27.9.07

志偉強明


希望你可以軟著陸之後, 慢慢享受.

又盒面上, 介紹除咗加冰外, 仲有一種食法.

"For years now people all over the world have been falling in love with the unique and great taste of Baileys Original Irish Cream Liqueur. And now there are even more ways to enjoy Bailey than ever before with this exciting new range of Baileys gourmet foods. The great taste of Baileys Original Irish Cream Liqueur is perfected by the blending of fresh Irish daily cream, the finest spirits and Irish Whiskey, and is recreated in this high quality, premium food range. It is everything you enjoy about Baileys and more!"

Cheers!

25.9.07

幾天隨想

剛啱開始既假期, 去既係一個熟悉既地方. 想去既地方其實唔多, 要去既以前已經去過(幾遍), 未到過既無興趣去, 又始終唔會去.

尋日早上一直落住大雨, 只好留喺所在既地方, 食過早餐, 睇吓書. 雨停過後, 到外面輕輕鬆鬆, 漫不經心走走, 發現天氣其實並唔係咁差. 由第一天到今日第四天, 感覺上同嬰兒差不多, 主要係食, 瞓同去洗手間. 其他事, 想做就隨意去做. 好多喺香港日煩夜煩既惱人事, (暫時)亦得拋諸腦後.

到外面吸吸新鮮空氣, 同家人自在咁傾談, 總有種重拾生活既感覺. 而且肥龍亦希望藉今次兩周既假期, 可以好好俾腦袋及身體休息一下. 因為未來前面要走既路, 肥龍已決定今年及後會喺事業上作出一個明顯既轉變. 信心係有既, 只係亦藉今次時間為未來開始做好心理準備, 亦順道為已計劃好既作最後調教.

現有既工作, 雖然未至於意興闌珊, 但就好之前時間所講咁可能已經到達一個明顯既樽頸位置, 而且挑戰感滿足感亦大不如前. 自覺要再進一步, 相信(機會)成本亦不少. 而且肥龍亦諗既然已經打工十年時間, 覺得可能反倒過來, 利用呢啲成本, 再用兩三年時間, 好好做成事業上另一個平台, 總算係一個可以接受既取向.

尋晚有機會同一位長輩傾談,肥龍將心中所想及計劃一一透露, 可慶幸係長輩亦分享咗唔少寶貴既意見, 肥龍深感獲益不少. 肥龍自問唔係一個好大喜功既人, 雖然有時心多多, 意見多多, 不過底子裡還算係一個保守及穩健既腦袋. 雖然長輩講過「無商不奸」, 肥龍自然有所保留, 同時明白長輩所講「靈活」既重要.

長輩對肥龍既計劃既支持係肯定, 而肥龍亦有一套最壞打算及退出既方案. 反正有一啲事, 正如好多人所講, 唔做過始終唔會心息. 雖然機會可能隨處有, 問題反而係自己識唔識得把握, 同時又可唔可以貫徹始終.

寫到呢度, 聽落都係一啲「阿媽係女人」既道理及說話, 但又又係呢幾日一直喺肥龍腦裡游動既想法. 肥龍希望喺度寫低, 作為對自己日後既一面警醒. 因為眼前既呢一步, 真係幾孤獨.

21.9.07

月黑千尋

月黑風高, 肥龍決定今晚就遠走高飛.

走到世界某一角落, 開始短暫但期盼既兩周假期.

****************

休息過後, 自當回來.

大家保重, 兩周後見.

****************

望各路英雄身心舒泰, 愉快悠然過中秋節!

20.9.07

管理自己

講開coaching, 咁啱睇到最近Fortune講Leadership, 茶杯又講Humanagement (即 Human + Management), 突然又想加把嘴講多幾句.

咁對於點樣先做可以做Leader又咩叫掌握Management, 出面街已經有無限既資源去提供, 肥龍喺度無謂班門弄釜. 不過反而肥龍想講接受他人既Leadership 同Management既心態上面.

