29.7.07

好鬼頭痛

一次週末直至零晨四點既吹水敍會,

只得甜筒果汁加口水花,

換黎晨早醒來至今既頭痛,

再加五粒止痛藥,

繼續有病呻吟.

你唔好當自己睇【特搜戰隊】就以為仲好後生架...真係...

特搜戰隊

有時星期六日無事忙, 與一般人無異, 肥龍鍾意留喺屋企睇咗電視聽吓歌. 但可能因為大唔透又八卦好奇, 每逢星期日朝早, 除咗JP Time TV外, 耐唔耐都會睇吓【特搜戰隊】.

「唔係呀嘩, 肥龍, 你貴庚呀? 仲睇【特搜戰隊】?」

咁當然, 純以劇情黎講, 肥龍當然超哂齡. 而且故事又永遠有個大框框, 睇落變化不大. 另更加唔會買同名既超合金玩具玩啦. 但當收睇【特搜戰隊】時再同以前既「XX戰隊」比較, 發現依家呢類既「XX戰隊」系列, 除咗仲係沿用四至五人團隊模式(用唔同顏色區別如紅、藍、綠、黄、粉紅)外, 原來喺故事上及敵對對手(壞旦)既設定上已經漸漸起革命, 進步及改變咗唔少 . 而當中更會加插有啲亦正亦邪, 成魔再回正道既角色及橋段, 並非仲係停留喺肥龍小時果種只有忠奸好壞、兩方對立既故事模式. 不過有時諗, 除咗畫面繼續打打殺殺外, 咁變法, 其實啲小朋友會唔會睇得明架?

另外又發現以前由第一集一直打到大結局果套機械人形象亦已經有咗唔少改變. 依家, 已開始加入修練、多次元升級及與其他角色合體, 非常多變化及組合, 亦令攻擊模式更多元化. 肥龍就曾睇過一本好似「XX戰隊」年譜既書, 詳細介紹呢類「XX戰隊」由N年前既第一代演變至依家第X代裡面喺唔同方面間既關連(例如故事大綱結構, 機械設計, 角色設定, 武器絕招等), 鉅細無遺, 非常精細及有系统, 絕唔似亂咁黎之餘更保持果一套成功方程式. 而如果肥龍冇留意錯, 就算點變都好, 好似主角或隊長都係由"紅色"去代表.

另外, 講【特搜戰隊】既原因就係發現原來香港版既主題曲係由梁榮忠主唱, 真意外呀! 不過當然都係原裝既好啦! ^^


日本版主題曲


香港版主題曲

28.7.07

紅潮十事

早已經買咗球票, 今晚入場觀賞利物浦對樸茨茅夫既球賽.

一. 利物浦加南華, 令整個加路連山好似染上紅潮一樣, 全街充滿紅衫人.
二. 相信除咗Ruby Seven外, 少數活動可以吸引差不多四萬人(實為39,353人)入場.
三. 大家一見曾先生同董先生出現喺場中螢幕就起勢咁噓, 那管只係出現一秒.
四. 見到鍾意既球員落埸熱身同比賽(特別係謝拉特,阿朗素同懐斯), 特別興奮, 值回票價.
五. 人多好做事, 由開波既第一秒開始, 不斷有球迷唱打氣歌, 打鼓, 歡呼同玩人浪.
六. 為咗想快啲換入準備進場既謝拉特同托利斯, 全場球迷想個波立刻出界, 因為可以立刻換人.
七. 到謝拉特同托利斯入咗場後, 全場球迷就想佢兩個快啲有波上脚, (精神上)猛叫其他隊友傳波俾佢地.
八. 托利斯獻出多個喺利物浦既第一次. 第一次穿利物浦球衣作賽, 第一次觸球, 第一次射門, 第一次射十二碼, 又第一次射十二碼唔入. 獨欠第一個入球.
九. 謝拉特雖然係踢咗五分鐘左右加射入一個十二碼球, 但球迷已經好似執到金咁, 非常開心同滿足.
十. 最後黎一個反高潮, 利物浦十二碼球輸左.

