31.1.09

五萬五千人中



話咁快又到咗領取渣馬runner pack(選手號碼布,記錄時間晶片,比賽當日行李牌/袋,比賽紀錄T恤,紀念品等)既時候.

到咗維園嘉年華會既地點,可能比原定時間早咗少少(原定早上十點正),發現未見往年排隊既人龍(往年就算係半馬大概都要排十五至三十分鐘左右).最後只係用咗十分鐘左右,就已經攞哂肥龍之外,及另外三位同事既runner pack(因為星期六兼住港島關係,做咗順水人情)啦!

雖然已經係第四年參加,不過當每次收到份runner pack既時候,心情都係咁興奮咁緊張架!




不過對於紀念品方面,特別係紀念牌,唔知點解定係有咩特別原因/理由,款式形狀主題每年都係唔統一,好似今年就用牛年及150年做主題,但係如果冇記錯前年就用大會吉祥物(好似隻蟻).咁,如果將往年既紀念牌放埋一齊,感覺又好似差少少喎~

如果將款式形狀主題統一咗,變成20XX年Y(生肖)年馬拉松,咁跑足十二年,咪就可以湊好一套十二生肖馬拉松紀念牌!到時除咗夠哂特別兼紀念價值,簡直係有錢都買唔到既時間見證呀!

又,有幾多人好似肥龍一樣,一直保留住每次比賽時既號碼布做紀念呢?

仲有...八日!

********************
2009 渣打馬拉松資料

‧ 半馬拉松(21.1 公里) 報名人數:14,000 人
‧ 全馬拉松(42.195 公里)報名人數: 8,000 人
起點 : 尖沙嘴
終點 : 維園

‧ 10公里賽道 報名人數: 33,000 人
起點 : 北角
終點 : 維園
途經 : 東區走廊

28.1.09

CCTV CUP: English Speaking Contest

今晚揸住個遙控左揀右揀,亂打亂撞睇到呢個節目/比賽.

真係幾好睇喎.特別係即場題目部份、主評判提問及參加者即時回答對質環節,有唔少唔錯既觀點呀.況且要對住一班人講野(仲要有鏡頭拍攝),再用非母語去講,確實唔容易架.

唔知係因為文化上差異定係自己喜好關係,唯一有些少挑剔就係參加者說話時既面部表情及動作.雖然話係Speaking Contest,而且說話時當然會有相應既表情及動作,不過有個別參加者又真係做得過咗火少少.呢兩個部份,特別係與西方人演講時既表現方式作比對,自然會明白肥龍所講既分別.

不過呢啲都係細微部份啫,整體上絕大部份(應該係所有)參加者都表現出充滿準備及自信,亦係吸引咗肥龍睇咗成個鐘兼冇轉台既原因.

25.1.09

年三十晚

話都冇咁快,經過一年既衝刺,今日就係年三十晚啦~

年中離開咗自己熟悉既行業,走到一個新行業、唙另一範疇再打拚.距今只不過短短六個月時間,仍然需要努力投入,打好基礎,希望可以日後有更多發揮機會,更重要可以喺所屬工作崗位上做出一點成績.

今朝雖然天氣寒冷及乾燥,仍然跟三位好友完成兔年收爐之練習.之後再加兩課22km練習,就正式完成今年為渣馬賽前練習既準備.

而再休息一陣,今晚就會參加由中學同學間安排,十年如一更唔清楚第N年度既籃球聚會.與一班相識超過廿年既同窗好友等嘻嘻哈哈咁出身汗,一齊渡過呢個年三十晚.

又,喺通知今晚安排既期間,有人半講笑提議如果有邊位尚有保存當年既PE衫(兼仲著得落)的話,到時就著住黎打籃球啦!

最後一呼百應囉.

咁...肥龍咪膽粗粗,番箱倒籠咁去搵,最後喺一堆舊衫中搵到圖中呢件已經破爛不堪兼起哂毛粒既PE衫.



