28.2.07

我的初吻

既然咁個個興致勃勃,肥龍一於嚮應,盡力盡本份又玩埋一份先.

讀書時代既肥龍,可以話係戀愛白痴, 竟然相信”中學生不應該戀愛”呢啲咁高層次既老套野,終日只係掛住打波,打遊戲機…不近女色 (依家鬼死咁後悔!)

到入咗大學,仲等咩呀? 中學生唔應該之嘩, 無話過大學生喎...肥龍果時都係十九歲, 血氣方剛, 就咁好似一隻出籠猛虎咁走咗入森林開始識女仔. 於是基本上大學第一年見有咩會呀,舞會呀,派對呀都參加吓, 志在識吓人咁囉.

最後喺其中一個屬會既活動入面認識咗當年既初戀女友.

講番初吻,其實都黎得好突然.,記得既係喺第一次約會(去睇演唱會), 果陣時連手都未拖. 之後送佢返屋企送到佢屋企樓下時, 唔知邊度黎既勇氣,唔理心跳高達一百八十既極限, 肥龍竟然拖住佢隻手, 然後仲拖咗佢埋一旁咀咗一啖.

講落好似好平淡,但實際上內心感受好澎湃.而且肥龍好鍾意鼻貼鼻果份感覺.

肥龍既初戀,第一次拖手, 初吻就係咁同時發生咗啦.

寫到呢度, 肥龍突然好想聽伊面首”吻感"呀...

"我的初吻"之達人系列:

CK
渣古
空姐
Gideon
喵妃
小馬哥
米雪
謝斯柏賀維士
Marshmallow
Kenka
克羅維
Edmund
C.D
冬冬
咪搞

27.2.07

良駒遠去

今日,係隔離部門奇夫喺公司既最後一個工作天.

肥龍因為有會開,一直開到晚上八點幾先放番出黎.

途中,遇見奇夫喺自己個位執好枱頭既files同做埋啲手尾,肥龍心裏暗地咁讚咗一句"果然係有責任同專業,不枉佢舊老細阿力話佢係Fit馬吖!"

諗番起大約一年半前偶然間同阿力喺出差時講起何謂Fit馬.

當時大家都提開其實各自喺工作間都發現有一位明白之星,而喺某程度上, 喺呢兩位明白之星中亦揾到唔少自己當年既影子. 而阿力所提及果位就係奇夫啦.

其實當一個月前知道奇夫辭職既消息時,肥龍心裡的確打咗果突.跟手肥龍打個貓俾阿力問有冇諗過點挽留奇夫呀?

點知阿力個答案果然比肥龍高(點止)一個層次.

阿力話呢份係奇夫既第一份工,好多野都想學,包括出外闖同見識.老套啲講,個心唔喺度,你又可以留得佢幾耐? 又謂有朝一日當奇夫見識多咗,如果都仲係發覺敝公司係好、有前途既,阿力好有把握可以叫番奇夫番黎幫手. 唔係仲好咩?

我頂! 阿力,你係得既!

講番轉頭,如果有日有位同事辭咗工後仲會每晚甚至最後一日肯OT工作既話,除咗冇咗一位同事外,可能仲代表你失去咗一位工作夥伴啦!

奇夫,祝你喺未來既工作一帆風順,大展身手!

26.2.07

我係差人

本來肥龍想寫第啲野,但啱啱知道奥斯卡既結果,都係講吓<無間道>先.

如果冇咗麥兆輝、莊文强,加埋劉偉强, 未必有<無間道>,更加冇<無間道風雲>.

講真,肥龍覺得幾諷刺.

肥龍兩套都有睇,馬田史高西斯果套有其特色,但可能因為係改編關係,始終無形有原著既框架.

肥龍覺得可惜既係當年既<無間道>並冇份提名最佳外語片.肥龍依家都仲好記得當年喺<無間道>正式上畫前大約半年左右第一次喺劇院睇<無間道>片頭時果股震撼同期待既感覺.

唔怕講,肥龍大大話話睇咗<無間道>十次以上(戲院/DVD/電視/畸寶). 而且仲係睇極都唔厭,愈睇愈有味道!

今晚睇畸寶新聞訪問麥兆輝時既一番話別具意思. 大意謂就算人經歷幾逆境時,只要堅持做(交)出最好的話,始終係會得既.