相信有唔少多人都有呢個情況,面對老細既指示, 一係就信心不足,唯唯諾諾, 照單全收. 另唔係就會覺得呢啲指示, 不外如是, 自己可能心情有一套更好既方案. 問題只係無機會講, 又或者會覺得講咗老細唔明(唔聽).

但係如果換個角度諗, 其實有幾多人會喺收到既指示前, 會好好管理及準備好自己去執行所指派既工作呢? 你可以話老細無料無計劃無能力, 但一件事既成敗, 除咗計劃之外, 執行力亦非常重要. 試問有邊個唔想指指點點, 叫人做野呢? 問題係如果你無執行既能力同經驗, 順風順水時當然無問題啦, 但如果遇到問題或發現資源唔夠既時候, 就要見真章嘞.

仲有, 如果你老細真係無料無計劃無能力, 如果真係俾你上咗佢個位, 你又敢唔敢講會無問題呢? 咁如果無呢啲能力同經驗的話, 係咪應該先諗吓不如去按照指示去做, 期間自己一面留意及學習當中要在意既地方及技巧, 從中偷師.

喺肥龍工作生涯中, 大部份既老細都係只會喺面前做一(幾)次, 你見到學到幾多係你既事. 肯落手落腳教既, 少之又少.

講起學習, 肥龍覺得同老細討論, 其實亦係一個唔錯既學習過程. 雖然呢個過程, 所花既能量, 絕對唔會比做老銷對客戶既少, 但喺討論過程中, 你更加可以睇到老細既思維同顧慮, 又或者一啲宏觀既考慮. 依啲真係睇咩書都唔會學到. 至於, 最後吸收到幾多, 就係睇個人既造化同天份啦.

17.9.07

以前跟佢

最近無意中喺一個客戶口中, 聽到肥龍之前一個上司 (依家喺唔同公司做) 同其他客戶講肥龍當年都係跟佢搵食. 言下之意, 即肥龍當年係佢下屬, 肥龍既一舉一動, 有咩能力, 佢都一清二楚. 所以有生意如果搵肥龍做, 不如搵佢做啦.

肥龍聽到後只有一笑置之. 心諗肥龍當年係佢下屬係個事實, 無需要隱瞞或避諱. 佢咁講自然有其目的, 肥龍無心推敲, 但就想知係咪咁就代表肥龍喺事業上唔可以超越佢? 又或者, 係咪表示佢始終比肥龍優勝呢? 唔通肥龍自從脫離佢既 “庇蔭”後, 一直唔長進唔積極去提升自己既能力呢?

可能因為之前既工作關係, 肥龍除咗要應付本身工作外, 仲要負責指導successor既事項. 而喺同時, 肥龍都會向同事灌輸如果要升職就一定要有人可以頂替佢原來既工作呢個概念, 否則只有留喺原有崗位上. 換句話, 其實肥龍都唔知幾想佢地一個二個步步高陛 (當然係因為有能力同經驗嗰種), 因為咁除咗代表肥龍有班好幫手, 開心都黎唔切外 更代表肥龍有機會更上一層樓. 而且肥龍深信, 如果同事真係比肥龍能幹的話, 肥龍應該係檢討自己既問題, 而唔係去阻礙同事去發展. 況且, 肥龍亦未必留喺同一崗位太耐, 始終會離開再闖另一片天. 無謂阻同事發達.

另外, 肥龍非常享受呢個指導過程, 亦覺得可以發掘一位能幹既同事既滿足感好大. 所以一直咁做都覺得無問題.

所以對於有時聽到邊個話邊個係邊個個上司, 又或者邊個係邊個下屬呢類說話時, 肥龍唔想聽之餘, 亦覺得好幼稚, 好鬼煩厭呀.

16.9.07

相片回憶

肥龍係一個以影像為主, 文字為副去攝取知識既人. 一直覺得, 一張再簡單既相片可能會比一篇詳細既文字黎得深刻, 帶黎更直接感受. 所以喺好些情況, 肥龍會用相機把呢啲感受一一記錄落黎. 最近留意自己既扑亦放咗唔少相片做輔助去講故事, 而家中亦買咗些少以相片說故事既書.