眼前盡是紅!


全場爆滿, 好鬼多人!


一係入, 一係唔入!

25.7.07

排洪音樂

【老銷網訊】昨日(7月24日)由於一宗工作事故, 肥龍五臟六腑內腎上腺及皮質醇已出預定警界線, 情況告急.

10時19分,肥龍腎上腺水平已達極高水平,而皮質醇超警戒達水平十級,發出今年首個排洪警告.

有關網友稱,該洪峰達到近年一遇既水準。

後來情況持續. 但據悉,其後受各方網友相托,問候, 支持, 洪峰初步受到舒緩. 奈何肥龍本身已因為洪峰影響, 導致昨日工作情緒低落, 戰意散漫.

經有關人士初步評估, 慶幸受損程度尚可接受及理解水平, 但須要確保洪峰已受控制. 而有關人士透露, 相信肥龍可以喺短期回復正常, 唯有少部份功能及工作被延誤, 估計問題不大. 至於重建工作亦陸續展開.

【老銷網訊】小記老銷, 喺肥龍面前, 報導完畢.

肥龍在此希望多謝各方網友(燒豬,野蠻郡主,s-pig,亞芬及Old Cake 等)及友好慰問, 多謝關心及鼓勵! 肥龍尚且可以! ^^

另, 肥龍在此介紹肥龍所挑選既排洪音樂, 唔錯架! - 陳輝陽 -陳輝陽鋼琴作品集











王菲 - 暗湧


黃耀明 彭羚 - 漩渦

24.7.07

排洪警告

對唔住, 晨早本來唔係(想)咁鬼負能量, 但諗係唔係真係鋪鋪都要撐到”行”哂, 你先知我既立場又其實原來都係好好火既呢?

你如果唔係唔記得你曾經應承同講過咩, 你知唔知你尋日email最後果幾句說話係幾咁無意義, 但同時又幾令到我心淡呢?

不過你放心, 喺呢件事, 我團火, 可以既話淨係會喺文字上去表達及宣洩. 但如果你想我當眾表現一次, 除非: (一) 我真係好嬲; 或(二) 你真係想我唔俾面你. 咁我或者會做俾你睇, 但係我都唔想勞氣.

又如果我唔係想幫你做好啲, 我就唔會堅持由今年年頭開始為呢件事同你傾到依家. 但你既態度反而間接話番俾我知你只想見步行步.

我既信譽同記性尚算良好保存, 除咗係本人賴以為生既生存之道, 但同時亦係本人工作上既基石, 真係, 一步都唔會退. 而且我既同事同我一樣咁重要.

你唔好以為我出完聲, 你立刻做番, 我就會當無事發生咁. 又, 你再電話同我講既野, 只係含糊兼詞窮.

如果你志在試吓底線, 或者想拖延, 本屬無壞, 但你或者已經忘記咗咩叫互信. 有啲野, 講咗聽咗就講咗聽咗, 返唔到轉頭, 同埋都唔好諗住可以返到轉頭. 而最壞既係你俾其他人睇到你既動機.

不過唔可以唔承認, 關係可以好脆弱, 不在乎已建立咗幾耐.

報告完畢.

(後記: 我知我知, 以上唔係做下屬應有既態度, 但呢次排洪係必須既!!)

21.7.07

粉絲心情

經過數唔到幾多個年頭, 書雖然就愈買愈少, 但書展每年都仲係會去, 以去書店行心態逛一逛.

本來正考慮星期六怕多人去定唔去之際(又撞正HP7出版...), 喺電台節目中聽到蔡東豪先生話佢會做完節目後出現書展, 結果肥龍二話不說, 就係咁標咗出去, 去會展出發.