而肥龍亦非常認同呢番話. 有時覺得依家會堅持既人少,想放棄既人多.放棄既人亦只有抱怨.

結果係點唔重要, <無間道>一直係肥龍港產片既至愛.

對唔往,我係差人.

24.2.07

盡在英超


好多人都知道,"盡在英起"呢句說話再過多幾個月就由"畸寶"轉到"現在".

由宣佈明年度英超會登陸"現在"果一刻,肥龍已經開始心郁郁想轉台,話哂都睇開畸寶多年,又有西甲、德甲同意甲,以水準計,點都唔會差得過英超(甚至好過...).

不過當肥龍睇完今季幾場大戰如阿仙奴對曼聯(主客兩場)、車路士對阿仙奴、仲有車路士對曼聯等,發覺英超真係好好睇! 其他國家既聯賽,講真,一季加埋(即場計)都睇唔夠十場. 反而英超,每個星期起碼睇足三場,呵!

另外,唔知有冇朋友仔都有玩開Fantasy League呢個英超網上遊戲.

唔經唔覺,原來已經玩到第二十七週(啱啱完結).其實肥龍都係第一年玩,開始時其實都玩得幾差吓,只係著重揀一啲"名氣"球員就以為實掂咁啦. 點知,現實得出黎既結果就係分數同排名都係below average, 並且喺中下游掙扎.

後來,慢慢適應玩法及掌握到一啲選人既橋妙後(大概十週後),成績開始慢慢改善,而且排名仲一路一路趕上. 直至第二十七週,肥龍既排名係122,508位(總登記人數為1,225,574位)(見圖). 即肥龍已經進佔Upper 10%之列.

不過,講真排名同分數對肥龍講無乜意義. 況且玩吓遊戲啫,大把人勁過肥龍啦,最多咪係當牙骹咁走去認叻囉!

肥龍之所以提起呢個遊戲,除咗係因為鍾意睇英超而順便玩埋個遊戲外,其實肥龍係想講透過呢個遊戲, 肥龍發現唔少自己喺工作上選人上同團隊管理上既某啲喜好同盲點,幾得意架!

而且, 肥龍覺得一個人最真性情既一刻或當你想睇某個人既性情的話, 不如試試留意佢玩遊戲果陣間既一舉一動, 好多時玩遊戲時既小習慣同行為喜好, 喺做其他點及做事時會不自覺咁流露番出黎,幾準架!

23.2.07

新春雜談

仲有三日,肥龍既新春假期又完結. Holiday mood當然就依然籠罩,但市面既新春氣氛就散得七七八八啦!

一. 開工大吉

尋日年初四肥龍"貢"返公司一個鐘左右,主要係攞番部腦俾IT米高兄修理,順便象徵式開埋工兼派吓利是.唔知係咪公司啲男生比較含畜或者怕羞,過黎主動同肥龍拜年既多數都係女生. 不過利利是是,紅紙一張,最緊要大家高興!

放完假下星期一返公司再睇咗點先!

_____________

二. 煲碟成績

多得無記晚間播放<十兄弟>同<迎妻接福>, 肥龍差不多每晚都可以煲番唔少之前買落既影碟(戲及演唱會),非常痛快!

以下係近日既成績表.

1. The Devil wears Prada
2. Johnny English (電視播)
3. 宇多田光2006年演唱會
4. 軟硬天師Long Time No See演唱會
5. Stealth
6. Pirates of the Caribbean: The curse of the Black Pearl
7. Pirates of the Caribbean: Dead's man chest

希望最後呢幾日煲埋<西九龍皇帝>、<傷城>、<林海峰踎低噴飯>同埋<墨攻>先! 不過舊債未清,轉頭今日又買咗套日劇<交響情人夢>番黎(早排去日本做野發現呢套劇喺果邊大人氣!),睇黎煲碟係沒完沒了既.

_________________

三. 羅四姑接生

年三十下晝行海皮無聊望沿避風塘既樓時無意發現<羅四姑接生>呢個褪色既招牌. 原來這麼近那麽遠. 接生呢樣野肥龍連佢究竟算唔算一個行業都未知,而且就算係都應該係好耐之前既行業. 竟然發現香港仔曾經有過一間喺左近喎! 貪得意就拍低佢作個記念,不過應該同羅四海無關啦! ^^

________________

四. 摩斯漢堡

好耐之前喺日本食過一次,味道唔錯. 大年初四行開朗豪坊發現原來有一間喺Food Court果層.

