.003+08:00

跟朋友講開跑步既經驗，講到點解無論咩比賽，都一直堅持去「跑」，一步都唔「行」既原因．

原因好簡單，就係因為討厭半途而廢．

而且大部份情況下，由「跑」轉到「行」既理由，心理原因居多．

「跑」其實並無快與慢之分，大部份喺路面上既跑者，通常只為自己而「跑」，而快與慢，又只有自己最清楚．

許可的話，其實可以放慢腳步些少，調節一下步伐，完成餘下部份．

可能有人話，「行」一段，等身體慢慢休息，然後可以再「跑」過．視乎距離，不過，決定由「跑」轉到「行」既時候開始，呢個「跑」與「行」既周期，或者會變得愈來愈頻密，更可能成為習憤．

跑五公里時，覺得十公里好長，二十公里、四十公里更加遙不可及．但當跑到十公里時，回望五公里，又會有甚麼想法呢？

未跑過，通常唔知可唔可以跑得到．

遇到困難、逆境，太易放棄，唔好玩．而且，唔似跑步，唔係任何事情都可以「跑」一段，「行」一段，又再「跑」一段．有時機會可能只此一次，又或者，下一次要等上一年或好幾年，要持續去做，到時可能需要更大更強既堅持．

呢個就係我既「跑道」．

東京馬拉松見聞（四）

2009-04-05T12:41:00.007+08:00

Everyone is No. 1~

歌仔都有得唱。不過，比賽第一從來只有一個，況且每一個參加者可能各有各自參加比賽既目的。所謂「第一」既感覺，比較貼近既想法，或者應該係對比賽既重視及獲得其他人尊重吧。

衝過終點既一刻，代表比賽既完結。同時，不論多與少，代表過往付出既時間及努力，加上比賽間既專注，到一刻得以完成。

以數量計，肥龍過往參加過不多不少既比賽。通常，喺比賽途中，特別係比賽尾段，從沿途支持者及工作人員既支援聲，從不間斷，更令比賽充滿氣氛，又令跑手注入比賽動力。今次，東京馬拉松令肥龍有更深既體會。上一篇已經講過，從沿途既支援聲如何令肥龍熱血沸騰（實不相瞞，肥龍真係曾經因為沿途既支援聲感動得雙眼通紅～）。不過，衝過終點後一幕幕既畫面，及工作人員對所有完成比賽既跑手既尊重，更令今次經驗劃上完好既句號。

其實，喺最後四至五百米既時候，肥龍身旁附近一直都有幾位正一樣趕衝刺既跑手，果時，心態及目標好簡單，就係盡情享受及完成眼前最後一段既路段。體能上，每一步一樣疲累，心態上，卻一步比一步來得輕盈，又愈來愈激動！

肥龍雙手振臂一呼，衝過終點，感覺非常美妙！同樣地，身旁既跑手做著差不多既動作。大家四眼交投，臉上流露滿足神情，更互相握手道賀！另身旁有位跑手完成後，回身臉向終點躬身，表示完成及感謝。更有不少與同為完成比賽既朋友互相擁抱高呼！喺呢一刻，各人正用自己既方式去為完成比賽而慶祝。

通過終點後既一段路，工作人員正為每一位完成者遞上毛巾、食品，並解除比賽時間晶片。雖然簡單，卻又意義重大，大會就為每一位完成者準備及為掛上刻有完成比賽日期既獎牌，為每個完成者留念。雖然參加並完成比賽既參加者為數不少，可是，每一位工作人員既態度及表情卻非千篇一律，更不斷向完成者道賀及鼓掌！就算語言不通，亦可以感到充滿人情味及尊重。

而呢遍聲響，更完全充滿最後取回個人物品既地方，道賀聲及鼓掌聲，此起彼落。

喺果一刻，肥龍覺得自己就（似）係比賽既No. 1，樂在其中！

櫻花

2009-04-03T12:34:00.001+08:00

DSC_0299
原由 FD @ Aberdeen 上載

記得喺比賽後既第一個早上、亦係今次旅途既最後一日，從新宿坐火車到上野恩賜公園，睇第一次櫻花．

一個人感覺好自在、好悠閒．一面從熱鬧既比賽中後慢慢恢復，一面拿著咖啡，一步一步從遠到近，欣賞櫻花盛開．

可能因為之前一日整日都落雨，頭頂既天空，藍得不可再藍．

東京馬拉松見聞（三）

2009-04-01T21:56:00.002+08:00

終於都寫到入正題，講番馬拉松當日既情況．無可否認，肥龍對日本有份濃厚既情意結，唔知可以點解釋，總之就係（好）鍾意去啦．而今次可以喺一個自己好鍾意既地方跑第一個馬拉松，心情既唔真實，卻又興奮，又緊張．有幾緊張？相信講出黎都未必有人信．記得比賽之前一晚，吃過晚飯後，九點幾已經回到酒店房內，開始逐一收拾比賽需要既物品，掛上號碼布及比賽晶片．肥龍所入住既酒店，離起點步行計，大概需時20分鐘．換言之，如果要朝早八點前要到達現場，並進行換衫、放行李加埋熱身的話，大概六點半左右就要起床做好準備．

結果，肥龍當晚校好三個鬧鐘，加埋front desk既morning call後，先至安心落床去瞓．

第二朝（即22號比賽當日），當第一聲鬧鐘響起，肥龍經已立即彈起身！梳洗過後，換好衣服，正式朝向起點出發．原來，之前一晚驚唔知醒而校三個鬧鐘都未算緊張．當肥龍步出酒店後向起點方向行咗大約三分鐘既時侯，忽然唔知諗緊咩野，竟然以為自己行錯咗方向！正當想停步調頭之際，再察覺周遭一樣往向起點方向行既人群，其實只係自己虛驚一場！