對於相片, 肥龍常用兩個角度來接觸. 一個係從第三者去觀看其他人拍攝既相片去認識相片中既故事及情況. 另一個係從自己拍攝既相片, 去回想或加強一件自己曾接觸過既事與物.

呢啲事與物, 可能係一件玩具, 可以係一啲童年時到過經歷過既地方. 又會係一次難忘既假期及遊歷, 及種種身邊周遭出現既事. 不過偏偏喺旅遊時, 肥龍唔係咁鍾意拍好"多"相, 到此一遊式既相片可謂少之又少, 反而有時只係會為眼前一啲比較特別或覺得特別靚既景象拍幾張. 拍攝既理由可以好多, 但就覺得如果只係太專注拍照或希望將影像保留, 眼前真實既景氣就只會變成相機三吋螢幕裡既影像, 變得唔真實, 亦令眼界收窄, 更忽略咗周圍一同觀察到既一切, 違背本來旅遊既目的及意義.

就算再好功能再勁既相機, 亦唔可能將心中既完全感受保留. 而且如果真係對某件事與物有濃烈興趣的話, 遲啲亦可往書裡尋.

由澳洲黃金海岸既悠閒及藍天白雲, 日本富良野農場既繽紛花卉, 法國巴黎市面既歐陸氣息, 到所居住既南區海灘郊野公園既自然景色, 相信就算無相片, 相隔一段時間的話, 肥龍仲係可以把感受詳細咁講出.

因為咁,對一個未到過既地方或未接觸過既事, 正如前所講, 肥龍傾向好少拍攝, 反而盡量先用眼睛去接觸及觀賞, 發掘動心既地方再拍攝. 又除非, 當肥龍有機會再去或再接觸既時候, 再去拍攝多幾張.

14.9.07

綠野仙蹤


喺公司工作對電腦螢幕時間多, 一到週末, 就係要去休息. 除咗星期六早上去跑步. 最近當天氣開始無咁炎熱時, 有時間就會到香港仔水塘走走.

綠葉成蔭, 景物遠近, 眼界廣闊, 兼俾眼睛休息.


相隔不遠, 迎面見行山者, 點頭打個招呼, 再到下一點.

走到水壩, 將眼光放在遠處, 又會是另一種寧靜. 望著水中央, 見大群錦鋰魚游動, 非常自在.



眼前既一景一物, 令肥龍開懷, 亦為肥龍熟悉. 因為呢遍綠野仙蹤, 肥龍在此長大, 玩耍, 曾渡過不少個夏天及秋天.

13.9.07

填鴨老銷

做老銷, 從來都係老銷一早問定個客預算係多少, 將來可能有幾多單, 然後返到公司砌報價單. 而且當有必要時,會準備好資料及可能答案, 先走去同老細商量及爭取支持(例如減價)協助.

不過依家好似變咗, 唔係咁樣喎. 除咗準備不足外, 依家情況就似變成好似老細想做成單生意多過個老銷咁添. 結果變成老細猛問老銷問題, 老銷可能先可能會答番一兩句. 問一句就答一句, 惜字如金.

咁講, 就算老細想幫老銷減價攞單, 至起碼老細都要有啲實用資料先可能做到決定.

結果過程中, 反而係老細要問番老銷唔同方案及價錢既可能性 (例如個客點解唔簽/ 貴咗幾多/ 送咩唔送咩/ 個客第時會有幾多類似既項目/ 數期呀等), 又或者要了解定係因為第啲原因個客唔簽, 最後先可以砌好份報價單.

咁唔通, 老銷唔多志在啲生意同佣金?

但相反, 咁其實老銷喺度做緊咩呢?

12.9.07

壽司店內

《人物介紹》

勤奮既運茶人形












開心得意既招財猫












不拘言笑既伍長












笑盈盈既小嘻哈












臉青兼髮型變咗既肥龍














同場加映: 伍長(Giroro)個人solo


11.9.07

The day carries intensely personal memories

雖隔六年, 感受甚深.

