30.12.07

半馬煉成


經過尋日一段由香港仔經域多利道、沙宣道到瑪麗醫院既探索後,一條約兩個小時既練習路線(半馬距離)大致成形.

- 香港仔至淺水灣來回,約55至60分鐘;
- 香港仔至瑪麗醫院來回,約50分鐘

距離正式比賽約仲有六個星期,依家主要針對既,係距離及耐力上既鍛鍊.速度上反而可以保持.由香港仔上斜至華富邨一段跟西隧一段無論斜度、時間上都幾類似,可以多加利用.因為始終覺得半馬路線最困難及辛苦既一段,就正係由西隧底上斜至干諾道天橋既一段(其實肥龍從未可以一口氣谷哂成段斜路架~),希望喺一月內,可以安排一至兩次跑畢全程既練習,克服困難.

咁兩個小時既目標,就可能達到.

粉紅救兵


間中都會收睇【粉紅救兵】呢個節目,其實除咗當中食物及室內設計部份環節外,其他內容,感覺只係不大了了.

每集都會有一位主角及一個特訂主題 (如結婚週年、朋友派對、路演等).然後五位主持就分別會為該集主角從衣著、社交、住所及飲食環節上,對症下藥、度身訂做一場「大龍鳳」.講真,如果可以好似節目入面不計成本,加上個別刻意安排,自然有求必應.

不過對於呢個過程,有一點覺得非常有趣有意思.喺提出任何建議之前,五位主持都會嘗試先了解或發掘該集主人性格上既特質及喜好,跟住利用唔同形式設定或方法,再將呢啲特質發揮及表現出黎.

性格特質係牡丹,表達形式係綠葉.

每人都有唔同優點同缺點,又有三衰六旺,更有情緒高漲低落.最困難既情況係當失意情緒低落時,會唔會忘記咗自己既優點及所長.另外,喺工作生活上,會唔會因為當中既勞碌及現實,好易忘記自己既優點及所長,又或者已經忽略理想或嗜好,只係集中去應付生活所需,結果反而好易變成咗「酒肉行屍」.

有時都會喺唔同渠道接收到「be yourself」、「做回自己」等既訊息,至於點樣去做,其實可能可以好簡單,重點就係要將各樣性格上優點及本身所長,重新recall出黎.相信任何人,都有能吸引他人既一面.而呢一面,往往就係可以表現出最自然既果一面.而且人性本善,只要唔係壞心腸,只要交出真既一面,相信唔難搵到知心友知音人.

至於呢五位主持,有時就覺得佢地既工作,就係喺過程中幫已經變咗「酒肉行屍」既主角,recall番可能本已被遺忘既牡丹(優點及所長)出黎,加上綠葉(包裝),重新展現俾身邊既朋友親人及伙伴去認識佢.

28.12.07

情報無限

最近正為下個月中到日本仙台既旅遊作準備. 因為今次目的主要係溫泉及休閒方面, 行程及路線安排上盡量選擇偏離市區既地點.一般香港買到既(中文)旅遊書及所介紹既地點並唔係咁啱使, 所以唯有轉去搵日本出版既旅遊書或上網中尋. 不過喺開始搵資料後, 實在不得不佩服日本人搜集情報能力. 有時覺得日本人真係咩都可以研究一餐, 興趣專門化, 仲會一直更新豐富下去.

雖然為全國第十二大城市, 不過相比大城市東京、大阪, 仙台其實多一份林蔭處處, 僻靜樸素及充滿古風(因為伊達政宗關係)既氣息, 加上充滿自然景色, 又有另一種吸引力. 而所買既旅遊書, 就由歷史文物、建築、交通、飲食、祭事、購物手信、運動、郊遊資料等寫足一本書, 內容應有盡有. 而詳細程度, 直情好似睇緊遊戲機攻略, 一步一步咁去介紹, 未去都已經非常期待.

另外當上網搵各種資料時, 更發現一些歷史建築物如【瑞巖寺】、【大崎八幡宮】、【東照宮】等廟宇, 已經網上化. 除咗會設有本身既網頁及附有以唔同語言(中文、英文及日文)編寫既相關資料可供下載外, 甚至更清楚刊登全年唔同時間舉行既祭事概要, 非常user-friendly及實用. 咁旅客就可以就本身時間安排行程, 更有機會可以一窺探當地文化及傳統儀式.

交通方面就會好準確咁記低每個站、每程車既行駛時間及收費, 而且顏色標記鮮明, 遊客唔難跟住去個地圖乘坐及安排心目中路線. 至於今次重點溫泉上面, 除咗會圖文並茂咁介紹唔同地點溫泉既特色外, 最欣賞就係每每喺介紹食物時會寫低一啲量化既描述如食拉麵時碗既直徑及深度, 食物數量等, 到要落order時就唔會出現睇相時好大碗又原來其實係迷你裝既情況.

所以, 雖然唔識聽同講, 如果只去幾日, 用上呢啲情報攞喺手, 有時只要加啲簡單中文生字, 都可以應付得黎嘅.

唔係長人地志氣, 不過肥龍除咗欣賞如此水平又平民化既情報, 更希望可以學習呢種重視情報精神.

27.12.07

認識疏遠

曾經有個以下一番對話. 大意係喺人生每個階段就會遇到唔同人和事. 而某啲事物可能只會喺某一段時間去做, 未必會持續一直做落去. 之後過去咗的話, 就唔會重提再做.

而身邊相遇既人亦一樣, 存在著唔少過客. 喺人生中總會遇到及認識唔同既人, 喺唔同人既身上, 可以搵到令自己得到快樂既時刻, 認識及學習到新事物甚至新朋友, 不過呢啲相識既人, 到後來又可能會因為其他原因而開始少見面, 疏遠. 而呢個認識、疏遠過程係不斷發生.

聽落其實覺得有啲悲觀但又可能係現實既寫照. 對於事物, 肥龍有類似既想法. 有唔少興趣及嗜好, 的確會隨年齡、身體狀態及心態上既轉變而變化. 好似做運動, 讀書時肥龍絕對係運動份子, 不過畢業後, 相同既運動再繼續做既, 真係少之又少. 只係近兩三年又再興起跑半馬拉松, 又無時無刻抽時間去練習及比賽. 不過會再跑幾耐, 真係冇認真去諗過. 大概到一刻突然唔想再跑就唔去再跑. 不過, 多數又係有新攪作囉.
另外, 可能自己心思思好多野想試, 咁又覺得喺某段時間去專注做一件事其實係好型, 兼唔駛令自己遺憾, 又值得回味既生活方式.

至於朋友, 呢個道理反而唔係完全認同. 可能就算係萍水相逢, 不過如果只係因為時間關係而感情變化, 確實可惜. 雖然人係需要進步, 但所指既進步可能係指生活上既智慧, 交朋結友上既智慧. 肥龍有幾個相識超過十年、十五年甚至廿年既朋友, 其實一年見面可能只係幾次. 又當中有一兩個, 就係曾經經歷而呢個「認識、疏遠」呢個過程, 不過只係再隔一段時間, 大家又走埋一齊, 喺原有既認識上, 再加上一啲新既話題及元素, 而大家既交情又再進化. 反而覺得可能呢個就係大家保持友誼既方式.

當然, 肥龍又認同過客呢個道理, 可以解釋既就只會話唔係每個人都可能交心(深). 而曾經認識過既人, 確實又令自己得到快樂, 認識及學習到新事物.

所以每逢節日假期, 又自然會諗起各位朋友, 用唔同方式問候一下及送上祝福.

24.12.07

聖誕交叉仆之話飲咪飲、話走就走

一直都冇諗過我係一個甘flexible既人

個次,我飲到天昏地暗,有邊班人個同我飲已經吳記
得左剩係記得每個禮拜五或六都一定要將酒精打進
我既血液裡面,為我呢個SOHO既自僱人仕帶來一點
生氣(self office home office),為我既人生加多滴回憶

CWB,2:30am,半醉…

電話響起…
女:'你係邊呀?'
我:'係登龍街33樓呀,你係咪黎呀?'
女:'我轉頭打俾你啦..'

哦,呢個只係識左2-3個月,個樣吳係好得但係又可以擺
得落口個d囉..呢d人要識架,如果吾係大時大節我咪聽
'乞食?'..男歡女愛既野,冇話邊個蝕底既..

繼續喪劈事半打芝華士先 !

3:15am…70%醉….

佢到左,坐係我身邊..夠膽同我玩隻抽?!
我:'甘那飲得?一杯一次呀?'
(意即輸一鋪飲一杯...飲大左...開始失控)
佢:'怕你呀?!!!!!!!!'
(好大聲..驚死冇得飲甘款)

兩個人互片
'4個6 !'
'5個4 !'
'6個6 !'
(意氣風發地心忖:我揸4粒6.你仲吳死?!!)
'開 !'
(Shit….圍骰4?)

一杯又一杯(我),佢又有時幫我頂d(自隊?)
我,又開始失控
'挑,甘勁呀,輸個個咀一啖呀笨?
''怕你呀?'(PK囉,正中佢心意)

5分鐘後,兩個人已經係度車黎車去..
(唉...衰d講句..好彩燈光夠暗姐)
(okok...我知有d女讀者想打我)
我:'不如走囉'
(呢句一定要講得好自然,俾人既感覺係要好
versatile,暗示之後再去飲又得,食野又得….或姐…
…..都得!..........得左)
佢:'去邊呀'
我:你個邊囉'
佢:'huh?我屋企好多人喎'
我:'呀...甘上左車先啦'

5:30am,我與她,屋企大門
開門一刻………………..
我阿媽(!)已經起左身..仲坐係個廳度!
半醉既情況下,我褔至心靈,以迅雷不及
掩耳之勢双手合十,眼觀鼻,鼻觀心
暗唸'時運高,你睇我吳到,點都睇我吳到'千篇
跟手再以草上飛之勢喪跑入房,再跳上張床

良久…..過後,二人相擁入睡
佢:'我都係返屋企先'
我:'吓?吳係哈化'
(你甘醒?費事第二日起身吾好意思?)
我:'如果你走左,吳好再過黎'
(交戲交到底啦..)
佢:’………………..’
自已走左



By 數奇門二打六

****************

P.S. 如果你覺得個標題唔合心意, 隨時話番我知.

亦祝各位聖誕快樂愉快! q(^_^)p

****************

除咗呢篇, 仲有以下同場演出:

1.聖誕交叉扑之腿王鯪魚
2.聖誕交叉扑之《不代表本台立場…》
3.聖誕交叉 Blog : 第四代香港人的自白
4.聖誕交叉扑之漆黑螢火蟲
5.聖誕交叉扑之(聖誕鴨)
6.聖誕(平安夜)交叉扑——木馬還轉
7.「聖誕交叉扑」之一滴酒精
8.聖誕交叉扑之前度驚魂
9.聖誕交叉扑——愈快樂愈墮落(抱緊你)
10.聖誕交叉 Blog 之 :高清聖誕節 HD Christmas
11.聖誕交叉扑之2.0美女
12.聖誕交叉扑之聖誕咭
13.聖誕交叉扑之《平安夜帶異性回家, Yes! Yes! Yes!》
14.聖誕交叉扑之--無處可叉
15.聖誕交叉扑之 (我唔係雞)
16.聖誕自blog之小temp
17.聖誕交叉blog之記得當時年紀小
18.聖誕交叉blog之願你今夜別離去
19.聖誕交叉扑之 『聖誕夜,讓我特別記念你。』
20.聖誕交叉扑之【紙布物語】
21.聖誕交叉扑 之 《 小鳳萬花筒 》
22.聖誕交叉扑 之 二 《表姐的婚禮》
23.聖誕交叉扑 之 三 《開香檳》
24.聖誕交叉扑之聖誕情緣(上)
25.聖誕交叉扑之「這樣的夜﹐這樣的夢」
26.聖誕交叉扑──聖誕卡
27.聖誕交叉扑之家書5.1
28.聖誕交叉扑之《歡度聖誕夜》
29.[ 聖誕交叉 Blog 之 :許願 ]
30.聖誕交叉扑之往事不堪回首
31.聖誕交叉仆之話飲咪飲、話走就走 (本篇)
32.聖誕交叉扑之《灰色聖誕》
33.聖誕交x扑之遲遲未扑財俊系列
34.聖誕交叉扑之「小傢伙過聖誕」

暫時係留意到咁多, 如有遺漏, 麻煩通知一聲, 立刻update!

水上的士

上星期六早上, 同一個一樣由出世到依家一直住喺南區(一樣係石排灣)既好友講起香港仔避風塘.