好奇加上為食,就買咗個餐試吓. 水準保持. 芝士味唔錯,漢堡味道濃,非M記漢堡可比. 不過薯條飲品就一般啲.

不過無怪既,如果用M記一個餐既價錢買一個芝士漢堡,唔好食就...‧哼^^!

22.2.07

海誓山盟

肥龍大年初二睇電視播緊2006年度十大中文金曲,見到林子祥頒獎俾陳奕迅時,腦海突然哼起<<海誓山盟>>呢隻歌.

鍾意呢隻歌無乜特別原因,又唔係特別鍾意追<跳駒>, 總之鍾意聽啦.

不過記得讀書時有位(女)好友喺肥龍生日時打電話上電台點唱呢隻歌俾肥龍聽,結果俾果住DJ誤以為呢位好友同肥龍之間"有啲野"喎...

再上YouTube試吓摷有冇呢隻歌啦,結果咁橋揾到既竟然又係中文金曲既片段 (1987年). 發覺二十年後, 歌聲當然依舊,而阿Lam容貌竟然絲毫沒變,實在神奇!^^

至於歌詞原來又係出自潘源良手筆,正!


海誓山盟 - 林子祥

曲︰林敏怡
詞︰潘源良
編︰林敏怡

心又再飄 就似就要撲進這海中跟它呼叫
全因從前話過 誓盟是如何重要
今天的掙扎知多少

再見的歡笑 沒法望到仍然如追憶般飄渺
到處人群在笑 猜說情早逝了
歡欣結局 少中更少

無止境的等 不禁心動搖
一分一刻也感到寂寥
卻總想到唯有你 叫這一生再沒缺少

人必需飽經心意的動搖
再去發覺愛中的奧妙
縱使天意難看透 我都感於盼望
甘於接受每一秒

人必需飽經心意的動搖
再去發覺愛中的奧妙
縱使天意難看透
我的痴心卻〔像星火永〕未退燒

21.2.07

地球暖化


相信經過呢個農曆新年後,好多人都好有興趣問句點解過年咁熱架?

全球暖化一早已經唔係咩新聞同題材,肥龍亦無須喺度班門弄斧.

不過肥龍工作上接觸好多喺國內有設廠既港資老細,有時同佢地講開一啲同環保有關既討論時,普遍俾肥龍既感覺係兩個字:冷淡.

雖然佢地未至於提及雙面影印,廢紙回收,節約用電呢類措施就當自己間廠已經好環保.但在商言商,佢地可能更關心其他野(例如喺邊度開廠有稅務優惠、工人人工、電力平啲、勞保條例鬆啲). 至於環保,相信除非市政府又或者佢地既大客(歐、美、日等)有要求或俾壓力佢地,否則佢地唔會咁自覺去做及執行.

再者,肥龍都聽唔少廠話有乜ISO14000體系認証,但其實只係紅頭文件,只會喺評審前先去執行.

公道啲講,咁都有一啲負責任既企業好有系统去計劃同執行.

所以當肥龍聽到曾先生話會同廣東省政府會就環保及廢氣排放計劃達成協議,又或者喺香港搞"藍天行動"時,不妨諗諗點樣利誘班喺廣東省設廠既港資去(正視)處理呢個課題,可能仲有成效.

車欠石更

放假期間睇咗唔少DVD,軟硬既Long Time No See就係其中一隻.

肥龍係軟硬粉絲,由佢地一開始既"飛越顛狂院"相隨到現在.

如果有人話佢地呢樣個樣(負面既),肥龍都認同架.不過關鍵係佢地將意念運用得好有技巧同埋好識得掌握大眾既口味.

至於對肥龍黎講,軟硬絕對係一段非常值得懐念既回憶, 甚多於只係歡笑.

唔係有軟硬佢地...

肥龍中學時去自修室温書時會冇咗調和劑(肥龍會錄低佢地啲節目温書時用walkman重聽!);

另外, 星期六會冇咗好多歡笑; (晏晝 - 飛越顛狂院, 夜晚 - 老人院);

冇可能會發現平日唧都唔笑,冇乜兩句既大佬竟然會聽往收音機儍笑...