買咗入場券, 攞份場刊, 立刻尋找想到既兩間出版商「上書局」(喺Grand Hall)同「紅出版」(喺Hall 2)既位置.

當到達「上書局」攤位時, 原來蔡東豪先生仲未到, 反而就見到另一位蔡先生(蔡子強先生). 蔡先生正向讀者介紹剛出版既新書. 而肥龍買咗三本書, 仲同蔡生寒喧咗一陣及得到佢既簽名書. 而喺言談間,蔡生透露如果想見蔡東豪先生, 或者要半個鐘之後番轉頭睇睇.

咁, 見唔到目標, 之後肥龍唯有走去附近攤位流連. 大約四十五分鐘左右後, 望一望錶, 心諗時間差不多, 不如就吓番去睇吓蔡東豪先生到咗未.

果然, 不遠處就見蔡東豪先生喺「上書局」攤位出現. 肥龍最初只係遠望. 平時, 喺唔同媒體讀、聽蔡東豪先生既文字及聲音機會多, 今日終於第一次見佢既廬山真面目, 竟然有啲緊張.

肥龍抱住唔理咁多, 死就死咁心態, 開始向攤位走近, 希望近距離同蔡東豪先生黎個(眼神)接觸. 最後, 肥龍又借買書為名(毅行者. 其實書展之前已經買同睇咗, 今次係再買多本) 好唐突咁主動"撩"蔡生傾談幾句. 眼前既蔡東豪先生同之前媒體見到既, 形象差不多, 一副文人既感覺, 但又比文人多一分活力及朝氣, 又平易近人. 而當中話題主要環繞佢本書同佢參加毅行者既片斷, 雖然只係短短兩三分鐘既對話, 肥龍可以感覺到佢由籌備到寫呢本書既熱誠, 及對毅行者活動既鍾愛. 接過佢簽名既書後, 肥龍好滿足咁離開.

之後, 就行咗去另一目標 - Hall 2 「紅出版」處探吓渣蛇果仔(之前已經買咗)^^.

肥龍最後行咗兩個鐘左右, 總共買咗十本書, 大熱天時一大背囊咁番歸.

唉, 估唔到, 三十幾歲人仲學人做粉絲, 真搞鬼! (^_^)"

20.7.07

八個小時

有日肥龍同朋友傾談工作狀況既同時, 話題無端端拉到去freelance工作上.

肥龍有時有個想法(可能係錯既想法), 就係覺得公司用現有既人工換肥龍每天八小時工作, 對肥龍, 對公司黎講, 其實都係非常唔夠效益既. 儘管只係肥龍一廂情願, 自以為事既想法.

簡單啲講, 可唔可以用相同八小時工作, 搵到多啲收入及私人時間. 又或者有個方法, 令肥龍更積極咁利用時間.

咁如果俾肥龍可以從新分配工作時間, 對象, 性質的話, 其實真係好有興趣及動力去做另(多)一個工作模式, 甚至(同時)轉戰到另一種業務上 . 可能, 一生中, 有一啲事真係好想嘗試一下, 唔關甘心唔甘心, 反而係當見眼前自己已經喺現有崗位同行業已經工作一段日子後, 發現就算再行前, 再做多幾年, 仲有幾多可以行, 可能心裡經已有數. 而且發現如果再唔進步的話, 可能事業就此停滯不前, 又或者可以話係之前幾年唔停咁衝, 最近終於衝到一個樽頸位.

而肥龍所擔心既並唔係「現有式」, 反而係「未來式」. 其實要繼續做落去, 安安穩穩做到四十歲真係唔難. 但之後呢, 暫時一片空白(雖然依家諗仲遠咗啲).

工作對肥龍黎講只係一部分, 而當中現實成份較高 (因為要生活). 不過有機會, 肥龍好希望可以做到自己想做既事同時, 亦可以喺收入上爭取平衡. 雖然風險係存在及預知既, 結果可能係甚多, 或者更少, 反正不大. 至於工作能力及經驗方面, 相信經過十多年既工作及對客戶既經驗, 加埋老銷訓練, 亦算已累積到一個程度, 明白商業社會上既要求及現實. 唔會咁易主觀同過度樂觀, 諗過咗籠.