話題其實係由港鐵南港島線講起, 後來就講到依家香港仔其實有唔少地方係填海得來. 又講笑想當年其實邊度邊度仲係海, 馬路只係去到邊度. 又發現由於少時好少機會到香港仔關係, 原來好友對好多香港仔原址舊貌都唔係咁有印象. 肥龍比較唔同, 當時因為間中會到黃竹坑邨住既阿姨度玩, 所有會有機會到香港仔坐小巴到黃竹坑. 又因為咁, 對沿線及附近(鴨脷洲大街及漁村)景色有比較多記憶.

對於鴨脷洲大街及漁村, 肥龍有較深印象. 除咗因為當時有像依家大澳一樣既漁村景色之外, 就係由香港仔到鴨脷洲大街時(唔記得咩野原因要到鴨脷洲), 乘坐既水上的士或者「街渡」咧.

- 船長位就喺正前方, 船身白色, 上蓋為綠色;
- 依稀記得每程收費係港幣兩亳子. 而當時當然未有八達通, 要喺岸邊既碼頭先行俾錢然後入閘等船;
- 一程船大約可以載十五至二十人, 而全程大約需要三四分鐘;
- 街渡設計特別, 基本上並無甲板, 椅子主要設喺船身兩旁, 又喺兩旁中央放咗張長橩, 可以再坐多幾個人;
- 由於椅子主要設喺船身兩旁, 坐喺近出口既乘客, 差不多可以用手觸摸到外面水面;
- 又由於船艙內無空調無風扇, 所以一般出口到唔會掩蓋. 只不過當落雨時就會放下尼龍帆布掩蓋.

咁肥龍憑腦內記憶加上少少想像, 畫咗呢隻街渡出黎, 俾好友睇下, 唔駛描述得咁辛苦. 不過可能同實際有好大出入甚至錯添, 所以唔好介意. 另外肥龍嘗試上網搵有關街渡相片, 可惜仲未搵到.

22.12.07

兩個探長

今日坐巴士聽到由遠處傳來既一段熟悉既電話鈴聲.

探長有好多種, 又以「加奇探長 (Inspector Gadget)」比較深刻.

依稀記得, 每次加奇探長收到任務既指示後, 指示會爆炸既畫面.

依稀記得, 每次加奇探長每次符碌破案既過程.

依稀記得, 每次侄女(?)跟小狗如何暗中協助加奇探長逢凶化吉既情節.

睇果陣, 口中念念有詞. 「有冇咁啱呀!?」「咁都得!?」「唔係呀嘛!?....哈哈!?」不時掛喺口邊.

後來好似有拍成大電影, 不過無睇到. 況且保留童年記憶咪仲好!^^



呢段後加:

呢邊廂加奇探長每次逢凶化吉、符碌破案. 另一邊廂有個只靠一把萬用刀加上就地取材就可以化險為夷既「玉面飛龍(MacGyver)」. MacGyver 或者叫麥佳華好型, 型在每次危急關頭一定搵到唔同材料做唔同功能既工具. 要炸彈有炸彈, 要游繩有游繩..., 得一個人. 總之好鬼科學但又work, 好過上物理化學堂(如果真係得的話), 勁!

21.12.07

南港島線

呢個切身問題, 主觀上, 喺肥龍既生活模式及現有交通配套下, 其實唔需要地鐵. 不過唔同人各有所需所求, 加上有時都會花唔少時間喺交通上, 喺方便既前提下, 肥龍唔會反對. 加以喺十大基建既名號下, 如箭在弦. 既然決定要興建, 咁不如肥龍講下對現有方案既意見.

1. 取消個別車站或車站數量無疑可以令總成本降低, 縮短總行車時間 以及效益計比較可行既方案. 不過問題係, (往中環方向)如果喺海洋公園站開車後就直達金鐘站, 可能現有方案未必可以幫到咁以灣仔/ 銅鑼灣一帶作為轉車站既一群. 以肥龍觀察所得, 其實有唔少南區居民係先以其他交通工具如小巴, 巴士到達灣仔/ 銅鑼灣, 再以此一帶作為轉車站. 再接駁原來既港島線到柴灣沿線及東九龍各地. 因此, 如果南港島線總站設於金鐘, 雖然可以解決香港仔隧道塞車問題, 但只會令人流轉向金鐘站, 而對本身已經非常繁忙及擠迫既金鐘站情況更加惡化. 而本應目的地為柴灣沿線及東九龍各地既乘客, 就只有金鐘轉車而選擇比較長既路線, 或就係繼續乘搭現有交通工具及路線.

2. 現有方案(往海怡半島方向)為黃竹坑、利東及海怡半島. 不過相對南區其他地區如香港仔中心, 石排灣, 田灣, 華富邨, 華貴邨, 甚至置富薄扶林加埋既居住人口 ,喺呢三個地區(黃竹坑、利東及海怡半島)所居住既人口, 其實只佔南區總人口一個好少既比例. 所以可以預期, 就算他日南港島線通車之後, 如果大部份人改為乘坐港鐵的話, 以黃竹坑為中心再到各區既轉車站, 流量及負荷將會非常嚴峻. 況且, 以現有南區道路基建中, 由於大部份地方已為工廠大廈, 可以擴闊路面既空間少之又少. 而真正可以應付高流量既, 就只得香港仔海旁路. 咁, 實在好難想像以現有基建如何去應付呢個設定流量. 而喺整個方案中, 亦有提及與漁人碼頭計劃既銜接, 咁喺應付本區居民已經負荷嚴重既情況下, 加上外來遊客, 問題可能會更加惡化.

3. 整套方案重點只係喺創造就業、成本、路線、車站數量及上蓋物業上, 絕少、甚至無提及任何配套令南區居民可以更有效去使用呢個基建. 作為南區居民既肥龍就覺得又係有種「不要問, 只要信」既味道. 彷彿只要有南港島線, 南區交通既問題就立刻可以解決. 不過實際上, 南區既交通問題, 又唔係單純喺集體運輸系統上. 所以肥龍覺得整套方案應該需要提供更進一步及更具透明度既資料及配套措施, 方便南區居民更明白計劃內既效益及取捨.

19.12.07

係咁架啦

睇咗黃子華, 經佢講一講, 一億就係一百個「一百萬」. 即係話, 就算年薪一百萬, 都要做一百年先做夠一億. 又, 原來咁樣諗, 先感覺呢個數量之大.

大到有如抬頭望住天空, 無語...跟住雙眼由左望到右, 再由右望到左, 然後低頭若有所思咁“哦”一聲, 再講句「真係好大喎!」既果種感覺.

忽然覺得自己好大鄉里.

「係咁架啦~~~~~」...我咩都知咩!

****************

其實有好多事情, 一早已經知道答案. 只係有時不扮高深, 冇樣認真. 結果係應該要思考既事情時冇去認真思考, 反而做埋啲「唔等駛」既野, 或者將正經野放埋一邊.

又如寫扑, 肥龍自己有幾多料自己知. 咁有時有朋友問既然你又唔係邊個邊個, 寫扑又冇效益, 點解仲會去寫?

「係咁架啦~~~~~」...我鍾意寫嘛!

****************

又令肥龍諗起年少時, 耐唔耐就好奇問肥媽呢樣果樣疑問既情況. 好多時不論咩類型問題, 當問到咁上下, 肥媽就自然會搬出「係咁架啦~~~」「總之係咁上下啦~~」、「遲啲你就明架啦~~」之類既答覆, 然後肥龍就會意識到「夠咧」, 再以似明非明、似懂非懂既表情, “哦”咗一聲, 就咁了事.

「係咁架啦~~~~~」...我知我又問錯野囉!

****************

問題: xxxxxxx?

答案:「係咁架啦~~~~~」

17.12.07

愉快故事

因為好友H新居入伙關係, 肥龍跟好友H, 讀書時好友S及好友K又再聚頭.

最後一次四個人一齊著住同一校服, 經已係十六年前. 當時, 除咗返學時間, 我地四個, 放學後既晚上就係打籃球, 玩啤牌, 到附近公園吹水及互相傾訴.

雖然近幾年大家都因為工作忙, 有人結咗婚, 又有人搬離開南區居住, 已經好少再見面. 只係耐唔耐既朋友聚會再相遇, 但好少只得我地四個.

好友H新居佈置得美輪美奐, 又非常個性化. 另外, 好友H跟女友C呢對拍拖十五年(定更長時間)既組合, 決定明年三月拉埋天窗, 實在值得慶賀, 又令肥龍非常期待.

好友K繼續同大家分享跟小情人猜既謎語, 雖然唔少答案令人無語, 難得喺一片噓聲中大家又樂此不疲, 一個接住一個.

好友S跟身旁老婆P, 無時無刻, 都向大家甜絲絲流露出等待著家庭小成員既喜悅. 而今個月二十四日, 將會係一個特別日子. 希望所有人健康.

見面不過三數小時, 時間唔係重點. 肥龍相信最好既係, 可以聽到大家生活都過得好愉快既故事.

16.12.07

15.12.07

找出不同

好啦, 今日唔駛返工(呢個咩理由黎架?), 同大家玩個遊戲 (玩遊戲從來唔駛理由).

相中人究竟是誰?







不過搵到無獎! @_@

朝陽之下

朝陽下,
呼吸的, 是一大清早, 未受太多汽油污染, 清新的空氣.

朝陽下,
迎面的, 是每個週末早上, 都帶著寵物散步或進行運動的男男女女.

朝陽下,
跑動的, 是每段路程, 不論高低起伏, 都會走過的雙腿.

朝陽下,
一個人, 以朝陽作伴, 大汗淋漓, 跑到終點.

12.12.07

向著光走

漆黑中,
置身於, 四處無人的街道, 偶然遇著迎面, 沒有乘客、準備返回車廠的巴士.

漆黑中,
陪伴著, 是動作一致, 卻看不見汗水, 照在地上的身影.

漆黑中,
聽到的, 是緊密但有節奏的呼吸聲, 及雙腿噼啪交錯的腳步聲.

漆黑中,
一個人, 向著光走, 享受一個人的寧靜.

11.12.07

功勞歸於

「肥龍, 喺呢件事情上面, 可以睇到你既功能及重要性.」

其他人聽到有咩反應肥龍唔知, 不過肥龍聽完真係唧都唔識笑.

事情詳細唔方便透露, 只係大概早前公司部門內同事一啲工作紀律同效率上, 下降到肥龍一個唔可能容忍既程度. 咁就喺幾個星期前開始, 肥龍決定要求所有有關同事每日進行放工前會議. 表面上, 希望藉呢個會議, 可以更了解更緊貼同事既工作情況, 從而肥龍可以即場幫同事為比較複雜既情況作出指引甚至解決方案, 實際上肥龍想帶一個訊息俾所有同事知, 佢地既情況已經到達肥龍忍無可忍既底線前. 而且肥龍亦希望重申本來定落既程序及要求, 三令五申, 希望各同事再三留意.

對於呢類micro-management, 其實肥龍覺得真係可免則免. 唔講肥龍自己既管理作風, 亦唔講micro-management上管理缺點, 起碼喺工作職責既考慮上, 肥龍已經接受唔到. 跟肥龍共事既同事, 大都已經擁有大學程度, 本著每個人心中一團心, 加上希望留番一部份自由度俾同事, 所以除咗個別經驗, 能力上同事理應可以應付日常大部份工作. 而且, 就算真係遇到問題, 其實仲有肥龍呢個阿四幫手.

只不過以上呢個安排, 除咗肥龍對同事既信任外, 亦完全取決於同事對自己既工作紀律同效率要求上. 肥龍留意到表現好既同事大致可以獨立及前瞻咁去安排工作, 而且有板有眼. 相反, 表現差既同事就往往後知後覺, 更甚至有部份同事以為肥龍唔知呢個情況, 諗住可以得過且過, 就咁過骨.

另外, 撇開管理上既安排, 可能肥龍思想比較古老, 肥龍認為既然收得公司份糧, 自然要交足貨. 呢個係合約黎, 一買一賣, 非常清楚易明. 只係唔同時間, 肥龍都聽過「搵咁多係做咁多」既講法, 真係好難認同. 同時, 肥龍一直所做既, 亦只算得係職位上既份內事, 無咩特別.

結果, 經過連續幾星期既跟進, 雖然情況未完全改善, 不過方向上已經收到預期既效果, 而同事大致可以重新做到本來程序要求, 部門既表現已經改善.

不過呢件事情, 肥龍後退一步去諗. 其實喺任何情況下, 不論好景逆景, 講真出力做野既, 面對客戶既, 始終都係同事本身, 而唔係肥龍. 咁所得既結果、功勞, 情況亦應該係一樣, 屬於同事. 不過, 現實咁啱又相反. 呢件事情令肥龍唔開心既除咗係同事既自主性問題而引申到後來既結果外, 就係本來應該係屬於佢地既功勞無端白事變成咗肥龍既功績.

