29.4.08

比較及標準

最近似乎好多人在談論「一百萬人的故事」呢個節目,咁不如我都講埋一份.不過,我偏向想講該節目既拍攝重點(當然都有個人觀點).

當然有唔少人覺得,電視台搵埋啲(睇落)上哂岸既藝人走入人群去了解平民百姓生活係偽善既一種,更甚至有種「何不食肉靡」之感,而且所講所做往往流於表面.咁我因為工作關係,上星期有段時間唔喺香港,所以只係睇咗其中一啲片段,感覺只係一般,又未必如其他人那麼強烈.但係如果換咗個角度睇,其實,電視台一直都有拍攝開一啲類似既題材,不過對象可能係遙遠非洲既一個村落,又或者係我們祖國因為天災而受影響既人民.客觀咁講,電視台無非係想透過電視畫面“講”一個故事俾大家知,只不過拍攝對象每次唔同.而呢啲題材可能又有所爭議性,再後來成為社會上各方面既(正面及負面)迴響.

又如果,若透過電視畫面及報導,令其他本來唔知道或/及認識個別情況既人,可以知道實際情況,本身唔係一件錯事.當然畫面及報導背後既真偽,可能要深一層既了解,先可能為真.否則只可能變成見到樹木而見唔到樹林,或者以偏概全既局面.其實只得半小時既節目,要求可以深入去了解個別個案既成因及理由未免過於急促,而相信編導主要著眼受訪人士「現在」既處境,唔係昨天,唔係明天.不過驟眼所見及預期,明天係十分遙遠及唔明朗.

然而,對有關該節目或所引申出黎既話題,著實有唔少係關於去解釋點解窮既理由及心態,亦相當全面及合理,實在冇需要再加上我既諗法.而我所指既窮,係指可以憑入息糊口.當然,每個人人生際遇唔同,生活更唔同.況且我都未必幫到咩手(指事業生活上).

有時倒覺得,其實「去聽」已經係一種態度,從中我地學習尊重其他人,包括其他人既生活種種.

我傾向相信各種事物都有自己既規律,亦有自然既可為與不可為.而不可為中總有它既局限及限制.隨意將一套放入另一套,效果未知之前,可能已經亂咗本身既規律.有人會好打不平,而且更為當事人著急及緊張,本無咩唔妥,亦可理解.而且如果係喺眼前發生,固之然當仁不讓,伸出援手.不過喺幫手既過程中,有時難免滲入主觀既經驗及價值觀,有時可能令對方更感壓力.之前讀AM730時,留意到阿斌曾經咁樣講過.
世上最為討厭的是比較,俗語有云:「人比人,比死人」.可惜是人類是一種天生喜歡分階級及分敵我的動物,所以凡事都與別人比較,執著誰才優越.正因如此,父母期望子女成龍成鳳,所以不理願意與否,便安排一連串艱辛訓練,將自己一套價值觀強加諸其身上,其實引用勵志故事何嘗不是一樣的.另外,為了鼓勵灰心意念,莫名其妙的一次作出比較,因為不是最慘的遭遇,故而沒資格言苦,況且這麼多成功例子放在面前,根本不可能有失敗者存在世上,因為一句說話:「殘缺的他可以做到,所以你無可能做不到.」
當時讀後自感係凡事總有兩邊意見,不過有時主流意識令大部份人既想法變得更合理.而討論過程中,往往又會著眼找出對方論點既不足,又或者嘗試用一啲成功既例子去將個別情況演繹為標準.不過,作為一個正常人(我自己覺得),有自己既家庭,事業,學歷,朋友,財富等,睇落理所當然,卻未必係所有人既標準或所追求既.不過如果將呢個標準套成為對其他人既標準,恐怕只有錯配.

而最痛苦既唔係去比較,而係被比較既一位.

28.4.08

決勝分

留意一下月曆,原來由今個月十四日開始,一直未有放假咁進行工作及會議,過程確實令人身心俱疲.有時突然睡中醒來,甚至連當日係星期幾都未分得清楚之際,已經跳咗落床兼換好衫,然後又再係新一日既工作開始.