眼前所見, 不能忘懷.

儘管遠在天邊,

感覺就在咫尺.

六年後,

日子依然繼續,

生活還是一樣.

不過, 從那天起, 這天變得不一樣.

同場加映

做好套衫, 影完原裝設定後, 肥龍貪玩, 又再搞搞新意思.


************************** <故事: 開始> *******************************

壽司店內...


人形公仔:「歡迎光臨!幾位呀?」

客人:「兩位吖唔該!」

人形公仔:「請呢邊坐吖」

客人就坐後:「攞酒黎先!」

人形公仔:「係」



酒過三巡後, 客人有啲肚餓, 開始叫野食:「兩客"菊壽司"吖, 唔該!」

人形公仔:「係!」

客人:「嘩, 有無攪錯, 啲壽司咁假既!? 同我換過哂佢!」

人形公仔:「...」




人形公仔:「先生, 胡瓜卷同玉子壽司」

客人:「咁細碟既?! 有無攪錯! 再同我換過佢!」

人形公仔:「又換? 真係...」







(隔咗一陣)
人形公仔:「先生, 唔知咁樣, 夠大未呢!?」

客人:「...」






************************** <故事: 完> *******************************














下回預告:

9.9.07

首作人形


Yatta~~~!! 終於「做」好啦!

點解係話「做」好, 而唔係話「砌」好, 因為要砌既機械部份只係用咗四十五分鐘, 但係整衫既剪裁部份竟然花咗差不多另外既兩個半小時. 而成套衫真係一剪一貼咁「做」出來!

之前因為美麗既誤會, 一直以為呢副運茶人形係唔包括衫(或紙)既部份, 理所當然咁肥龍因為未買和紙而未有拆開原來包裝, 亦因為工作忙所以一直未有開始.

後來, 分別喺saintvenus程語音果邊見到佢地既完成品後, 再細心留意, 發現佢地既人形都係著原裝果套衫後, 已開始覺得唔對路, 但因為最近幾晚好夜先返, 亦不了了之, 無去打開包裝查個究竟.

而咁啱, 肥龍上星期五行開文具鋪, 買咗和紙, 咁今日就"的"起火肝, 食完早餐就開始砌.

正如上面所講, 雖然整衫部份因為技術及功藝問題, 真係用咗意想唔到既時間黎做, 就好似重溫以前既美勞一樣, 不過就好享受呢個過程. 而整套衫既完成, 係用mix & match既原則(純粹以顏色, 圖案及有限資源)去設計, 至於其實有無用錯色或有違日本傳統, 肥龍真係唔知亦唔懂. 如果真係有既話, 亦希望見諒及提點一下.

漁光道上


今日趁有時間, 藉去水塘之便, 經過由出世至中三, 曾經渡過十五個寒暑既兒時居所, 忍唔住快拍咗幾張相.

望著以前居住過既單位, 雖然只係遙望, 而且只見到外牆, 不過感覺好特別, 好良好.

後來再走入走廊, 腦海浮現兒時既影像, 感受住當時既氣氛, 及懷著當時既心情.

非常懷念!

如果有時間, 一於再到此一逛, 除咗再拍多啲相, 仲會順道探吓啲街坊先.

8.9.07

聲調鍛鍊

肥龍本身聲底天生比較沉, 但講起野時聲調絕不含糊, 而且成日笑聲響亮.

不過發現最近返工既新同事唔知應該話係斯文定陰聲細氣, 硬係覺得佢好似含住野講野咁, 依依哦哦. 真係後面嘈啲都可能聽唔到佢講咩.

咁啱今日面試後, 老細覺得另一個面試者雖然樣樣都唔錯, 但係又係衰在講野時細聲, 似唔夠氣咁.

面試完後, 肥龍同人事部經理講開呢個情況, 就講笑話如果係咁, 不如叫公司攪番個聲調/聲線既訓練, 等班老銷除咗產品資料, 美色(如果有)外, 仲識得如何運用聲調/聲線去吸引客戶又好清楚咁同推廣產品.