坦白講, 呢類功勞, 肥龍受之有愧. 衰啲講, 肥龍都只不過係補番自己隻鑊啫.

10.12.07

溫摩吐摩

由今晚起, 除咗每星期練跑兩日之外, 決心每晚再追加二十分鐘exercise.

好! 我要做低我個BMI!

溫摩! 吐摩!

聖誔扑野

大鐵鎚攪「聖誔交叉扑」遊戲, 黎就黎, 無任歡迎!

我個e猫係:dragoninsouthern@hotmail.com

文化差異

“怎樣的城巿,就該有怎樣的人。香港作為國際城巿...不少具有外國背景家長、相信全球一體化,也期望子女成為有國際視野及競爭力的國際公民。”

今日讀【蘋果日報】, 留意到以上一篇既專題報導. 肥龍在學時, 對某幾個科目特別有興趣, 「文化差異」就係其中一科. 可能由於身處香港, 自小已經有唔少機會接觸香港中國以外既文化, 除咗可以擴闊視野, 更加可以從其他文化了解本身文化. 有時好多人覺得某些事理所當然, 不過可能從來無諗過原來喺地球某一角落, 同一件事原來係洪水猛獸. 又由某日開始, 因為接觸過呢片「文化差異」, 人自然會學習咗開放與包容.

工作上, 肥龍置身於唔同種族與文化既團隊, 一面係團隊成員, 另一面係團隊領導. 有時可能一個疏忽或看漏眼, 往往有意想不到既效果及評價. 亦因為長期喺多種族多文化既團隊工作, 自然對文化差異非常敏感, 但同時又多咗一份接受他想既彈性. 聽落可能好矛盾, 不過又好實際老土咁講, 互相尊重好重要. 有時見得多,亦學習得多.

喺肥龍心目中, 並唔存在某一種族或國籍優良於另一種族或國籍既想法, 反正喺全球化大趨勢下, 學識同能力之間既分別可能變得好少, 而最根本既分別, 好可能只源於本身種族/國籍既不同. 不過肥龍覺得國際視野可以培養, 但競爭力嘛...真係因人而異咧. 又係咪有國際視野會好啲呢?咁又睇下你做咩或者本身有無興趣囉.起碼肥龍唔會預期一個街邊外賣檔既員工有所謂既國際視野啦.

不過, 如果有興趣,喺唔同時候, 其實都有唔少以「文化差異」為題材既電影(例如【BEND IT LIKE BECKHAM】). 呢今日肥龍收到一封電郵, 介紹咗一套叫【PERSEPOLIS】講有關伊斯蘭/伊朗既動畫.純睇Trailer, 除咗畫功, 內容睇落幾特別之餘又非常有興趣了解更多. 遲啲或者會走去睇睇.

9.12.07

不斷求變


已經唔係第一次寫「井上雄彥」先生. 稱呼為「先生」, 因為井上先生既畫, 喺肥龍既心目中, 不止係停留喺消閒程度既漫畫.

不斷求變, 求突破, 精益求精...

有人會批評為商業化, 商品化, 不過喺支持者心中, 只希望擁有(更多)印有自己所擁戴既畫家既物品.

老實講今次所講既兩本漫畫, 肥龍只係一直追看【浪客行】. 至於【REAL】, 只看過一集後, 已無再繼續收看落去.

就算【浪客行】成績上唔可以超越【Slam Dunk】, 不過【浪客行】裡所講既又係另一個時空, 另一種國度, 另一類既氣魄.

今次企劃, 加上電腦協助, 將井上先生漫畫中既分鏡及電影感呈現出來, 非常精彩.

REAL #1
REAL #7

最後一段短片(約15分鐘)講為今次企劃準備既兩本漫畫週刊封面既情況, 最精彩莫過為井上先生用鉛筆起犒及後來上色既部份. 及後選擇最後封面設計既一段亦不錯.

7.12.07

我的肚腩

真係唔知點解已經練咗一段時間, 除咗開始時既一陣間, 個肚腩好似無咩變化咁既?

體重雖然有因練跑而消減, 不過唔知係體型問題定係有其他原因, 睇落個sharp始終麻麻地. 有時沖涼除衫見到佢, 雖則想話見佢已經比以前清減咗, 不過發現原來佢仲喺度時, 相對無言. 嗯, 唔係走咗既咩?

相比懷胎十月既母親, 肥龍係抱腩十年既肥仔. 對眼前呢塊肉 (感覺唔到骨), 只有痛之愈深, 並無半點殘留之想. 有人話切肉不離皮, 咁又真係切咗肉先, 其他可以及後慢慢講.

無‧哂‧計!

咁不如, 預留呢下一段喺度, 提醒一下自己. (不過好似係俾女讀者睇固喎...)又, 網海之大有無高人可以指點肥龍用其他運動方法去同呢個老朋友講拜拜呢?

5.12.07

值得再睇


如果你覺得生活不如意, 每日遇著各式各樣困難, 感情空虛, 當你有機會睇到呢部多年前(1998)既記錄片, 你自然會另有體會.

社會世界科技進步, 但人與人, 種族與種族之間既平衡、關係, 理應唔會退步.

你可能有時責怪現實弄人, 但如果你見到畫面裡既現實, 你可能會問點解個世界可以咁? 又眼前所見既又算得上係事實?

睇呢部片, 重點雖然放喺人性既黑暗, 歷史既無情, 又有生還者既傷痛, 更希望歷史唔會重演. 但觸動人既係, 當中所提及既親情, 友情, 就算喺苦難中既環境, 不單止不變, 更覺難能可貴, 更覺相互需要支持.

螢幕上不堪入目既畫面固然令人難受, 但細聽生還者就事件中對至親既描述及對事件中既一無所知, 更為心痛.

4.12.07

吾笑唔笑

小師妹: 「師亨, 可唔可以借個計數機黎用用?」

肥師亨: 「嗱, 呢個咧.」

小師妹: 「嘩個計數機咁多塵架?......不如一陣俾清潔阿姐吸吸佢好喎! 呵呵!」

肥師亨: 「我有兩部呀嘛, 我特登俾部多塵既你. 係啦, 吸吓塵好吖. 咁不如叫阿姐吸埋我啦, 橫掂我咁沙"塵"!」

小師妹: 「。。。。。。。。。」






肥師亨: 「講吓笑嗻....」






小師妹: 「師亨, 下次可唔可以唔好再"食"字呀? 好低能囉!」

2.12.07

三關過後

今朝一早肥龍約好友人喺香港站等, 坐早上5:35分(首班港鐵)特別班次直飛向迪士尼進發.

大鄉里肥龍初次踏足迪士尼, 對賽事路面情況一無所知, 只相信唔會好多斜路(因為填海關係架嘛...), 估計應該唔難應付. 上次Nike十公里路程有上有落, 結果可以58分鐘完成. 今次再以練習心情去面對, 希望保持上次時間, 目標鎖定一小時內完成.

放好行李, 熱好身. 企喺起點, 準備起步. 首四公里一直保持大約五分鐘跑完一公里, 可以話幾順利. 不過跑到第五公里時, 左邊腩部突然覺得好痛, 痛到差不多想停低抖抖, 於是放慢腳步試試休息回氣, 結果再跑五百米左右後又無再痛苦, 又可以發力再衝過.

到達迪欣湖, 先知道原來都幾大, 腦裡就開始諗要跑幾耐先可以跑一圈. 另外因為已經完成咗一半, 可能風景優美, 竟然跑到有啲迷茫. 不過只係過咗一陣, 又俾旁邊工作人員既打氣聲吸引返到賽事上面.

迪欣湖後路段微微落斜, 可以一路回氣一路調節步速. 跑到最後一公里, 時間約為48:xx:xx, 如果以均速計算, 大概該可以比上次快既時間完成. 結果都唔理沿海優美風景咁多, 搏埋啖氣去衝過終點, 最後以約54分鐘衝線.

目標超額完成! Yeah!

肥龍三關過後, 黎個小結:

(一) AVOHK五公里短跑: 30 分鐘
(二) NIKE十公里跑: 58 分鐘
(三) UNICEF十公里跑: 54 分鐘

之後目標及焦點就係明年二月十七日既渣打(半)馬拉松! Go!Go!Go!

後記: 後來衝線過後, 喺終點附近見到一個著淺藍色運動衫同著深色襪同跑鞋既索女. 不過肥龍啱啱跑完索哂氣覺得未係時候即刻食檸檬, 最後決定無上前打招呼及相認. 拿咁啦, 肥龍就係著住呢件衫跑架啦, 哈哈! 不過索女都好叻, 跑咗三年, 一路有進步! 三點成績除咗一年比一年進步兼效率高, 跑完一陣已經有文出. 認真厲害!


又後記: 初次踏足迪士尼, 欣澳, 迪欣湖感覺唔錯, 而且都幾舒服. 之前好多人講既(負面)評語肥龍又唔覺喎! 果然眼見為實又一例證!

30.11.07

嘩唔係嘛

曾經, 幾年前, 肥龍有次正當喺街頭準備橫過馬路之際, 突然唔知咩理由, 心虛咗一下, 好似感覺到一啲特別野喺附近, 本能咪四圍望啦, 竟然就見到已分手多年既女友出現喺十米內既眼前. 咁肥龍可能身有x, 當時感覺真係離咗一離, 唔知點反應就過咗馬路. 跟住最奇既就係, 同一情況, 竟然喺相隔咗約一個月左右, 附近位置(因為肥龍要去果頭轉車)又再遇見佢.

有時肥龍真係好易俾自己既呢類感覺嚇一跳. 你話心有靈犀好, 話係第六感又好.喺果一刻個心又好似突然感覺到另一樣野, 都咪話唔驚.

肥龍又試過發現眼前畫面依稀喺夢境入面出現過, 而貪玩既肥龍又去特登睇之後既事會唔會同夢境發生既一樣, 結果又竟然不媒而合. 不過好奇想知睇緊既你, 夢境入面既影像究竟係彩色定黑白. 肥龍既影像係彩色, 而且有仲好細緻. 好多時瞓醒咗仲會好記得. 所以有時發生呢個情況時, 都會諗究竟係真係曾經見過定發夢時見過. 感覺好奇怪.係真係咁橋呢? 或會係好多人講既日有所思, 夜有所夢?? 定係好似弗洛依德咁講夢其實係一種潛意識既活動,係由於人既自我防衛機制把本我願望壓抑落去, 再扭曲為象徵形式出現 (呢幾句係抄番黎)???

不過以肥龍既德性, 個腦係RAM黎, 第朝瞓醒又會無咗件事...就算生活迫人, 但相距壓抑呢個程度呢仲有一大段距離, 照計無咩野需要壓抑吖. 今日喺公司發生又有類似既事情發生 (肥龍好似預知某一件事出現), 但肥龍只係自己諗, 又可能係自己問題啩.

至於惡夢又點會無發過, 考試呀, 遲到呀, 著錯校服呀呢啲間中都有. 只係耐唔耐就會發一啲好科幻既情節, 例如全(屋)村人變成外星人, 要打怪獸. 又或者係幾秒之間由熟悉既住宅飛到陌生既外太空星球, 又打怪獸囉 (哈哈!). 好鬼激!

29.11.07

各自陳述

工程師J: 「你講果樣野程序無寫到喎....我幫唔到你呀...你試下問第二個啦...」


老銷M: 「咁無程序都要處理架啦, 諗咗辦法先啦...」


老闆L: 「個程序邊個寫架!??...(個臉紅哂)」


寫程序果位仁兄: 「啊, 我跟user request去寫咋喎,其他野我唔知道固喎...如果要加野, 你不如問老細啦,佢話點咪點,加咪加囉,係咪?(微笑)」

28.11.07

誰在介意

手錶時針踏正中午十二點時, 同事H 走過黎肥龍果邊.

同事H: 「龍蛇, 我地去(街邊)大排擋食野, 你去唔去呀? 嗯...你唔介意啊呵? 」

肥龍: 「嗯, 好呀!」

當肥龍同幾位同事到達大排擋時, 準備就座之際, 肥龍好自然咁就坐喺摺櫈上.

卻又原來發現只有肥龍坐低.

而其他人, 正用緊紙巾抺緊摺櫈表面.

之後, 先就座.

26.11.07

大魚故事

其實呢個標題到依家仲用會唔會out咗啲呢? 不過既然寫開龍媽, 就自然還有龍爸.