隨著愈來愈接近起點範圍，身邊既人已經愈來愈多．行咗約15分鐘，終於到達現場行李保安，簡單檢查之後，正式進入比賽起點範圍．再走大約10分鐘，到達擺放行李既區域。距離比賽起步時間尚早，就喺附近進行拉筋及熱身，並且換上已準備好既運動服。

可能因為比賽人數及起步形式唔同關係，喺輪椅選手之後，東京馬拉松係10公里同全馬所有選手（約35,000人）一齊起步（渣馬分開10公里、半馬及全馬，並當中再劃分唔同組別如精英組等）．當然，因為人數眾多，唔可能同一時間喺起點開步．咁所有選手其實喺報名既時候，大會已經根據所申報既預定時間分做A/B/C/D/E/F/G/H….好多組．而肥龍預算完成時間係4小時30分鐘左右，就被安排到G組．

交好行李，按照指示，慢慢咁行到指定既G區等候．一望腕表，先發現原來距離起步時間，仲有差不多成個鐘！雖然天氣報告話氣溫大約有攝氏10-14度，理應好適合跑步，不過當有大風吹埋黎時，其實都好鬼凍呀．咁既情況，唯有做多啲熱身運動，乘機保暖．不過等候時間實在太長，兼唔想喺比賽前消耗太多體力，做咗太約25分鐘左右，都好似身邊其他人一樣，坐定定等開場．

等到大概9點鐘左右，全場氣氛熱烈，不斷叫囂及拍掌．隨著現場管弦樂團演奏完畢及東京都知事石原慎太郎先生宣布，輪椅選手正式起步．再過大約10分鐘，石原慎太郎先生再宣布，2009年東京馬拉松開始！

由G區走到東京都廳門前正式起點位置，大概都要近10分鐘時間．喺呢10分鐘入面，心情實在興奮又激動，報咗名大半年，又練習咗好一段時間，越洋到東京，再到呢刻起點真真正正就在眼前，感覺真實得黎又似發緊夢一樣～

穿過東京都廳門前，右轉往新宿車站方向走，向首公里進發．跑到新宿近歌舞伎町段附近，已經被兩旁到場打氣既群眾打動！大會非常有心安排，早已喺沿途路線安排咗唔同形式既打氣團體及節目一直為當日35,000名跑手打氣加油．而第一個見到既團體就係近歌舞伎町段既「應援團」～

應援團既吶喊加上樂器既聲響，就似為剛開始既所有跑手加上節奏，一步一步（一下一下）朝前面終點方向進發！作為跑手，除咗專注去跑步及留意路面指示及情況外，現場氣氛絕對會令即場發揮添上無限動力，更令自信心加強．而令首次參加馬拉松既肥龍驚喜既係，全程42.195公里既路段上，喺容許既情況下，竟然差不多企滿前來打氣既人群，可以話係YOU’LL NEVER RUN ALONE！期間，有跟隨現場播放既音樂一班人邊跑邊做YMCA手勢，又有對一班正為跑手打日本鼓打氣既小朋友揮手，感謝支持，更有與表演傳統日本舞既女士擊掌！

跑到銀座一段時，更加係全程打氣部份既高潮．實在唔知道究竟當時現場總共有幾多支持者，只見滿街企街人群，不斷既加油聲及拍掌聲，再加上澎湃既鼓聲哨子聲拍打物件聲，雖然並非精英跑手，不過置身其中，感受實在絕無分別，而且更覺要加把勁去完成，無負沿途所有支持者既鼓勵。

總之不論跑手、表演者及支持者，相信每一位在場既，都能夠非常盡情盡興！

如果由現場支持者發出既打氣聲令肥龍全身注滿動力的話，咁喺約25公里後沿途由支持者所準備，送俾所有跑手補充體力既自製食物，簡直令肥龍熱淚盈眶，萬分感謝！呢種無私及大同既舉動，實在震撼，又充滿啟發！有朝一日，當肥龍不再係參加者時，一定會照辦煮碗為未來既跑手支持及打氣！

講開呢啲補充體力既自製食物，數落肥龍就有食過飯糰、朱古力、strawberry、香蕉、黑糖、蛋糕等。反而大會提供既香蕉及蛋糕就一次都冇食過。而除咗補充體力食物，沿途其實每3／4公里左右，就會有水站。而且一般水站都好長，可以一路跑一路飲，飲完又再攞，總之飲夠先走都話咁易。

回想比賽期間時，當發現首30公里完成時間為2小時55分鐘時，內心其實有一刻曾經覺得／諗過可以以4小時內完成，嘗試保持當時均速(約5分鐘45秒)去繼續其後既路段。不過隨著35公里後體力明顯下降，喺保守既策略及以完成首個全馬為首要目標前題下，唯有放慢腳步，一切依照身體及雙腿狀況去調校最合適步伐，直至到達終點為止。

