熱檸檬茶

一覺醒來, 乍暖還冷, 吸入乾燥的冷空氣之間, 令本已空空的肚子更感飢寒.

梳洗過後,穿起外衣, 徐徐步行至鄰近的茶餐廳來吃個早餐, 更點上至喜愛的熱檸檬茶.

喜歡茶餐廳的檸檬茶, 因為它不像從超市及便利店所買的盒装檸檬茶那樣千篇一律, 欠缺個性.

而且茶餐廳的檸檬茶, 随着檸檬的新鮮, 片數的多少, 跟紅茶的濃淡, 為每一杯檸檬茶帶來它的獨特性, 及個人化的喜好及味道.

可惜, 今天的熱檸檬茶跟以前喝的感覺大有不同.

跟心情一樣, 苦澀的.

是因為天氣冷了嗎?

是因為喉嚨乾涸嗎?

是因為檸檬太少、淡味了?

還是今天的紅茶過濃吧?

我不知道.

只覺只有紅茶味, 檸檬味無訂企.

結果, 我拿起匙羹, 開始輕柔的一下一下在檸檬片上擠壓, 希望能把檸檬汁不住的從片片的檸檬中擠出, 然後跟紅茶來個互相融和, 互相配襯, 並把雙方獨特的味道表達出來.

其間, 視覺上我看見新鮮的檸檬汁好像氣煙般滲入淺紅的紅茶裏, 我甚至感覺到檸檬的香跟紅荼的味所起的微妙變化.

到這一刻, 我急不及待, 立刻把這個狀態的檸檬茶緩緩的送入口中.電光火石之間, 舌頭中央兩旁的味蕾直接告訴我檸檬茶的味道.

噢!怎麼樣還是這麼苦苦的, 酸溜溜的?

善忘的我, 原來一直忘記放入糖.

(434字)

_________________________

另外, 仲有以下既檸檬茶.

太陽歌姬

最近無意中發現呢位日本既「唱作人」, 從此肥龍既ipod 無間斷日夜播放往佢既歌.

自從之前既宇多田光後, 良久未有聽到呢種「一聽就鍾意」既歌聲. 技巧可能幼嫩, 但又不得不佩服內裏既才華.

聲音充滿爆炸活力, 加上豐富既編曲及多元化既音樂, 好歌一聽再聽.

如果你有CD機, 又肯花一百幾十買張CD 番屋企聽 (雖然咁講不合世情因為依家興download!), 你會發現呢張碟的確物有所值.

汪洋大海

唔知點解, 去到沙灘, 硬係會哼到呢隻歌!

偷閒週日

啱啱呢個星期, 肥龍忙不過氣. 一方面為之前同事策劃既工作做跟進, 一面又為「月尾既M」而努力. 結果係唔夠休息兼沒時間寫扑外, 又令精神處於緊張狀態.

有謂一分耕耘一分收獲, 喜見之前推動及付出既努力初步獲得客户接納, 雖然都係老土果句依家只係起步階段, 唔可以太早開心, 但起碼面前要行既路明朗咗, 後面既就要努力保持呢股作氣堅持下去. 畢竟, 對肥龍黎講, 可以完成或達成一件事既滿足感, 往往能夠蓋過過程中既困難及挫敗.

而且肥龍一直有個信念, 就係遇到困難或逆境只要能克服, 就會更上一層樓, 就會令自己更成熟去面對未來既挑戰.

辛苦咗成個禮拜, 今朝肥龍走咗去淺水灣一趟, 發吓白日夢, 順便俾日對夜又對螢光幕(電腦及電視)既雙眼休息一下.

天氣其實仲有啲微涼, 海風温和. 而肥龍只係坐喺一旁旁觀周圍, 脚浸之處水温乍暖還冷.

遊人不多, 間中見幾個小朋友喺岸邊玩沙、踢水, 又有人喺碼頭垂釣. 四周空曠, 又見鴿子處處.

如是者, 一望就已經一個半多小時, 時間就係過得咁快. 但過得輕鬆, 過得自在.

前面既路仲有好多好遠, 只可用「平常心」去面對.