雖然幾十年兩父子, 就算之間有幾多野講, 龍爸永遠俾肥龍一個神秘既感覺. 神秘既並唔係佢既為人同諗法, 呢方面唔難察覺兼每日見面, 神秘既反而係龍爸既背景同出身. 龍爸無好似【Big Fish】咁耐唔耐講俾肥龍知佢成長生活過程上既變化及所見所聞, 亦從來無刻意想肥龍喺佢身上學習到咩.

肥龍由細到依家, 從來未曾從龍爸口中聽過半句有關爺爺婆婆以及龍爸成長既事 (註: 爺爺婆婆分別喺肥龍出世前及十六歲時已經去世). 彷彿呢啲就係龍家一啲所謂禁忌, 家人包括龍姊龍哥, 無人敢問, 亦預期龍爸會隻字不提. 又可能龍爸對某啲事不欲多談, 知道又無獎既. 而肥龍亦因為怕同唔知點開口, 就算好奇, 都一直喺呢個問題上停留喺幻想既階段.

******************

只係當有時肥龍同龍媽單獨閒話家常時, 龍媽就會透露少少有關未結婚前認識龍爸既情節同龍爸既家庭背景. 從龍媽口中, 只知道爺爺以前家底都唔錯, 而且爺爺仲有幾個老婆, 咁婆婆同龍爸就係屬於「細房」, 而婆婆亦只有龍爸一粒仔.

後來爺爺過身, 如粵語長片般既情節故事發生, 最後婆婆同龍爸攞住一份(有限)錢離開咗爺爺家, 另過生活. 而再後來龍爸就同龍媽結婚.

******************

另外, 龍媽係唔識字既, 大部份既字都係龍爸教龍媽既. 龍媽話當時龍爸無上過學, 只係爺爺會請老師到府上教龍爸, 大伯及阿叔等人書本知識, 所以龍爸識好多字. 又咁,肥龍又唔覺龍爸有讀過英文, 第一次聽龍媽講其實都唔係好信. 但後來一次歐遊, 肥龍又的確俾龍爸既英語程度嚇咗一跳. 龍爸係一九三五年生, 如果唔係接受過教育, 真係唔可以咁自如咁去用英語溝通. 雖然只講得一般 (相信係少講少用關係), 不過用詞好適當, 又明白對方意思及溝通.

*****************

有時執屋時見到一啲龍爸龍媽既舊相, 發現原來當年梳花旗裝既龍爸其實身型都幾札實同幾英帥 (點解遺傳唔到俾肥龍既?). 而且從當中唔少既戶外活動照片中可以想像出龍爸應該係一個好動及鍾意玩既人. 肥龍亦知道當年龍爸除咗工作以外, 仲有做民安隊既教官, 所以有唔少相係龍爸穿住制服既, 又有整緊繩索, 玩緊花式單車同攀山既照片.

後來龍爸因為一次救人時整斷咗隻右腳, 除咗後來既風濕骨痛, 仲換來退役既決定.

****************

龍家以前有部私家車, 龍爸有時間就會帶龍媽龍姊龍哥去遊車河. 後來龍爸借咗架車俾朋友, 對方竟然一借無回頭! 之後, 朋友當然無咗, 龍爸就無再擁有另一部私家車咧!

****************

不過以上所講, 除咗照片同歐遊, 其實肥龍一件都未曾目睹過, 只係從龍媽口中聽到有關龍爸既「大魚故事」.

P.S. 希望龍爸由出post 呢一刻開始唔會眼眉"調"咧! :p

25.11.07

腐竹糖水

一碗簡單既腐竹糖水, 令肥龍諗起與龍媽既往事.

不論以前及依家, 相信唔少人都有飲過維他奶. 肥龍都唔例外, 而且仲幾鍾意飲添, 特別係喺冬天天冷時一支樽裝熱維他奶, 更加係回味無窮暖在心.

依家物資充裕, 要飲維他奶當然唔難, 而且幾蚊一支/一盒, 大部份人負擔得起. 不過相比肥龍年少時既家庭環境, 當年零用錢有限, 坦白講如果想飲, 有時真係要留番啲錢或取捨先可以飲得到. 就算後來唔記得咩情況定肥龍同龍媽龍爸講好鍾意飲維他奶, 都唔會有咩分別.

直至有日放學返到屋企, 龍媽叫肥龍飲一碗喺飯枱既奶類既物體後, 覺得幾好飲, 就走去問龍媽果碗究竟係咩黎. 而龍媽既答案就話呢碗係自家制既維他奶. 自家制? 吓有既咩? 不過當年肥龍只得八九歲, 而又因為龍媽煮飯一路好叻, 飲落雖然覺得味道有唔同, 但又真係有啲豆味同甜甜地, 咁無懷疑, 不以為然又信以為真之下, 就相信所飲既就真係「維他奶」.

直到過咗一段時間肥龍喺有次幫龍媽揼白果時, 龍媽先提番呢樣野, 肥龍先知道係咩一回事. 原來一直所飲既所謂「維他奶」, 根本就係「(白果)腐竹糖水」. 咁又因為由細飲到大, 依家肥龍都仲好鍾意飲腐竹糖水, 但就唔一定加隻旦囉.

呢個, 就係當年受家境所限既龍媽就諗出一個令肥龍可以一直飲自家制既維他奶既故事.

練跑肥人

啱啱既星期五, 不約而同有幾個人問肥龍呢個問題.

「其實咩野推動你keep 住去跑步?」

咁肥龍既答案又其實無咩特別, 兼新意欠奉.

跑步既理由有好多, 既然叫得肥龍, 咁又點少得減肥呢一環. 因為生理需要加上嗜食, 唔做運動既話真係好鬼易肥, 最驚仲會一直肥落去, 最後對身體無咩好處, 咁咪跑囉.

而且其實一直肥龍素來鍾意做運動(唔似?), 特別係帶氧運動, 出一身汗, 其實好過焗一身桑拿. 不過肥龍一向唔鍾意去室內如健身房跑機, 雖然望落好似好方便(唔怕日曬雨淋)又簡易(可以用機計算跑速), 但就總係覺得欠缺因應環境變化而去跑既適應性. 咁, 戶外跑步沿途又可以睇風景, 又可以吸吓新鮮空氣, 聽落幾唔錯吖.

另外, 戶外活動雖多, 不過可以好似跑步咁隨時隨地一個人或幾個人既又唔係咁多選擇. 只是有時間, 穿上跑步鞋話去就去, 方便非常. 又肥龍特別鍾意晨早跑步, 除咗無咁熱同無咁多人外, 喺時間安排上, 跑完其實都仲係早上九點左右, 咁之後仲可以繼績做本來已安排既事添. 而且平日工作上已經好忙好操心, 如果連休息時間都要諗住掛住公司事, 生活實在太逼人啦, 咁有做運動放鬆一下就顯得非常重要.

不過肥龍跑步最重要既理由, 主要係滿足喺訂目標, 練習, 進步呢個過程, 又特別鍾意比賽既氣氛 (雖說無機會贏). 而其間, 亦可以喺自己既專注力及耐力上提升. 最近肥龍都係同幾個朋友一齊跑步, 無咩特別留意時間. 今朝自己一個跑, 再留意平日練習開既路線既完成時間, 發現原來已經時間大大改善, 之前話既四十分鐘樽頸線一跑而過, 最後只係用咗三十四分鐘完成. 而且仲可以有剩餘體力跑埋回程路. ^^

下星期日就係另一場既十公里跑. 不過又要戒口, 呢個星期唔可以食薯片, 雪糕同飲汽水咧 (呢個算係咩目標!?)... ~_~

20.11.07

給你能力


睇【黎多件衰鬼上帝2 (Evan Almighty) 】時, 摩根費曼飾演角色講到: 「你祈求勇氣, 你想上帝給你勇氣,還是給予你表現勇氣的機會?」

呢句對白, 忽然"又"令肥龍諗起之前寫過既「工利」題目, 亦正正講出肥龍之前或一直管理上既問題及盲點所在. 唔少時候, 肥龍可能諗得太多, 又或者所考慮既太流於表面/ 理想化. 結果, 工作上好多野及取向, 肥龍都可能傾向「想同事所想」上面, 繼而做咗唔少表面冠冕堂皇但又實質欠奉既動作.

例如, 同事覺得目標定得太高或佣金機制令佣金好難上增, 好多時, 肥龍好自然會走咗去諗目標及佣金機制既方向上, 而忽略咗留意同事跑數既能力上面.

又例如, 可能有人會同肥龍講, 既然公司俾得出佣金, 咁如果個別老銷或呢批老銷唔掂, 咁乾脆換過另一批咪得, 唔得換到得, 始終最後會有人可以做到. 反正佢地會講出無話無邊個唔得呢類說話.

以上既著眼點, 似乎太著眼喺成果或硬件上面. 咁就算點講, 其實都無對錯之分, 只係著眼點唔同, 效果唔同啫. 不過呢句對白, 可能就確認番肥龍之前所寫既諗法, 而且大意相同.

即喺workplace及job description上面, 肥龍其實更應該花多啲心思及腦筋去諗同事實際需要咩能力及技巧先可以將崗位上既工作做好. 又或以應以此為目標, 令同事能夠慢慢變得獨立自主咁去做野及去思考, 從而可以達成唔同成果, 或亦應透過唔同方法, 要同事明白, 可以改變及推動一切既, 就係佢地靠能力爭取既機遇及學習到既技能. 有謂“財”不入急門, “才”(能)又何嘗唔係呢? 不過要同事明白呢個道理, 明白何謂眼前或短暫既利益或要求, 何謂基本功及長遠能力, 相信又係另一個挑戰.

可能當再有同事向肥龍講佣金時, 肥龍應該咁回答番佢:

「你祈求佣金, 你想肥龍俾你佣金,還是給予你攞更多佣金的能力?」

17.11.07

由負到零

「只不過係由負數到零, 有甚麼值得慶祝呢? 」

短短既一句, 淡淡表示出生活中既無奈. 呢句對白, 係肥龍睇電影【東京鐵塔】時, 覺得比較深刻印象, 有意思既說話.

有時因為個別得唔到, 而愁眉不展, 更呼天搶地. 有時因為一直得不到, 而只有苦幹, 卻安於天命.
而由負數到零, 可能只代表最壞既剛過去, 前路可能仲係萬無頭緒, 摸不著邊際. 如果每件事都有特定週期, 應該會係由負數到零--> 到零到正數--> 到正數到零--> 再到零到負數, 又或者係由到零到正數--> 到正數到零--> 到零到負數--> 再到負數到零.一個循環, 起起伏伏, 能夠留低既, 就係擁有.

忽然諗起年少時住屋村既日子. 那時生活老實話並不好過, 但又可能當時既目光有限(定未開發?), 並沒太多比較, 相反過得相安無事.

如果有人問只係由負數到零, 有甚麼值得慶祝呢?
負數? 零? 正數? 唔知道咧.

肥龍大概會答就是「生活」.

16.11.07

靜靜起動

喺動畫/漫畫【頭文字D】Stage 1入面, 揸住架AE86既藤原拓海, 最初因為每朝都要駕車喺秋名山送貨, 加上佢老豆藤原文太既刻意訓練, 日復日喺同一路段係咁練, 結果喺基本功、技術及專注力上, 不自覺咁慢慢累積到一個水平.

由於拓海通常只有自己一個人喺路面上奔馳, 從未同其他人跑過. 所以到果刻, 其實對自己既駕車水平去到咩程度只可以話停留喺斷估或一支半解既階段. 另外, 佢當然 亦未諗過如果同其他人比賽時, 到底可以有幾多勝算.

後來喺初次無意既介入後, 拓海開始喺秋名山上與唔同既對手以落山賽進行比試. 而喺保持長勝, 亦愈戰愈勇既同時, 拓海意識到原來既基本功外 , 自己喺實戰時既不足. 亦由於引來愈來愈多既挑戰者, 拓海更發現唔同對手既風格及特性中, 睇到自己進步既空間. 無可否認, 拓海喺初期之所以能夠擊敗對手, 除咗因為上面講既基本功及鬥心優勝外, 或多或少, 都係拜AE86既老爺外表令唔少對手產生輕敵, 間接咁隱藏實力及後來勝利既伏線.

再後來, 當拓海遇上高橋洋介及高橋啟介呢對秋名人物並將之擊敗後, 拓海終於感到自己既實力, 亦開始肯定自己既駕駛技術及能力.

