31.1.07

生命無常

前幾日肥龍收到客戶打黎既電話,謂佢個大老闆(公司負責人)早幾日過咗身.

再睇到台星許瑋倫車禍離世,發現生命原來好脆弱,而死亡可以黎得好突然,無得預.

早排,肥龍睇咗本漫畫叫<死亡預告>.故事其實幾特別.

漫畫主要描述由於日本因人口繁多既關係,近未來日本通過了一個名為「國家繁榮維持法」既法律,為咗讓國家能永續繁榮,及增加年輕人意識生命既危機感, 某啲被選中既年輕人將收到一張「逝紙」,也就是通知生命只剩下24小時,等同於正式既死亡預告。

故事就係講喺人生呢段最後既24小時內,故事中人會如何渡過...有人會逃亡、有人會控訴,更有人會展開報復.

肥龍諗,就算有得預同無得預,其實對自己分別唔大,反而對家人既影響及打擊可能更大.不過如果真係得番24小時,肥龍一定揀同屋企人渡過.

而且因為你同我都唔知個鐘幾時到,所以老土啲講,做人真係要居安思危,做事就應該要盡其在我啦.

27.1.07

種子葉樹

兩年前起,肥龍習慣每個月預留幾舊水捐俾所屬學校(大學).

其實講真幾舊水對肥龍、對學校黎講只係一個好細既數目.

有時同朋友、同事,甚至係間中買野都會駛咗去.

不過,成件事肥龍睇係對學校感情既堅持及歸屬感多於其他目的,甚至可以話無其他目的.有時學校為表謝意,話會為支持既校友喺書本或其他地方命名,老實講,真係多謝兼唔駛啦.

反而有時肥龍接到一啲由學校義工(通常係仲讀緊大學)打黎既電話,好多野就有啲盡在不言中.

佢地師兄前,師兄後咁嘗試去推介或詢問唔同範疇既內客,雖然大家素未謀面對面,但都可以感受到果份熱誠.

除非佢地打黎果陣時肥龍真係好忙或者唔方便講電話,否刖一般都會好客氣咁慢慢聆聽,好有耐性咁一一回答,直至收線為止.

因為大家都係為學校出一分力.

而且肥龍都想俾所有首曾經及將會打電話俾肥龍既師兄師弟、師姐師妹知,其實好多人畢業後好關心學校既情況同發展.

如果烏托邦咁去諗, 肥龍都希望藉呢啲機會, 身體力行去感染佢地. 希望有朝一日當佢地離開學後,可以保持呢顆心,繼續為學校出力,並且繼續感染未來及幾多校友去出力.

到時真係做到每人幫少少,集腋成裘就最好啦.

26.1.07

陳國公主

肥龍鍾情國內歷史/古裝片除咗因為故事、佈景及製作具心思外,另一個注意力往往都落咗喺演員上面,特別係女演員.

上次<<神鵰俠女>>發現小龍女及郭芙,今次<<爭霸>>就有陳國公主.

真係唔明,點解會揾郭小姐飾演西施?





再黎多張...

24.1.07

飛黃星戰

摷開舊檔案時再睇番, Out就Out梗架啦,而且可能好多人已經睇過.

不過都係整上黎先算.起碼好鍾意隻背景音樂. ^^

做壞人,攪破壞一樣,講Strategy!

21.1.07

寫扑我見

之前睇開既好幾個扑因為唔同原因理由相繼暫停,甚至結朿.肥龍當然覺得可惜,不過亦好明白扑友既理由及折衷.

而與此同時,亦為肥龍反思自己寫(睇)扑既心態.

喺未有網絡、MSN及扑之前,其實都有好多人有寫日期既習慣,只係無公開咁啫. 而直至目前為止,亦有好多作家、文字工作者繼續喺傳统媒體發表文章及專欄.

但要要喺傳统媒體發表文章, 就算閣下知識如何淵博,文筆如何生輝,除非閣下認識傳媒人或喺媒體工作,否則絕對唔容易獲得機會. 或者另覓其他途徑例如投稿,碰吓運氣.

有咗扑,發表意見變得方便,容易.

肥龍有時諗:人生在世,每日無時無刻都會遇見、接觸、接收、發放由不同渠道及方法既訊息,而變成每個人既經歷及故事,再深一層成為知識、經驗及智慧.