另外, 如果可以訓練成呢幾把聲就更好(又好攪笑)啦!

6.9.07

應徵的你

呢個"你", 其實係一個"他".

聽過遇過見過呢個情況唔少次.

忍唔住想問一聲. 既然唔諗住黎見, 又或者心大心細未決定, 做咩要應承今日下晝個面試呢?

而且就算最後決定唔黎, 點都好, 你可以隨便搵個理由, 打個電話黎通知聲, 我無所謂兼起碼我唔駛繼續等. 但就唔係好似依家咁, 我同事打電話俾你你都唔接聽囉. 等我地仲擔心你會唔會途中有事添.

有啲野, 就算你唔係有心去攞人走, 但對方都會無緣無故俾你"撻"咗去, 時間就係其中一樣. 特別係因為呢個面試而推咗一兩個會議既我, 聽日仲要繼續做番原定既工作.

不過算啦, 你我素未謀面, 你又唔會睇到呢度, 你點會知喎, 係咪?

5.9.07

腳踏實地

電視畫面, 男角忿忿不平咁同前妻講: 「點解你唔可以欣賞吓我呢? 我依家已經做到xx界既才俊, 我間公司又愈做愈大, 每日都唔知有幾多人想去訪問我, 想去請教我. 但係點解你仲係覺得我唔生性?」

前妻氣沖沖就回應: 「你可唔可以腳踏實地啲呀? 依家你係有錢咗咋, 唔係聰明咗呀! 你知唔知呀?」

************************

其實喺日常生活中, 有幾多人唔會用一個人搵到既錢地位黎衡量呢個人既成功呢?

但係同時, 又有幾多人會關心呢個人係咪聰明?

不過如果話(俾人話)成功同(俾人讚)聰明可能只係果, 咁咩先係因呢?

早前未有股市大奇跡日前, 肥龍真係聽埋唔少消息, 當中有唔少市場既高見, 總之就係叫你放膽去買啦, 不過接近高位時就要小心啲 (肥龍夠知啦). 肥龍喺度唔係要潑泠水, 依家一個月過後, 貼市既經過左一巴右一巴後, 有幾多人身家係多咗, 少咗, 定係差唔多. 至於身家係多咗果啲人, 可唔可以話係聰明人, 肥龍唔知. 不過肥龍諗大部分人會覺得呢啲人 “叻” 囉. 點解? 因為搵到錢囉.

不過“叻”又好, 聰明又好, 呢啲無沽貨甚至入貨既人, 搵到錢固然係回報啦. 但同時, 要做到呢點, 肥龍覺得除咗要具備膽識之外,信念都唔可以缺少. 而當做所謂決定時, 就係要有對(呢)件事有充分既分析, 及其後既堅定意志去堅持落去, 直至等到結果一刻. 否則就算係成功亦只可以話係好彩, 係符碌. 更重要如果連自己都唔知點解會得, 咁又點可以話仲有下次呢?

咁股市可以咁睇, 做人方面其實都應該唔差太遠. 有好多情況, 作為一個對自己負責任既人, 凡事都應該心思熟慮, 再加埋堅定信念先去做, 咁成功既機會先可能會出現. 咁, 就算將來有一個浪撲埋黎, 自己都會知應該企喺邊個位, 唔會咁易隨波逐流, 唔會咁易被沖散, 可以生存落去啦.

清醒時間

唔計瞓覺時間, 以清醒時間計, 原來一日喺公司既時間比喺屋企既時間, 真係多出好多.

就算放工返到屋企, 食飽飯, 開始攪咗呢樣, 攪咗果樣, 又睇咗電視劇集.

結果, 話咁快, 時鐘已經直指零晨十二點正.

心思思又想睇吓呢, 做咗啦, 總之就唔想咁快瞓覺住.

因為, 私人時間實在少得可憐.

4.9.07

極速飄移

嘩, 睇完呢一張相, 心諗打機啫, 唔駛咁厲害啩?

