30.6.07

這個天氣


都記唔起回歸後九年間, 每年六月三十日既天氣係點樣.

但一九九七年六月三十日既天氣, 記得就跟今日一樣, 整日落住大雨, 而且比今日更大.

電視機正傳來紅館內慶祝回歸既節目, 歡天喜地. 但自己更想睇, 更有感覺既, (雖然當年已經睇過一次)反而係「畸寶」今日下晝四點開始播放既當年六月三十日, 肥彭離開港督府及其後政權交接既情況及片斷.

當今日各種媒體, 鋪天蓋地, 盡是慶祝既節目及消息時, 肥龍反問自己, 點解呢種心情好似好遙遠, 好陌生咁, 完全感覺唔到.

況且十年已過, 理應喺生活各方面, 自覺活得比十年前好, 而且土生土長, 雖未至事不關己, 兼唔會影響生計及生活下, 但就頓然發現自己缺乏咗當中既認同感及歸屬感.

亦因為咁, 心中既迷失, 乍近還遠, 特顯茫然.

各有睇法

任何事每個人都有一個立場、睇法.

你唔同意我時我又可以唔同意你.

但意見唔同又唔代表大家唔可以合作, 一齊完成一件事.

又如果太過執著細節又或者太過依賴舊有/已有既想法, 最後只會淪為無時限無結論既討論.

因為所討論既內容彷彿存在喺兩個唔同既時空中, 從來無一刻交差過.

你睇到乜? 肥龍只睇到一幅畫.

28.6.07

謝師夜宴

今晚肥龍收工喺車站等車返屋企時, 咁啱喺車站無幾遠, 見到幾個, 應該係五、六個左右, 芳華十零既少女踪影.

幾位少女, 除咗因為年樣貌美吸引肥龍注意外, 再細心留意, 原來一律直身吊帶禮服, 而又分別發現化咗少少粧, 都算幾悉心盛装打扮一番咁.

直覺話俾肥龍知, 佢地幾個應該係同學, 仲應該係準備一齊赴謝師宴.

肥龍雖然讀男女校, 但可惜, 當年由於太過沉迷運動, 又只鍾意一大班男仔周圍玩, 所以對男女之事, 一知半解又不感興趣, 直接啲講, 喺拍拖之前, 真係(女仔)手仔都未拖過.

不過後來發現原來有樣活動叫做謝師宴, 而且更因為原來係要跳(慢)舞. 結果, 肥龍第一次近距離面向女生, 又雙手緊握女生手仔既機會, 就係咁既情形下發生咗.

肥龍到依家仲依稀記得果刻個心卟卟跳, 又面紅喉嚨乾涸, 手心冒汗只識低頭不話, 非常怕羞既衰樣, 諗番都非常攪笑. 亦希望當晚既舞伴並無發現.

另外, 喺呢晚, 各位同學, 不分男女, 就好似今晚肥龍遇見既幾位少女一樣, 悉心打扮, 務求從外表話俾Miss 阿Sir及各同學知, 我已經熟哂, 一個二個好型仔好靚女, 大個仔大個女咁啦!

而又原來唔發現, 平日坐喺隔離既四眼妹, 除咗厚厚既眼鏡, 換番副con, 淺淺咁掃個淡粧, 再脫下校服, 穿上晚裝後, 真係好ok喎啊!

最後買咗

雖然今晚大陸返黎攰到死, 歸家途中最後都係忍唔住"竄"咗入去HMV 買咗先至心息.

黎緊幾日, ipod 都會傳黎美妙既歌聲同旋律咧.

27.6.07

靜待變化

雖然向後看時總係甜酸苦辣樣樣皆有, 不過寫扑、寫野就應如人生一樣, 應該係向前看既.

而且就算之前所寫既往事都係快樂既回憶, 不曾為緬懐過去而只在回味那刻那份「真」. 但既然活在當下, 就算只係剎那既感覺或體驗, 相信只有係真正咁接觸過, 先會覺得生活本該如此.