畫畫畫畫

一連四個「畫」字, 其實係想講肥龍自小就鍾意「畫」畫, 鍾意左「畫」右「畫」.

相比起右撇子, 雖然有好多人話左撇子既人對畫面既掌握比較强, 不過肥龍就半信半疑啦, 而且成日諗自己就係例外果位呀.

只係記得小時當肥媽去咗打麻雀時, 肥龍百無聊賴咁留喺屋企, 一張紙一張筆就可以畫足大半天. 不過肥龍唯一有度好就係唔會畫花屋企任何一幅牆, 所以肥媽都好樂意俾肥龍繼續畫落去.

冇受過正統訓練、無師自通既肥龍, 當然冇乜技巧可言. 極其量只係留於見乜畫乜, 又或者對住另一幅跟住畫既層面, 冇咩題材主題, 有時又畫啲不規則圖案. 而畫卡通人樣最難, 因為筆觸線條要精簡, 又要特出人物既特徵. 不過講真, 雖然唔可以話畫得好靚, 但都可以話見得吓人既.

喺中學時代,肥龍總係鍾意上堂發白日夢. 有時悶悶地, 就會當教科書係畫紙, 喺所有空白既地方畫公仔. 另外, 間中肥龍都會貪得意走去参加一啲校內比賽(例如海報設計), 托賴亦曾經得過獎 (如果冇記錯, 獎品曾經有$400蚊書卷), 都幾高與架.

後期由於其他書友仔推選, 肥龍有幸擔當及參與過學會及學生會既推廣工作(promotion), 而肥龍畫既野亦由「自娛」開始進入「俾人睇」既階段. 講真, 都有啲驚架, 怕做得唔好達唔到預期既效果. 後來, 肥龍更有幸為中學預科畢業班設計T恤及參與畢業刊內文插畫設計. 呢本畢業刊, 雖然粗糙及製作簡漏, 不過肥龍一直保存至今, 話哂都係「紀念 + 心血結晶」麻!

到後來入咗大學, 順理成章心思思又加人學會, 更成為Promotion Secretary, 負責學會既 O Camp 營刊, 海報、橫額既設計. 印象最深刻果次, 就係整咗張(當時覺得幾大!) 3呎x10呎既橫額, 由二樓吊落一樓, display俾啱啱步出Canteen 既校友睇. 記得當時反應幾好添!

大學畢業後, 斷估都冇乜機會去畫畫啦(唔計用黎追女仔啦^0^)... 點知有次俾一位同事發現肥龍本記事簿既公仔後, 竟然提議肥龍為當時既老細畫張生日咭慶祝. 唔係啩? 喺香港呢個商業環境下, 咁會唔會低B 咗啲呀? 而且肥龍又真係好耐冇畫野啦, 驚畫得唔好. 但唔知點解最後肥龍又好順攤應承喎... 結果就膽粗租畫咗第一張咭送俾老細既咭啦! 雖然唔知老細鍾唔鍾意個設計同公仔, 但係好彩佢都冇「掉」到啦! 哈哈!

另外, 肥龍一直想學graffiti, 不過有時先覺自己好似格格不入, 所以停留喺「諗」既階段...

孖寶金鑛

有時都唔知係江郎才盡定古老當時興, 有啲事物耐唔耐又會走番出黎, 或者係所謂既come back. 講既係以任天堂為首既「超級瑪利奧系列」, 或簡稱為「孖寶」. 每次出動加上時代既唔同及改變, 衍生出好多好多既產品出黎,大賣特賣. 可以話五花八門,包羅萬有.


由紅白機開始, 到超級任天堂, 一直都鍾意玩「孖寶兄弟」. 上山下海, 後來仲上埋天, 好鬼刺激!

其後Gamecube, Gameboy無以為繼, 要到NDS同 Wii時肥龍先再重投任天堂陣營.

最近, 三日一小行, 五日一大走各大街小巷既肥龍發現大量以「孖寶」為題既產品活躍於市面. 計先有膠公仔, 又有NDS機套, 再有埋扭旦既回力車,NDS既stylus 筆及手機公仔...嘩嘩嘩, 簡單啲講, 唔係講你有幾鍾意, 而係講你有幾多錢去買及有幾多地方去擺.

