31.3.07

宿營之癲

唔記得係喺中二定中三開始, 好興喺長假期(例如聖誕或暑假)就一大班書友仔去宿營.

點解唔會喺農歷新年就唔駛多講, 冇理由斷自己財路. 至於復活節喎, 因為好近大考(年終試), 除非你讀書好鬼醒又或者諗住放棄, 否則揾到隻蚤"蘇"你先奇!

而宿營既地點, 大部份都係去啲偏遠既離島. 肥龍同書友仔就留吓唔少腳毛喺長洲既東堤, 大嶼山既塘福、長沙同貝澳. 另外記得有次就去咗個朋友喺東涌既祖屋玩.

宿營既經驗對當年肥龍都幾大衝擊. 話哂咁大個仔都未試過唔番屋企瞓,而且仲可以喺龍爸龍媽既視線範圍外活動. 咁既環境下, 唔玩到癲就假啦!

開始時候, 基本係全男班(肥龍係讀男女校),活動因此剛陽味十足. 由到沙灘打排球、撲浪, 到坐足半日岸邊釣魚. 又有到空曠地方放風箏,或者租架單車四圉"片". 至於膳食方面, 就非常簡單, 主要靠罐頭同公仔麵. 如果自己煮自己嗰份的話,問題唔大. 但係要煮咁多人份量喎...就真係頭都大埋. 結果就演變成打邊爐同燒野食呢啲例餐. 起碼鍾意幾時食都得,随時加入! 另外鍾意食幾多悉随尊便, 幾咁free!

到最後整煲糖水又或者到鄰近士多整支雪條都唔錯架.

後來, 隨著女書友仔既加入,女書友仔將佢地平時喺家政堂所學揮盡渾身解數將廚房變成御膳廚房後, 飲食問題得以改善.有啲仲好好食添呀!

晚飯後既活動,就會玩吓啤牌,鋤吓D、十三張咁, 又或者打吓牌. 另外有啲書友仔就鍾意走出露台或上天台吹水及炸吓機!

如是者, 當大家玩到傾到咁上吓啦, 夜咯, 就自己番番房揾個位瞓...

不過最精彩既部份就正正由呢一刻開始.

喺呢一刻, 通常最夜瞓既書友A 就會喺佢帶黎既背包裏面攞出已預先準備好既鑽地龍, 然後好巧妙咁將燃點著既鑽地龍拋入嗰間有一堆已經瞓到死豬既房, 再跟手閂門.

之後既情形係點相信肥龍唔喺呢度寫都可以喺腦內想像出黎,所欠既可能就係聽唔到房內傳黎既躲避聲、慘叫聲同粗口.

結果,亦由唔知邊一次宿營開始, "鑽地龍特襲"成為每次大家唔(敢)入睡既節目啦. ^^

27.3.07

我愛實驗


除咗喺幼稚園小學時種黃豆綠豆外, 細個得閒冇野做時, 肥龍都好鍾意學吓「塞先生」咁,做吓小實驗.

同自製玩具情況一樣, 由於經費有限(其實係冇!!),取材用料主要喺屋企揾及發掘.

開始時比較簡單,主要係用洗潔精或番梘開水, 自製泡泡玩吓.


又或者喺陽光燦爛既下午, 用鏡折射陽光照射對面樓某單位.

另外又試過打風時用針線縛住個背心膠袋, 然後抌出窗口放膠袋, 睇住膠袋吹到愈高愈遠!

而喺廁所入面, 小便時將曱由射落廁坑度, 先發現原來曱甴係唔怕水同唔會浸親.

後來真係玩到無野好玩, 普通玩意已經滿足唔倒肥龍,結果後期甚至開始用自己既身驅做親身體驗.不過效果就麻麻地, 好多時「捉蟲」收場.

例如肥龍想知自己個頭大, 定係個窗框闊, 結果喺伸個頭入窗框後, 個頭竟然"卡"住喺個窗框度, 出又唔係入又唔係, 動彈不得. 最後要勞煩肥媽幫手先可以出番黎, 不過雙耳就已經被擦到紅哂!