有段時間, 會寫有關工作上所發生既事, 並利用呢度作為減壓既地方. 而且工事上面, 發生與遇見既, 始終都會喺固定既框架內出現. 另外最近所寫所提及既, 唔係冇野好寫, 但發現都係負面既感受居多.

呢點, 自己亦早就察覺到, 咁更加唔應該被呢種心情牽往鼻子走. 又反過黎講, 意識裡亦發現負能量慢慢開始累積.

最近,呢種諗法及感受愈來愈烈.

可能因為工事繁亂, 唔想再為此而費神, 特別喺唔駛返工時.

可能因為工作千篇一律, 預計之中, 忽然主觀地想遇到更多新衝激.

可能因為每天工作因循, 自身能力亦漸漸消減, 不求突破.

可能因為自覺所能做既, 雖然已不多, 但又不自知當中所欠缺, 好想好期待再遇見生活上既良師益友(仲有無架?).

又或者, 最近所感覺到既就係「冇感覺」.

之前大鐵鎚講得啱, 生命係需要重量, 生活亦然.

我希望改變.

26.6.07

史力薑人

肥龍原文:
佢個設定確係搞鬼
見親佢都笑口噬噬
貪得意就換佢番黎
閒時惱時望佢兩眼
煩燥漸消咪話唔棧

好無聊呀我~~ :P

燒豬提供:
史力薑人好過癮
蚊蚊憎憎易身痕
咧嘴一笑冇煩惱
開開心心過日辰

24.6.07

的起心肝

就算唔跑渣打(半)馬拉松, 每逢週末, 一有時間, 肥龍就會走去跑步.

由香港仔海旁至淺水灣既距離大概八公里左右, 一般需時約四十分鐘內就可以完成. 而肥龍最佳時間則為三十一分鐘.

不過唔知係最近工作忙碌定係疏於練習, 最近兩次跑步, 跑到莫氣, 需要中途停低休息再跑...今日更可能因為天氣太熱及中午食得過飽, 竟然唔可以完成全程. 真激氣!

睇黎真係要的起心肝, 要再次努力保持及回復狀態, 否則下年想以接近兩小時完成半馬拉松的話就真係諗都唔駛諗咯!

另外, 肥龍仲整咗個時間表去留意進度, 希望可以跑番好少少.

23.6.07

物慾高低

「人一世物一世, 點都要戴過勞同揸過賓士先算可以!」

呢句說話, 可能偏激咗啲, 而且聽落非常「哽耳」, 不過又真係肥龍從友人口中親耳聽過既一句說話. 肥龍諗, 可能當事人貴為一個成功人士, 有啲野作為身份象徵好, 代表佢老哥對於成功(或財富)既指標都好, 無可口非. 但講真, 對肥龍黎講, 呢類說話, 真係幾惡頂又無咩感覺囉.

對於物慾, 肥龍可以算係可高可低. 咁呢樣野呢又應該同收入高低無咩真接關係. 肥龍眼見身邊一啲同事及認識既人, 每月基本上都係過著「月光族」生活, 大感不惑. 有時好奇又無知咁諗, 就算買得起, 究竟又係咪真係有咁多野要非買不可呀?

對於事物, 肥龍著重實際用途大於炫耀功能, 況且就算真係好, 都無必要掛哂上身俾人睇啦.

相反, 令肥龍比較吸引既嗜好, 往往就係可以有機會到世界各地了解當地文化同品嘗地道食物.比較幸運既係, 雖然去過既地方唔多, 但因為出差關係, 可以去到唔同地方見識, 有啲甚至乎可以居住一段時間. 雖然每次出差或旅遊, 基本上肥龍好少會買手信(要買野俾肥媽!), 但反而因為為食, 就不時會買好多(新鮮)食物返香港, 然後跟住果個星期, 可以繼續飽嘗當地食物. 有時真係會怕回港過海關時會俾關員截停審問一餐...