最後，自己既堅持及努力，加上沿途所有工作人員、支持者、表演者及跑手既鼓勵，最終以4小時08分鐘（非官方時間）完成人生第一個馬拉松！我得咗啦！Yatta！

實在要衷心感謝所有工作人員、支持者、表演者及跑手既鼓勵！更為每一位曾與肥龍擊掌、曾給予食物俾肥龍既工作人員及支持者講聲「Domo arigato！」

待續。。。

（雖然事隔已經超過10日，因為實在太興奮，所以寫呢篇時用咗好多感嘆號（！），請勿見怪～）

東京馬拉松見聞（二）

2009-03-29T23:47:00.003+08:00

東京馬拉松有幾受歡迎？其實可以從報名人數去反映。

以每年全馬名額30,000人計，從2007年開始，超額報名由3.1倍，激增至2009年7.5倍，即有約22萬幾份申請，大約每7名報名者只有1名成功，所以有得跑絕對都要靠多少運氣。

不過呢個情況，聽講只係喺本地報名者發生。由於主辦單位及政府希望藉呢項賽事吸引海外旅客並帶動當地消費，所以好似肥龍呢類海外參加者，中籤率其實非常之高。不過，參加者當然亦需要喺網上報名時（報名時間大約7月份左右），申報本身比賽成績及預計完成時間。

之前提及過全馬名額30,000人，加埋10公里既5,000人，整個比賽大約35,000人參加。呢個數字，據說唔會因為報名人數增加而改變。而就算全馬有30,000人去跑，可以完成既比率依然非常之高，竟達97％（2008年）。而大約6成參加者可以以5小時內完成。

呢一埋數字，如果將鏡頭轉番去香港馬拉松的話，情況完全唔同哂。每年香港主辦單位總會高調宣佈參加人數又打破去年紀錄，不過如果細心留意，譬如說2009年計，全數55,000參加者中，全馬參加者只佔約8,000名，其他都係半馬（12,000名）及10公里參加者（35,000名）。

其實，多人參加都好既，起碼代表多人做運動，而肥龍對此並冇太大意見，而且亦唔代表因此而影響半馬及10公里比賽既存在性。不過對於主辦單位有冇設定長遠目標去提高比賽水平及推動本地人做運動方面（例如如何鼓勵之前參加過半馬及10公里既參加者嘗試參加全馬比賽），實在失望兼睇唔到任何實質行動。

東京馬拉松見聞（一）

2009-03-29T01:59:00.014+08:00

雖然已經過咗一星期，不過由於自己仲係沉醉於完成比賽既快樂中，一直未有時間去整理有關比賽既點滴。而之前只係講咗完成時既心情及部份情況，都應該係時候正式講番今次比賽既所見所聞，或者會對未來有打算參加東京馬拉松既朋友提供一啲提示。

基於比賽前需要盡量爭取休息，而且亦無謂太頻撲，所以就安排咗比賽前兩日（即二十日）早上，乘坐飛機向東京進發。到埗時已經係當地時間下晝兩點鐘左右，本來打算立即趕去指定地點領取比賽物品及號碼布，不過考慮到有行李喺身兼且可能要步行一段路程，比較「論盡」，所以最後都係決定先回酒店check in並放低行李，再輕裝往Tokyo Big Sight （指定領取比賽物品及號碼布地點）。

講番有關東京馬拉松一啲小統計，唔睇官方資料唔知，原來喺約2,000位海外參加者中，香港以247位參加者排咗喺最多人報名既國家第四位，緊隨美國（899位）、英國（333位）及韓國（253位）之後。其實都唔係完全好意外，因為喺香港機場候機室入面，肥龍就已經遇到兩班共約五、六十人既跑友，浩浩蕩蕩咁乘搭同一班機向東京出發。

可能想像，日本除咗係港人旅遊熱點，更加係非常受本地跑友垂青既外地馬拉松之選。

相信今次馬拉松結果亦冇令千里迢迢，遠道而來既跑手失望。

喺安排所有參加者到場領取比賽有關用品既Tokyo Big Sight入面，大會就喺旁邊同時舉辦咗Tokyo Marathon Expo。除咗大會贊助商都設有指定攤位之外，更加有唔少販賣與跑步相關既產品既參展商出席。

對於平日主要喺旺角及某幾間鋪頭買跑步用品及跑鞋既肥龍，呢個expo可以話提供咗一個一條龍認識及接觸有關產品既機會，而且好些產品，更加喺香港未曾見過，但又實用。至於有關今次馬拉松既限定紀念品，更加係「血拼」既時刻，好難忍得住手。畢竟係一次旅遊加跑馬拉松關係，結果。。。亦買咗咗唔少野。

又唔單止賣野及派野，其中有幾個攤位，更加整色整水，做好幾個場景，安排俾參加者及好友或家人一齊影番張靚相留念，同時又可以舒緩一下比賽前夕既緊張心情，認真唔錯。

如果有時間，或者許可的話，建議儘量早少少到場（肥龍到場時經已下晝六點半，會場八點正關閉），可以更細緻去了解有關產品及資料。

點樣去Tokyo Big Sight? 坐JR山手線到大崎站轉車坐Rinkai線，到東京國際展示場落車，行十分鐘左右就到。

去完Tokyo Big Sight，可以坐番車到大崎站，再坐車去隔一個站既品川及汐留行街食飯。Good!