後來有次又好無聊, 折開吓支原子筆,諗吓如果將原子筆支蕊(黑色)好似當飲管咁啜會點. 結果? 結果咪係啜到成口成脷後黑色囉! 之後仲唔敢打開口, 費事俾肥媽發現的話又會被打餐死!

不過話時話, 都唔夠肥龍朋友C 勁. 佢竟然用針筒打洗潔精入隻草蜢度做標本! 最正既就係佢一直以為洗潔精就係防腐劑, 直至有人同佢講先知攪錯! 唉!

25.3.07

石澗之樂

講開水塘,提及石澗,唔可以唔提石澗之樂. 不過先旨聲明, 呢段只係肥龍童年往事一則, 千祈咪模仿或跟住做.

講番到石澗有咩既同幾好玩? 重點大概有三: 接觸大自然、與別不同及魚樂無窮.

果陣其實肥龍年紀都仲細, 大約十一二歲左右. 講真,如果唔係有啲年長既邨友陪同, 真係唔敢貿貿然行上去. 唔知點解, 每次都係逆流而上. 可能係同上游啲水清啲有關.

而且每次去石澗玩, 都好有冒險既味道. 因為眼前所見, 往往随住地形既同而變化, 從而諗出或對應出唔同既玩意.

如果去到淺水既小溪,如果有帶装備(養魚魚網及膠袋), 咪去撈吓魚,捉吓蝌蚪,跟住攞番屋企養. 又或者攞落下游或水壩放生.

另外,石澗之"游"非一般喺泳池及海灘之"游"可比.

有時如果行到一啲水深或叫"潭"既地方, 就索性剝哂衫褲剝哂鞋去游水 . 間中仲會喺因應地形關係而產生既高處作高台跳水,非常剌激好玩.

有時又會發現一啲水流比較猛既位置, 就會坐或者"埃"落去做番個自然版既水力按摩.

暑假悠長,夏日炎炎, 有時甚至帶埋西瓜, 一於享受浸水歎西瓜既時刻. 有時又吹吓水,游吓水, 總之一個下晝話咁快就過.

不過依家諗番, 其實都覺得幾危險. 不過細路仔唔識死, 福大命大至無事囉.

而且果陣都唔知唔知邊到黎既智慧, 通常落雨打風或之後既一星期內, 都唔會去石澗玩. 咁夏季雨量偏少, 一直好彩冇發生過咩意外(突如其來既急流).

此外又冇遇著咩變形蟲随水入耳而導致其他病(腦膜炎?), 反而耐唔耐就有人比蜜蜂針過.

23.3.07

水塘蹤橫


啱啱睇完留言,c.m.兄講開以前住木屋通山走既情景,令人回味.

細個果陣,其實肥龍都算鄉下仔一名. 除咗南區,真係無咩去過邊. 但係當時香港仔仲係小社區,叫得小,就真係十分鐘就行哂. 而且果陣時連香港仔隧道都未有, 銅鑼灣或者灣仔啲咁遠既地方, 簡直諗都未諗過去.

既然冇得出市區, 結果去水塘玩就成為星期六日或暑假既唯一娛樂.

肥龍以前住既屋邨鄰近香港仔水塘, 有山靠山, 有水靠水,步行五分鐘就到.

至於去水塘有咩玩? 講起就一籮籮. 過就偏重夏天活動居多. 露天麻, 冬天好鬼凍架!

水塘空曠地方多, 如果一大班細路既話, 玩吓"二追" (捉依欣)又得, 踢波又得. 記得有一年仲大膽到喺屋邨攞(偷?)人啲曬衫竹(共六支)上水塘紮兩個龍門,買個西瓜波就開波!

跑或踢到熱咩,又未必立刻走番屋企沖涼. 反而走咗去溪澗或者引水道浸水,用自然水力做"達古玆".

後來浸水都唔夠, 甚至走去水壩游水(對唔往呀廣大市民!!). 水塘有魚,有時都會有魚以為有野食啄肥龍幾野! 個種感覺好過癮. 游完就沿水壩邊果把石造既水尺上番岸.

有時踢得多波,悶啦,唔想踢勒, 咪一行四人,扮奪寶奇兵咁, 由水塘下游逆流而上沿石澗行上山頂. 真係太平山頂架!而且中途行到熱或者休息, 就會停喺潭度浸一陣,玩吓水.不過其實都幾危險, 肥龍就試過途中遇到蜜蜂,結果喺頭、手、脚分別被釘,之後仲要去睇醫生.

