人肉漫游

打工有度好,自從聖誕節放大假後,肥龍一直沉醉喺假日情緒,雖然已經返緊第二個星期工,但精神仲停留喺打邊爐狀態.

心情好矛盾,又好討厭.

好想做野,但撻唔著火.就好似啱啱考完會考,提唔起勁再做任何野....

今晚肥龍放工更無聊,百無聊賴行到公司附近巴士站,於是見到咩車(巴士、小巴)就上咩車.

結果上咗224X去咗尖沙咀中間道.

諗住行去天星碼頭,路經星巴克,買咗杯焦糖咖啡,坐船過中環.

揸住杯咖啡,望住維港夜景,慢慢咁搖去中環,原來咁寫意、寧靜.

腦海浮現起人在中環,做其中環博客,然後迷失中環....

抬頭見中環高樓大厦,忽然想起朋友L,望住佢返工之處時,突然無聊打電話走去揾L問佢辦公室喺幾樓.

問七十六樓係咪頂樓? 原來七十七樓先係....

一路同L講電話, 落船跟往坐巴士返屋企.

喺氣温十一、二度下,喺屋企樓下附近買咗盒壽司當晚餐....

L到屋企,要收綫.

好耐無試過咁無聊,言行間有啲似飲大咗.

其實只係飲咗杯咖啡.

__________________________

朋友L: 對唔往,要你陪我講電話,仲要聽我講廢話....不過多謝哂!