待續。。。

楠田昭德

2009-03-28T16:30:00.002+08:00

【轉載】日本埼玉市六十五歲業餘馬拉松選手楠田昭德（Akinori Kusuda）二十二日跑完東京馬拉松比賽全程，實現了連續五十二天跑馬拉松的目標，締造新紀錄。

楠田在大學期間，曾連續四年參加箱根接力馬拉松比賽，畢業之後，漸漸少跑步；五十歲之後，又重新開始了跑步生涯。去年春天，楠田從報紙上看到一名四十八歲義大利男子，連續五十一天跑全程馬拉松，創下世界紀錄，因此產生「雖然不是什麼正經的紀錄，說不定自己也能做到」的想法。

楠田自家附近的公園內有一個約九百二十公尺的跑道，他就從這裡開始挑戰自我。他每天早上七點開始跑步，約有一百二十名同伴為他紀錄、測量以及加油。

楠田二十二日跑完東京馬拉松大賽之前，已連續五十一天都跑上四十二點二公里。楠田和支持者現在計畫申請將其壯舉列入金氏世界紀錄，預料應該能獲得認證。楠田說：「我非常高興，這讓我明白一個人也可以成就大事。」「我的挑戰一開始是為了自己，但我現在非常感謝那些曾經幫助過我的人。」

*********

65歲高齡，連續五十二日跑咗五十二個馬拉松距離。而第五十二個，即東京馬拉松，成績係3小時55分完成。

服未？

強強強強強強強強強強強強強強強強！

AK公館?

2009-03-28T01:32:00.004+08:00

莫非。。。係新宿歌舞伎町支部？

與自己對話

2009-03-25T16:46:00.004+08:00

喺跑今次東京馬拉松既過程入面，一共落過兩場大雨．

第一場雨出現喺約十八公里一段中，當時有氣有力，加上兩旁觀眾熱烈打氣，好快就輕易走過，向著更遠既終點進發．

第二場雨出現喺約三十六公里一段，距離全程距離四十二點一九五公里，尚有約六公里要走．

雨點打落身上，都分唔出究竟汗水定雨水，雙腿開始唔聽呼喚，速度亦比先前首三十公里時明顯轉慢．

有一刻，真係有「想」停步既想法．　不過，同時腦海內似有另一個自己，不斷反問自己一連串問題及與自己對話．

「都已經跑咗八成既路段，唔通黎到呢度先要放棄？」

「一年黎，特別係最近三個月既練習及準備，真係要白費？」

「點解要停步？雙腳痛嗎？雙腿有抽筋嗎？」

「山長水遠走黎呢度，係“跑”馬拉松，唔係“行”架！」

「終點就喺六公里之後．．．」

既然都已經跑咗八成既路段，又冇腳痛冇抽筋，終點就喺六公里之後，實在冇理由要停步！

同一刻，集中精神，目光再放落終點既方向上．然後刻意靠近左面走，然後提起左手，與旁邊正為跑手打氣既人群逐一「擊掌」！

佢地既打氣及能量，透過每一下擊掌，轉化為力量，似令身體每一個細胞注入動力，令自己繼續堅持，一直跑到終點．

眼前既指示牌，由（最後）五公里開始，變成四公里．．．三公里．．．兩公里．．．到最後一公里．

兩旁企滿冒著雨為跑手打氣既人群及表演者．充滿拍子既打氣聲及音樂，就似為跑手定出節奏，完成眼前最後既二百米！

衝終點一刻，百感交集，同時為自己既堅持及付出而感動．

終於完成人生首個馬拉松．At least I never walked.

紅慧星

2009-03-25T09:47:00.006+08:00

尋找紅慧星吧！？

42.195

2009-03-22T15:43:00.003+08:00

我完成咗啦！

完成時間係四小時零八分鐘，甚至比原定目標上限四小時十五分鐘仲要好。（原定目標係四小時十五分鐘至四小時三十分鐘）

感覺好奇妙，就好似完成咗一件連自己都覺得難既事（四年前自己仲係以兩小時三十九分鐘完成渣打半馬）。全程唔單止冇停過，更加冇行過一步！堅持到底！

I never walked in my first marathon.

希望可以將呢個首次馬拉松成績，獻給屋企人。

冇佢地既諒解及支持，我就冇機會完成咗呢件望落好傻，又冇實質回報，兼要日練夜又練既活動。

不過可以好肯定，呢次經驗，回報可能好無形，但絕對對自己好有啟發。

今晚一定要獎勵自己食番餐好既兼好好休息。

出發啦！

2009-03-20T09:05:00.001+08:00

我要出發啦，下星期再見！

我的練習記錄番外篇の東京(馬拉松)賽前準備

2009-03-15T15:08:00.013+08:00

距離三月二十二日尚餘六日，喺完成埋黎緊既星期二最後一課既練習後，練習正式告一段落。而星期五就已經係出發既日子，亦係時候為各方面小處著手，開始要為旅途及比賽細節做好準備。

良好既準備係比賽既一部份。翻閱之前從講座時寫低既筆記，從飲食到賽前準備，到比賽路面情況，逐一重溫。

飲食方面，比賽前兩天，食適量牛肉（補血），碳水化合物（米飯、薯仔、意大利粉、生果）及蔬菜。及後喺比賽前一天，食適量肉類保持熱能（特別天冷地區比賽），以碳水化合物及蔬菜為主。另外就要戒飲冰冷飲品! 因為冰冷飲品可以令能量降低。而可樂及咖啡有興奮及利尿情況，令鈣質流失。到比賽前數小時，就食一些熱既食物（如飯、粥或通心粉），提升熱能，支持比賽時所需。

其次，對比賽路面及起伏情況之認識亦非常重要！不過。。。雖然去過東京好幾次，但係東京比賽路面情況實際係點既呢？真係唔知喎。。。好在官方網頁有有關資料，仲拍埋全程路線VIDEO，自然一目了然。初段約五公里主要係落斜，然後大部份路段都以平路居多，應該唔似渣打後段多斜路咁難應付。