仲有好多好多...不過睇番Long Time No See, 原來最正、精彩嗰Part唔係演唱會,反而係Bonus Track裡既每晚嘉賓果幾段.

睇完後肥龍更加明白點解自己仲係懐念緊八十年代尾/九十年代時果班歌星、組合及歌曲. 唔係話依家嗰班唔好...但總之唔係依家嗰班囉.

但當你睇完黎明、張學友、草蜢同郭富城既演出後, 你就會明白肥龍講乜. 最後,加多個陳奕迅.

可能肥龍所指既就係所謂壓台感,及對現場觀眾嗰份感染力,以及闖江湖嗰種魄力(?!). 試問佢地有幾多位當年唔係經歷過浮浮沉沉、黙黙耕耘先到今天既獨當一面.

同依家嗰班唔同既可能係遊戲規則已經變咗,商品化咗.無話好唔好,只係覺得"聲色藝"呢個形容詞已經係太苛求啦.

不過,如果肥龍無記錯,劉德華好似都有做表演嘉賓喎...但點解無咗佢嗰part既?

20.2.07

三月八日


仲有兩個禮拜左右,就係三月八日.

照睇都知未必係Happy Ending, 不過呢類小品故事最令人嚮往.

而且妻夫木聰加埋長澤正美, 我鍾意!

不如果日就睇呢部戲.

19.2.07

最後衝刺

唔講唔講,再過唔夠兩個星期,就係渣打馬拉松既日子.

肥龍身體唔爭氣,由年三十病到年初一,大年初一仲發高燒.

好彩好快退燒,今日身體已漸漸康復.

焉知非福,可以乘機减番少少負磅,祇係怕要慢慢調理番條中氣.

今個星期繼續放假,希望把握呢段時間,喺比賽日前再練多三四次,作最後衝刺!

17.2.07

十年如一

肥龍班舊(中學)同學圈子裡每年除夕除咗同屋企人食團年飯外,其實會有一個好特別既活動,就係會喺呢晚租番個籃球場打場籃球.

最近肥龍好奇咁問究竟有邊位老友記記得呢個活動係喺邊一年開始.

肥龍依稀記得好似係1991年,但又有人話係1990年喎...

結果呢個問題就咁不了了之. 其實最終答案係邊年都好啦, 唔覺唔覺原來都搞咗十幾年囉.

成班人,計埋讀書時間,就係咁識咗十幾年,而且再過幾年就廿年啦.

雖然大部人其實都唔係成日見,好多仲係一年咁樣先見一次. 無所謂啦!有時諗番都好得意,講真依家個個都三字頭,唔係麻甩仔就已經結咗婚,仲有細路仔. 但由大家既心境,到講既內容,其實某程度仲停留吓讀書時既程度. 而且個個都大唔透咁,嘻嘻哈哈又一晚(年).

至於感情,雖然大家好少見,但又好似冇乜點變喎...(可能因為少見磨擦啦...^^)

而場波就愈來愈唔似場波,都話咗三字頭啦,打兩個鐘頭波? 唔好玩啦,企多過行.

肥龍都係旨在聚吓舊吹吓水咋! 有時肥龍情願坐喺場邊,最多間中出黎幫手填補吓啲垃圾時間.

最後真心多謝(幾位)有心人每年自動蒲頭去聯絡大家、安排同訂場.就算唔打,肥龍一定蒲頭!

16.2.07

狗去迎豬

肥龍實在好耐無"停"或"想停"呢種感覺.

直至今日晏晝三點半離開公司(其實係去第二處開會)時,突然感到由外到內,再由內到番外咁吐咗句"終於放假啦!"

可能真係自從舊年十月一直冇休息衝到今日. 期間除咗公事外,仲有好多私事需要兼顧.

而且最近呢個星期,同事間亦發生咗一啲意料之外既事,雖然事件未致發展到最壞既程度,但衰在又未到完全解決喎,結果可能要過咗農歷新年後先有結論.

果種心情,真係十五十六,愈諗愈唔舒服.

有時都係老套果句話,你睇我好啫!我都有好多野煩大家又知唔知呢?

但係當肥龍諗起原來自己如何努力做好一件事時,因為一啲自己控制唔到既因素(人、事)而令肥龍既工作或計劃受影響既話,你都咪話唔谷氣.

不過,正能量啲去諗,船到橋頭自然直.有好多野,其實諗太多都無用及無益,到時自然諗到辦法及出路.