***********************

現實生活中其實有唔少呢種情況. 肥龍為準備今年既渣打半馬拉松, 除咗早喺今年八月開始起每個週末練跑之外, 喺唔去跑步既日子, 都會喺瞓覺前做一陣sit-up 及掌上壓. 目的係希望可以喺跑步練氣之後, 可以一直配合修身減磅. 始終, 體重對跑步既表現有著重要既關連. 另外, 肥龍除咗以兩條路線交替(香港仔<>鴨脷洲及香港仔<>淺水灣)作練習外, 再額外參加一啲十公里比賽去提升狀態, 順便測試一下自己當時既水平.

咁當然, 同真係跑步既人相比, 肥龍啱啱提及既, 其實一直都做開並且程度更加劇烈添. 所以時間亦比肥龍更快更穩定. 雖然有著呢個距離, 不過身邊人既存在, 可以令肥龍跑步時更專注. 有時, 當一個人跑步時, 平均速度反而更難掌握, 往往愈跑愈慢而不知.

藉著比賽既氣氛及其他人既表現, 肥龍平日練習既成效, 又確實不自覺咁被迫咗出黎令發揮更好. 而且肥龍更加相信, 只要持之以恆咁練習落去、跑落去, 除咗對自己身體狀況更了解外, 成績依然有縮短既空間.

當然, 依家距離明年二月中, 好多事可能言之過早. 可以練習既時間睇落仲有好多, 距離半馬兩小時既目標時間只會愈來愈近.

15.11.07

你做乜呀



純粹就廣告本身對白, 笑死! xD

寓意深厚得黎又搞笑!

特別係聽到飾演貝爾果位問牛頭馬面時:

「你做乜呀?」

「乜你覺得百幾年前發明電話線嗰陣會知你今日攞黎做寬頻咩? 」

14.11.07

十里以內

想再寫多少少有關今次完成Nike十公里既後記.

可能因為熱身方面及集中力問題, 開始至首三公里其實跑得唔係太好. 雖然話上斜既程度唔係好高, 但因為第一次跑呢段路, 開始時真係嗱唔到本來諗住快放五分鐘既節奏. 慶幸出黎效果唔錯, 首三公里只係用咗十五/十六分鐘完成, 亦見到第一個水站飲水.

後來, 最辛苦既一段莫講係中段轉節既位置. 呢段主要由上斜路組成既路, 由於當時大約已經跑咗一半, 體力力氣亦消耗咗一部份, 身體亦正在回氣中, 但當見到其他人開始(掉頭)向相反方向跑時, 心急咁就自然會想跑快啲掉頭 (記得跑渣打半馬到荔景時都有呢個情況), 結果好易亂咗步伐. 不過決定後來放鬆去跑, 咁又慢慢適應番.

另外, 其實同場比較既人都跑得唔錯亦相信有所準備, 眼見沿途停低慢行既人唔多, 自己自然唔想係慢行既其中一個. 後半段由於係回頭路, 問題反而唔大, 最重要係保持跑速跑埋餘下路段.

當跑至最後一公里時, 肥龍望住手中腕表, 睇到表面上打出 “52:XX:XX”既時候, (當日平均六分鐘/公里)第一次感覺到可以突破六十分鐘大關既機會終於出現咧.

結果, 以五十八分鐘衝過終點. (註: 公開組比精英組遲十五分鐘起步, 畫面上時間為精英組起步時間)

正如之前回覆留言時提過, 其實肥龍做出時間, 並唔算特別好 (只算一般). 不過高興既係, 練習咗三個月後喜見成效出現, 實在非常鼓舞. 亦令肥龍會更俾心機去跑好埋往後既比賽, 再挑戰自己既最佳時間.

呢種以努力而達標既感覺, 實在美妙. 亦開始慢慢對自己既表現愈來愈有動力及信心.

所以話, 肥龍可以跑, 你都可以跑!

13.11.07

隱藏尋找

尋晚睇無線【新聞話事、人】訪問方東昇講到敬業樂業. 又講到開心與唔開心.

其實如果要唔開心, 真係咩都可以唔開心, 唔講生離死別, 唔講失敗虧損. 就算係中六合彩, 都可以唔開心架, 因為可以嫌中得少(當然係最極端情況啦). 有時又會把所遭遇到既無限放大, 總睇落衰野只會落喺自己既頭上, 倒楣! 咁樣諗法, 如果只係發洩當然可以啦, 但如果變成習慣既話, 都真係幾惱人.

相反, 記得有次上公司培訓時, 有過一個環節, 係問同要講出自己覺得開心既人、事與物. 喺過程入面, 肥龍見到原來有好多人都要好辛苦先至諗到幾件開心野出黎, 而且更有啲人會好認真去諗所諗某件事, 究竟算唔算係開心事呢? 總好似如果要講開心既事的話, 一定係超開心, 勁開心既先算數, 先可以同人講.

呢個情況, 係咪好奇怪呢? 開心既自動會折扣, 唔開心既就放大. 咁無形中, 又自然會產生咗一種差異. 而會唔會係因為雙重標準所以沉迷喺呢種差異當中呢? 呢種差異, 老實講, 往往又好似好難去滿足得到. 因為往往後知後覺.

其實, 開心既人、事與物係咪真係咁難搵? 定只係當一切覺得理所當然, 再無諗過去搵呢?

肥龍唔係想講咩大道理 (況且呢啲topic 每日唔知有幾多人會寫), 只係覺得想開心既人多, 會尋找開心既少. 而且肥龍諗尋找不快同尋找開心, 所需要既力氣同心思, 應該差唔多啩. 咁點解唔去為自己做得開心一啲呢?

Hide and Seek… 開心既唔會隱藏, 唔開心既其實又無必要自找.

但現實又似隱藏開心, 煩惱自尋.

你想hide 定想 seek?

11.11.07

突破樽頸

整個賽道雖然有不少上落斜路段, 整體難度適中, 唔難應付.

而且多得大會每公里樹立(距離)指示, 可以一直留意分段速度, 適當加速及減速回氣, 最後以五十八分鐘完成十公里路程.

達標(六十分鐘內)!

呢個時間, 當然比前列份子相差好多, 但對肥龍黎講就可謂突破咗一個鐘呢個樽頸時間.



下一關就會係十二月二日既聯合國兒童基金十公里跑.

肥龍可以跑, 你都可以跑!

10.11.07

次關精選


話都無咁快, 聽日就係十一月十一日, 第二關準備就緒.

肥龍計劃會先以快步跑五分鐘, 再均速至慢速跑十分鐘, 再快步跑五分鐘, 然後以自由速直撲終點.

目標時間: 六十分鐘內

開始!

6.11.07

超人都市

**************

《 蝙蝠俠 》 拍攝期間封路路線

日期:11月12日凌晨至上午6時
封路:皇后大道中介乎砵典乍街與威靈街

改道:沿大道中前往西區的車輛行經德己立街及威靈頓街,然後返回大道中或砵典乍街、干諾道中、租庇利 街、德輔道中、永樂街、急庇利街、文咸東街及摩利臣街,然後返回大道中

需改道的巴士路線:4、5、7、10、37A、M49、71、90B、91、101及104號

資料來源:運輸署網頁

***************

哈, 你話如果呢幾日有人特登著住件蜘蛛俠衫, 走入去砵典乍街與威靈街附近, 博上鏡會係點呢? 又, 如果有一大班人著哂xx戰隊衫喺附近一字排開, 又跳黎跳去, 打怪獸會唔會阻住拍攝呢?

突然之間, 因為有好多超人喺度, 香港好安全.

(咁, 以依家啲電影後期電腦技術咁勁, 就算拍咗, 都會俾人刪走哂囉...另外, 又好想見架蝙蝠車喺中環行呀! ^^)

4.11.07

五支煙囪

心血來潮, 突然諗起鴨脷洲港燈發電廠, 咁即管上互聯網及維基上搜尋, 結果都無空手而回...^^

期間無意中搵到anpanman呢個blog, 寫咗一篇有關發電廠既故事. 嗯原來又真係有段古, 好得意又不失傳統風俗. 經anpanman同意, 故事相片如下.

*********************



今天鴨脷洲的海怡半島,原址是鴨脷洲港燈發電廠!

第一次令我深刻印象是由華富村乘巴士往香港仔下斜方向時,看見這座巨型廠房外貌,有很懾人的感覺!!!

1990年拆卸後,仍保留一大型倉庫及寫字樓大廈,至今仍在,位於海怡半島中間位置.

1995年,我在一間工程公司幹文員工作,曾被派到這裡負責有關街燈維修資料的記錄員!!

跟一些在這裡工作的老職員傾談,得悉原來身處寫字樓位置,正是跟圖片中......依次序,由照片左手面數過來,最左面就是一號發電機組!!!

還有我曾在歷史資料聽說"假煙囪"一事! 他們都知悉這事在早期發電廠仍是初運作時期,由原本兩支煙囪,擴展至三支煙囪,即增加一組發電機......可是三支煙囪,一起噴煙......這情景,跟拜神燒香的景象極為相似!!!!! 對身處香港仔避塘的朋友來說,極之不滿,引起情緒不安,強烈要求發電廠必需拆卸這不祥之物!!!!!(行船者很相信意頭,因海上工作有很多難以預測的風險,也不能盡說是單乎迷信,這是可理解!)

結果發電廠急建多一支煙囪,形成實際上有三支煙囪運作,另一支是"假野",用來作道具,解決視覺上產生民憤的問題!!!!

及後,港島發展急速,需求電量更大,假煙囪也不再是假了,變成真了,最後更是變成五支煙囪啦!


******************

今日肥龍下晝趁近黃昏時間, 走咗去相片差不多既位置再拍一張相比較. 發電廠同煙囪當然已經拆咗, 不過對岸(田灣)既電纜架就仲喺度呀!!

1.11.07

看不見的

肥龍有時做白日夢, 曾經諗過突然失明既感受同日子會點過.

記得喺電影【地下鐵】入面, 梁朝偉飾演既角色突然間失明, 好自然咁, 生理上、心理上, 接受唔到. 一大埋非常切身又實際既問題. 接受唔到自己照顧唔到自己, 生活變得被動, 需要他人協助去完成大大小小生活細節及處境.

不過喺肥龍既幻想裡, 呢啲細節要解決只會係時間問題. 但原來, 肥龍覺得失明, 某程度上, 比死亡更可怕.

其實唔駛真係要失明, 只要合埋雙眼, 眼前一黑, 黑色既畫面已經話哂你知你視覺上失明既世界. 又試幻想如果喺合埋雙眼一刻後, 世界從此變成黑色, 及只有黑色畫面.

幻想裡, 接觸世界既層面變, 方式變, 感覺認知亦變. 日夜及冷暖可能從皮膚上感覺得到. 但肥龍覺得可怕既, 係失明突然令生活變成一個記憶空間, 事物既認知只可以靠過有既記憶影像做比較, 確認. 新既事物, 因為睇唔到, 走唔入腦袋, 只可以意會及幻想.

又最怕從一刻起, 唔可以再見身邊所有人既容顏. 眼神, 笑容, 臉容, 肥瘦, 成長....一幅又一幅熟悉既臉, 往後, 只可以從腦袋記憶找尋, 去思念.

唔止係思念, 更滲著心痛及掛心.

感覺就似真既一樣.

每次夢醒, 都會感恩. 因為, 可以看見.

31.10.07

宇宙大王



同網友msn傾開, 發覺唔同人, 硬係有啲野其他人做無事, 但偏偏自己做就有問題, 相反亦然.


有時無聊白痴諗, 遇到呢啲情況, 開始懷疑自己究竟係咪地球人定只係得自己係地球人, 因為點解只有自己係咁.

又, 如果自己唔係地球人, 好可能係唔自願或無意降落地球. 不過降落時沖擊太大, 失咗憶. 結果, 一覺醒來, 除咗身無一物之外, 連自己隻太空船停咗喺邊都唔記得咗, 搞到返唔到家鄉. 最後流落地球.

呢一刻, 突然令人諗起IQ博士入面既宇宙大王尼克真.

為咗可以返家鄉, 尼克真大王同隨從四圍咁去搵太空船既踪影. 並且又同時自食其力, 拉架木頭車, 走去做收買佬. 收埋一疊疊舊報紙攞去變賣, 希望可以搵夠錢慢慢去整架太空船.

咁大王如果喺香港應該可以搵到唔少機會. 因為喺香港, 大王發現原來有好多免費報紙, 而逢星期五果份, 仲要好大疊. 不過大王可能要俾啲心機早啲同勤力啲, 因為大街小巷地鐵站巴士站(可能)仲有唔少大王既同鄉, 密密手咁去收集舊報.

又今晚係哈囉喂, 大王身型圓轆轆加埋身青BB既打扮, 應該會喺人群中好搶眼, 到時可能會有唔少人爭相搵大王拍照, 摸吓佢個頭 (實際係佢個口) , 可能搵到賺外快既機會添.