喺比賽前喺腦海中幻想一下路面情況，可以令心理上準備加強一點。

至於天氣方面，預計比賽當日天氣有雲，氣溫介乎7至14度之間。其實都幾適合跑步及自己既身體狀況。不過，如果比賽開始時（早上9點正）氣溫較低的話，可能要做多啲熱身，並喺比賽初段儘量用鼻呼吸，以防因冷空氣冷傷肺部，等到之後開始進入狀態時先至轉換番慣常既口部呼吸。

另外，黎緊呢個星期，除咗瞓覺之前要做多啲拉筋運動之外，就係要早睡早起，儲足精神！

一切既準備，希望可以令自己跑畢全程，完成人生第一個馬拉松！

"GIFT" by Mr.Children

沿途有你

2009-03-14T11:43:00.004+08:00

其實肥龍每次練習時，沿途都會遇到唔同既跑友，雖然互不相識，大部份情形下，大都會互相點頭示好及打個招呼。

日積月累，有時又會因此而認識到新朋友，交流及請教有關跑步上既知識。

今朝如往常星期六與好友H到附近練習，途中遇到後來喺運動場相識既L小姐及C哥。

其實第一次遇見L小姐及C哥一齊練習已經係大概半年前事。雖然一直唔認識C哥，不過就觀察C哥既身形及速度，已經知道係長跑高手一名，而可以同C哥一齊跑，L小姐水準自然有番咁上下。

不過，大約兩個月之後，就冇再見到L小姐及C哥既踪影。估計大概因為大家練習時間或頻率改咗，而且亦係好平常既事，亦冇需要八卦去諗有關原因啦。

今朝完成練習後，剛巧喺運動場遇到一樣完成練習既L小姐及C哥。L小姐為人隨和，主動與肥龍及好友H打招呼及交談。原來，L小姐之前之所以突然失去踪影，主要係因為一次練習時受傷，而且情況都幾嚴重。期間休息、治療一段漫長時間，而L小姐亦透露當時已經有退出2009年渣打馬拉松既準備。後來喺情況好轉及穩定後，經C哥既鼓勵及陪同下，L小姐慢慢開始恢復練習。

最後，L小姐以約四小時完成2009年渣打馬拉松。

L小姐可以完全康復並可以完成渣打馬拉松，當然可喜可賀。

不過，C哥果份無私及成人之美既行為，更令肥龍覺得更值得尊嚴。一個人憑能力知識而成功，當然值得欣賞。而用自己既能力知識令他人成功，更值得欣賞。

更不可不提，C哥仲有做渣打馬拉松義工，負責指示參加者正確路線及提供即時協助（肥龍當時路過時仲有同C哥打招呼添～）。可能有人覺得好簡單，不過其實C哥要由果朝四點企到十一點，仲可能要日曬雨淋架！另外，作為一個跑手，要犧牲參加大賽（如渣打馬拉松）既機會，真係一啲都唔容易囉。

而肥龍喺跑步路上，亦想多謝好友H及好友G。肥龍因為要準備東京馬拉松，喺渣打半馬後，短暫休息一陣就已經重返練習既軌道上。而好友H及好友G之後其實都係冇比賽，不過都主動提出可以協助肥龍練習。而此期間，肥龍的確得到好友H及好友G既支持，令練習及準備更加有動力，時間及狀態好快已經回復準備渣打半馬時時既狀態。

而好友H及好友G期間亦提供唔少跑步及體能上既意見，令肥龍獲益不少。

黑白照

2009-03-12T01:16:00.002+08:00

之前由舊同事T推介，現正喺香港中央圖書館展覽館展出既「香港印象 ━ Impression : Hong Kong」攝影展覽，今日放工時間剛好路過附近，時間所限，只能逗留短短五分鐘。

雖然只係行咗其中一部份，不過對一幅又一幅既黑白作品，特別係有關1966至1975年間既相片，覺得實在好看。

而且，對於眼前既黑白照，果種實在感及細緻度，絕非平日喺電腦螢幕中睇慣既數碼相可比。

下星期一定再抽時間再睇多一次。

********

香港印象 ━ Impression : Hong Kong [10/3 - 19/3]

[ 攝影展覽 ] 香港印象 ━ Impression : Hong Kong

日期 10/3 - 18/3
時間 1000-2000

日期 19/3
時間 1000-1800

地點中央圖書館展覽館

康樂及文化事務署場租資助計劃予以補助，沙龍影友協會、香港攝影
學會聯合主辦『香港印象 ━ Impression : Hong Kong』
國際影星周潤發先生與沙龍影友協會名譽會長黃貴權醫生黑白攝影展
(全部作品均使用黑白菲林拍攝)，謹訂於二零零九年三月十日至十八
日上午十時至晚上八時及三月十九日上午十時至下午六時假座香港，
銅鑼灣，高士威道 66 號，香港中央圖書館展覽館公開展覽，歡迎各
位蒞臨參觀。

我的練習記錄番外篇の東京(馬拉松)攻略

2009-03-08T11:17:00.003+08:00

東京(馬拉松)攻略

上星期，一場黃雨及唔穩定既天氣，或多或少影響到練習既安排。不過比賽日子愈來愈近，練習如火如荼，又豈可能如此容易改變呢？

就算係行雷閃電兼落雨，一樣阻肥龍唔到，除了更加睇天做人一見天氣好轉立刻著鞋落街跑之外，另如果真係無辦法之下，就會去跑機。

(一向以黎，肥龍都幾抗拒跑機，除咗因為冇得沿途睇風景，最怕見到面前Panel一大堆數據！而且通常愈望只會跑得愈差~)