身體既感覺自然咁反射到腦袋中,而迎面既又係接踵而來既工作.腦袋眼睛手腳既速度,愈來愈唔聽駛,可以既話真係好想好想休息一下.奈何工作未完,而且更似愈做愈有,只好用本能既反應加埋少少堅持,一直拚落去.呢段工作時刻,除咗磨鍊身心外,更察覺其實身邊各環卻未盡在掌握之中,一切未明朗之前,最後唯有見招拆招,兵來將擋,不變應萬變.

有時頓覺自己似打緊一場五局過後再進入最後決勝分既網球賽中一樣,呢一刻可以有機會servicing for the match, 另一刻可能又要面對對手既 break point.磋來磋去,球來球往.每刻唔容許(自己)犯錯,卻又危中有機.不過講到底攻唔到係其次,我起碼都要保住自己既發球局,然後再等機會來臨,攞埋呢一分.

或者咁,就正反映我呢刻既心情.

21.4.08

媒人工作

其實都係見步行步,不過管理上有時硬要充起父母官,除同事各大小事項都要留意外,有時甚至於至做埋「雞仔媒人」.

而所講既「媒人工作」,並唔係促成姻緣果種.而係因為特別原因,幫同事搭路去公司其他辦事處(唔同地區)落班果種.

事源最近跟其中一位同事(或者叫M君)傾談. 得知佢因為太太工作需要關係,喺未來一年間,太太好大機會要調派到杭州一帶工作,由於M君結婚大約兩年,唔想長時間分開兩地兼同太太商量後,M君就打算今年較後時候辭工,然後跟太太去當地生活及工作.

而M君亦預計到當地後,或者須要重新搵過一份工作.就算要跟足當地招聘條件,人生路不熟,亦冇咩所謂,反正都係重新黎過.

老實講,喺自己心目中,M君係一個做到野既同事兼熟悉公司運作,而跟其他同事相處都幾融合.所以佢既請辭,或多或少都會對現有運作有所影響.再者,要搵個新同事接手,亦需要一定時間.咁如果可以的話,當然想M君繼續效力,所以就決定傾向「保留M君」既方案.

不過開始傾之前,有以下既假設:
1. 只係(客觀上)M君要隨太太到杭州工作,並非對(主觀上)敝公司有任何不滿而借意請辭;
2. M君太太既工作只會維持一年左右,最後會調回香港.M君亦然;
3. 杭州當地招聘條件(近似工種計),跟香港差別待遇依然好大.

因此,後來跟M君提出兩個方案,內容大致如下.

方案(一):幫M君搭路到敝公司喺杭州或附近辦事處(如寧波)工作.當然,M君需要通過跟當地經理/主管面試.要對方覺得適合及傾妥條件(如人工,褔利,稅項等)先可以.(咁呢一年,就可能搵其他同事甚至問其他部門借人幫手)然後等一年後再安排M君回港歸隊;

方案(二):更改/甚至重新設立M君喺香港既僱員合約/形式.合約上大致方向提高年假日數令M君可以抽時間到杭州(M君既太太亦應有假期可以回港),當然薪金相應調整.而一年後,再因應情況需要再重設之前已成立既僱員合約(不過就要跟M君詳細安排放假日子及長短);

方案(三):由得M君請辭(最容易做囉).

至於結果如何,暫時未有結論.

work 唔 work? 都唔知道架...

題外話.喺討論及安排方案(一)前,當然唔會少咗同當地經理/主管打交道既環節.當中留意到其實香港人一直以為既優勢已經愈來愈唔明顯.而且因為M君既工作及職位主要係對客戶及當地市場,所以語言上及熟悉當地市場狀況可能更為重要.至於甚麼國際視野,英語水平,依然重要,不過可能已經比較下次要啦.

反智

跑少日馬啫,點解會咁大件事及反應咁?

凡事總會有個理由及其結果.情況就好似東主有喜暫停營業一天一樣,咁點解唔可以因為天氣情況決定取消呢?唔通馬匹及騎師既安全,大家唔會關心?

又可能有人問點解唔留到到當日先作決定,咁其實應家柏已經有所回應,不過似乎未為一眾馬迷所接受.