咁之前亦講過, 肥龍到外地旅遊時, 有三個地方係必到既, 分別就係超級市場、街市同博物館. 有時貪得意, 就會到處影低唔少片斷及相片作為紀念. 有時無聊執開野, 都會攞起啲相片再回味當時既片斷. 另外, 由於工作關係, 順理成章認識唔少當地既同事及朋友, 依家如果再去呢啲地方, 必會相約會面及食飯, 了解吓近況. 雖然只可能一年或幾年先再面, 但呢種友誼尚算可以維持(平日靠email聯絡). 咁到佢地到香港時, 肥龍亦會盡地主之誼招呼一番.

咁呢, 唔知有冇人好似肥龍一樣, 心底裏早就有一份清單, 羅列出一啲希望有生之年可以做到既事. 而喺肥龍呢個表入面, 大部份都係同大自然景物、旅遊及運動項目有關. 而呢一切, 其實都係著重記憶多過實物既願望, 但係就肥龍最嚮往既, 真係再多都唔無所謂 (Never settle for less) , 不過就真係要俾心機儲夠彈药先可以一個又一個去實現啦.

22.6.07

心情忐忑

最近兩個星期心情就如過山車一樣上完又落, 兜個圈, 又落完再上.

上個星期五既一份報告, 說明最近, 起碼近一年, 所做所想所慮既, 確非無中生有, 亦非緩兵之計.

今個星期一既一個長周末, 暴露最近, 起碼近半年, 最缺乏既, 係一個真正對公事不理不聞既私人休息.

兩個星期前一段由衷既說話, 奈何對方充耳不聞, 拖拖拉拉, 最後不獲接納.

今日早上再由對方口中, 相同既說話, 此刻反變為聆聽者, 頓感無奈.

眼前一個一個同伴、戰友, 作為負責任者, 繼續只有默默耕耘, 希望盡一分力.

19.6.07

軟銷感覺

講開喜愛既廣告, 欲罷不能.

喺故事及軟銷方法上, 肥龍好鍾意睇呢輯廣告.

廣告人巧妙咁利用當時森柏斯同阿加斯既關係及事件去創作呢兩個廣告(亦敵亦友, 瑜亮之爭既關係, 但其實私底下十分老死兼互相欣賞). 結果, 觀眾見到既係兩個由埸內打到場外, 令人印象深刻既「故事」.

阿加斯形象鮮明眾所周知, 但值得贊歎既係, 廣告裏亦把平日沉默寡言, 內斂既森柏斯拍得生動活潑起來. 說明或想傳遞一點訊息, 就係當一個人做一啲自己鍾意做既野時(例如片中打一場網球場外網球賽), 係可以需要啲神經質, 係可以仲好玩啲既.

而扮演旁述既麥根萊亦十分搞笑.

至於最後兩個邊個勁啲?! 又好似無結論及交代喎...(無得罪雙方擁躉^^)

睇完, 真係想立刻走落馬路打番場一樣既網球.

咁呢, 就正正套入品牌既口號中.



豬龍入水

當勁豬遇著容易被騙嘅魔鬼時.

勁豬變成.

.

.

.

.

.

.

18.6.07

要點本事

啱啱睇完蔡瀾及倪匡既「拾年」, 妙語如珠. 假期前夕晚上最好既娛樂, 賞心樂事.

節目中, 蔡瀾謂事業上佢停唔落黎, 因為佢使錢既本事比揾錢既本事高, 但做得開心.

呢句說話, 肥龍愈諗愈覺有趣.

奈何肥龍揾錢既本事不高, 因而局限咗培養使錢本事既能力.

又或者揾錢既本事低, 但使錢既本事更低.

肥龍物慾不高, 只係嗜好多多, 八八卦卦. 心多多又好奇, 只望所走過既自覺回味, 無悔足矣.

愈是期待

之前講開既寶礦力廣告好, 啱啱講既GATSBY廣告又好, 喺建立品牌既角度講, 非常成功.

成功之處, 除咗發揮廣告既功能外, 不自覺中, 亦慢慢將品牌既訊息傳播俾大眾. 而大眾除咗接收品牌及訊息同時, 逐漸亦對品牌及其廣告產生一種熟悉感及期待.