氣溫反而唔係問題，而且再涼啲跑得仲輕鬆。

每星期練習量亦增加至約六十五公里（十六公里，十六公里，十八公里，十六公里）。而十八公里完成時間約為九十分鐘。更重要係，身體回饋俾肥龍既訊息係狀態完全OK，就算保持現有時間及速度，應該可以掌握到，而且可以跑得更遠。

另一樣要注意既，就係心理上既準備。一方面叫自己放鬆盡情去比賽，同時亦要為自己進行self-movtivation。跑步除咗要保持練習，耐力，更需要心中一份堅持。

停步或繼續，答案就在自己。

今次既東京(馬拉松)攻略，就係喺開始兩三公里盡量留力保持慢速（約六分鐘尾），然後再用練習時既速度跑三十公里。至於餘下既距離（約八公里），就由到時即場既身體感覺及意志去決定啦！

自己既目標唔係高，不過有機會既，當然希望可以喺時間上做好一點，可以跑一場盡情既馬拉松！

十三日。。。

東京寄來的信

之前話二月尾大會會寄出通知，於是等了又等，星期四(6/3)當日...

終。於。收。到。啦～

十年

2009-03-07T00:08:00.003+08:00

記得十年前既八月天，從老遠既西貢，搬到現南區既居所。

人生第一次置業，擁有既第一間房子，感覺深刻，而且特別珍惜。

而十年間，生活中變化好多。好多好多從冇到有，一點一滴，都在此處萌芽，發生，成長及累積。

其間有三年，雖然曾經搬離過此單位，租住到別處。

不過，可能始終唔係自己既地方，而自己又鍾意為居所佈置及花心思。就算有時從各地找來稱心既擺設，最後都只有遠觀而不了了之。而且，更怕每隔兩年就要跟屋主討價還價既時刻，亦要有就討論結果失敗而搬遷既準備。

大概因為呢種無立足既感覺，後來，決定搬回舊居居住。

一住又是兩年多。

最近卻到了一個該轉變既時候，雖然有點依依不捨，居住咗近十年既單位，今日最終易手。

正式與舊居道別後，將會係另一頁既開始。

慶幸

2009-03-03T11:09:00.003+08:00

由前幾日開始，當好多人都正在思考及決定供定唔供呢個問題既時候，尋日同事M話，今次金融風暴，特別係肥龍呢類三十出頭或更年青既一輩，其實應該值得慶幸呢次出現既時間．

一來就算係有損失，大致都係有限．二來喺時間上，相信經濟亦唔會無止境咁差落去，呢一輩有著更多資源及時間裝備自己，準備捲土重來．

相反，若正值準備退休之年，相對而言，可以做到或改變到既，可能可以得好少．

肥龍非常認同同事M既說話．

肥龍心態係，就算將來經濟環境會變成如何，生活依然要過．往後有既時間愈多，代表可能遇到機遇既機會亦愈多．問題反而係自己喺逆境如何保存實力，渡過風浪，甚至等待機會突圍而出．

投資，肥龍有，而且亦一樣有獲利及虧損．經歷過97金融風暴，科網爆破，沙士，都過到唔代表下次都過到．今次跟之前唔同，又過咗幾年，身份唔同咗，年紀唔同咗，入息唔同咗，於是可以承受既風險亦唔同咗，要顧慮及計劃既都唔同咗．

唯有講句，之後要過得謹慎一啲．

等待下一個機會出現．

共勉之．

回 michael （二）：有關跑步書籍、雜誌及報章專欄

2009-03-01T16:10:00.003+08:00

續上一次michael問有關跑步書籍．

隨著馬拉松／跑步運動愈來愈普及及專門化，相關既書籍、雜誌及報章專欄亦因應而生．而且題材由最初主要報導賽事成績及運動時注意事項（例如熱身運動，運動耗損／受傷等）等硬資訊，漸漸到後來多元化，甚至由唔同年紀，唔同跑齡既跑手講述到各自跑步經歷及故事，令讀者以另一角度去認識馬拉松／跑步.

當中，又夾雜著有唔少充滿啟發性及有血有肉既故事.

其實，喺呢個資訊咁發達既年代，要搵有關資訊（特別係硬資訊）絕對唔難.不過，如果要介紹，就自然會係以下幾本/幾樣（當然仲有好多...）：

書籍

【關於跑步，我說的其實是.../ What I talk about when I talk about running】- 村上春樹（中英版我都有。不過只睇咗英文版，好睇！中文版朋友送既，不過入面啲相好正。諗住遲啲去日本果程機時睇～）
【It's not about the bike】- Lance Armstrong
【從減肥到馬拉松】- 馮兩努
【跑步聖經/ Running & Being】- George Sheehan （簡體字版，而且有Audio版，可以一路跑一路聽！）
【Trailwalker】- 蔡東豪

雜誌

Runner's World （有US版及UK版. 好全面，而且有網上版）
Hong Kong Runner （中英對照）
SportSoho 運動版圖（只睇過創刊. 不過特別係專訪，幾好睇～）

報章專欄

明報 - Runner專欄（逢星期六刊出. 除咗人物專訪，仲有Keyman專欄及其他有關跑步知識及健康資訊）

網頁

香港業餘田徑總會（比賽資料及消息）
hkrunners
香港長跑網討論區

另外，如果有咩好介紹，都不妨出聲吖～

Google Ocean 下既百慕達三角

2009-03-01T14:29:00.006+08:00

上星期既一篇舊文，講到海底既世界.