而且天氣預報只係想大眾可以了解大致天氣狀況.香港地理面積再細,仲係會出現跑馬地落大雨,上水陽光普照.何況係三號風球加上黑雨之後.而且自己亦應有個判斷及觀察.

唔好將話題講得太遠.問題係,其實少一日賽馬,對有大家咩影響或損失呢?

最後申報:我唔係馬迷兼冇買馬.更唔係天文台既擁戴者.我只係不吐不快啫.

19.4.08

隱隱於市中

冇獎競猜遊戲第二回.

唔知大家知唔知相中呢度係邊度?


提示: 呢同呢.

P.S. 多謝同事A呢輯相片(呢張只係其一). 有機會時間會講下佢既興趣,確實有趣.

18.4.08

守門員最好既朋友係....

咪龍門柱囉....

原來,除咗【足球小將】裡面,志偉話「足球係我好朋友!」之外,經此一提,喺足球比賽場上,仲有呢段看似理所當然,卻又互相扶持既緊密關係.

有能力將本應屬於球賽中一部份,不過又不為旁人觀眾及球迷留意既物件,描述得如此實在,如此一矢中的,相信只有一人.

愈諗愈會心微笑.

其實對呢個消息,自己並不傷感,只係聽完感覺到一份失落.而呢份失落,又一直停留喺心中,唔想講唔想寫,不過始終都係喺度寫咗出黎.

今朝出門口前留意到晨早新聞有你既一段說話.

(微微笑)「我要場波踢完我先識講架,我係做新聞既!」

喺未有各式既新聞台前,要留意新聞時事體育消息,就只有【午間新聞】,【六點半新聞】及【晚間新聞】.自己非常鍾意運動,亦非常留意各樣運動比賽消息及結果,所以往往會睇到最後等待到體育新聞報導完畢後,先會起身做其他事.就算當日其他新聞內容如何沈重,喺呢短短幾分鐘中,就係最輕鬆既時刻.

雖然新聞題目每日唔同,收睇你所報導既體育新聞卻成為習慣.

希望你可以安息.

14.4.08

喂,有冇興趣鍊番轉?


雖然只係舊酒新瓶,但係...呢個新瓶的確係好吸引呀~~

再加上wi-fi連線,設立網上私竇自由組隊鍊車又實在無可抗拒兼有趣!

有興趣可以add我個wii-code: 0087-2507-5021,隨時歡迎!

3...2...1...Go!

13.4.08

紅棉盛放



羅文  【紅棉】

紅棉盛放天氣暖洋洋
英姿勃發堪景仰
英雄樹力争向上
志氣誰能擋
紅棉怒放驅去嚴寒
花朵競向高枝放
英雄様萬衆偶像
紅棉獨有傲骨乾
我正直無偏英挺好榜様
有上進雄心堅决争光
結棉子借風飄
四方樹苗堅壯


後記:

近兩三星期跑步途經壽山村附近時,見到一棵開滿紅花,非常茂盛既木棉樹.而每次,總會見唔少攝影愛好者出動私伙用心拍攝.

咁趁今日下晝有少少時間,就走咗去湊下熱鬧.

12.4.08

N 個肥龍

喺生果報國際新聞留意到呢則新聞:

一個人有一個故事,但住在美國的奧弗希爾( Karen Overhill ),身上有17個人的故事。她為逃避小時候屢遭親友侵犯的記憶,結果患上嚴重的「多重人格障礙症」(Multiple Personality Disorder ),一個人有 17種性格,體內彷彿有17個性格不同的人寄居。
睇完既第一個聯想就係之前喺另一位博客簡介中留意到既【24個比利】. 書雖然未曾讀過,只不過打過一陣書釘,書評倒係有睇,讀後非常好奇. 但往往理智(因為呢本書篇幅太長)戰勝購買慾,一直未有行動.

後來跟E提到呢則新聞及【24個比利】,E又講到書中提及到除咗人格分裂,分裂出黎唔同性格既「個體」,可以有著唔同既能力.而個體能力又可以互相矛盾(即個體A可能係數學天才,而個體B又可以係數學零旦),更甚至係分裂出黎既「個體」,擁有原來「個體」都冇既能力.