唔知架車會唔會跟住畫面郁呢? 不過點樣都真係好想試吓, 但係唔知香港邊度有地方可以咁搞法...


又, 如果第時有得玩揸巴士呀, 揸飛機等遊戲時, 咁既話咪仲勁仲誇?

2.9.07

書櫃一角


心血來潮所拍既一張相. 映著家中書櫃一角.

近年因為搬遷頻密, 而且有肥媽屋企做後備倉, 有好一段時間, 肥龍真係連一本漫畫都無放過喺屋企.

唔(再)買漫畫既理由有三:

一. 新既漫畫唔及以前睇過既漫畫及漫畫家好睇;

二. 睇開既漫畫及漫畫家一直無新作;

三. 懶, 唔想搬屋時又要執餐懵

不過肥龍既然咁鍾意買及睇漫畫, 呢啲理由又點可以維持得好耐呢. 而且其中有啲理由, 根本就唔成立(例如第一同第二點). 又加上有時睇雜誌同聽人講開啲好睇既漫畫時, 最後咪又再心郁郁, 買番本黎睇.

某啲漫畫, 就好似嗜好一樣(肥龍嗜好繁多), 有時只會係三分鐘熱度, 睇完或到熱情冷卻時, 就未必再有興趣翻睇, 而且可能某啲情節已經脫節, 依家睇番節奏及內容格格不入.

又有某啲漫畫睇果陣對情節好有共鳴, 睇完好似突然"叮"一聲醒哂.

不過更有某啲漫畫卻代表成長路上既回憶, 就算只當一切留喺心中, 卻未必一定要擁有. 咁之前喺留言度講過, 肥龍覺得唔少人認為漫畫只係叫娛樂,只係俾小朋友睇既副產物, 而又認為書本上既先係知識(起碼有唔少家長係咁諗). 肥龍絕對唔認同. 因為漫畫帶俾肥龍除咗娛樂之外, 其實喺成長路上同時添加唔少喜怒哀樂, 更從中得到唔少智慧及支持. 不過再睇呢張相, 先發現原來肥龍睇開既都係嗰幾位漫畫家. 啱啱先講咗一切留喺心中, 未必一定要擁有...真係講笑咩(請原諒肥龍前後矛盾)...始終心頭好就係心頭好. 肥龍覺得人既記憶有時係需要物件去協助, 先特別顯得實在, 特別窩心.

結果買吓買吓, 又開始累積唔少漫畫.

而其中有幾套漫畫, 每次當肥龍搬屋執到果陣時, 總係會忍唔住再睇一陣, 然後先會好細心咁放入紙箱內. 到拆封時, 又會小心翼翼, 一本一本咁放好喺心愛位置.

之但係咁, 呢個情況相信會繼續發生, 唔會突然改變.

1.9.07

想搵番野


最近, 肥龍工作上負能量多得不得了.

職位上夾喺老細同同事中間, 有時真係做到思覺失調,兩面不是人.

老細唔駛多講, 簡單講, 又要馬兒好又要馬兒不吃草. (不過有無唔係咁既呢?)

內部會議一個緊接一個, 討論既來去都係呢個.

相比對老細, 肥龍對同事既時間更多. 奈何時間愈多, 代表見到同事既問題既機會更多.

有時, 肥龍都真係唔知或唔明白咁究竟係代溝吖定自己心態變咗吖. 愈來愈多眼前事唔明白, 亦愈來愈睇唔過眼.

有同事謂上司下屬關係就如拍拖, 時好時壞. 咁如果呢句話成立, 講真咩都可以講得通, 亦唔駛咁煩.

斤斤計較, 愛投訴, 事不關己, 講回報. 只會一面指人地點點, 但就同時合理自己既問題, 待人嚴又律己寛.

更有比小朋友更幼稚既行為. 遇到問題唔係自己問題, 一定係件事本身早就有問題.

處理唔好, 就係其他人唔合作. 資源所限, 就係阻礙發展. 無就投訴無, 有則投訴少.

真係咁差咩?

究竟唔見咗啲咩呢? 又, 唔見咗既去咗邊呢?