所報導既古文明，好奇既肥龍當然有興趣知道.

不過，更有興趣去知道既...反而係一直神秘莫測既百慕達.

究竟喺Google Ocean 下既百慕達三角，其實會係咩模樣呢？

你估會唔會發現以前喺附近失蹤咗既飛機及船呢？

電腦．馬拉松．舊同事

2009-02-26T18:35:00.006+08:00

電腦

因為使用開既電腦HD瓜咗，而另一部電腦既中文輸入又極之唔方便，結果就係少咗寫文，亦少咗留言．本來都有幾樣野想寫，結果可能都係不了了之．

馬拉松

自己都控制唔到，不過氣力同狀態正由渣打半馬後迅速回落．雖然唔可以話係藉口，之但係喺濕度超高既天氣下練習，只可以講一句：「濕哂～」

距離比賽尚有廿三天，未來既練習，除咗要逐步加長距離及耐力，更要喺心態上加強一點．

因為初次跑全馬，心理上覺得目標應該放得保守一點、低一點，最緊要完成全程，完成時間反而定得鬆一點．不過發現問題係當目標定得保守時，準備時既心情亦隨之而放鬆，最後反而影響番完成既確定性．

所以，可能都係果句，態度最重要．

舊同事

如果有留意開之前喺度肥龍講過工作間與同事既舊文.　曾經有位舊同事因為工作上做法上既問題，與肥龍互相開火．

跟住過咗個零月，呢位同事就向肥龍提出辭職．

雖然同事冇講出辭職背後既真正原因，不過．．．肥龍心裡有數．但肥龍覺得既然公事公辦，公司有公司既程序及應有資源，非一個人主觀地可以話變就變，立即執行．況且處理上自問亦冇任何偏私情況，最後選擇冇刻意去解釋．

最近與該舊同事再見面．席間舊同事透露今天正再套入當年既處境，只不過，今次唔同在身份對調咗．自己做咗當年肥龍既角色．

及後，舊同事向肥龍講咗幾句，今日終於明白當日肥龍所講及所想．

聽完，心中感到一份欣然．

與舊同事相約及後再見面．

回 michael （一）：有關計算跑步距離儀器

2009-02-20T22:20:00.025+08:00

完成咗渣打半馬之後，大約休息咗一星期，又再為下個月既比賽作準備．

比賽之後，狀態及力氣比之前正回落咗唔少．而練習既重點主要係集中喺保持練習次數（每星期三課）及基本距離上（九至十二公里上）．並打算到三月左右先逐漸加長距離及重點放喺最後既長課上（三十公里以上）．

喺上一篇，網友michael問到，有咩物品可以計算跑了多少公里.

其實答案及方法會有好幾種，視乎michael對所需要量度距離所既精準度而定．而且除非用好專業或仔細既設備，一般設備普遍都有偏差（5-10%）．若果對業餘跑者或初級跑者而言，以設定跑步路線或想量度自己所跑步距離，大致有以下幾個方法．

(一)　Google Map 或 Jogging Calculator

如果喺跑步之前，大概已經知道及設定咗指定路線的話，其實可以利用Google Map 或 Jogging Calculator 去策劃路線．呢個方法好處係唔需要咩特別設備，只要知道起點及終點的話，基本上就可以得出路線距離．

例如，之前利用呢個方法，就計算出由政府總部至維園既距離．

不過，呢個方法都有其限制．就係若果個別路線（如小路）並未喺Google Map上出現又或者比較曲折，喺設定路線時，就會有唔少操作上既困難，並導致未能劃出所定路線．

而且當要策劃曲折既路線時，由起點至終點之間，需要加上一啲副點去協助，都幾花心機．兼且當有新路線或更改路線，可能又去花上功夫及時間去做另一個．

另外，呢個方法最大既盲點就係未能計算及顯示整條路線既高度資訊．而呢個資訊，絕對會對速度及完成時間有莫大關係．

(二) NOKIA電話 + SPORTS TRACKER 軟件

呢個就係暫時肥龍所用及用得最多既方法．

如果好似肥龍咁，係使用NOKIA電話兼支援AGPS的話，只要安裝一個叫“Sports Tracker”既免費軟件，基本上就已經搞掂．只要每次跑步前開啟Sports Tracker軟件，及確認GPS訊號運作正常，喺起點時起按開始及終點時按完結，沿途所有資料（距離、時間及路線高度）就自動記錄喺電話記憶上．

呢個方法簡單易用，而且設定唔複雜．又可以喺每一公里或五百米期間自動作記錄，完成後又可以將紀錄export出黎(screen shot - jpg or data - excel)．當將所有紀錄集結之後，更可以作進一步分析，認真唔錯．

而最厲害就係所得記錄及數據可以上傳到Google Earth上，令練習路線活現眼前．

不過，因為係用GPS關係，若果沿途接收不良（如隧道管內）或受到干擾（旁邊有其他無線訊號），有時所記錄既資料就可能會有所偏差甚至錯誤．

總括黎講，除咗呢啲小地方／缺點，不失為一個既經濟又方便既方法．

(三) NIKE+ 或 NIKE+ SPORTBAND

呢個方法肥龍一直有興趣試但又未試過．特別係當肥龍已經用緊i-pod．

而呢個方法，其實同上面NOKIA電話既使用方法好類似，不過唔係用電話，換咗NIKE+既特定感應器（第一代）或特定手鐲（第二代）．

只要喺跑完之後，將i-pod與電腦連接，數據就會自動上載及紀錄．同上一個方法一樣，當將所有紀錄集結之後，更可以作進一步分析，方便快捷．而且NIKE+更有為跑者設立特定網頁，除咗做記載，更可以將練習紀錄同世界各地NIKE+使用者作比較．