實.在.匪.夷.所.思!

一個人擁有唔同及多種性格從來唔係新聞,但因為生活/工作而產生既唔同臉孔及性格卻見有唔少.而心理學中亦自有對「多重人格」有有效既分析及註解. 不過,整組事令自己覺得最好奇及驚訝既,反而係經抽絲剝繭分析後,講有關分裂結果而產生出來,卻擁有唔同身份,性別,年齡,職業等,又獨特鮮明既個體.究竟點解可以咁發生,真係一百個唔明白.就如其他人問點樣可以將一個人身份如上市般分拆分拆再分拆,然後各自獨立營運一樣.

後來又諗假如自己好奇,嘗試接受催眠,到底又可能見到幾多個「個體」呢?呢條係一條幾有趣(起碼對自己而言)既問題.聽好多人話做老銷習慣面對唔同客戶自然戴上唔同臉具或嘴臉,而且有時連自己都覺得唔係咁了解自己.咁如果可以去估下,亂猜既結果又可能會出現以下情況:

1.貌似三十幾歲,實際都係三十幾歲既管理夾心人;
2.以為自己廿幾歲,成日放工放假去睇唔同玩具既大細路;
3.(仲)當自己好fit,每逢週末早晨去跑步既年青人;
4.從來唔會上磅,嗜吃如命卻又唔識戒口既肥仔;
5.嗯...(都話自己都唔係咁了解自己啦~應該仲有既!)

如果再照照鏡,發現體內可能嚴重超載都唔定!

10.4.08

重提基本功

因為人手調配關係,兼新招募既同事仲未報到.結果由上兩星期開始,一人分飾三角,一面做本來屬於自己既事,另一面要暫時頂住空缺既工作,最後兼要為(另一位)新同事做briefing及training.

雖然一路都有見開客戶,但又其實有唔少事務已經轉咗搵同事幫手.今次情況特別及重要,都係自己做會安心啲.好多以前做老銷既基本功,亦要一手一腳發揮出黎.除咗最初特別係cold call方面有少少未習慣之外,其他事尚算可以應付.

今次再接觸番呢啲基本功,其實,感覺跟以前非常唔一樣.由開始cold call, 見客戶,打報價,跟進報價,催客簽報價既過程入面,再次搵到唔少以前自己做事既影子.又發覺,雖然已隔一段時間,呢啲基本功,依然有效,依然幫到自己達成項目.

融會貫通既一次體驗.

最近一次見客,臨行前離開客戶既一刻,客戶半開玩笑問既然依家俾嗰個offer比同行貴,咁其實我覺得有咩優勝條件可以搵到張單.

答覆除咗係話敝身公司實力雄厚,夠專業,收費合理之外,就係會有一個有經驗及幫到佢既老銷喺左近.只要電話/電郵一到,自然會盡力處理.

又原來,呢個答案背後,發現自己仲係好鬼鍾意出街跑,面對客戶,做老銷.

5.4.08

齊來做運動

康文署果邊抄過黎:

康文署免費提供康體設施響應奧運

為響應北京二○○八年奧運會、鼓勵市民多參與體育運動及推廣社區體育,康文署將於七月一日至九月三十日期間推行「免費使用康樂設施計劃」,讓市民可以個人身份,在未被團體預訂的時段,免費使用康文署平日需收費的多項康體設施,包括度假營、水上活動中心、網球場、體育館、公眾游泳池等。現已開始接受七月份度假營設施和創興水上活動中心的露營和日營的申請。至於使用康文署其他免收費用康體設施的安排,將容後公布。

有時間就留意下,到時去游下水先!!

(其實,唔少康文署既設備同設施都唔錯同方便架~)

(又,最終要喺康文署個網先搵到呢段推廣,反而GovHK果邊冇喎...)

4.4.08

手痕劣作

都唔知水平如何,而且第一次photshop上畫,仲未好適應繪圖筆及所有一切.

左睇右睇,可以(再)改善既地方會有不少呀.不過....都係先去片啦!



而且咁講,唯有....再睇多啲,畫多啲啦~(仲要畫功課...)

^_^