亦由於以上產品大受歡迎, 供求失衡, 最後產品價錢大幅提高.

就以最近扭旦既回力車為例, 一套六架, $10蚊抽一架, 好彩既$80-$90蚊應該可以抽哂.不過尋日路經188時發現一套六架竟然賣$169蚊, 好過炒股票. 肥龍之前喺扭旦機抽到一套. 奈何眾人皆盲目, 持續買入.

仲有日版既NDS機套, 情況一模一樣, 但價錢仲勁, mark高兩三倍!

你話孖寶係咪金鑛呢?

我做得到

尋晚睇咗之前講既「一篤戲」, 白只兄講佢既「愛脂」故事, 講既係每個人心底裡有幾滿意自己(由內至外).

鏡前既肥龍, 其實身型變化不大, 而體重因工作作息而有些微起落. 不過有時面容略見疲累.

有時眼見愈黎愈肥既身驅, 最終按捺不住, 「嘀」起心肝去消脂. 最厲害既試過一個月減咗二十磅, 回復十年前常做運動既身體狀態.

肥龍鍾意做運動, 每個星期總會抽時間由香港仔跑步至淺水灣或到運動場跑圈. 最近兩年更膽粗粗走去跑渣打(半)馬拉松. 完成既時間唔係重點, 反而其中果股「我做得到」既信念更令肥龍變得埾毅, 更加會去盡自己既能力去完成目標.

每次想去跑步前, 總有一百個理由加藉口叫自己如放棄、休息、下次再黎過...

不過咁係咪應該有既態度先? 除非放蹤自己, 唔想再有咩既目標, 否則始終有踏出「第一步」既一刻.

身驅可能覺得攰, 但內心總係期待完成既一刻.

跑步一樣, 做事亦一樣. 要收獲先要有付出.

老銷辛酸

每份工都有其難處、其辛酸史.

老銷既辛酸其實都冇乜特別, 唔係想講俾老細捽數、日曬雨淋、日夜奔走、受客户氣等等.

除咗無間的M, 最令肥龍感到無奈及憤慨既, 就係親眼睇住及見證住自己之前幾個星期/月/日所黎所付出既努力、心血、時間、腦汁去準備或培育既客户關係, 竟然可以俾另一個同事用短短既幾句說話或犯一個好低B 既誤失而毀於一旦, 真係無話好說.

有時, 負責項目既同事就係咁唔上心, 有時仲滿口理由, 一副話之你既嘴面. 跟往肥龍既內心就立刻尤如熱煱上既螞蟻, 搞到自己心掛掛又坐唔安唔安落, 好惨!

有時又掉轉諗, 究竟呢種心態係由於肥龍自己有問題吖(例如要求高) 定係唔信負責既同事既能力呢? 咁講真, 就真係兩樣都有少少架. 不過呢個感覺唔係靠直覺而係由多次既經驗所得.

另外, 有時又因為信哂同事或者偷懶望少眼, 「瀨」咗唔少野, 甚至中伏添.

呢啲情形, 如果最後可以同個客傾得掂數都仲好啲. 但如果真係因為咁而個客真係走咗, 都唔知應該怪邊個. 而且少一個就係少一個, 結果咪又要揾番另一個(新)客去填番條數吖. 不過生意、客户關係喎, 並唔係一朝一夕可以做得出黎既事, 但除咗做, 仲可以點呢?

唉, 老銷既辛酸, 係「靠人」呀!

老銷宿命

尋日肥龍有機會同黎自台灣、廣東及深圳既同事碰面. 咁除咗做本來預定既工作外, 期間幾位負責老銷部份(包括肥龍在內)好自然咁走埋一齊吹吹水、消消氣, 兼且互相交換吓最近既公司動向.

而由呢啲話題又好自然咁拉去另一個長久討論但永遠冇結論既話題上, 就係公司好多事都以「有事鍾無豔,無事夏迎春」兩句話管理老銷. 呢兩句話既大意謂當條數靚、掂既時候, OPs (營運部門)就當老銷們如無物, 功勞盡攬. 相反, 到條數唔掂、唔夠新客、增長放緩時就入哂老銷們數.