而除咗踢波游水行石澗外, 有時如果唔夠人, 就會走去捉"金絲貓"或"虎仔". 其實都唔可以叫做捉, 因為主要係靠揾出由兩塊樹葉相連既金絲貓窩, 用Tic-Tac糖盒/火柴盒/樹葉做既籠將金絲貓收起. 然後好似古時打蟀咁揾其他細路捉到既金絲貓打文.

如是者, 肥龍既暑假, 大部份喺水塘渡過,活像「野孩子」!

呢種活動, 一直做到一九八八年既夏天.

21.3.07

紀念別冊


「我的未來不是夢」...

咁肉麻、無知既說話,唔係酒後既胡言亂語,而係肥龍上個禮拜六執書(執輸?)櫃時,發現放喺暗角處既紀念冊上面既封面句子.

宜家再睇番啲內容, 除咗勾起肥龍中學時既回憶外, 另外真係覺得幾好笑, 又好攪鬼.

年少無知、少年不知愁滋味!

可能肥龍由小到大都係古靈精怪,結果,各書友除咗循例歌頌、表揚肥龍既外型、頭腦、待人處事態度、不同事跡...(下删一萬字)外,仲花咗唔少心思喺上面做咗好多好特別既"別注", 令每一頁每一段都咁精彩,生色不少!

有人奉上印有情深說話既書籤,永遠咁祝福肥龍.

有人奉上當年競選學生會內閣既選票, 叫肥龍毋忘歷史!

有女書友喺所寫既最後一頁,奉上青春玉照一張, 明豔照人.

有男書友用鉛筆畫上足球小將戴志偉既大頭照, 再加一段勉勵字句.

又有男書友將原來既車廂大合照變成龍珠人物大設定.

更有男書友貼上一張十蚊紙,叫肥龍將編號最後一個號碼變埋"8", 就可以有張"888888"編號既十蚊紙!

不過肥龍都係鍾意副校長所寫果幾句,字簡言賅,終身受用!

19.3.07

自製玩具

肥龍少時家境尚算可以,但同好多當年曾住屋邨既朋友仔一樣冇錢買玩具。當年好多玩意都係唔駛錢(因為冇錢買!), 結果除咗通山走周街跑、打波外, 真係冇咩野玩.

而且終日通山走周街跑、打波都唔係辦法. 起碼打風落雨,天寒地凍就唔係咁好玩囉.

後黎多咗朋友仔(包括肥龍)開始讀書, 開始接觸工科,漸漸學咗啲所謂手藝,咁就耐唔耐圍埋一齊吹水,諗不如整啲野出黎一齊玩啦.

當年整玩具, 當決定咗咩玩具之後(例如波子機), 絕對係預算先行,往往先由成本出發.而且幾似依家"籌期".

可以喺屋企攞既(除咗錢!),就喺屋企攞.

可以喺街執既(例如垃圾房、士多咁呀),就喺街執.

可以喺學校借既(例如工具),就借啲倚攞番學校,偷偷咁上堂整.

最後如果真係要錢既, 就每人夾少少出黎, 走去買嘞.

今朝肥龍走去買早餐橫過馬路時睇到地上一個"Coke-Zero"既荷蘭水蓋,突然諗番起一件少時自製既波子機.

荷蘭水蓋同波子機有咩關係, 咪就係用黎做波子機裡頭被波子擊中既圓形物體囉!打中時噹噹聲好響架!

除咗荷蘭水蓋, 當年好多材料都係執番黎. 包括波子機本身個塊木板, 仲有釘.

橡根同波子就一蚊幾亳喺文具鋪買既.

唔計準備材料時間, 記得當年大約用咗半日幾位朋友夾手夾腳整出黎.

不過過程都唔算好順利, 因為每個人對波子機個Layout都有唔同意見. 你又話咁先至勁, 佢又話不如咁整咁整.

有時傾到扯哂火, 差啲打交.

有時傾得成啦, 又發現冇或者唔夠材料. 又要再執過.

