二十四

上星期返返下工突然發燒，經家庭醫生Ｔｏｎｙ診斷，原來仲有扁桃腺發炎．

食咗差不多一星期消炎葯，結果喉嚨依然好痛，似被火燒，吞口水飲啖水都痛．

結果，決定今日再去阿Ｔｏｎｙ既診所了解一下．

期間，問Ｔｏｎｙ點解或點樣會令扁桃腺發炎．Ｔｏｎｙ答因為抵抗力差．

明白哂，好一句一問一答．

及後，Ｔｏｎｙ覺得可能呢種病菌好厲害，建議不如打針啦．咁你係醫生，又睇咗咁多年，實信你架．

不過喺準備插針之際，Ｔｏｎｙ突然爆咗句：「你條血管都幾粗壯喎！」沾沾自喜之時，葯又已經注射得七七八八．

唔到一分鐘，Ｔｏｎｙ又問係咪覺得好快就唔痛呢？講果陣時從表情上睇非常得意．不過經佢一提，唔知係咪心理作用，的確冇咁痛喎！

當以為可以脫苦海時，Ｔｏｎｙ講咗一句當頭棒喝既說話：「不過呢種葯只係二十四小時有效，如果聽日差不多時間喉嚨又開始覺得痛的話，即係呢種菌仲未清，或者仲要再繼續打多一兩日架～～」

嗯．．．Ｔｏｎｙ，點解你唔早講呀？

貞節牌坊

就算唔存在org chart上部門與部門間，喺肥龍所處既公司，老銷同工程師之間，彷彿無形中永遠隔著一道線．

而呢道線，不分對錯，不分性別，不分高低，卻又可能不（需）分道理，把兩者分開，令各自企喺線既兩旁，相望卻未必相助．

又奈何線既兩方所講既，又係兩套唔同語言，最後互相溝通不了，又或者各持己見．

如果有刻有一方不知好歹，嘗試去接觸另一方既管轄範圍，情況原來就如私自闖入對方既禁地，對方當然唔會欲拒還迎，相反可能換來落閂放狗，迎頭痛擊．

對方所守既，就如貞節牌坊，一寸都唔可以退，頑強抵抗．

而私闖禁地既一方，唔成功的話，就只有倉惶出逃，靜待下一次機會．就算成功，亦要出盡法寶方可成事．

呢個情況，就無時無刻循環喺公司內發生．

不過因為呢啲貞節牌坊，令兩方似近視一樣忽略咗唔少本應（共同）可達到既遠景．雖覺可惜，卻又感無能為力．

而事實上，喺未來一個月內，肥龍就係要準備去拆其中一組工程師既牌坊．

不過如此．

深水埗雜記

雖然話只係以興趣班既心情去返學啫，不過話哂都係一個課程吖，始終需要認真看待嘛．．．何況要交功課呢．．．

忽然發現，手頭上既ｌａｐｔｏｐ既非處理圖像專用型號，兼已經係一年半前既貨色，要行所需要既軟件，真係聽唔到都感覺到佢行到上氣唔接下氣．況且，其實都唔可以只靠上堂時短短三個鐘畫畫畫就成事（我冇咁既天份）．最後，都係決定要添置一台新電腦，可以放工有時間時慢慢畫．