有人可能會回應, 假如當有相同既資源及預算時, 佢地都可以做到.

但當肥龍細心再諗, 其實呢啲回應, 係咪必然既呢? 但同時, 肥龍反而問, 假如真係有相同既資源及預算時, 係咪可以做到相同或更好質素既作品既同時, 兼獲得一樣叫好既口碑呢?

正好比如何做到「一加一大於二」來得說易行難. 而且肥龍確相信未必係愈複雜, 要高要大就好, 反而往往好簡單咁帶出訊息就掂.

相信作為製作寶礦力及GATSBY既廣告人員一定都唔容易處理. 因為除咗要保持一貫水準外, 更要突破以前所接觸既範疇. 原因好簡單, 因為佢地實在做得出色, 大眾亦愈是期待.

可能呢種又可以叫「榮譽」.

本地之中, 肥龍對以前既「萬寶路香煙」廣告最印象深刻. 仲記得當大眾仲係鍾意到「大戲院」睇戲既年代(指幾百觀眾果種, 非依家迷你戲院可比擬), 每逢農歷新年, 好多人就十分期待可以喺大銀幕中睇佢地每年既賀年廣告.

而肥龍最鍾意、最印象深刻就係呢個. 仲好記得隨著後尾搖哂旗至最後一聲鼓聲, Wideshoot 拍攝既長城映象所帶來既果股張力.

睇完真係深呼吸一吓, 暗暗叫聲「好!」

17.6.07

高低立見

今年二月時去日本開會已留意呢個廣告. 最近喺(香港)電視亦已經可以收睇.

輕快又充滿懷舊既調子, 加上GATSBY 一向出位既風格, 一看就印象深刻.

一句對白都冇既廣告, 大膽得黎簡單又直接. 擺明硬銷木村拓哉加品牌, 但總好比本地製作咁揾邊個邊個做代言人, 然後企喺鏡頭前吹噓一番黎得自然.

選曲更是一絕, 更巧妙把品牌名稱套入歌詞, 而難得意思又吻合, 確非「情與義、值千金」式既選配可相比.

「I can give you GATSBY~~~」

高低立見.

*******************

GATSBY - 木村拓哉


The Stylistics


The Stylistics SMAP Crossover

田徑場上

閱讀「Trailwalker 毅行者」其中一章有關啹喀兵隊與遨遊人間既故事後, 肥龍若有所感, 諗番起中學時代時田徑場上既一些逸事.

肥龍所讀既中學, 除咗因應往常學制及年齡而將所有學生編為唔同級別及班別外, 同時亦為所有新生編入唔同社別. 方便其後既陸運會、水運會、球賽及其他大型活動, 同學們除咗以個人名義參加外, 亦同時代表本身屬社參與. 每年, 各社就為咗個「全年最佳」而鬥個你死我活.

社別係用顏色去區分, 有黃、紅、綠、紫及藍. 而肥龍就屬於「紅社」. 記得當年, 係屬於「黃社」及「綠社」既年代, 喺各大小比賽及活動, 大部份既獎項都由兩社所囊括. 至於身處既「紅社」呢, 往往都係做陪襯角色或得個梗頸三. 當然, 偶又有時能夠突圉, 攞到個別單項既好成績及冠軍. 另外,就係間唔中攞到個「全場啦啦隊」冠軍咁囉. 而整體水平上, 仲有一段距離.

其實, 喺呢種大圍情形下, 以肥龍個人之力, 想或要改變呢個狀況, 根本就係「不可能任務 mission impossible」. 不過咁, 到咗中五嗰年(即畢業嗰年), 肥龍希望可以做到一件事, 就係想攞社際4x400米接力賽既冠軍.

以當年既年齡及水準計, 完成一個圈四百米, 三甲成績普遍會喺一分鐘內或六十秒左右. 而要攞個人冠軍, 大約跑五十五秒左右.