講真,身邊發生咁多野,如果真係要寫,題材應該唔難去諗.加上依家網絡互聯網發達,真係可以話咁易就將自己所見既一事一物及經驗同陌生人分享.

而肥龍寫扑既目的主要係吹吓水、發吓噏風. 如果認真咁講,可能係想將發生喺自己身邊發生既事作記錄,甚至好似面鏡去認識自己.

比好多扑友,肥龍寫扑時間唔長,只有半年左右,過已經經歷過寫扑既起伏.

由最初傻吓儍吓開始寫,到後來嘗試諗一啲題目去寫,再到依家不定期咁隨心意,見到咩或諗到咩去寫.

而有時又貪得意喺其他扑留言.老實講,肥龍亦曾為見到有其他扑友將"老Sell遊記"成為連結開心過.始終覺得所寫既得到其他人認同及賞識,再寫扑都會積極啲.

亦有試過因為寫扑寫到半夜一兩點.

話時話,好多時(其實絕大部份時間)肥龍都覺得自己才疏學淺,工作經驗其實仲係有限公司.所見所聞往往就已經為事實既全部.

不過...好在有機會睇其他人既扑去擴闊視野,而且好多扑都好有趣味性.

但係任何事花太多時間都會有反效果,寫扑睇扑亦然.

所以依家,肥龍每天當睇專欄咁大約用十五至三十分鐘睇扑,亦絕少留言.至於自己嗰個,亦只會想寫就寫,無話唔寫得唔得.

興趣啫...無謂妹仔大過主人婆.

打工事業至要緊.而且肥龍仲有好多野應該做,等住去做.

13.1.07

定型料理

最近開始睇"妙手小廚師II"漫畫(即天才小廚師--- 味吉陽一), 讀到一段非常有意思既情節.

情節大致係話拉麵係一種會進化既食物,配合不同時代既嗜好,不斷地變更所使用既材料同調味料...而拉麵可說係一種完全無所謂固定型式及材料既年輕料理. 唔似烏龍(烏東)麵咁已經定型, 由越係經驗老到既廚師,做得越好.

肥龍睇完諗,又真係喎!無怪會有味增、魚、豬骨等湯底,再加上唔同地區既特產/名產如黑豚肉、長脚蟹腳,秋刀魚、北海道牛油呀. 然後用上唔同或獨特既煮法,變成唔同風味既拉麵.

如果要肥龍諗類似既港式食物(定型料理 vs 無所謂固定型料理),應該會係雲吞麵同車仔麵之分.

可能由細食到大,肥龍好鬼鍾意食車仔麵.記得小學時讀下午班,有時龍媽無煮晏飯,就去學校附近車仔麵檔醫肚.五亳子個麵餅,肥龍鍾意一粗一幼,再加十個八個餸,五六蚊攪掂.

然後狂落辣椒醬,粗中帶幼食就最正.如果再飲支媽媽奶,就必定肚疴,萬試萬靈! ^^

另外肥龍有時間時又會好奇周圉貢去唔同地方試吓啲車仔麵咁.

可能因為地緣關係,呢度(南區)會有魚札、魚皮餃,炸魚皮,手打魚旦咁....有陣時諗,喺南區食既車仔麵會唔會同喺九龍新界果邊食既好唔同呢?

12.1.07

鍛鍊音樂


因為要準備渣打"半"馬拉松關係,每星期都要去跑步練吓氣練吓耐力咁.

講開蘋果,提開埃扑,肥龍早排本來貪得意心思思想買對一剔同蘋果合作既"賴畸+"(或Nike+)跑鞋黎試吓,睇(聽)吓所帶來既跑步新體驗係咪真係好似所講咁過癮. 而其中特別有個分唇肥龍覺得幾得意既--- Power Song (鍛鍊音樂)設定.


咁如果真係買咗既話,肥龍既鍛鍊音樂就會係...



加油! 努力! 仲有六星期! ^^

10.1.07

白帝君臨


白色旋風又再吹,天下再無寧日!

一直只聞樓梯響,但原來樓梯行出黎後仲得人驚!

第一次係隨身聽市場,跟住第二次係流動影院,今次終於到流動電話,上網連線...