狗去迎豬,最緊要有健康既體魄及正面既心境,畢竟都已經做咗三十幾年人,頂得往,冇話冇乜唔得嘅!

依家最重要既,就係唔好諗咁多,陪吓屋企人,盡情休息吓至初九先啦!

12.2.07

小小揮春

如果叱吒或網上會有個小统計,咁究竟"我最喜愛既新年揮春"金、銀、銅獎會係邊三張呢?

肥龍既心水(順序)係:年年有餘、心想事成同埋身體健康.

肥龍好鍾意魚,又屬雙魚,可能係情意結,諧音有魚(餘)幾重要. 而且肥媽由細教落,做人要脚踏實地,做野洗錢要量入為出、量力而為. 就算有再多(不過肥龍唔介意多,仲好想多啲!),最緊要做到"有餘".

至於心想事成,肥龍唔係指願望成真果類主觀既"空想", 反而覺得凡事如果能做到"心想",能夠堅持,再付出努力加上運氣,咁就好大機會達致"事成"啦! 聽落好積極喎!

最後身體健康,唔駛講,依家愈來愈重要,你估肥龍好後生咩! ^^

11.2.07

良心議員

如果今日中午你喺香港仔中心為<南區地鐵>路演時所說既話作為你及貴黨既立場,肥龍實在覺得失望.

至於南區未來有冇地鐵,肥龍真係冇意見,有又好,冇又好,日子都會係咁過.

未來特首選舉結果係點,大家心裏有數.

但係如果出自你把口話煲呔一定當選,倒不如爭取要求煲呔喺佢份政綱內包括南區地鐵列入,肥龍有啲無話可說.

如果你係持平,係幫南區市民既話,你應該係向所有特首候選人提出呢份索求.

係囉,你都爭取咗咯,如果最後煲呔唔將南區地鐵列入佢份政綱內,咪就係佢既事,入哂佢數囉,與人無尤.

可能肥龍激動啦,錯怪好人. 既然你做咗議員咁耐,或者明白咩叫實際同政治啦.

輸贏唔重要,最緊要有風骨.

9.2.07

九十二吉

今日得半日會. 下晝(公司安排)做咗鴨仔跟團去遊東京.

先到世貿中心頂樓遙望東京市,再坐日之出觀光船沿內河到淺草雷門.最後就去皇宮外圍影張"到此一遊"大合照.然後坐子彈火車返橫濱.




喺淺草雷門除咗買野,仲求咗支籤(九十二吉).

6.2.07

喪食橫濱

連續開咗兩日會,朝九晚八,要長期集中精神去吹(係要一定傾到有結論果隻),其實都幾疲勞轟炸.

真係讀書時都無咁有規律.不過做野要勤力,搵食就要賣力啦. 結果大部份時間都係開會吹水同飲飲食食.

仲有就係同幾位Recept姐姐(應該係妹妹)學吓日文咁囉.

今日有同事提出不如今晚自由活動. 於是一大班人入夜放工後浩浩蕩蕩咁走咗去橫濱JR站附近四圍蒲同搵食.

肥龍鍾意食日本菜及日食, 結果今晚好對唔住自己身體(因為要跑半馬拉松).行咗一陣就已經食咗份日式咖哩吉列豬排飯. 跟住隔咗唔夠一個鐘,又去食咗碗拉麵. 好暖,好好味呀~~~!

星期四會落東京...
___________________________

一個人出差就係咁無聊...好在有得上網咋.

上次講開飲牛奶,今日已經進入第二盒.

另外,原來喺日本上扑,個扑個header變埋日文喎.

4.2.07

押鏢橫濱


失驚無神,收到老細最高指示今個禮拜要到橫濱開會.

出發前老細仲叫肥龍親手攞份野俾日本大大老細.

唔知點解,感覺有啲似以前押鏢...[肥龍老細:呢一鏢就由肥龍去啦,到咗日本,就咁咁咁啦...]

結果今朝就飛咗到日本,依家喺酒店房仲趕緊呢個禮拜開會既簡報同內容,而且睇怕仲有排搞.

不過呢度酒店上網好平,上足一個禮拜(100M速度)先1000YEN, 一於上住網聽住903/港台一邊做.

另外肥龍有個怪習慣,去親日本都鍾意買同"隊"鮮牛奶. 有相為證.