如果係使用第一代既感應器，就要配備NIKE+既跑鞋使用．又或者要將感應器收埋好．

因為未用過，未能俾到用家既意見．不過，喺網上討論區聽過，特定感應器或手鐲既電池唔可以更換，意思即係話用到冇電的話就只好買個另一個感應器．而感應器電源一般可以使用約兩年．

另外，所得數據，只可以喺指定軟件上操作，唔可以轉移到其他軟件使用（如Google Earth或excel上）．

(四) Polar 手錶

其實都係同（二）及（三）如出一轍，不過呢個方法可以話係最專業及準確．而且因為手錶功能上既設定，更可以量度及計算出其他練習及比賽中既數據（心跳率，每圈時間等）．

由於數據可以與Google Earth連接，更可以了解所跑路線既情形．又因為裝備及零件較精密關係，所量度既偏差亦比其他設備小．

又因為比較專業關係，更可以預先輸入練習模式及目標，再喺練習或比賽時作參考及提示，修正或提高即時表現．

不過．．．既然講到咁pro．．．呢個方法相比其他方法，投資自然要多啲啦．

好！講住咁多先，希望所寫正是回答michael所問．

遲啲再寫埋其他．

Second Season

2009-02-19T21:18:00.002+08:00

Keep moving on!!

一小時五十八分鐘零七秒 (更正)

2009-02-08T16:27:00.004+08:00

黎到第四次挑戰渣打半馬，終於可以突破兩小時線，以約一小時五十八分鐘零七秒完成！ Yeah!!

呢個成績，真係好滿意呀！

當然，能夠做出目標成績，關鍵在於對賽道既熟悉及先前針對性既練習，令賽前既部署大致可以按照計劃般發揮出黎．

沿途一直留意目標時間去完成各分段距離．由於最初三公里時間比原先目標時間稍微落後，及後只有一直沉著面對，並等待喺適當路段上再提速，希望可以逐少逐少咁追番所落後既時間．最後喺約十三公里左右（入西隧前）終於重拾賽前部署節奏及時間，並一直保持至衝終點．

期間，當跑到艱難既路段及最後段時，除咗保持速度外，心中只有不斷咁鼓勵自己要頂住，因為，終點就喺冇幾遠既啫．

呢個經驗，又一次話俾肥龍知：「有目標，只要肯堅持努力，遲早都會得既！」

另外，一眾參賽既好友及同事亦平安完成各項賽事，實在好值得高興！咁，可以同一班好友練習及一齊比賽，亦係一件好開心既事！

當渣打半馬結束，肥龍今年度既馬拉松比賽及練習其實仲未告一段落架！休息一個星期左右後，就會再重拾練習，再向人生既第一個全馬比賽進發！

老sell遊記

2011 的 7件事 - 進度及結果

2011 的 7件事

2011年給自己的一個字

Tribute to Haile Gebrselassie

支持者與參加者

我和我的主場

Splash N Dash Aquathon Series Race 4 - The Finale: 自我感覺良好

向Anzenchitai 說再見

Are you ready?

Splash N Dash Aquathon Series Race 1 & Race 3: 在水中那位不是我

Splash 'n Dash Aquathon Series：交學費

貼金的事情請找我，貼錢的事情請勿找我!

Shin Zan Mono【新參者】

秋季

小結

八強

十六強

開波啦！

Sundown Marathon 賽後成績初佈

醫生，醫生，可唔可以幫我打針呀？

從跑步到幫助別人

我的練習記錄 (Week 10: May 9 - May 15, 2010)

我的練習記錄 (Week 9: May 2 - May 8, 2010)

Shameful!

我的練習記錄 (Week 8: April 25 - May 1, 2010)

馬拉松練習記錄 (Season 3)

2010年渣打半馬拉松 － 少少苦楚等於激勵！？

五條腿一條心

六萬人啊

時間有限

我的練習記錄 - 差勁的準備，意料不及的成果

兩套誠意推意推介既日劇

2010年給自己的一個字

走在褔岡的清晨中

Nothing is impossible - Dec 12, 2009

我的練習記錄

我的練習記錄- 增加里數的一週

我的練習紀錄 - 幾段

EA Sports: Portsmouth 0 - 3 Arsenal

又一年

都係時候啦～

我的練習記錄 - 天氣轉涼下試衝9K

我的練習記錄

尋根究底

惡搞C朗

我的練習紀錄

繼續移軸

Tilt Shift Lens Effects

反網絡暴力宣言

我等著你回來．．．

第二階段練習：質與量的提升

EAG

跑步。游水。再跑步

退役

好幫手：沒扣針的選擇

I'll be back!

歡喜若狂

Cup of tea

再聚

多心惹事

我的練習記錄: SPEEDWORK 啟動！

不要將手機扣在皮帶上!

減磅

One summer's day

點解要跑呢？（2009年5月10日更新）

Initial D 4th Stage

計於立夏

我的練習記錄(SEASON 2): SPEEDWORK

半桶水

Onwards

尋找合適自己既既均速

Confusion

New Gear

跑道

夢？

頸膊痛

關於「跑」，我其實想講．．．

東京馬拉松見聞（四）

櫻花

2010年渣打半馬拉松　－　少少苦楚等於激勵！？

回 michael （二）：有關跑步書籍、雜誌及報章專欄

回 michael （一）：有關計算跑步距離儀器