結果，剛過去既假期既一個下晝，就係同好友Ｐ喺深水埗電腦商場渡過．

＊＊＊＊＊＊＊＊

相反讀中學時差不多每個月都會去朝聖，原來咁多年後，發現已經好幾年冇去過深水埗電腦商場．

咁商場入面情況其實差不多，都係咁多鋪頭同人．只係產品唔同咗，而產品售價最後又好似少咗個零．

而且呢度係証明 「Cash is King」既好地方，俾Cash，價錢永遠總係有商量．

＊＊＊＊＊＊＊＊

商場樓下已經冇哂車仔檔．好懷念以前揸住碗麵或碗仔翅企喺街食既日子同畫面．

唔記得留意對面果間食蛇既鋪頭添！

＊＊＊＊＊＊＊＊

好友Ｐ似乎係識途老馬，下午茶時間帶咗我去附近地鋪食豬潤麵（仲要係公仔麵底！）．湯夠味，好多豬潤，食到最後仲有，正！

然後好友Ｐ又再帶我去鄰近既鋪頭買芝麻糕同紅豆糕．可能當時已經成五點幾，或者生意太好，芝麻糕賣哂．不過試咗紅豆糕．唔甜，幾好味！

我就係咁做咗半日深水埗自由行．又其實，好多地方隔一陣再去都幾好吖！

＊＊＊＊＊＊＊＊

言談間，好友Ｐ同我都覺得大家唔知係咪年紀大咗定集中力差咗，以前可以行幾粒鐘睇差不多同一樣野（電腦野來來去去都係果Ｄ）．依家行多半個鐘已經急急準備收隊．而且愈來愈唔想買／抽咁多野．

不過耐性呢樣野，近年真係退步緊～

＊＊＊＊＊＊＊＊

原來隔咗咁耐，骨子裡仲係好似以前讀中學時一樣，去到電腦商場仲係會俾唔同形式既產品睇得好興奮．哈！

暴走

最近可能真係工作繁忙兼腦袋冇休息，每晚放工後身心就似虛脫一樣，做咩都提唔起勁．

有人問我點解唔回留言．我答我最近玩緊頹廢．實情係，感覺就似兩頭燒既香燭，生命正以平常兩倍速度去燒．

而我，只係想事情用應有既速度去進行．

講開呢個狀態，結果，每晚坐回程巴士既時段，往往就係我每晚第一段既休息時間．

尋晚慣常咁登上一直坐開既巴士上，唔駛五分鐘，身體已經進入熟睡模式．

車廂內外發生任何事，途經咩地方，都已經唔重要，亦唔知情．因為我豬咗．

正在熟睡既我，竟然唔知道巴士已經到達目的地．

霎時間，唔知咩原因或感應，身體突然本能似咁責醒．都未有機會定神，就用電光火石既百份之一秒，向外面景物一瞄，確認所處位置後，再用另一個百份之一秒，立即動身暴走落車．

呢一幕暴走，正好被之前坐喺身旁既少女目睹．

落車後，還跟少女四目交投. 我定著眼，隔著玻璃，只見佢臉上一副尷尬表情，彷彿用臉部表情同我講：

「肥仔，你唔係呀化？　咁都得！？」

之後，少女隨巴士離開遠去．

心聲

今晚於一個講座中聽到的一席話.

「生活太忙，經常聽不到自己的聲音！」

「寫作，可以讓我聽到自己的聲音．．．」

「每次下筆至完成寫作，就是自己跟自己說話的過程．同時，自己就是第一位讀者，聆聽著自己的聲音．．．」


＊＊＊＊＊＊＊＊＊

聽後，感受甚深．回家路程中，一直在想．

對於我，寫ｂｌｏｇ的過程，同樣地，就是自己跟自己對話，嘗試去聽自己的聲音的時刻．跑步時的寧靜，呼吸聲，腳步聲，一樣令我實在的，聽到自己的聲音．

每日身邊發生不同的事，有著不同感受，想記下，想表達，想反思．

就是，想各樣種種，變成自己思想中的一部份．

更重要的是，這個自己跟自己對話的過程，可以令我更了解我自己．

而在這裡，我選擇各位成為我的聆聽者，成為我的讀者．

進入另一個世界

三個星期前，貪得意，工餘重入校園環境，開始學習一項之前完全未曾接觸既科目．

雖然只係啱啱開始，不過已經發現，所學習科目既行業，同自己一直身處既行業，模式感覺大大不同．所講既唔係科目內容及行業狀況，呢啲預咗唔同，反而係行業中所謂「技能」或「專業」既界定．