而之前喺「未完事項」中提過三件事分別已經開始. 開始做好多準備功夫, 開始問好多人唔同既技術問題, 希望最後可以落實.

19.7.07

兩個自己

今日心情就尢如有兩個自己, 一個喜, 一個憂.

一方面繼續遊覽網友既扑, 留吓言, 天馬行空.

一方面因為工作上既情況, 唔停咁, 埋頭苦幹.

心情大起大落, 可以話人格分裂.

加上下午接過來既電話, 傳來一個既預知又唔想知既消息.

整個下午, 唔想工作.

************************

雖然未係最後一刻, 不過今晚還係到醫院見姨丈你一面.

上次到醫院探望你, 知道你不想家人見到你患病既臉容, 知道你自知身體狀況, 你顯得不耐煩, 不發一言, 更著其他人離開.

你生命力很強, 唔係指卧病床既你, 係指每年家中聚會時見既你. 每次見你出現大家就哈哈笑.

你個樣好唔友善, 但出奇地你對我就係好隨和, 好客氣. 其實我無驚你架, 不過只怕唔知同你傾咩啫.

雖然你成日話你未讀過書, 有多野都唔知, 唔識, 但有時你就係攞住份報紙雜誌, 問我呢樣, 又講吓果樣, 我其實都唔知你知唔知我講咩架.

記得有次講起日本旅遊, 你竟然突然講咗幾句日語. 原來當年打仗時, 你曾經要喺日軍飯堂附近工作, 所以一般對答用字, 難唔到你.

你鍾意飲酒抽煙, 明知對身體唔好, 不過你又鍾意, 家人只叫你適可而止.

今晚跟你牽手, 感覺好特別. 互相凝望, 千言萬語, 盡在不言中.

而家人只希望你不再受苦, 快樂離去.

一切在心中.

*******************************

離開醫院後, 一大家人去咗鄰近酒樓食晚飯, 席間繼續有講有笑.

大家其實好豁達, 勇敢面對. 況且生老病死, 自然不過.

17.7.07

機迷必玩

每個世代, 每款電動遊戲主機都會配備唔同代表既必玩遊戲.

紅白機時, 有孖寶兄弟 (Super Mario Bros)...

Gameboy時, 有俄羅斯方塊(Tetris)...

Playstation時, 有Winning Eleven, GT等...

Playstation 2時, 繼續有Winning Eleven, GT, DDR/Stepmania同跳舞毯...

NDS時, 有孖寶賽車 (Mario Kart), Cooking Mama...

到Wii時, 相信就係呢個 -- 「WiiFit」



其實都唔係咩新技術, 雖然睇落好似好簡單, 不過又好似好好玩喎. 一面玩一面做運動, 又可以同家人朋友一齊切磋比試.

到時, 又唔知會唔會好似當年跳舞毯咁, 人人週圍撲, 做到一機一塊甚至一機兩塊既景況呢?

14.7.07

週六晚報

晚報, 一件彷似上一個世紀既產物, 代入免費報紙林立既今天, 除咗感覺遙不可及外, 甚至對部份人黎講就似從來冇存在一樣.

肥龍第一次接觸晚報, 源於讀中三時每週要寫既週記.

當時肥龍寫週記既心態係但求得過且過, 功課一份, 冇話想點又點. 而每個星期既週記內容, 當然亦唔會有咩特別, 主要係環繞與肥媽果個星期發生既逸事或無聊家事, 加以修飾加以記綠. 至於其他同學寫乜, 肥龍真係唔知, 不過諗都應該都差唔多啩.