肥龍當年跑大約六十二秒. 而咁啱, 當時可以亦揾到另外三位所跑時間差唔多既拍乸, 自然組成一隊.

當年既大熱門, 非「黃社」莫屬, 因為四百米個人冠軍就喺其中, 而且其他三個都唔弱. 至於其他社呢? 就覺得如果肥龍果隊跑番自己既時間同節奏, 要嬴其他社應該唔難.

咁, 雖然冇喺賽前全隊練習過, 但每個成員就分別自己去練習(到依家仲好記得當時為突破六十秒呢個樽頸, 跑到氣來氣喘接近休克既感覺!). 不過目標好簡單 --- 「攞冠軍」.

終於到咗比賽既一日. 肥龍負責跑第二棒.

「啪!」, 比賽開始. 由於係第一棒, 開始時各社差唔多. 直至到三百米左右, 「黄社」同「紅社」些微帶出, 更差唔多同時接上第二棒. 肥龍接過棒後, 彷彿將所有野拋諸腦後, 只顧一味博命跑, 至於同其他人既距離, 根本無法分神去理會. 記得跑到轉彎到最後一百米時, 肥龍身體基本上已經感到進入極限, 眼前只覺四周無人, 一片寧靜, 就好似只有肥龍一個人喺度跑. 及後, 眼前終於出現第三棒既拍乸, 肥龍咬埋最後一口氣遞上接力棒後, 四肢無力咁停步休息.

相信第三棒亦以一樣既心情及方法去跑. 眼前既係「紅社」正以約三十米既距離領先, 而「黄社」緊隨其後.

喺呢一刻, 肥龍既腦海, 真係有希望攞冠軍既想法架.

而呢個三十米既距離, 亦保持至接第四棒既一刻. 但亦喺呢一刻後無耐, 「黄社」亦接咗最後既一棒. 本來,負責「紅社」最後一棒既其實亦跑得唔錯, 但奈何對方既冠軍人馬果然厲害, 隨所跑既路程愈長, 只見呢段三十米既優勢, 變得愈來愈少.

結果, 喺終點前既二十米, 「黄社」起越「紅社」, 到達終點.

由領先到落敗, 失敗固然係難受既. 不過今次肥龍反而感覺唔係咁大. 因為自知大家都已經盡哂力, 亦跑出之前既部署, 勝負只係一個結果.

而且對方既實力、努力及付出亦唔可以怱視. 喺公平競爭下, 對方勝出亦屬實至名歸.技不如人其實無咩值得失望. 反而因尊重比賽既同時, 尊重勝出者及賽果亦非常重要. 另外, 最重要係整個過程(由練習到比賽)肥龍都覺得非常享受.

所以及後每次為勝利者加冕及鼓掌既時候, 是由衷及感動去做, 亦係應該有既風度.

16.6.07

因財失義

當中一個故事, 係友人P 與生意拍乸間既糾紛.

典型既因財失義既故事.

內裏細節唔係重點, 不過可能因為肥龍都認識故事裏既三位主角, 甚覺可惜. 特別當知道內裏所涉及既金額及業務發展狀態後, 更深感不值.

P 講得啱, 喺股東結構、人事、營理上, 呢鋪佢學到好多野.

試想像一段十幾近廿年既友誼, 咁就攪掂咗.

P 仲有同肥龍講: 「如果要做生意, 千祈唔好諗揾朋友(真心嗰種)做拍乸, 否則最後可能連朋友都無埋.」

肥龍就答P: 「幾個人攪件野出黎真係唔咁難, 但當有問題, 想攪走呢舊咩時就難咯!」

不過對於當時人(特別係扭計嗰位), 肥龍覺得佢可能因為好勝, 又可能佢真係唔明咩叫做「山水有相逢」呢個大道理, 都唔講如果有朝一日會邊個做邊個老細嘞, 不過做得生意呢, 始終會有風險, 咁如果他日可能周轉不靈或者遇到困難時, 估仲有人會幫手呢?

而且所做小動作, 除咗自己發洩外, 真係無咩用. 更只會令其他人戴另一副眼鏡睇佢.