好似自己身處既行業，起職普遍需要大學畢業，然後就以經驗資格，隨工作性質，時間年資，一直累積．講求既係專業，精確，符合標準．

而最新學習既行業，當然亦有所謂既專業資格，經驗更加係必須既．不過，除咗呢啲，對於如何表現「技能」及「專業」，最後就落入曾經參與過既作品或工作上．直接啲講，就係你話你勁，就不如攞出黎睇你幾有料或幾專業，唔係話你有張沙紙就得．講求既重要係實戰力．

確實係兩個好唔同既世界．

咁，當有時習慣咗喺自己既世界生活工作，突然跳出框架，從其他人／行業睇番自己（優勢／趨勢／缺點／不足）及分別時，感覺好良好，好深刻．

而由於已經習慣咗喺某一個世界咁耐，又非常有興趣試下進入另一個世界，見到更多有趣既事．

五個月後的這一天： 依依不捨

由去年十月開始計算，經過五個月既練習及參加不同的比賽，終於到了這一天．

一行五人，全部安全完成半馬賽事，其中好友Ｈ，更於兩小時內完成．

肥龍完成時間約為兩小時零五分鐘（非官方），官方時間要遲啲先知．

雖然未能喺兩小時內完成半馬賽事，主要目標落空，不過有兩樣次目標還係可以做到．（一）由開始一直跑，跑到終點，中間未有停過步；（二）首二十公里路程可以兩小時內完成．

對於未能兩小時內完成半馬賽事，主要原因應該與肌肉鍛鍊不足有關．最後兩公里，其實已經開始腳軟，全靠意志方可以保持一直跑，一直以應有速度到終點．而最後洛克道至維園一段，沿途路人既打氣及支持，感覺好正，為呢段路注入無窮動力．

衝線一刻既感覺依然瀝瀝在目．心情很矛盾，一方面為自己能夠完成賽事及所完成既時間而高興．另一方面，似乎又是一件事情既的完結．

這段期間，眼見自己既努力不斷從完成時間上正面反映出來，越跑，便就越覺得自己可以跑得更快，體能上可以跑得更長．能夠這樣感受到身體傳俾自己既回應，其實算做一種好特別既過程及感覺．

五個月既練習，說實話，其實一點都不辛苦，而且樂在其中．只係在臨近比賽日期前一段寒冷時間，要一面保持應有既比賽狀態外，同時要盡量保護自己身體健康．說得直接一點，就是從來未有過一次，如此這麼著緊自己既身體狀況及飲食習慣．當然，除了身體狀況，本身嗜吃既嘴巴，都要因為這段時候既練習，極唔願意循規蹈矩呜一段不短既日子．雖然偶然會有破戒既時刻，但很快，就會化成為一股動力，好叫自己再加緊去練習．

五個月既磨練，最後就係証明咗自己既規律、努力及堅持．不過，完成過後，到咗呢一刻，原來最後既感覺就係依依不捨．

＊＊＊＊＊＊＊＊＊＊＊

不過有結局，先會有新開始．

下一站，目標可能就係更多既馬拉松．

＊＊＊＊＊＊＊＊＊＊＊

依依不捨既其實仲有一件事.

講真（定講假），我仲有好多野想同大家分享，想同大家討論．而又原來呢個地盤，不知不覺咁已經寫咗接近十八個月（約三百篇）．而寫扑呢個過程，絕對係一個好特別既經驗．

寫扑及睇扑既過程，令我領略都好多平時生活工作上未曾接觸及知道既經驗，見解及故事．而扑友中又似有神乎其技，各自表現精彩及真摰既一面．

咁肥龍既文筆只係一般，而分享既，都只係身邊發生既生活事．

但對於肥龍自己，突然發覺喺題材上，寫工作，寫生活，寫南區，寫旅遊，寫馬拉松．．要寫既，原來已經寫得差不多．又突然覺得，如果再寫，只不過係舊既一個延續的話，只會令人食之無味，不如早歸．

啱啱喺上面先講完，有結局，先會有新開始．雖然突然放棄有啲可惜，不過思緒呢，就真係唔知飛咗去邊．況且其實我唔識鍊金術變魔術，唔會突然間多咗樣新野．無奈新東西，新思維，又非一朝一夕可以培養或爆出來．所以自己都有話而說不出話來．

覺得不進則退．

除咗跑步，肥龍希望喺各方面都有更多既突破．

於是，喺未知下一步情況下．呢篇，應該係我呢個地盤入面（暫時）既最後一篇．

又，如果日後有新既題材，甚至形式，或者再會有一個新既開始.