而當年教肥龍中國語文既詹老師, (表面)可能希望同學可以將生活融入寫作中, 而又同時想培養同學對唔同既事物產生既觀察力及想像力 (實情可能睇同學既家事睇到悶哂), 竟然諗出一個針對週記既內容既新建議.

而呢個建議, 就係將週記既題目設定為每個星期六晚出版既【新晚報】內既一個專欄既插圖為題.

真係一個嶄新既名題方法. 不過寫乜其實冇咩所謂, 况且要「揸流灘」唔算好難.

但估唔到, 寫週記既最大問題唔係寫作, 反而係喺點樣見到幅圖上面.

往日唔同今時, 當年要買報紙, 一定係要去報攤處買(依家有便利店24小時有得賣). 不過唔知究竟係發行量問題定係真係好多人睇, 結果好多時都買唔到上當日下既晚報. 而報攤有時又好早閂門, 夜咗去又可能撲空.

買唔到既代價, 就係睇唔到果幅插圖, 結果連要寫乜都唔知.

咁,買唔到晚報都唔係咩絕路, 要知始終有辦法. 雖然當時唔好話互聯網, 連傳真都未普及, 而咁啱冇同學住喺附近, 不過仲有樣野叫做電話. 結果每次當買唔到既情況出現, 肥龍就會打電話去問同學幅圖大約係點, 再加一啲主觀既幻想力, 勉強都可以完成果一份週記.

不過呢個補救方法既代價就係當遇著啲描述能力低既同學時, 風險不少. 肥龍就曾經試過寫咗一篇離題萬丈既週記, 結果被罰重作, 捉哂蟲!

之所以後來, 當肥龍又買唔到報紙時, 情願第日早少少番到學校, 問同學借幅畫睇, 喺入班房前攪掂!

12.7.07

女人心情

收音機徐徐播出「女人的弱點」呢首久違咗既歌曲.

呢首歌既旋律, 其實喺好耐之前聽「义雞(Chage & Aska)」既Single時已經聽過, 當時只覺此曲非常悅耳, 奈何當年肥龍入世未深, 唔懂男女情愛之事(依家都唔見得好幾多), 更加唔會明白女人既心情, 就當普通一首流行曲去聽, 白白咁糟蹋咗由潘源良先生填上既歌詞.

事隔多年, 雖然再聽時感覺一樣(一樣咁好聽!), 但今次認真細嚼內裡歌詞後, 先發現原來肥龍一直咁冇心肝, 睇漏咗原來咁細緻描寫出女人既心態既歌詞.

而最近, 當肥龍閒時到訪唔同網友既扑時, 唔難發現當中有不少網友透露各自既情感故事. 真心說話, 肥龍睇既時候, 就彷彿有把聲音喺肥龍耳邊一字一字, 一段一段咁讀出黎. 當中情感真摯, 有茫然, 有憂怨, 有關懐, 有思念, 有正面時亦有反面. 雖然素未媒面, 但從文字世界裡, 肥龍亦能意會當中既說話及感受.

不過, 曲雖然優美, 希望有朝一日, 可以聽到有首歌叫「女人的優點」就好啦! 不過諗黎諗去, 最近似既就有周杰倫既「可愛女人」咧!

女人的弱點 - 葉蒨文


You are free - Chage & Aska


可愛女人 - 周杰倫

9.7.07

小記事簿

就算依家科技愈來愈先進, 愈來愈多方便既時候, 唔知有無人好似肥龍咁, 雖然已經擁有PDA或者類似產品, 但就仲有用小記事簿既習慣.

其實肥龍都有用smartphone去處理日誌及工作有關事項. 不過可能因為手癢, 鍾意寫呢寫路及亂畫一通, 所以就會隨身再攜帶住一本記事簿喺身, 方便即時記錄身邊發生既事件或腦海突然諗起既意念.

咁, 除咗要帶多樣野外, 唔發覺有咩問題囉. 而記事簿又豈止一本, 公事上肥龍通常會分開幾本(唔同顏色封面), 又以事項分門別類. 咁同老細傾野一本, 同同事傾野又另一本...