不過問題係...究竟如何將呢件都已經唔知係咪中碼(當年肥龍都ok fit過下)兼有些少縮水既背心,套入已經係事隔多年又肚滿腸肥既肥龍身上呢?

如果著爛咗依家買唔番架啦...

最後深呼吸一下,將背心慢慢隨頭部套下.除咗緊咗少少,竟然著得落喎~(哈,真係好開心呀,都不枉最近練習半馬既成果!)

只不過,胸前果三個英文字就...嗯~嗯~嗯~

(本來呢篇想叫【糯米大腸】,不過新年流流,冇謂影響大家食慾,都係算吧啦.)

***********

最後,亦借呢度向大家拜年:祝牛年身體健康,心想事成!

23.1.09

我的練習記錄 (23 of 24)

四個分段時間

最近既練習雖然仍然保持一星期三次,不過練習距離就由之前既短課(9km)增加至9km/16km/22km 上.初步時間掌握唔錯.大致可以保持平均約5分鐘20秒完成一公里.耐力上,亦特別加強最後三公里既訓練,以防止跌watt情況再次出現.

距離比賽仲有十五日,之前既準備功夫亦差不多,再進一步既提升機會唔大.只希望保持身體健康及充足休息,另外喺最後既五課練習中可以再跑三次22km既距離,務求可以喺穩定既狀態下,去完成第四次渣打半馬兼挑戰自己成績.

今晚特意上渣馬網頁下載咗份「賽道高度圖」,貪得意就賽道形勢去計算出各分段及完成時間.

依照計算,如無意外,只要發揮正常,目標將設定為1小時55分鐘至2小時3分鐘內(今年月初美津濃半馬成績)完成.

而要達成呢個目標,咁呢四個分段時間:28分鐘(5km)、53分鐘(10km)、79分鐘(15km)及107分鐘(20km),就一定要記到實一實啦!

13.1.09

踢波除咗講球技之外...

仲要講演技!

可惜遇著一對睇唔明既球證及旁證~結果嗌「CUT!再黎多Take!~」



當出現「上帝之手」、「插水」、「詐死」之後,以後睇波可能又要留意多一樣.

不過...你話諗出呢套野嗰(幾)位Clever好,dirty又好,按照球例,呢球可算係valid goal既. 但係如果有粉絲或有其他人話過程次要,勝出、入球最重要,咁球例以外,又真係冇咩值得好去講.之但係喺運動場上,除咗賽果,始終仲有「Fair Play」呢一套囉.

而且試諗下呢場波有幾多人睇?又當中睇咗既,你估有幾多人會有樣學樣呢?再咁落去,第日踢波除咗講戰術排陣球技體力之外,可能仲要防「古惑」.另外呢類小把戲,對青年球員有益定有害,都係留番俾各位自己諗好啦.

講返場波,本人非紅魔粉絲,果晚純粹睇波,其實紅魔整體佈局及各方面發揮都喺車仔之上,贏得合理架.又如果可以唔出呢套野,呢個賽果更值得尊重囉.話時話,講到底車仔後防唔集中又爭唔落既~!

11.1.09

Haile Gebrselassie

作為漸漸入局既長跑愛好者,自然開始更留意有關長跑及長跑手既資料.

咁又喺一次偶然下,因為標題吸引(好似係講Heros of running 2008),就買咗本RUNNER'S WORLD黎睇.

七位Heros既故事真係好好睇.好睇在唔單止每位喺自己參與既項目或比賽中獲得好成績,更特別係每位跑手背後既故事,及佢地如何利用跑步或參與跑步事業去改變世界、挑戰及突破自己極限.

而其中一位就係Haile Gebrselassie.

Haile 既笑容充滿自信又單純.而佢既表現,真係可以視impossible is nothing. 喺2008年既德國柏林馬拉松,佢就以破所有分段時間既表現,以兩小時三分鐘五十九秒,打破佢自己所保持既世界紀錄!

而呢一次,已經係佢第二十四次破馬拉松世界紀錄.已經年屆三十五歲既佢,依然相信自己可以跑得更快.雖然未必係由佢創造,不過Halie相信有一日,或者有一位跑手可以兩小時內完成馬拉松.