不過到時大家再見到既，可能係「另一面肥龍」咧．

＊＊＊＊＊＊＊＊＊＊＊

最後，我想借呢度多謝咁多位曾經到過【老sell遊記】光臨、留言、及路過既各路英雄俠女.

因為冇你地既留言及到訪，相信我唔可以保持動力寫到今日呢一刻．而且，每當接收到電郵通知有新留言，早就已經歡天喜地，立刻打開電郵細心閱讀，又再回覆．就算素未謀面，每一次大家既說話及支持，就彷如親耳聽到一樣，非常親切．

另外，更加多謝（曾）有將呢個地盤連結既扑友，多謝你地既交流及連結．令我呢個扑可以喺你既blogroll上出現，實在係我既榮幸．Thanks!

＊＊＊＊＊＊＊＊＊＊＊

祝大家生活愉快，繼續　Happy Blogging! ^^

大家再會了！

星期日，你得唔得閒?

準備好未?

最近不論喺公司或打開電視，不時都會聽到呢句說話．準備好咩野？咪就係「渣打馬拉松」囉！

其實距離比賽日仲有４日，可以準備到練習既，都已經做得差不多，只係希望喺最後關頭，要保持身體健康狀況，注意飲食，盡量休息，同埋做好一啲細微既準備功夫．因為平日肥龍跟一同練習既友人已經習慣咗早上練習，所以對比賽時間（早上７時正）既適應，應該唔會有太大問題，只係喺比賽當日要再早少少起床．

另外，由今日起，肥龍開始準備早上６點左右就起床，然後就到樓下附近地方做些少（約３０分鐘）緩步跑及伸縮動作，再先去返工．

而今晚放工後，就會到維園領取比賽當日所需既號碼布及晶片．

再睇天氣，天文台預報話２月１７日(星期日)天氣如下：

風 　 ：東至東北風5級，間中6級
天 氣 ：多雲，有幾陣雨
氣 溫 ：13至15度
相對濕度：百分之75至95

照咁睇，當日除咗氣溫一般外，亦準備好要同其他跑手一齊風雨同路．準備好，大家都加油！

幾個百份率

放假前，一位同事拿著一份似計劃書既文件見肥龍，打開一望，原來係一份有關喺呢個農曆新年期間為長者服務既計劃，希望肥龍可以捐款支持一下．而同事主要負責為幫助長者喺過年前打掃家居，同埋安排及與長者一齊食年飯，順道問候一下，令長者感受到節日氣氛及其他人既關懷．

又，肥龍其中一位親戚參加咗苗圃行動舉行，展開為期約一星期既【新春助學行北京】活動．由初三日起，經已出發到北京，依家應該仲係在路途上努力緊．

同事親戚，出錢又出力，有時間參與，當然最好．其他人就算因為工作所限，未必可以出力，咁其實出錢都可以係一種支持，一份心意．而肥龍就係多數係後者．

相信各位每年農曆新年都有機會派同收利是．除咗個別情況（如公司老闆或大富之家），一般利是銀碼大概約幾千至一萬元左右，如果折合計，又大概為年薪中幾個百份率．當然，派同收利都是講意頭，而習俗亦有其可觀性，但如果各位願意把呢幾個百份率中既部份或全部捐俾其他更有需要既人士，呢個意頭可能更大更好更有意義．

而有其中幾項肥龍覺得一直非常重要更需要大家持續既幫助，（絕對分次序）分別係（一）老人健康及生活，（二）各級教育及（三）傷殘人士醫療及生活．因為，喺歌舞昇平中，老人小童及傷殘人士所遇到既情況，大都唔會隨經濟轉好而變好，卻又往往會被社會忽略既一群（一環）．