而且就算整好, 另一個切身問題就發生, 就係唔玩既時候擺喺邊(個)度.

既然住得屋邨, 地方自然有限, 如果放喺自己屋企, 實行聽俾老母炳. 而且因為放咗喺你度關係,呢個果個玩親都要走黎同你攞/借, 你都唔好話唔煩.

結果最後我地爆咗公共電箱房把鎖,然後將部波子機放入去. 邊個想玩就自己走去攞.

除咗波子機, 最勁就係連桌球枱都整個, 唔係細細張果隻, 係三呎乘五呎果種, 好鬼大架!

肥龍有時諗番轉頭, 都幾好笑. 況且當年都唔覺得自己窮(可能因為冇乜物質誘惑!), 有得玩就得囉!

18.3.07

等價交換

如果想得到更多,最直接既可能就係付出更多、投入更多...(等價交換?), 係咪咁呢?

同事K 同肥龍話依家做既野同預期有啲出入,而且想参與多啲項目既策劃 (而且感覺到佢既負能量正在增加!).呢點肥龍唔否定, 況且都幾同情K依家既工作性質同工作量, 而佢都曾經表現策劃項目既能力. 結果都算唔錯.

只係同時肥龍又真係唔可以接受K做緊既項目繼績延遲及誤點,甚至因為種種理由而未開始. 真心果句,如果呢個情況唔改善, 結果可能真係會拖到今年六月... 咁, 好多本來計劃好喺四月中開始既項目一定受到影響, 而呢啲項目對今年既計劃都幾關鍵.

其實呢種情況不時發生. 但問題係...多數都要肥龍開口問到, K 先會講出所有問題. 肥龍就覺得就算有咩問題, 或者遇到問題, 有啲野真係一個人做唔哂, 在公在私,都應該主動出句聲要求支援, 起碼可以知道同立刻諗吓有咩幫到手或者"補飛".

但實情啱啱相反. 如果K 唔開聲又唔講, 肥龍真係會忽略咗都唔知.

另外肥龍又覺得做野一樣還一樣, 呢樣都未做好既話都咪駛諗第樣.

矛盾既係, 工作上好多環節, 係互相緊扣,上家未得下家冇得開始. 如果肥龍强迫K 一定要喺四月中四月中前"清"哂手頭上既項目的話, 只怕會百上加斤.

但如果唔係咁, 肥龍又怕K 因為工作量及時間倉促問題唔可以集中時間及資源去執行呢啲已計劃好既項目, 最後做得半桶水.

結果呢, 肥龍喺同K 解釋咗點解要盡快"清"咗手頭上既工作既同時,講如果K 真係想参與多啲項目既策劃,喺呢段期間, 肥龍期望佢會喺工作時間同積極性上投入多啲. 而且如果有任何需要同問題既話, 立刻同肥龍講. 否則佢都係先做番非項目策劃既工作為佳.

不過到呢一刻,或者係肥龍太過憂慮啦, 腦裡仲係諗緊呢個問題...

17.3.07

所謂勝利

終於今日睇咗戰狼三百.

講真,個故仔好簡單,而且有部份肥龍麻麻地鐘意, 但無謂喺度講劇情嘞.

畫面真係好勁. 近兩小時既著咗大部份時間係咁插呀,劈呀,射呀...勁勁勁!

感覺完全唔似睇緊電影, 反而仲似睇緊漫畫或者打緊<三百無双>.

肥龍兩眼目不暇給, 又睇得目瞪口呆.

不過,其實想講既反而係戲中所提及既"勝利".

實際勝利固然重要,但"精神"上既勝利更顯得永恆.

為尊嚴、為信念、為理想、為任何目的而戰可以係重點, 但當中所付出果份堅持同毅力更值得尊重.

明知不可為而為之!

而能夠為一件事而堅持同搏命,絕對係一份光榮.

Hoo! Hoo! Hoo!

(LKK 加油!)

14.3.07

柏林圍牆

今朝睇報紙讀有關德國擬褫奪希特拉德國國籍既報道, 又令肥龍諗起二次大戰既歷史.

莫明奇妙,在學時西史肥佬既肥龍對二次大戰(或者呢段時期)既歷史有非常强烈既興趣. 更甚至求真到走去圖書館睇書呀、買落唔少書呀、VCD/DVD呀, 電影呀, 總之就係睇極都唔厭.