P, 希望你好快解決件事啦, 你咁鬼多正能量!

15.6.07

五個故事

雖然相聚只係短短兩個幾鐘, 意想不到地各有各既故事.

五個人, 五個故事.

故事中有喜事重重, 又有煩惱唏噓. 另有事業上既轉變, 更有生意上既糾紛.

中間夾著依然係中學時代既舊笑話, 加插最近「謎」一樣既對白.

不過無所謂, 因為所關心既, 都係大家既近況.

朋友, 就算冇咩需要幫忙, 得閒出黎敘敘原來已經係一個得著.

13.6.07

噢咀問題

早排肥龍行開科學館睇恐龍化石, 除咗睇恐龍骨及不同既化石外, 亦令肥龍諗起同家中傭人有關既一件事.

記得大約兩年前喺太古城亦有舉辦過一次恐龍化石展覽.

咁喺呢段期間, 有日肥龍同家人到太古城午飯後途經展覽會場. 咁肥龍見唔算人多, 又冇咩人排隊兼且免費, 都唔理家人及傭人有冇興趣, 就拉埋佢地一齊入去「貢」吓.

點知睇咗大約十五分鐘左右, 就喺其中一件三角龍既化石面前, 傭人問咗肥龍一個問題.

傭人: 「Mr. 肥龍, 依家仲有冇(活)恐龍架?」

肥龍: 「ooo...」

停頓數秒後, 肥龍只好收拾心情繼續完成埋餘下既部份.

後來肥龍諗, 會唔會啲CG 或「侏羅紀公園」拍得太「堅」呢?

10.6.07

過去今天

就算冇睇燒豬果邊, 單係近日睇埋電視啲回歸十年節目呀, 人物專訪呀, 十年前後既tag呀, 「過去今天」呢四個字彷彿一直徘徊喺腦海入面.

記得九七年七月一日就好似最近幾日咁全日落住大雨. 記得, 當年喺電視機畫面裏睇住肥彭喺離開港督府前接過英國旗時果個黯然無光既表情, 依然歷歷在目.

尋日肥龍初次踏足尖東既歷史博物館時, 行到「七一回歸」既部份時, 再見過去香港既發展同經歷, 及回歸交接儀式時, 心裏亦不自然咁感動出黎.

不過果一刻, 肥龍同時對自己既身份產生咗一份迷失感.

******

相對「過去」、「今天」, 肥龍更加留心「明日」. 所謂每日都係新一日, 明日永遠令人期待. 而且平日思考「明日」時已經腦交戰, 實在唔可以花時間去緬懷「過去」. 但就非常專重「過去」, 嘗試學習. 因為所有發生過到既都係人生既一部份.

不過, 亦希望過去所經歷既, 唔會成為明日想法既局限.

最近, 肥龍正為「明日」思量下一步既起點.

******

「過去與今天」- 係肥龍一首好鍾意既歌, 只記得係廿年前港台劇「暴風少年」既主題曲. 套劇講乜已經呢記得, 但有幾句歌詞就鍾意到不得了.

就像 就像 就像
像那方的星光閃動 眼也會發光
仰望浮雲常變不定 暗裡嘆一聲
衝出他朝崎嶇道上 那怕會退倒
試問誰人曾會考慮 過去與今天


如果冇過去, 就冇今天. 但好多人就係只想大家認同「今天」既佢, 又或者留意他人「今天」所得. 不過今天既成功及繁榮, 係咪代表過去未曾失敗過呢? 相反, 今日見到不堪失敗既佢, 又係咪代過去未曾成功過?

而且發光與慨歎, 未試過又點知呢?

9.6.07

無線傳電

無線傳電」呢樣野, 應該係肥龍喺呢個科技先進、產品製造及開發成熟既時代中其中一樣盼望.

