呢個"你", 其實係一個"他".
聽過遇過見過呢個情況唔少次.
忍唔住想問一聲. 既然唔諗住黎見, 又或者心大心細未決定, 做咩要應承今日下晝個面試呢?
而且就算最後決定唔黎, 點都好, 你可以隨便搵個理由, 打個電話黎通知聲, 我無所謂兼起碼我唔駛繼續等. 但就唔係好似依家咁, 我同事打電話俾你你都唔接聽囉. 等我地仲擔心你會唔會途中有事添.
有啲野, 就算你唔係有心去攞人走, 但對方都會無緣無故俾你"撻"咗去, 時間就係其中一樣. 特別係因為呢個面試而推咗一兩個會議既我, 聽日仲要繼續做番原定既工作.
不過算啦, 你我素未謀面, 你又唔會睇到呢度, 你點會知喎, 係咪?
9 則留言:
對不起！ 因買唔到飛机票所以冇到...下次唔會 hehe
唔緊要, 知你未上機就得咧. 而且有時差, 你應該仲趕得切既.
我"等_______________________"你呀!
^^
下？咩肥龍兄唔係講緊我咩？！（哦哦哦，當我無講過...鎖你）
可以話，呢d咁既candidate，真係無下次，而且唔只係係小女子現在的公司，可以話，無論小女子以後去到邊，只要小女子記得你，你都唔洗指意再係小女子既地部搵食。
點解咁偏激？因為小女子認為做野要有擔帶，你見工都已經係咁，我先唔講你專唔專重我，如果真係請你，我驚你成個無尾飛陀咁，成日攪到我心驚膽跳，到時我好易心臟病發喎，咁就梗係你死好過我死啦，係咪？
不過小女子遇過個更離譜，番工第一日就玩失蹤，難為小女子浪費幾日時間幫佢搵位坐、set電腦、攞work pass、set ID...唸起都火滾！
唔好意思，首次留言就扯火添！
C.M.兄,
唔通呢個就係你大大老闆發現左你個嗰陰謀黎?
而且個candidate唔係叫志明喎．．．＾＾
Marshmellow,
唔駛唔好意思呀， 其實我仲扯火過你呀！ 不過肥龍對扯火呢樣野係會同遇到既情況成反比，見得多咗，咁我咪變成冷嘲熱諷囉．
你講得啱呀，見工已經咁樣，請咗返黎仲成世界？ 況且今次係請老銷，咁無”搭霎”真係驚架！ 得罪我都尚且可以，得罪客就死十次都唔夠．佢連打電話講理由都想慳， 就唔好諗佢會cold call 同follow up 啦．
試過唔來唔單止，打電話仲要cut線同變留言，其實一句唔適合有幾咁難講出口
呀...有個仲攪笑…我叫佢見工，對方話"你邊到架！"我真係呆一呆，邊到?咪講多次公司名…但其實佢只係想問我係邊區…但咁既講野方法…真係唔多掂！
野蠻郡主,
佢就係如你所講, 打電話俾佢仲要cut線同變留言, 唉!
發佈留言