Yatta~~~!! 終於「做」好啦!
點解係話「做」好, 而唔係話「砌」好, 因為要砌既機械部份只係用咗四十五分鐘, 但係整衫既剪裁部份竟然花咗差不多另外既兩個半小時. 而成套衫真係一剪一貼咁「做」出來!
之前因為美麗既誤會, 一直以為呢副運茶人形係唔包括衫(或紙)既部份, 理所當然咁肥龍因為未買和紙而未有拆開原來包裝, 亦因為工作忙所以一直未有開始.
後來, 分別喺saintvenus同程語音果邊見到佢地既完成品後, 再細心留意, 發現佢地既人形都係著原裝果套衫後, 已開始覺得唔對路, 但因為最近幾晚好夜先返, 亦不了了之, 無去打開包裝查個究竟.
而咁啱, 肥龍上星期五行開文具鋪, 買咗和紙, 咁今日就"的"起火肝, 食完早餐就開始砌.
正如上面所講, 雖然整衫部份因為技術及功藝問題, 真係用咗意想唔到既時間黎做, 就好似重溫以前既美勞一樣, 不過就好享受呢個過程. 而整套衫既完成, 係用mix & match既原則(純粹以顏色, 圖案及有限資源)去設計, 至於其實有無用錯色或有違日本傳統, 肥龍真係唔知亦唔懂. 如果真係有既話, 亦希望見諒及提點一下.
15 則留言:
拓海兄，掂喎! D紙幾錢架?
遲D我地不如揾埋venus同D公仔搞個網聚咯，如果老餅返黎香港就更加好啦~
真係唔錯喎...個公仔係咪可以郁架？
你個公仔Ｄ衫好鬼靚呀！ :) 等我造件軍綠迷彩比個公仔先. 哈哈
程兄,
見吓面幾好玩. 我返香港一定話過你知！
程音語,
如果淨係計今次用既, 廿蚊左右啦. 但係你要一pack一pack買, 有大有細張(唔同一pack), 共約八十蚊啦.
做外衣既藍色紙, 其實仲有剩(其他花), 如果你想要又唔介意, 可以俾你. 而且呢啲紙質地好靓, 摸落手感好正.
公仔網聚? 好喎, 記得預埋我咧! ^^
野蠻郡主,
係呀, 識郁架! 上咗鍊後, 只要放個杯上個盤就會行, 攞走就會停.
old cake,
軍綠迷彩? 得喎!
不過個公仔送過黎既會唔會係罐頭呢?
同埋會唔會轉髮型呢? ^^
我個公仔會送M.R.E(Meal Ready-To-Eat)㗎！ 哈哈 可能會造頂帽佢戴. :P
我都好中意DIY啲手作仔
男人來講好似你咁巧手真係少有啦
啲衫真係好靚
佩服佩服
Hana,
多謝你到來及稱許先. 咁當然仲可以做好啲, 不過以第一次做黎講, 我已經幾滿意架啦.
DIY 真係幾好, 又可以發揮, 改裝, 可以有好多變化.
肥龍, 你個公仔呢套飲衫好型呀!!! 夠晒獨一無二~ 我嫌我果個"行"得滯添~
公仔網聚, 好呀~ 等我整多兩件衫畀佢當fashion換先!
saintvenus,
係呀, 其實係美麗既誤會就不如錯有錯著. 不過就真係獨一無二咧!
係啦, 等你整多兩件衫, 加埋程音語同old cake, 一於攪個公仔網聚, 交流吓整衫過程呀! ^^
可能我會加支ＢＢ鎗上去我個公仔度！ 小心喇你哋 哈哈
？紙？！做得好靚喎...不過點解你「男仔之家」鐘意玩公仔？！
marshmallow,
只係我自小都鍾意砌模型, 及DIY整玩具. 咁又見呢個公仔好有特色(可以上鍊), 就貪得意買個黎玩囉. 放心, 我唔係有咩「特別癖好」架!! ^^ 不過就真係好花心機同功夫, 而且有時整出黎可能同原先構思好大出入呀!
發佈留言