肥龍諗應該都有唔少人有以下相同既諗法 (特別係出差外遊比較多既更甚). 就係當擁有及攜帶愈多電子產品既同時, 你會發現喺屋企裏面火牛愈黎愈多.

iPod x 1
數碼相機 x 1
DV 攝錄機 x 1
NDS x 1 (或/及 PSP x1)
Notebook x 1
手提電話 x 1 (如果你只係用開一個品牌又或者唔係經常換機的話)
仲有好多...

最後你會問一句: 「駛唔駛咁多火牛(變壓器/充電器)呀?」. 而出差執行李箱時, 無可奈何就因為咁而多咗一堆「黑馬馬」既物件.

其實随著電子火牛既出現同普及, 情況已經有所改善. 兼且好早之前亦經已有唔少發明嘗試去解決呢個問題, 奈何只停留喺開發階段, 暫時未能普及化. 另外, 國內亦留意到呢個問題, 亦建議统一所有內地手機生產商生產既火牛插頭標準, 嘗試減少製造多餘既火牛數量.

而且, 耐唔耐就有聽到話因為變壓器操作過熱而引致火災既報導.

肥龍諗呢, 「無線傳電」可能係更直接及有效去解決/ 簡化以上情況既方法. 不過咁, 一啲耗電量或電流大既電器(如泠氣, 洗衣機, 雪櫃呀)就應該因為安全考慮而繼續使用插頭/ 插座, 正如有燈既同時, 電筒亦有其功用(急緊/ 逃生).

未來, 如果喺出差既地方有間酒店話除咗寬頻及Wi-FI之外仲有埋「無線傳電」的話, 肥龍一定揀入往呢間. ^^

後記(2008年1月):

呢件,雖然唔係所有電器都用得,不過已經行前咗一步,而且可以好方便.

8.6.07

服務態度

今晚肥龍同朋友L 到尖沙咀食飯, 因為要「還枱」關係, 最後只好埋單走人. 咁見都仲係九點幾咁早咯, 就提議不如再揾個地方繼續傾, 結果就行咗去星光行裏頭既H-D記食雪糕.

安排就座及各自柯打雪糕後, 就繼續傾計. 咁當肥龍將手臂輕微向前傾並倚放喺餐枱時, 可能地面不平又或者隻枱脚唔平, 結果成張枱就一直搖搖晃晃.

正當肥龍同L 研究呢個情況時, 突然彈出一位侍應, 好有禮貌咁問有咩可以幫手, 又問係咪張枱搖晃不平. 然後二話不說, 就去攞咗張杯墊摺咗幾下, 再夾喺枱脚同地面之間. 搞掂!

於是, 八卦既肥龍就同L 講呢啲就真係好既服務態度嘞, 抵佢買七十蚊個特色雪糕囉.

不過可能肥龍心地壞啦, 就細細聲同L 講其實佢地係咪一早知張枱既問題(搖晃), 只係每當有客時就係咁做, 加吓印象分咁呀.

L 就話可能係呢度個經理特登設定呢個情況出黎, 睇吓幾時會有同事發現/ 留意店內食客既反應, 更會主動向食客提供協助. 而經理亦可順道以此行為作為評估員工表現既範圍之一.

結果你一言我一語, 到最後當然冇咩結論啦. 不過, L 所講既就算未必係真, 但又致於全冇可能喎. 而且內裏又有其智慧, 幾得意. 肥龍後來又諗, 如果呢個設定用喺平日既工作環境上, 結果又會係點呢?

最後, L, 祝你生日快樂呀!

6.6.07

同聲一呻

雖然只係過咗一半, 呢個零七年呢, 真係過得唔易.

今日臨放工時候, 同事L 請肥龍食魷魚, 送上辭職信一封.

講真, 呢個情景, 雖非首次, 但每次遇到, 總係覺得好似電影「Speed 」咁, 問點解每次啱啱搞好一樣, 轉頭又有另一樣野要處理. 兜兜轉轉, 忙完又忙, 一直徘徊於人事遊戲中. 結果一面盤算今年人手安排及項目計劃既同時, 一面又為穩定團隊而抓狂. 有時心諗, 就算平日儲埋幾多正能量都好, 遇著呢啲情況, 真係唔知可以OD 到幾時. 就算有人話放工後應該抽番自己出黎, 唔好諗咁多, 不過喺今時既情況下, 肥龍真係做唔到, 兼且繼續諗.