不過, 貼身既就只此一本,主要記錄私人事宜及一啲零碎點子, 等之後返屋企或得閒時加以整理. 而記事簿中, 又特別偏好loft及page-one 搵到既日本出品, 貪佢細細本, 紙質又正, 紙味夠香, 封面夠靚, 特別好寫.

雖然肥龍都明白其他人諗咩, 但就已經唔止一次, 當開會時肥龍從袋中攞出記事簿準備記錄低有關內容時, 身旁同事都會流露出一副唔可以相信而又奇怪既表情. 彷彿就係用表情話俾肥龍知: 「龍哥, 你唔係呀嘩, 咁樣係咪Out咗呢? 依家人人都已經咩咩咩咁囉! 」

而又當肥龍準備提筆記錄重點時, 耐唔耐就會有人插嘴話: 「阿蛇, 可唔可以唔落簿呀?」

8.7.07

另類享受

雖然熱, 就算唔係因為準備馬拉松, 每逢週末醒來, 腦海諗起呢個畫面及天氣, 身軀就會自自然然忍唔住換上運動衫穿上運動鞋, 衝落街去跑步.



走數十分鐘, 出一身汗, 又是一種享受.

7.7.07

湊巧遇上

身水身汗, 到達淺水灣, 咁啱撞見人家大事.

八八卦卦, 拍低準備時既一刻.

07年7月7日, 08年8月8日, 09年9月9日,...... 繼續樂此不疲!

心思重要, 持續心思亦重要.

6.7.07

相聚一刻

呢個年齡層橫跨起碼六個代溝既聚會, 今晚大家又再見面咧!

要多謝好友阿芬, 喺今晚飯局之前, 好好心機, 鉅細無遺咁寫咗之前幾年既精華及值得記念既片斷. 當中不論食物同記憶, 加埋廚神既紅酒冷知識, 肥龍都非常回味!

2005年形式最特別. 除咗廚神誕生外, 亦因為係分兩parts兩個星期五去搞. 仲記得廚神果晚煮到連餐廳個廚師都走埋出黎食埋一份. 廚神真勁!

2006年感覺最深刻. 因為諗都無諗過當中真性情既對話, 歡樂依然卻又抹上悲傷, 更無諗過會飲醉. 基本上肥龍好錫身, 通常杯中物淺嘗即止. 不過難得喺一班好友(前同事/前上司)面前, 都係飲咗先算! 結果到最後肥龍飲到貓咗, 一上的士就已呼呼入睡, 更差唔多錯過哂當晚德國對厄瓜多爾既世界盃揭幕戰.

2007年會點? 哼, 食咗先知. 不過, 又要醉呀?

大話遊戲

最近肥龍正睇緊日劇【LIAR GAME】.故事中,喺一個遊戲機制下, 每個角色利用唔同方法(包括大話)去欺騙對方,一面令對方迷惑而自己佔上風,一面又再令自己優勢擴大, 獲得最後勝利.

喺生活工作中, 其實又見過唔少真實既故事, 最後只苦了當中既受騙者.

喺大約兩年前左右, 肥龍認識咗一位剛從大學畢業既朋友, 就叫佢做C君啦. 果陣時C君啱啱出黎社會做野, 個人好單純, 對其他人既認識往往只從對方所披露既說話為主, 然後對號入座. 結果, 終於有一日, 做開溫室小花既佢發現原來職場及成人世界裡既人際關係令佢無所適從. 而C君又實在唔明白點解公司得幾個人而朋友又幾個人點解有真話唔講(唔係咩特別事), 到講真話又唔講清楚, 硬係要搞到啲關係鬼咁複雜, 覺得好似互相利用, 各懷鬼胎, 唔知點相信人咁.