30.10.07

真的漢子


通常耐唔耐都會見到有警務處招募警務人員既廣告, 不以為然. 今次喺倫敦地鐵入面咁啱見到一個. 從未去搵過英國有關正職警員人數同流失率有幾嚴重, 更唔係好清楚倫敦既治安情況. 雖然呢個本應係一個好認真既題目, 不過再睇呢張相上面既文字, 肥龍就好自然諗: 「其實有無人真係因為呢啲點子而走去應徵架?」

- 完善專業訓練...
- 與在職差人一齊執勤及照應...
- 刺激既警務工作...
- 獨一無二兼刺激既經驗...

好好奇, 以上呢啲經歷會有幾多人期待呢?
又, 既然係義工, 定係仲有其他更實在既吸引力呢?

29.10.07

背景聲音

最近同一個客戶食晏時, 公事以後, 傾開一啲瑣事. 客戶就話因為佢發現公司同事喺辦公時間掛住聽收音機或聽歌, 攪到影響工作時既集中力及專注力下降, 及怕影響其他同事, 所以最近就決定嚴禁喺辦公時間收聽電台或歌. 不過, 開始咗大約一個月左右, 情況無明顯變化前, 佢就已經發現同事故態復萌, 偷偷地又再繼續聽番. 呢件事, 令佢非常唔高興之餘兼覺得無同事辦法.

客戶非常無奈謂辦公時間唔準聽收音機或歌本來就已經係應該既, 只係開壞咗個頭, 俾同事聽慣咗先至攪成咁. 而且佢又覺得, 成件事既處理, 自己既出發點本想係希望同事可以集中啲及專注啲去做公事, 只不過係同事一律唔明白佢既用心及意思啫.

聽完, 肥龍當然非常明白客戶既苦心啦, 呢個情況, 肥龍都有諗過及發生. 但同時, 肥龍又有一個疑問: 其實因為聽歌而影響工作時既集中力及專注力呢個情況, 會唔會係客戶自己既假設, 又或者會唔會係佢反應過敏呢? 肥龍除咗下意識地點頭表示附和, 咁就好奇問客戶其實之前有無試過因為呢個原因令到有事件發生, 甚至令到公司有所損失呢. 咁客戶就話無, 只係佢就如上面所講佢希望呢個情況應該改善一下囉.

不過肥龍就講笑謂, 其實要留意睇吓同事聽咩囉. 如果係睇歌可能問題唔大, 但如果係聽財經台呀, 股票呀咁, 就真係要留意一下, 千祁唔好阻住人發達. 又可能客戶果份工只係part time黎既啫, 再嘈可能連做都唔做時, 到時佢仲麻煩.

不過好似呢類問題, 真係又好難有個結論. 講番肥龍自己, 其實, 好多時, 當肥龍留喺公司加班做野時, 都會好自然習慣開著收音機或者播吓歌, 一路聽一路做野, 可以輕輕鬆鬆咁去做, 覺得並無咩唔妥兼可以減減壓添. 反正如果聲量唔大而又唔影響其他人既前提下, 肥龍無咩太大意見及所謂囉. 但係如果係喺辦公時間呢...除非係勞工密集行業或有實際需要, 又同事操作主要係機械式而唔太大需要用腦的話, 尚且可以. 否則, 真係可免則免. 兼且真係仲要靠同事自己自律, 唔好過界. 但真係唔容易, 反面既例子就見唔少.

講到尾, 易放難收嘛.

27.10.07

報名季節

唔記得起係之前喺電台節目聽到定係喺毅行者本書度睇到, 毅行者呢個活動, 雖然本質及形式上只係一項運動, 不過背後卻愈來愈有一股宗教似既魔力, 令參與過既人, 一直非常投入, 樂此不疲咁一年一年咁落去.

肥龍又覺得, 其實參與過香港馬拉松, 情況亦差不多.

而如果大家身邊有朋友同事曾經參加過其中一項活動既話, 最近, 唔難會聽到以下對話:

如果對方已經參加過

「你整咗未(報名)? 」

「你邊年開始(玩/跑)架? 」

「你第幾年參加呀? 我呢…..」

「咦你最快跑咩時間呀? 」

「咁你諗住跑咩時間? 」

「點解唔試吓跑半馬或全馬呀? 唔掂? 唔會架! 你只要平日肯練習下, 三個鐘 (半馬)/ 五個鐘 (全馬)應該得架! 」

「不如試吓跑半馬/ 全馬啦! 」

如果對方未參加過

「好好玩架, 試吓啦! 如果第一次跑咪先試吓十公里囉…. 掂哩!」

「好多人一齊跑, 好好feel咋!」

「大約一個鐘左右, 唔會好難架咋!」

「嗱, 件衫好靚架!」

****************

就係咁, 每年一到呢個報名季節, 大家可能成日見到一個或一班本來唔係義工既義工, 鬼咁正能量咁, 不斷咁叫身邊既人(快啲)參加, 又鼓勵一齊去練習.

又當報名既時間開始, 喺街上喺運動場上, 見到愈來愈多為準備比賽既練習者.

快, 跑, 跑, 跑!

26.10.07

有心有力


雖然無份參加, 不過見到一群有心人, 一支團隊四個人一條心, 一百公里幾十小時一件事. 肥龍其實好眼淺, 除咗動容, 就真係好欣賞呢股作氣!

每日世界國家社會社區公司屋企家人友人自己發生好多事, 各有故事, 自有甜酸苦辣, 不過未必孤獨, 自然人間有情.

唔行都可以捐款, 有時間不妨上去了解一下每隊既目標同理念. 更可以表示你既認同及支持, 出一分力, 幫所有有心有力既人打打氣.

The One-69ers, 我支持你!

25.10.07

飛身報名

話咁快, 又到報名時間嚕!

二月十七日, 半馬拉松, 肥龍又黎啦!

咦, 終點變咗維園喎...(不過有關係咩? ^^)

24.10.07

敬酒唔飲

唉, 愈來愈覺得自己似個QC, 不過檢查既, 唔係貨, 係人.

又覺得自己似個鬧鐘, 仲要係有snooze果種, 隔無耐就響一次, 拍完, 一陣又再響.

唔通個個真係好似口中咁講, 日理萬機, 每秒幾廿萬上落?

咁有啲野, 要做就係要做架啦, 無(時間)做咯, 咪要諗吓點樣做得有效率啲, 或者(時間)安排得好啲囉...

係咪衰呢依家, 硬係要搞到大老細出手.

23.10.07

地區球隊

有日肥龍放工坐車經過黃竹坑運動場時, 唔係大驚小怪, 竟然見到有班人喺運動場田徑跑道內既草地足球場上踢緊波. 事緣呢個場, 一直以黎成廿年, 肥龍都未曾見過有人喺度踢波, 就算肥龍心想有朝一日可以喺呢個場踢番一場 (肥龍細路時好鍾意踢波), 可能亦只有停留喺幻想既層次. 果時心諗, 其實會唔會係中間啲草有問題, 定係呢個場根本係唔借出來作足球比賽用呢, 所以一直無(見過)人喺呢個場上踢波.

果一刻, 真係有諗過落車走去了解個明白.

咁啱友人P係參與與足球有關既事務, 上星期六肥龍就提起呢件事八卦一下. 原來, 肥龍之前見到既, 應該係南區U19 (19 歲以下)既代表隊操練. 後來P再講, 其實南區仲有球隊打緊丙B聯賽, 而當中仲有其他地區球隊同組比賽.

講開地區球隊, 唔可以唔提大埔和富, 肥龍亦有睇佢本【足可圓夢】. 上屆大埔和富雖然只係踼得麻麻, 但以首屆踢甲組聯賽而言, 已經算係交足功課. 而且就好似好多唔同媒介報導咁講, 大埔和富除咗成績之外, 帶出既係其他非地區球隊無既歸屬感同喺既凝聚力, 亦為地區球隊帶黎營運發展既啟示. 同時, 藉大埔和富模式既成功, 更可以刺激一下香港足球界(足總)既運作及氣氛.

畢竟, 香港足總及球會既管理及作風真係不敢恭維. 遠既唔講, 但就上屆南華留班同今屆東方升班既理據及安排, 無不為旁觀者汗顏. 同時, 現今香港甲組球隊及球員水平(特別係體力上) 距離現今職業聯賽水平, 仲有一段明顯既距離而需要提升. 肥龍已經唔止一次見到有球員踢到七十分鐘(全埸九十分鐘)已經無哂氣, 唔掂!

香港唔係倫敦, 以球員供應及資金關係, 加上聯賽水平及制度而言, 唔可能同時擁有幾隊英超球隊 (車路士, 阿仙奴, 熱刺等). 而當肥龍上個月旅行曾到訪車路士及阿仙奴主場球場參觀時, 於眼所見, 除咗係可以坐四五萬觀眾既球場外, 亦見到優良管理策略及引以自豪既球會歷史. 而當中既阿仙奴主場球場, 更係肥龍誠意推介. 因為喺果度見到既, 並唔係單單一個好靚好大既球場或一支擁有球星既球隊, 而係一項一絲不苟, 非常專業, 一環緊扣一環既產業模式, 並且利用呢啲優勢再去發展擴充.

唔同既係, 喺歐洲頂級聯賽及球隊, 球隊可以有好多收入既來源(轉播權及每場廣告等), 門券既收入只係雞肋(不過如果一百英鎊一張時另當別論), 反而球場可容納既球迷愈多, 代表更多埸內商機, 小如場內飲食(四五萬觀眾喎!)到球隊紀念品, 可以話財源滾滾來. 又當球隊可以參加歐洲賽如歐冠盃, 出場費及獎金亦非常鉅額. 相比本地聯賽, 基本上如果唔係有有心人一直不問付出咁俾錢去營運球隊的話, 好多球隊根本上連收支平衡都有困難. 除咗外隊及一啲亞洲賽, 打黎打去都係果幾隊, 而比賽場次亦有限, 可以發展既空間非常狹窄.

一項產業要成功, 要發展, 絕對需要優良既管理及遠景去吸引更多人參與 (職/ 球員, 球星) 及引來資金到來投資, 然後再成為獨有既模式 (包括青訓及球探). 相反就唔一定係單靠每年辨吓外隊, 攪吓網頁, 攪吓公關就可以攪到出黎. 況且, 好多野其實都係以推動本地足球為名, 實質係賺(本)錢項目. 始終, 任何活動, 都要交出成績及提供娛樂性, 先可以吸引更多球迷參與.

喺本地聯賽, 肥龍真係好難想像自己會擁戴一支現時既甲組球隊, 更枉然話會薪火相傳, 帶同下一代一齊走入球場觀賞本地賽事. 有時諗, 依照現有情況, 不如攪業餘聯賽好過, 起碼可以更多人參與及更普及. 到適當有足夠水平及規模時, 再重新引人職業聯賽制度. 但又咁講, 當有日有一隊代表南區既球隊出賽甲組聯賽的話, 唔駛諗, 肥龍一定會全心支持, 到場打氣! 因為南區球隊呀嘛... ^^

22.10.07

字裡自己

可能又係庸人自擾既話題. 不過自上個星期睇完某戲至今, 對戲入面其中一段一直徘徊喺腦海中, 咁無無聊聊又可以繼續諗吓.

其實, 大家有幾多人真係完全認識、了解自己呢? 咁大家又係用咩渠道及方法去認知自己呢? 有唔少扑主(博客)喺寫自己既扑時, 或多或少會喺簡介或自我介紹入面加幾句, 希望令到訪既各方朋友可以知道自己既說話, 嗜好, 喜愛既事物. 不過各方朋友睇完個扑後, 又係咪真係接收到呢啲訊息或者會有相同評論, 就唔係咁清楚咧.

另外讀書時大家又會俾自己本紀念冊啲老友呀, 同學呀, 心儀對象呀去寫呀寫. 咁之後細心閱讀, 從文字中, 先知道喺對方心目中, 原來自己係咁個喎! 之後又再睇, 可能仲發現一啲連自己都唔為意既口頭嬋呀, 小動作呀, 仲有處事手法, 更加唔知道原來當年某日自己既行為或說話如何令對方留下(深刻)印象呢!

又有時, 打掃屋企搬屋時, 總會無意搵到其他人寫俾自己既書信或memo, 咁下意識咁, 又會坐定定睇番一陣先. 不過, 又原來, 喺閱讀對方寫俾自己既留言時, 不論係好話定係逆言, 從他人既文字去認識自己, 真係好好feel同滋味在心頭, 又會令人突然諗起呢個他/ 她.