有時, 一個人靜既時候, 莫講話要堅持, 就算係自我鼓勵都唔係咁易... 結果只有粒聲唔出, 留喺度寫扑舒緩一下.

咁, 仲可以咁樣講, 既然依家仲可以寫同呻出黎, 起碼表示呢一刻, 肥龍仲可以清醒同知道自己做緊乜、堅持緊乜. 不過咁都無乜辦法, 畢竟今年勞工市場非常活躍, 最終只係苦咗肥龍呢類夾心階層. 最怕就係連鎖反應, 都唔知會唔會有...

聽朝仲要同老細討論有關同事L 去留既方案呀. 肥龍應該可以頂得住, 唔駛籐, no problem!

5.6.07

深感失望

其實, 直至落筆呢刻, 肥龍依然猶豫係咪自己對呢件事過於主觀及把自己認為重要既事睇得重要.

但當你一方面知道有好些歷史事實, 已經慢慢喺下一代既教科書開始淡化, 簡化既時候, 今日, 一份聲稱每日讀者數目達到某個水平既報紙, 選擇用高清電視廣播既新聞成為今日該報章頭條, 另外把尋晚維園集會放喺第十頁併以比頭條既圖片相約或更小既篇幅去報導時, 作為廣大既讀者及市民, 你認為可以感到什麼, 可以表達什麼呢?

肥龍只可以講: 「深感失望」!

3.6.07

不會忘記

對於當年親眼目睹既電視畫面及後來對事件既思考了解,

千言萬語, 始終不及呢句來得堅定.

「不會忘記!」

2.6.07

展館之遊

每當外遊時, 除咗超級市場及街市外, 肥龍最鍾意去逛展覽館或博物館.

去行街市, 因為鍾意觀察及好奇當地既生活方式及飲食習慣. 而去逛展覽館或博物館, 就好似了解咗當地既歷史、文化氣息或個別項目發展.

行超級市場既理由呀, 八卦同為食囉.

所以一有時間, 以上三個地方一定係行程既必然之選.

最近咁啱申請咗張「全年展覽館通行証」, 趁今日無咩節目又冇咩想做, 肥龍走咗去尖沙咀既太空館及藝術館一趟.

對上一次去呢兩處地方係幾時已經唔係好記得, 但總之應該係好幾年前既事.

畢竟太空館可能已經年事已高, 依稀記得大部份展品及說明好似同上次去時無咩分別. 但問題就係, 如果呢個係一個事實, 咁情形就好似番睇一本已經睇完既書咁, 就算話可能每次參觀既心情都唔同, 但就喺預期之內. 而且如果冇咗一啲(定期)專題, 咁就真係比較擔心日後如何可以繼續吸引市民去參觀囉, 所以希望遲啲太空館可以攪攪新意思又或者喺主題上升級一吓, 否則真係怕佢會慢慢被淘汰.

結果, 肥龍只係花咗十五分鐘就「行」完太空館. 咁見有時間, 又再走去後面既藝術館參觀.

喺全無預期下, 去咗分別喺二樓展館既「不中不英」及 「林風眠藝術展」. 結果感覺反而唔錯喎.

其實肥龍本身冇咩藝術細胞兼冇咩審美眼光, 只係覺得(視覺上)睇得舒服就得. 有時覺得, 喺平日緊迫繁忙既工作以外, 除咗做運動喺體力上既發洩外, 到寧靜既展館睇一啲靜態既展品及文獻, 其實對精神及腦袋而言都係一個唔錯既選擇.

咁行到攰攰地, 可以坐低休息又或者可以走去鄰近既咖啡室嘆杯咖啡, 然後可以入去再睇過.

不過有時睇睇吓, 就會諗不如買番幅複製品掛喺屋企或公司就好啦.