如果有睇Steve Jobs既演佈會,你會發現及明白何謂設計,乜野叫改變,點樣叫突破.


iPod, 流動電話,上網連線, 三為一體!

群眾屏息以待,細心聆聽,繼而讚嘆!

果股氣勢,大有白帝君臨低聲道:"各位,久等啦! 我出黎啦,放馬過來啦!"

聽完瞓唔著既可能係諾記、索愛記、三星記.

又一次意念、設計,市場推廣既示範作.

__________________

不過唔知可唔可以支援中文短訊呢?

9.1.07

鍊金術師


肥龍好鍾意呢套卡通(你睇呢個扑既網址就知!),裡面提到既鍊金術同等價交換更愈睇愈有意會.

舊年花咗百零蚊買咗三個硬膠Figures,雖然唔郁得,但造型比例幾正.

最近睇書上網到灣仔188商場發現MEDICOM出既鍊金術師(愛德華+艾爾), 造型比例同配件比上一套正好多.手腳又可以擺"鍊金陣鋪屎"! 勁!


不過就要一對買,盛為二千大元!

肥龍以為個價遲吓會跌啦,點知兩個星期後再問,好似股票咁,升咗兩百,至二千二! @_@

為免玩物喪志,而且要二干大元,都係淨睇好過買. 有時心頭好未必需要擁有.

8.1.07

人肉漫游


打工有度好,自從聖誕節放大假後,肥龍一直沉醉喺假日情緒,雖然已經返緊第二個星期工,但精神仲停留喺打邊爐狀態.

心情好矛盾,又好討厭.

好想做野,但撻唔著火.就好似啱啱考完會考,提唔起勁再做任何野....

今晚肥龍放工更無聊,百無聊賴行到公司附近巴士站,於是見到咩車(巴士、小巴)就上咩車.

結果上咗224X去咗尖沙咀中間道.

諗住行去天星碼頭,路經星巴克,買咗杯焦糖咖啡,坐船過中環.

揸住杯咖啡,望住維港夜景,慢慢咁搖去中環,原來咁寫意、寧靜.

腦海浮現起人在中環,做其中環博客,然後迷失中環....

抬頭見中環高樓大厦,忽然想起朋友L,望住佢返工之處時,突然無聊打電話走去揾L問佢辦公室喺幾樓.

問七十六樓係咪頂樓? 原來七十七樓先係....

一路同L講電話, 落船跟往坐巴士返屋企.

喺氣温十一、二度下,喺屋企樓下附近買咗盒壽司當晚餐....

L到屋企,要收綫.

好耐無試過咁無聊,言行間有啲似飲大咗.

其實只係飲咗杯咖啡.

__________________________

朋友L: 對唔往,要你陪我講電話,仲要聽我講廢話....不過多謝哂!

7.1.07

畸寶冷飯

原來冷飯亦會好好味.

今個週末肥龍成日留喺屋企執野、整野. 開住電視,睇往畸寶四十一電影台,睇番十零廿年啲港產片,發覺原來仲係好好睇!

尋日睇史提芬周既逃學威龍,仲係覺得好攪笑!

今朝睇哥哥,梅姐及曼玉既緣份,依然咁型,音樂好聽故仔寫得好!

下晝黎套最佳損友闖情關,雖然冇第一集咁好笑,但當睇番劉華,馮淬帆,叻哥,曹查理(渣古兄?!)既演出,都仲係笑爆嘴!

反而睇番宜家最新果啲戲,除咗個別一兩套外,其他睇十五分鐘已經想瞓.

點解港產片會咁.....

係因為無錢?

無好劇本(講真以前果啲都好爛!)?

無好演員(定係來來去去都係果班演員...)?

或者其他原因影響呢?

6.1.07

數碼四寶

呢個新年,可能真係市道暢旺心情佳,不自覺咁買咗唔少野....

科技發達,而且肥龍又鍾意High-Tech野,理所當然咁當然就買數碼相機呀,遊戲機呀等...

肥龍忽然好奇想知,有幾多人都係買咗呢四寶呢(Wii, NDS, Canon 850IS 同埋iPod Nano)?

1.1.07

貳零零柒

新與舊交替,貳零零柒年既第一秒,你做緊咩?

肥龍就係"噏嗲"緊個扑,同睇住電視班柴娃娃喺度唱皆大歡喜! ^^