而且, 咁睇, 又不失為一個自省既機會.

20.10.07

車途聲害

肥龍兩面性格雙重標準, 自己講野嘈但又嫌人嘈.

平日返工放工, 可以既話, 都盡可能唔坐地鐵而坐巴士.

因為實在頂唔順每隔幾分鐘既列車廣播.

坐巴士, 塞對耳機聽住歌, 可以望望外面風光, 又可以發吓白日夢.

不過最近唔知係心情差定係留意多咗, 每次乘坐交通工具時, 身邊硬係遇到一位或以上既煲粥客.

電話係發明用黎溝通, 你可以話肥龍食古不化, 但係就...

真係唔想亦無興趣聽妳/你今日公司有幾忙;

真係唔想亦無興趣聽妳/你屋企有咩事;

真係唔想亦無興趣聽妳/你仔女返緊咩興趣班;

真係唔想亦無興趣聽妳/你最近買咗股票賺咗錢;

真係唔想亦無興趣聽妳/你叫伴侶記得食葯早啲瞓覺;

真係唔想亦無興趣知妳/你買咗曼聯上盤讓半球.

我只係想安靜安全坐完呢程車. 唔係叫妳/你唔好講, 不過可唔可以講得細聲一啲, 自律一啲?

如果好似日本咁規定交通工具行駛時, 乘客唔准使用手提電話交談就好咧!

18.10.07

源自比較

明明喺做決定時, 只得A 同 B ,

喺A 同 B之間, 經過分析、考慮、計算, 然後作出選擇,

嗯, 就揀A啦.

不過, 當揀咗A無耐之後, 發現原來仲有 C喎.

明知點解, 硬係覺得C係好啲. 又怪點解唔早啲遇見C, 又自問點解當時無C.

*****************

喺選擇過程中, 往往只可以著眼當前因素去做決定.

開始時只有原本既選擇, 而決定亦只可基於呢個設定去做.

如果做咗決定, 可惜思維並無與時並進, 以為當時既因素仲係不變還原, 可以回到從前, 係天真.

又如果係一廂情願咁覺得雖然所有野繼續發生, 只係當時未遇到或無去做, 機會過去, 係不知足, 係貪心.

*****************

講到底, 如果唔係因為比較, 其實可以簡單得多.

16.10.07

反枱技術

好多人話工作辛苦, 老細客戶好demanding, 同事又唔合作, 事事不如意, 真係做到想「反枱」!

咁要反枱, 其實技術又係咪到家呢? 不如試吓呢個, 可能就有答案咧!

玩法: 用mouse將畫面中既手由下至上移動, 當手到達接近枱邊(即枱底)時, left click, 張枱就會開始反.

- 反枱既程度取決喺mouse下至上移動既速度同left click既時間

肥龍暫時(更新)紀錄係295回, 睇吓你可唔可以更厲害, 更高! Have fun!

14.10.07

近朱者赤

年少時, 龍爸龍媽各有各忙, 見面時除咗食飯飲茶扭買玩具之外, 好少傾談及講有關學校生活既事. 咁大部份既課餘時間, 肥龍就係同屋村友人四處玩, 再唔係就同書友仔去玩.

唔係肥龍講得誇張, 少時住喺屋村人品複雜, 三山五嶽, 咩人都有. 而且喺我果陣時, 好多屋村友人大部份人都讀唔成書 (莫講話大學生, 預科畢業已經好醒, 中五畢業又有少少), 就咁讀完中三就算. 有啲又開始群埋啲唔太好既人, 做埋唔少唔好既事.

肥龍就曾經試過喺香港仔海旁公園同朋友傾偈時俾人用刀狀既物件恐嚇老笠, 交錢後再報警再捉到個到人喺差館先發現個賊原來係自己既同學, 都咪話唔嚇一跳.

依家有時諗番轉頭, 如果唔係當時龍媽惡死兼打得重手, 肥龍可能已經走咗去跟佢地去玩, 後果會點就唔知(亦唔識去諗), 但之後所行既路就肯定會好唔同咧.

另一方面, 令肥龍當時無同屋村友人去玩既就係同時(中學)認識既書友仔, 佢地未必全部都係大好人, 但嗜好就好鬼健康(做運動), 而有幾個仲讀書又叻添, 問心講肥龍受佢地(正面既)影響唔少. 又其實雖然期間有好多離離合合, 到因升學而認識, 到分開(唔同預科/大學), 又再認識(出黎做野咧!), 不過咁多年黎, 感情依然沒咩大變, 除咗個別時候既重色輕友或實在工作太忙, 到依家大家關係尚且保持得唔錯. 耐唔耐就諗啲主意出黎聚一聚.

今朝同友人msn時, 講開知道原來尋日朝早佢地一行五人走咗去跑步 (肥龍尋日因為有比賽所以無出席), 跑完仲一齊走咗去食早餐, 真係好想去呀! 咁, 下星期六朝早就預埋肥龍, 不見不散啦!^^

13.10.07

完成一關

五公里, 完成時間為三十分鐘左右. 第一百六十三名次 (唔駛包尾~~!)

同估計既時間差不多.

嗯, 三個星期沒跑及練習, 算收貨啦.

咁, 就繼續準備第二三四關.

12.10.07

桌球枱上

睇開黑柴, 諗番起打「士轆架」.

讀書果陣時體育世界開始引入英式桌球, 而好多桌球既知識同規則, 都係喺節目裡面學番黎. 另外喺節目入面,肥龍開始認識同知道當時既世界冠軍就係戴維斯, 仲有白旋風韋德,後來仲有眼鏡好似上下調轉戴既泰萊. 無幾耐之後又有個靚仔既享特利.

肥龍鍾意韋德, 因為佢好鬼神經刀, 風格快、狠、 準. 一盤波, 隨手起Q兼起break, 一陣就打完. 勁起上黎好多球手根本唔係對手. 而且佢又係左撇子, 加埋長曲髮, 型!

讀中學放學後, 除咗鍾意蒲機鋪外, 有時就會跟啲村友仔去波樓打「士轆架」. 當然唔會只係打波, 有時除咗打牙骹戰外, 有時仲會打波鐘, 慶起上黎更會打波鐘加五毫子一度.

果陣, 喺球技進步以外, 最想擁有既就係一支私家Q. 攞住佢落波樓, 打開Q套拎支Q出黎果個畫面, 不知幻想過幾次.

不過最近已經好少睇, 之前搞既桌球錦標賽又因為有事唔得閒去睇. 依家只認識奧蘇李雲一個, 再加埋傳家俊咁. 咁啱奧蘇李雲又係神經刀一名, 不過更可以左右開弓, 更好似(唔肯定)擁有最短時間打147度(最高分)既記錄.



諗起好好玩, 有時間再去打.

11.10.07

唔弗地跑

素來有跑步既習慣, 近年更以跑渣打半馬拉松為興趣.

舊年本來準備充裕, 目標想跑出自己最好時間. 奈何突如其來既水泡令後段既部署有變, 最後雖然跑出比前年快既時間, 但相比原來目標(兩個小時內), 仲有一段明顯既距離.

今年再接再厲, 做足更多準備功夫. 除咗每星期練跑之外, 更特別安排喺渣打半馬拉松之前, 參加其他比賽(如十公里賽)去保持狀態, 希望唔弗跑到弗, 唔駛最後一兩個月辛苦搏命去操練, 亦可以達到以戰養戰既效果.

黎緊既星期六(十月十三日), 肥龍會先參加AVOHK一個五公里既短跑. 不過因為參加人數只有幾百人兼屬於短途賽跑, 水準可能唔錯, 呢幾日竟然開始擔心到時會包尾添 @_@!!

跟住, 下個月十一日就參加咗NIKE既十公里跑.

到(暫時)最後, 就參加咗十二月二日聯合國兒童基金既十公里跑.

就係咁樣, 一路跑...跑...跑...跑...跑呀!

向兩個小時完成半馬拉松既目標進發!

10.10.07

急唔黎喎

之前公司因人事變動既空缺陸陸續續填補, 新同事亦返咗工差不多一個月咧.

之前講過, 一般新成員落場前, 大約需要俾4-6個星期時間去提供briefing, training. 更要安排佢同啲現有成員出一齊去見客. 之後就算完成, 只代表新成員有基本能力同認識所負責既工作, 咁又除非搵著個熟手技工(同行), 好老實講距離真正獨立工作仲有一段時間.

肥龍都係過來人, 當年咩鬼都唔知就已經俾前老細”伸”咗落海, 幾經辛苦用咗幾個月先可以爬返埋岸. 不過當中既徬徨無助, 至今依然在目. 所以因為咁, 肥龍又的確唔介意俾時間同事去”浸”好啲基本功, 一步一步黎喎. 而肥龍就好鼓勵同事如果覺得能力範圍可以既話, take 少少 risks, 放膽去試, 到遇到問題時自己諗諗, 主動去問或請教有經驗既同事, 咁相信學習得黎比較上心亦比較有歸屬感.

不過有時呢個假設或安排, 往往係同事比肥龍仲心急. 有時, 又真係令肥龍感到唔知好嬲定好笑.

有時會自己反思, 對一啲新入行既同事, 究竟應該係俾時間同機會佢地去學習好基本功先再安排實質工作好吖, 定係好似肥龍當年接受果套咁, 先一腳”伸”同事咗落海, 等佢自己用辦法遊返上岸至好呢?

肥龍又突然諗番【戰狼300】入面如何訓練斯巴達戰士既情節添…

不過喺真實情況, 又有幾多個可以捱得到及堅持落去呢?

9.10.07

正在播放


咁就聽咗十年.

再搵, 原來有官方十週年網頁喎.

聽住睇住, 舞台簡簡單單, 不自覺隨熟悉旋律又開始搖身搖勢.

7.10.07

救泊車盲

肥龍本身係一個泊車盲, L泊位尚算可以, Parallel泊位喎, 千祈唔好泊車果陣有車喺後面等住, 否則必定皮質醇突然標高. 莫講話好似豬啲拗爐呢類龐然大物, 就算細架啲既車, 亦都有可能攪到身水身汗.肥龍咁耐以黎都係喺停車場整花部車(仲要唔係自己車!). 又或者, 只要安裝番個「X將軍」之類既泊車感應器先可以避免呢個問題嘞.

英國意大利同好多歐洲國家一樣, 城市內有著唔少狹窄小巷, 平日行車已經要打醒十二分精神, 而喺入面泊車就更加係高難度動作. 今次遠遊, 除咗見到Smart之類既環保二人小車外, 喺街上更見到唔少一人既小車, 令大鄉里既肥龍又大開眼界線. 而且有啲外型好特別, 有從後面望似足個木箱咁, 又有啲就似卡通片IQ博士裡既Q版車, 色澤鮮艷又外型攪鬼, 唔睇清楚仲可能估外殼之內其實係用雙腳行走添.

有咗呢啲小車, 泊車可能變得無難度, 肥龍呢類泊車盲有救星啦! ^^

似足個木箱既小車


似卡通片IQ博士裡既Q版車


咁泊又得!?


仲有巴士^^

6.10.07

體驗禮物

有時, 諗一份特別又稱心既生日禮物一啲都唔容易. 買物品送俾人咩, 除咗要好熟悉及留意對方鍾意咩又或者缺少咩之外, 又要睇吓自己荷包有幾多, 否則如果買落一大埋唔用既禮物, 費時失事.

又如果送俾長輩呢, 就更加要再三留意. 另外如果想請對方去旅行的話, 有時發現原來對方以為你會陪埋一齊去, 咁如果唔係咁諗又或者無假喎...可能又令對方失望, 咁點算好呢?

而又如果送一份體驗式既禮物唔知又會點呢? 可能你會問: 體驗式既禮物? 咩黎架?

適逢今年大伯六十歲大生日, 上星期四清早, 一大班人浩浩蕩蕩咁揸車殺入位於英國南部Brookland既 Mercedes-Benz World. 同時為大伯預訂咗以下呢個半天既節目.

今次為大伯準備咗三個courses:
1. off-road 4x4 adventures (M-Class) (15分鐘)
2. AMG Taster Passenger Experience (E63 AMG Saloon)(15分鐘)
3. AMG Experiences (SL 55 AMG Roadster)(30分鐘)

頭兩個全程由在場師傅駕駛及示範, 而最後一個(即第三個)就由在場師傅從旁協助下, 由大伯自己駕駛, 自己飛. 肥龍有幸掹車邊, 頭兩個courses可以做後座乘客, 可以經驗人生第一次乘坐四驅off-road時既顛簸, 到直接感受似飛機起飛(E 65)既加速(514匹, 由0至90mph)及濕地上既飄移及打轉.