有時肥龍同人講笑, 或者肥龍前世就係活喺呢段時空中.

但現實係有時肥龍又真係閉合雙眼, 嘗試將自己代入呢段歷史,幻想著生活喺如此大時代既景況.

如果喺果個時候, 已經有太空人上咗太空, 又或者上帝喺天上望番落地球, 睇到既景象應該都幾震撼.

眼前既可能係千瘡百孔,烽火連天既地球. 而成千上萬,不同種族、不同國籍、不同膚色既人們會好似虫群咁喺陸上、海上及天上為"當時"既目標而戰.

結果係點,大家都知道.

講真, 肥龍都覺得幾荒謬. 但偏偏就係人類既歷史一部份.

講番德國, 除咗希特拉、納粹外, 為人認識既就有分隔德國為東西兩德既柏林圍牆.

一直肥龍都為未有時間及機會親身到柏林一睹真實既柏林圍牆感到愜意.

但竟然,喺肥龍任職既公司既日本辦事處,居然有其中一道真實既柏林圍牆.

當地德國同事侃侃而談有關歷史, 到問有關購買呢道柏林圍牆既費用, 佢地話都唔知, 只知係拍賣所得. 不過就知花喺運輸既費用足足係圍牆既費用兩倍.

第一刻親眼甚至可以親手接觸到圍牆既情景同心情, 就算落筆呢刻, 依然記憶尤新.

肥龍成個人就好似融入歷史時空當中, 靈魂從日本呢道牆傳送到十萬里外既德國柏林, 感受到當時既無奈、分離及動盪.

更有意義既係,將呢道柏林圍牆喺日本奠基既日子,就係十一月九日.

德國人敢於面對歷史, 可見一斑.

事有凑巧

三月五日放假呢, 恆指跌777點.

今日三月十四日又放假, 開市已經跌500多點...

唔係講有冇買開股票, 不過有冇咁橋呀!?

12.3.07

無間的M

以前老細教落,做老sell其中一樣大事就係月尾交數,又稱交 M 或者 M巾.意即每月都要交.

特別喺臨交M前果幾日,如果唔到數呢...個心情呢...真係坐唔安,食唔落之格.

好,就算呢個月俾你掂、到數又點? 月結後下個月咪又要重新黎過, 確係苦過DD...

肥龍任職德國公司,頂頭老細大部份係德國人. 奈何德國人又重數據,鍾意分析呢樣又果樣...

結果reports一大堆. Monthly Report 後又有 weekly report, 結果每月的M 漸漸變成每週的M...再變成無間的M...

換黎既係 M 痛黎得愈黎愈頻密. 由開始時既緊張,茫然及患得患失, 到變成生活工作一部份(逢週一或月尾咪駛旨意放假), 再到後來身心變得麻木, 但有時又真係覺得好煩.

整個過程心情起伏甚大,但又冇人可以幫到你. 可以話有苦自己知,把 M 痛留給自己.

M 痛、復原、M 痛、復原、M 痛、復原...

另外,都未講客户無時無刻、無從預計既S, 同埋同事失驚無神俾你既手尾, 呢類既 M 痛仲難熬.

成與敗、得與失...每日就好似踏鋼線咁戰戰競競咁走過.

講到呢度又唔知你明唔明我講乜呢...

11.3.07

不死之鳥

唉...之前咁多隻都忍到.

到呢隻...最後忍唔住,訂咗! >_<

鳳凰幻魔拳~~~

10.3.07

三百戰狼

心血來潮,走上網睇仲有冇飛...

9:55pm 得番最前一行.

算啦,唯有遲啲睇啦!



嘿...3月17日星期六...

推銷隊長

我知你地想同我喺正日搞搞新意思,不過有大佬自遠方來,分身不暇, 唯有先應酬佢啦.

雖然只係補祝,都幾意外架.

更加估唔到蛋糕上果句"萊X推銷大隊長"!

好在唔係"萊X催銷大隊長"又或者"萊X推拿大隊長"啫...

不過其實都OK吖,唔講唔玩又邊有得笑? 最緊要好玩!