結果老銷變成兩面是人. 一係閒死, 唔係就做死. 永遠得唔到應有既認同及尊重. 而且有時仲要俾OPs 既人話technical & product knowledge 唔夠, 又或者話老銷亂咁/ 輕易應承客户啲無理要求, 仲係 underquoted 添. 謂做死OPs喎...討論既結果, 往往就係齊聲一哭, 然後就再數呢樣果樣.

公說公有理, 婆說婆有理. 至於實情, 又係咪真係咁呢? 呢類討論同觀點, 雖然有份講, 但肥龍既唔認同, 內心更不以為然. 而且覺得好多都係因為「做果行厭果行」啫, 有咩野唔難唔駛做吖? 當吹水消氣就得, 無須太過認真啦.

至於肥龍點解做老銷? 原因好簡單, 除咗肥龍鍾意同人傾野講野及人工外, 最重要係無時無刻都係待人接物既歷練. 而且因為工作關係, 可以認識好多人(其中不乏大老板及高人), 間唔中睇吓人地公司運作偷吓師或者多嘴請教幾句, 都幾有用同直接架. 有啲客户識得耐咯, 甚至做埋朋友添. 雖然間中有起落, 但其實都幾享受及開心既.

而且sell 乜唔係最重要, 除咗明白客户既需要外, 最緊要係識得sell自己, 在內在外, 在公在私, 咪Good 囉!

矛盾心情

尋日黑色星期五, 工作上雖然都尚算可以, 但心情呢就壞透, 而最後又滲咗些少矛盾.

本來肥龍都唔想黑口黑面兼責怪同事, 過正如肥龍喺會議中所講, 每件事肥龍一定會有本身意見同睇法,如果可以的話, 肥龍都盡量會俾同事自己去搞同處理,而肥龍只會從旁協助及提點. 不過今次肥龍真係對同事整件事既安排及分工非常唔滿意, 直接啲講句, 如果肥龍咁都話冇問題收貨的話, 除咗過唔到自己果關外, 之後一定會後悔.

點知先後悔既唔係件事唔收貨, 又唔係件事做唔好, 反而係肥龍「省」完同事既心情.

可能係性格上既缺憾 (雙魚座), 又或者肥龍係性情中人, 雖然主要同工作有關, 不論一對一或一對N, 好多時肥龍都盡量「避」免鬧或責怪同事. 無他既, 肥龍自己知自己事, 有時發起脾氣時, 真係咩都無情講, 仲要係有自己講就冇人講. 而且言語之間, 有時難免用字太過直接, 甚至乎「刻薄」. 有時諗, 換轉肥龍係聽果位, 可能都會覺得「礙耳」又或者想駁兩句咀.

另外, 有時都怕同事聽完唔順氣又或者覺得肥龍唔講理由, 索性劈砲唔撈. 而呢個一直係肥龍心中既炸彈, 所以心情真係如履薄冰, 有時要睇好火喉.

呢啲野, 肥龍既然寫得出黎, 又點會唔知呢? 只係有時作為夾心階層既肥龍, 無奈地要人格分裂, 工作時魔鬼(態度), 放工時天使(心情).

而且, 基本上現有班底都係一個一個咁請番黎, 真心果句肥龍真係花咗唔少時間、心機同機會去扶助佢地, 等佢地每個都可以獨立咁應付所負責既工作. 而且肥龍有時講笑話肥龍對佢地喺公司既前途果種着緊程度, 膽敢講句不下於同事自己.

試問喺咁既設定下, 肥龍又點忍心「省」同事呢? 最多就只係做到對事不對人, 講番心中果句咋. 過喺承愛工作上既壓力既同時, 肥龍仲要處理人格分裂底下既矛盾心情, 如果有時正能量下降或處於低水平時, 真係唔易過.

今次, 肥龍又為呢個情況心情忐忑咗一日. 不過今日見番啲同事, 一齊食晏吹吓水, 情況應該冇肥龍諗得咁壞, 咁心情咪好番啲囉!

算吧啦, 肥龍都係無得救架啦!