你睇, 坐後座經已咁興奮, 講到好似係送俾肥龍既禮物咁, 你話如果好似大伯咁坐車頭仲有得落埸揸呢點算...不過真係一句講哂: 正! 本來之前一大班人都驚大伯可能覺得麻麻地, 唔敢玩, 點知玩完去食晏果陣時大伯已經話如果下次再揸呢就咁又咁, 又話下次佢實飄移得(再)勁啲喎!

而且講到晚飯時仲講緊, 就知道佢幾鍾意及興奮咧!

3.10.07

少食滋味

本來喺香港來來去去只係識嗌叫開果幾種意粉, 去到呢邊仲有新鮮做既, 實在花多眼亂, 又目不暇給. 而且可能因為心情輕鬆, 個腦完全慢幾拍(或者無運作), 食完好快又唔記得咗叫咩名(?!). 不過當再見番個menu, 記憶又再番哂黎.

呢度食野有樣好, 當然食物價錢有平有貴(用呢邊生活水平計), 但水準就普遍好好, 而且用料新鮮(包括意粉). 有時就係諗, 要弄一道好食及有營養既食物, 食物本身新鮮係少不了, 再加上合時飲食, 就更加好.
餐前麵包一般比較硬及味淡, 不過加咗醋及oliver油後又好味番唔少. Florentine Steak又比想像中更大, 三個人食都不為過. 食飽後到街上食番杯雪糕做甜品, 然後飲多埋杯Cappuccino或者latte, 又冷又熱, 滋味在心頭!

有日就肥龍走咗去逛菜欄, 見周圍有芝士呀, 火腿呀, 各色各樣大小既菌類, 乾製既食物呀, 行一兩個鐘一啲都唔覺悶呀. 不過雖然肥龍鍾意食意大利餐, 但要由朝食到晚, 食足四日, 每日三餐, 今次可算係第一趟.

事後證實就算幾好食又好, 幾為食都好, 好野, 都應該係少食多滋味.

呢邊係邊度? 意大利佛羅倫斯.


2.10.07

發現豬踪


早幾日行開街, 發現豬踪! 睇落, 又同平日見開既有啲出入喎.

再望真啲, 周圍既肉腸同後面既火腿, 都好似都好好味咁喎! ;p

27.9.07

志偉強明


希望你可以軟著陸之後, 慢慢享受.

又盒面上, 介紹除咗加冰外, 仲有一種食法.

"For years now people all over the world have been falling in love with the unique and great taste of Baileys Original Irish Cream Liqueur. And now there are even more ways to enjoy Bailey than ever before with this exciting new range of Baileys gourmet foods. The great taste of Baileys Original Irish Cream Liqueur is perfected by the blending of fresh Irish daily cream, the finest spirits and Irish Whiskey, and is recreated in this high quality, premium food range. It is everything you enjoy about Baileys and more!"

Cheers!

25.9.07

幾天隨想

剛啱開始既假期, 去既係一個熟悉既地方. 想去既地方其實唔多, 要去既以前已經去過(幾遍), 未到過既無興趣去, 又始終唔會去.

尋日早上一直落住大雨, 只好留喺所在既地方, 食過早餐, 睇吓書. 雨停過後, 到外面輕輕鬆鬆, 漫不經心走走, 發現天氣其實並唔係咁差. 由第一天到今日第四天, 感覺上同嬰兒差不多, 主要係食, 瞓同去洗手間. 其他事, 想做就隨意去做. 好多喺香港日煩夜煩既惱人事, (暫時)亦得拋諸腦後.

到外面吸吸新鮮空氣, 同家人自在咁傾談, 總有種重拾生活既感覺. 而且肥龍亦希望藉今次兩周既假期, 可以好好俾腦袋及身體休息一下. 因為未來前面要走既路, 肥龍已決定今年及後會喺事業上作出一個明顯既轉變. 信心係有既, 只係亦藉今次時間為未來開始做好心理準備, 亦順道為已計劃好既作最後調教.

現有既工作, 雖然未至於意興闌珊, 但就好之前時間所講咁可能已經到達一個明顯既樽頸位置, 而且挑戰感滿足感亦大不如前. 自覺要再進一步, 相信(機會)成本亦不少. 而且肥龍亦諗既然已經打工十年時間, 覺得可能反倒過來, 利用呢啲成本, 再用兩三年時間, 好好做成事業上另一個平台, 總算係一個可以接受既取向.

尋晚有機會同一位長輩傾談,肥龍將心中所想及計劃一一透露, 可慶幸係長輩亦分享咗唔少寶貴既意見, 肥龍深感獲益不少. 肥龍自問唔係一個好大喜功既人, 雖然有時心多多, 意見多多, 不過底子裡還算係一個保守及穩健既腦袋. 雖然長輩講過「無商不奸」, 肥龍自然有所保留, 同時明白長輩所講「靈活」既重要.

長輩對肥龍既計劃既支持係肯定, 而肥龍亦有一套最壞打算及退出既方案. 反正有一啲事, 正如好多人所講, 唔做過始終唔會心息. 雖然機會可能隨處有, 問題反而係自己識唔識得把握, 同時又可唔可以貫徹始終.

寫到呢度, 聽落都係一啲「阿媽係女人」既道理及說話, 但又又係呢幾日一直喺肥龍腦裡游動既想法. 肥龍希望喺度寫低, 作為對自己日後既一面警醒. 因為眼前既呢一步, 真係幾孤獨.

21.9.07

月黑千尋

月黑風高, 肥龍決定今晚就遠走高飛.

走到世界某一角落, 開始短暫但期盼既兩周假期.

****************

休息過後, 自當回來.

大家保重, 兩周後見.

****************

望各路英雄身心舒泰, 愉快悠然過中秋節!

20.9.07

管理自己

講開coaching, 咁啱睇到最近Fortune講Leadership, 茶杯又講Humanagement (即 Human + Management), 突然又想加把嘴講多幾句.

咁對於點樣先做可以做Leader又咩叫掌握Management, 出面街已經有無限既資源去提供, 肥龍喺度無謂班門弄釜. 不過反而肥龍想講接受他人既Leadership 同Management既心態上面.

相信有唔少多人都有呢個情況,面對老細既指示, 一係就信心不足,唯唯諾諾, 照單全收. 另唔係就會覺得呢啲指示, 不外如是, 自己可能心情有一套更好既方案. 問題只係無機會講, 又或者會覺得講咗老細唔明(唔聽).

但係如果換個角度諗, 其實有幾多人會喺收到既指示前, 會好好管理及準備好自己去執行所指派既工作呢? 你可以話老細無料無計劃無能力, 但一件事既成敗, 除咗計劃之外, 執行力亦非常重要. 試問有邊個唔想指指點點, 叫人做野呢? 問題係如果你無執行既能力同經驗, 順風順水時當然無問題啦, 但如果遇到問題或發現資源唔夠既時候, 就要見真章嘞.

仲有, 如果你老細真係無料無計劃無能力, 如果真係俾你上咗佢個位, 你又敢唔敢講會無問題呢? 咁如果無呢啲能力同經驗的話, 係咪應該先諗吓不如去按照指示去做, 期間自己一面留意及學習當中要在意既地方及技巧, 從中偷師.

喺肥龍工作生涯中, 大部份既老細都係只會喺面前做一(幾)次, 你見到學到幾多係你既事. 肯落手落腳教既, 少之又少.

講起學習, 肥龍覺得同老細討論, 其實亦係一個唔錯既學習過程. 雖然呢個過程, 所花既能量, 絕對唔會比做老銷對客戶既少, 但喺討論過程中, 你更加可以睇到老細既思維同顧慮, 又或者一啲宏觀既考慮. 依啲真係睇咩書都唔會學到. 至於, 最後吸收到幾多, 就係睇個人既造化同天份啦.

17.9.07

以前跟佢

最近無意中喺一個客戶口中, 聽到肥龍之前一個上司 (依家喺唔同公司做) 同其他客戶講肥龍當年都係跟佢搵食. 言下之意, 即肥龍當年係佢下屬, 肥龍既一舉一動, 有咩能力, 佢都一清二楚. 所以有生意如果搵肥龍做, 不如搵佢做啦.

肥龍聽到後只有一笑置之. 心諗肥龍當年係佢下屬係個事實, 無需要隱瞞或避諱. 佢咁講自然有其目的, 肥龍無心推敲, 但就想知係咪咁就代表肥龍喺事業上唔可以超越佢? 又或者, 係咪表示佢始終比肥龍優勝呢? 唔通肥龍自從脫離佢既 “庇蔭”後, 一直唔長進唔積極去提升自己既能力呢?

可能因為之前既工作關係, 肥龍除咗要應付本身工作外, 仲要負責指導successor既事項. 而喺同時, 肥龍都會向同事灌輸如果要升職就一定要有人可以頂替佢原來既工作呢個概念, 否則只有留喺原有崗位上. 換句話, 其實肥龍都唔知幾想佢地一個二個步步高陛 (當然係因為有能力同經驗嗰種), 因為咁除咗代表肥龍有班好幫手, 開心都黎唔切外 更代表肥龍有機會更上一層樓. 而且肥龍深信, 如果同事真係比肥龍能幹的話, 肥龍應該係檢討自己既問題, 而唔係去阻礙同事去發展. 況且, 肥龍亦未必留喺同一崗位太耐, 始終會離開再闖另一片天. 無謂阻同事發達.

另外, 肥龍非常享受呢個指導過程, 亦覺得可以發掘一位能幹既同事既滿足感好大. 所以一直咁做都覺得無問題.

所以對於有時聽到邊個話邊個係邊個個上司, 又或者邊個係邊個下屬呢類說話時, 肥龍唔想聽之餘, 亦覺得好幼稚, 好鬼煩厭呀.

16.9.07

相片回憶

肥龍係一個以影像為主, 文字為副去攝取知識既人. 一直覺得, 一張再簡單既相片可能會比一篇詳細既文字黎得深刻, 帶黎更直接感受. 所以喺好些情況, 肥龍會用相機把呢啲感受一一記錄落黎. 最近留意自己既扑亦放咗唔少相片做輔助去講故事, 而家中亦買咗些少以相片說故事既書.

對於相片, 肥龍常用兩個角度來接觸. 一個係從第三者去觀看其他人拍攝既相片去認識相片中既故事及情況. 另一個係從自己拍攝既相片, 去回想或加強一件自己曾接觸過既事與物.

呢啲事與物, 可能係一件玩具, 可以係一啲童年時到過經歷過既地方. 又會係一次難忘既假期及遊歷, 及種種身邊周遭出現既事. 不過偏偏喺旅遊時, 肥龍唔係咁鍾意拍好"多"相, 到此一遊式既相片可謂少之又少, 反而有時只係會為眼前一啲比較特別或覺得特別靚既景象拍幾張. 拍攝既理由可以好多, 但就覺得如果只係太專注拍照或希望將影像保留, 眼前真實既景氣就只會變成相機三吋螢幕裡既影像, 變得唔真實, 亦令眼界收窄, 更忽略咗周圍一同觀察到既一切, 違背本來旅遊既目的及意義.

就算再好功能再勁既相機, 亦唔可能將心中既完全感受保留. 而且如果真係對某件事與物有濃烈興趣的話, 遲啲亦可往書裡尋.

由澳洲黃金海岸既悠閒及藍天白雲, 日本富良野農場既繽紛花卉, 法國巴黎市面既歐陸氣息, 到所居住既南區海灘郊野公園既自然景色, 相信就算無相片, 相隔一段時間的話, 肥龍仲係可以把感受詳細咁講出.

因為咁,對一個未到過既地方或未接觸過既事, 正如前所講, 肥龍傾向好少拍攝, 反而盡量先用眼睛去接觸及觀賞, 發掘動心既地方再拍攝. 又除非, 當肥龍有機會再去或再接觸既時候, 再去拍攝多幾張.

14.9.07

綠野仙蹤


喺公司工作對電腦螢幕時間多, 一到週末, 就係要去休息. 除咗星期六早上去跑步. 最近當天氣開始無咁炎熱時, 有時間就會到香港仔水塘走走.

綠葉成蔭, 景物遠近, 眼界廣闊, 兼俾眼睛休息.


相隔不遠, 迎面見行山者, 點頭打個招呼, 再到下一點.

走到水壩, 將眼光放在遠處, 又會是另一種寧靜. 望著水中央, 見大群錦鋰魚游動, 非常自在.



眼前既一景一物, 令肥龍開懷, 亦為肥龍熟悉. 因為呢遍綠野仙蹤, 肥龍在此長大, 玩耍, 曾渡過不少個夏天及秋天.