跑步以外,Haile 利用自己既財富及感染力,協助Ethiopia部份人喺就業、教育及愛滋病方面工作.

有興趣的話,可以睇埋雜誌RUNNER'S WORLD就Haile寫既文章. 或者睇完就會更了解喺堅強耐久既體魄下,究竟咩原因及理想令佢繼續跑落去.

REVEAL Part I


REVEAL Part II


REVEAL Part III


2008 Berlin Marathon WR 2:03:59

世界真細小

Samsara,

就算你冇話點唱,講出黎你都未必相信,其實我個腦呢幾日都係哼住呢幾個音呀~哈哈!

又,相認既過程及對話實在超爆笑.世界真細小囉.

下次沿途睇下會唔會見到你/我啦.

10.1.09

我的練習記錄 (22 of 24)

練習進入最後階段

距離渣打馬拉松尚餘廿八日,練習正式進入最後階段.除咗保持兩晚十二公里既練習,最後既三個週末,都會安排十八公里以上既中課練習,總之就係可以令雙腿肌肉及力氣完全習慣及應付半馬既距離,同跌watt講bye bye!

跟好友H提及上次跌watt既情況,H提議肥龍嘗試將均速降低少少至五分鐘三十秒一公里.大意係每公里刻意跑慢少少,保留氣力,可能對整體(特別最後段)表現更有利.肥龍半馬目標只係兩小時內,H比肥龍強,目標更高,直指一小時四十分鐘內完成(去年P首次跑半馬就以一小時五十四分鐘完成,勁!).

今朝就按照呢個均速去跑,感覺唔錯,期間仲可以同H傾幾句偈添!每公里既分段時間又可以一直保持.身體似在回應尚有餘力喺後段再衝刺.

另外,亦想跟已報名既好友(好友LKH,好友LCO,好友LKL,好友CKC,好友LHY,好友C, 好友哥哥LCW)、同事(同事M同事C)及一眾bloggers(on dogbacakaraak,samsara,三點)講聲「大家都加油呀」!

(原來肥龍認識唔少朋友都有跑渣馬架!註: 今年參加半馬十公里.

二月八日維園見!

4.1.09

Mizuno Hong Kong Half Marathon 2009



時間達標

上篇講到目標完成時間初定喺一小時五十二分鐘至兩小時零八分鐘之間. 由於今次為今年首個半馬兼作為渣打半馬既熱身賽,都係保守少少,就決定企喺上圖展示既「兩小時」起步區準備.

之後既情況,就決定由雙腳話番俾肥龍知道,究竟到時係放定係留.

結果以兩小時零三分鐘完成全長廿一點七公里既半馬.亦暫時為個人最佳半馬完成時間.

唔可以喺兩小時內,當然有少少失望.不過既然長跑長有,呢個目標,就要留番喺黎緊既渣打半馬時去突破喇.


十五公里後跌哂watt

賽前策略係希望一直保持約每公里五分鐘廿秒既均速去跑(當然會因為上落斜會有些少唔同),直至到終點為止.整個過程其實一直依照計劃跑得幾順利,特別係首十五公里,分段時間甚至比之前兩次十五公里比賽跑得仲要快.

不過好可能之前比賽及練習最長都係十五公里內,雙腿肌肉已經習慣咗呢個距離既力度及耐力.結果喺十五公里後,雙腿及力氣忽然好似無咗「勁量仔」一樣,迅速走樣~

期間(大概跑到十七公里時),望一望腕表,曾經心算可能勉強可以兩小時內完成.不過當再留意每公里均速時,發現原來首十五公里既每公里五分鐘廿秒均速,喺十五公里後已經突然急跌至每公里六分鐘以上.

咁喺每公里多使用約一分鐘既情況下(加埋就係約三分鐘),再加上後段體力下降,實在無謂為咗呢兩至三分鐘要谷得太盡及冒險.否則如果因為咁樣而受傷而錯過咗渣打半馬及東京全馬就好可惜啦.