個鮑魚同瑤柱做型好得!個蛋糕食嗰時甜喺心,好好食呀!

多謝各位隊員支持及心意! 我仲諗緊點樣保存"萊X推銷大隊長"嗰個牌!

9.3.07

火爆隊長

一直以為已經識得點樣控制自己既情緒.

原來我識得既只係停留喺臉部表情同行為方面.

當一觸及底線時,發現原來仲有團火仲好熾熱.

三十幾歲人喎....

呢團火,雖然經過晏晝講完電話後曾受到控制,但肥龍喺度想講既係呢團火收線後其實仲未熄滅,而且仲係好L慶!
___________

你話想發大黎搞,希望重拾往日既地位,我一定撑你! 辛苦啲咪辛苦啲囉.

但如果未經我同意就走去幫我辦理同決定隊員既生死,對唔往,我會意無反顧,同你死過.

又如果同我講一切都仲只係建議,未經落實,其實無須諗得過份緊張及太壞既, 唔通我又等你傾好、諗好哂之後同我單聲時, 先同你討價還價先至係上策?

可能當有人話我多事、衝動甚至霸道,咁又點? 我只有先下手為强,講出我既底線.如果我唔去為自己及隊員爭取,可能到最後受傷害既又會係我地呢一群.

___________

你知架,我從來唔會無的放矢.

今晚講得太多啦, 瞓醒覺就冇事!

8.3.07

特別鳴謝

特別鳴謝今日SMS、電話、電郵及親口同肥龍祝賀既各位親朋好友同同事.

雖然生日年年過,都係最緊要身壯力健笑呵呵啦!^^
__________

另外想喺度同各路扑友致謝,特別係CK兄,渣古兄、鐵鎚兄等. 自從上星期報上"我的初吻"一文後多得扑友連結,令登上"老Sell遊記"既扑友多咗好多(係好多果隻).跟住肥龍貪得意check吓自己敝扑個狀態啦. 唔睇尤自可,一睇真係嚇咗一跳(藍色線)! 個勢直頭好似食咗偉高,"目標觀眾喺哂度呀!"咁既感覺呀! 不過再睇埋跟住果幾日(紅色線),原來仲似食完偉哥添...嘿...


喺度除咗希望各方扑友有時間繼續遊覧敝扑,俾啲意見外,肥龍會抽多啲時間喺度留多啲足印及點滴啦!
__________

肥龍一向都鍾意睇果啲生活體驗式既旅遊節目, 最近無記套"雪映移城"幾好睇喎~~隻主題音樂幾好Feel呀!

睇完搞到肥龍又想請假飛去日本東北添!

下星期仲有"向世界出發"呀...

5.3.07

順利完成

整個過程,完成得並不容易.

本來以約一小時十分鐘已完成首十公里算係個唔錯既開始.

後來既抽筋、莫氣係預計之內,意料不及反而係跑至八至九公里左右發現左腳板近脚指附近開始(感到)出現水泡.之後連右脚都發生同樣情况.之後兩隻脚板愈跑愈痛,但總算頂得往.

而且可能尋日濕度高,跑時又感到身體及雙腿愈來愈重.

最終以近兩小時三十分鐘完成咗半馬拉松賽事.雖然比原先兩小時十五分鐘既目標時間慢咗,但總算達成比舊年快既完成時間既最初(首要)目標.

"人大了,開心都想哭!" - 講既可能就係衝過終點果刻既心情.Yes! I can make it!

雖然跑時好攰,好痛. 但愈跑近終點,心情就愈矛盾.

之前多個月既練習、準備,一剎間將要完成,好似有啲唔捨得. 但同時又為自己終於完成二十一公里路程及達標而感到振奮.

講到咁,下年當然會繼績參加.

我會跑好呢個半馬拉松!

1.3.07

黎料啦喂


啱啱過咗個星期六攞埋號碼布、T-shirt.

準備得七七八八, 再過多三晚,就真係黎料啦喂!

真係要醒醒定定,休息好啲,再得閒拉吓筋!


好驚之前果晚瞓唔着,不過星期日要晨早四點半起身,又驚唔知醒呀!

哈哈^^不過聽天文台話星期日會好潮濕喎...