當時, 肥龍就同佢講有唔少人, 可能因為某些缺憾(包括性格, 身份, 行為, 自信心等)加上動機, 又或者只係因為個別動機, 去得到想得到既野, 就選擇或利用講大話去達到目的. 而且佢地當中, 可能覺得如果對方知道自己既真正一面或身份時, 可能對方根本就唔會對佢地有興趣.

又肥龍聽過一句話, 說謊係無自信既反射.

當然, 亦唔排除好些鍾意玩弄人際關係既人, 奈何只有另一方不知罷.

而且, 近日肥龍亦同另一個友人講開, 依家網絡發達, 溝通方便, 加埋其他已有渠道, 有機會或要開始認識一個新朋友真係唔難. 但結果咩, 真係唔知. 反而, 傾談中, 愈來愈發覺, 隨著長大成長, 喺人生路途上, 年紀越大或越後認識既人越唔容易知真假. 可以靠既, 可能只有憑直覺, 經驗及時間. 老套啲果句, 日久見人心啩.

依家肥龍寫扑, 主要作為興趣, 鍾意寫咩都得, 無需要收埋. 如果再幸遇到個知音或網友, 得閒到訪呢度, 留吓言發表吓意見俾肥龍, 就已經係份唔錯既鼓勵啦.

5.7.07

好戲在後

喺睇Youtube 時無意中發現以下片斷, 實在驚奇!

一路睇,腦裡一路湧出唔同既四字成語. 一個接一個.

不過咁, 左睇右睇, 硬係覺得同現實社會某啲事有啲相似...

未完事項

有三件要做既事情, 一直在拖延著, 一直在說忙, 一直諗唔出如何開始, 更加唔知道如何去做及完成.

之前幾個星期蘊釀著既事情, 走到今日, 應該會有一個明朗既方向.

一直喺原地踏步, 裹足不前既想法, 最近已去到一個應該要開始既時候, 應該要付諸實行.

否則, 留下既, 只會係一個只會空談, 空想, 再隔一段時間獨個後悔既自己.

2.7.07

真空旅遊

近日正開始留意今年九月份旅行既資料, 除咗要搜集一啲基本野外(目的地資料, 交通, 當時天氣等), 發現依家去旅行, 真係要/會帶多咗好多野.

手提電話啦, 數碼相機啦, ipod啦, NDS啦...而且諗吓諗吓, 又諗不如帶埋部laptop啦...(仲未諗起要帶火牛呢個問題上)

開始發覺, 隨著科技進步, 產品愈來愈個人化, 人亦變得愈來愈貪心, 怕寂寞, 而以上物品又某程度滿足呢個需求.

記得之前讀信報時鄧達志有篇有關旅遊時既「真空狀態」, 意即斷絕一切現有通訊, 可以寧靜、舒適及不受干擾咁享受呢個旅遊時刻.

又記得以前放假去旅行, 手提電話未普及, 到達目的地時會打電話返屋企報平安. 依家反而會話如果對方有需要, 其他人隨時打個電話就揾到, 同喺香港冇乜分別. 而且又可以話長途電話費貴, 索性話冇申請漫遊, 一了百了. 但後來當漫遊愈來愈方便及便宜, 加埋3G 既出現, 俱往矣. 換來係二十四小時standby.

而且依家加埋email 及BB, 世界冇一刻停頓, 通訊資料發達到一個階段, 你甚至冇理由話唔知又或者冇見過.

結果, 工作就係工作, 放假旅遊又係工作.

旅遊本身應係享受既, 雖然出外旅遊, 錢應駛則駛, 但所指並非純吃喝玩樂式既享受. 反而, 可以喺一段時間, 短或長, 接觸、見識、認識、了解及學習另一個國度形形色色既人事物, 確係賞心樂事. 另外, 認識中國以外既文化及歷史亦可以令人更加包容、欣賞及感恩. 而此期間如果可以把眼前既景象留下, 不失為一段美好既回憶.