況且可以打破自己最佳半馬完成時間都已經ok啦.最後就選擇咗用最舒服及應付到既速度完成餘下既路段.

依呢個完成時間及經驗,亦對下個月渣打半馬既準備注入唔少信心.而渣打半馬既準備及倒數亦立刻開始.未來一個月主要集中喺中、長課之上.

仲有三十四日.

3.1.09

彷彿是Mock Exam


雖然話每次比賽當然係全力以赴,但當中點都會有輕重之分既...最近所跑既比賽,路程距離一般都會喺十至十五公里之間,講到尾無非係針對耐力及均速既鍛鍊,及絕大部份都係為前渣打半馬準備及提升狀態及之用.

話說開始參加本地其他比賽做「個體戶」,都只不過最近兩年既光景.而且都不過係約一個月參加一個比賽.除咗渣打半馬(已經跑咗三屆)外,其他大多數只係第一次跑既啫,所以對於完成時間既期望呢...嗯,其實真係冇咩概念.而且,喺唔熟悉及唔了解賽道路面起伏既情況下,每次比賽既過程,講真同摸著石頭過河無咩分別.通常都係一路跑一路適應,期間再留意自己剩餘既體力,至於要收要放,真係跑完先知龍鳳.

聽日就係大美篤半馬比賽,由於距離上次北潭涌十五公里比賽只係相隔兩星期,兼且比賽後要休息,期間尚有聖誕節及新年假期,莫講話練習,保持體重及狀態都唔係易事.玩下手,隨時之前辛辛苦苦練埋既都影響埋.

結果最近兩星期只有四課,完成時間總算冇咩走到樣,只不過心情就有少少緊張.而今次亦係渣打半馬前最後一項比賽,雖然成績只係做參考,不過心情真係有少少似準備Mock Exam囉.除咗練習頻率因為上面情況所講減少,又今次屬半馬距離,究竟可唔可以兩小時內完成,聽日自有分曉.如果有留意右手面肥龍既半馬成績的話,都知肥龍最佳半馬時間為兩小時零八分鐘.又經過最近一年既練習及準備,一公里約需要五分鐘廿秒左右完成的話,計算出黎既半馬完成時間為一小時五十二分鐘左右.

初步計,肥龍聽日既目標就會定喺一小時五十二分鐘至兩小時零八分鐘之間.

嗯...身體狀況似乎唔錯,左腳既傷亦應該冇大礙.唯一要留意就係最近天氣寒冷(預計聽朝十四至十八度左右),比賽前一定要做夠熱身.咁...今晚一於放鬆心情,早啲休息啦.(上次北潭涌比賽前一晚,無緣無故零晨三點幾竟然醒咗~結果眼光光等天光~)

1.1.09

2009年給自己的一個字


每年,就算工作、生活上有幾忙或者有幾得閒,都會習慣為自己列出一啲年度目標,好為自己喺新既一年定出一個方向,唔駛好似盲頭烏蠅咁胡亂去衝,浪費精神及時間.

今日係2009年1月1日,好想寫一啲說話、目標出黎,希望令自己既目標更清晰,更順道鼓勵自己,為自己打打氣.

然而,目標雖然唔算得上好多,而且年中亦可能會出現變化,不過如果要今刻一一數出黎既話,其實都會有少少壓力架.而且,對於自己,每個目標既得與失,其實唔係最留心既部份.反而喺做每件事中可以令自己投入,盡能力去做,可能更覺重要.

或者咁講,自己享受成果,重視過程,更為完成每件事而滿足.當然,自己梗係唔鍾意落空既感覺及滋味啦,而且邊有咁鬼多正能量吖.不過勝在夠阿Q,好快又會爬起身再黎啫.每完成一件事,代表自己既人生經驗上又多了一行.而每一行亦將會成為獨一無二既記憶.

今年將會發生既,都會係一種新體驗.

所以今日為自己給一個字「成」