30.6.08

曲終人散

最近肥龍跟一位同事講開工作上既情況,愈講愈離題,竟將所講既情況扯咗去「後施丹時代既法國隊」上.

同事既意思就話睇吓今屆歐國盃法國隊既成績,就知冇咗施丹既影響有幾大,而且強如亨利, 只要有施丹喺度,要贏波根本就唔係問題.誰不知施丹用頭撞人後還宣佈以後唔踢波!試問亨利又點可以撐起成隊法國隊? 就算有列貝利,賓斯馬都唔能夠取代施丹既作用!講到呢度,同事又謂如果往大局去睇,希望施丹會復出救國啦!

如果單就成績(三戰一和兩負,得一球失六球)而言,同事所講既絕對成立.

不過肥龍就覺得可能同事言重咗,況且當中有危亦有機.素來球隊轉型,通常非一朝一夕可完成,亦要顧及現有球員及其特性, 先可以塑造出合適合理既打法及隊形.

至於由誰領軍, 還是用整體方式,可能需要用時間搵出答案.不過若果硬要搵人代替施丹(或其作用),雖然望落有跡可尋(如隊形/功用),其實當中涉及唔少磨合既困難.而且事實上,除咗打得辛苦之餘,各方欠缺默契下, 更可能弄巧成拙添.

而施丹只得一 位(其實任何球員情況都係一樣),有時太過理所當然,其實都會對後繼者造成唔少壓力及不公/過高既期望.

後來肥龍又提到,其實球隊中唔同位置上尚有其他正選及有經驗既球員, 對於呢個情況,重點可能放喺如何將之前施丹喺場上既效率及功能保持由有經驗既球員分擔同時,再尋找出新既隊形及球員,更為上策啦.

球隊就如人既個性一樣,應該充滿風格.

另外,如果往呢個方向諗,又帶出一個有趣既問題:究竟係(1) 先有隊形,然後先去搵合適球員演繹(可以比較摩連奴同鄧立東尼既分別),目標為本(先減少犯錯然後再搵機會);定係(2) 先有球員才得出最佳/合適隊形(可以諗史高拉利喺葡萄牙前鋒缺乏但中場翼鋒充足既情況)?  

好既教練,如果真係有唔少球員選擇,除咗輪流補替,通常都會有多於一個隊形及戰術以備殺著或保持勝局.咁呢個問題可能又去返,係做教練既,可唔可以搵到有能力及合適既球員效力上.

最後,講返亨利,就如水一樣無形無相, 倒入杯就是杯既形, 倒入箱就是箱既形.如果當打時既亨利,始終都係亨利嘛,可以喺有需要時打出身價既先可以叫巨星呀.從來與撐唔撐得起球隊冇關.而且可唔可以奪標,肥龍傾向整體作戰方案.

Euro 2008

7.6.2008

今晚真係忙,啱啱先睇完法網(Ivanovic勝出!),再等多個零鐘,四年一度既Euro Cup又開始啦!

自己其實冇咩特別心水,偏好當然有,不過就唔係任何球隊die hard 粉絲,純粹睇波為主,一切視乎整個賽事發揮.另外就最最最緊要唔好好似上屆一樣,打法上保守兼戰術上大倒退就得嘞.

雖然唔係die hard 粉絲,不過有兩三隊依然會特別留意,分別就係西班牙隊,意大利隊同德國隊.

西班牙隊?主要係因為一個射手-F.Torres.雖然西班牙隊後防認真麻麻,不過有時大賽要贏波防守之外,可能就要靠有一位可靠既射手射個波入龍門.而且F.Torres早隨利物浦五月中收咧,喺有充份休息及準備下,要踢三個星期好波,唔係咁難,所以機會未必冇.最怕只要西班牙又只屬(賽前)熱門,往往雷聲大雨點少之流而已.

另外,覺得意大利有機會原因主要覺得意大利跟德國一樣,係屬於專踢盃賽既球隊.加上世界盃既骨幹,默契經驗充足,加上穩健門將Buffon,只要改善慢熱作風,往後應該愈踢愈有. 但係喺領隊同球隊平均年紀問題上,又確定存著一定暗湧.

最後,連一個非德國球迷都認為德國有機會奪標時,可以想像出今屆德國三線整體實在平均,加上抽得好籤,只要發揮正常及保持世界盃機動有效率既打法,四強可期.況且,正如上面提及,德國都係專踢盃賽既球隊,配上充足及有經驗既後備深度,實在難有其他隊可比.不過當諗起由「阿二王」Ballack領軍時,又真係...

另外,有一隊冇提及又唔預期可以奪標,但就非常睇好可成為本屆黑馬,就係由Hiddink率領,以整體發揮為主既俄羅斯隊.如果有睇歐洲足協盃,都應該有留意來自俄羅斯既辛尼特隊,先後殺退德國既利華古遜及拜仁慕尼黑等,進步之大,絕對要留意.

黎緊既三星期,即將冇覺好瞓啦~ Goal!~~

19.6.2008 後記:

上面提及既四隊(西班牙隊,意大利隊,德國隊及俄羅斯隊)分別分組出線過關,總算冇跌破眼鏡(好險~). 跟住,意大利隊就將會八強戰對西班牙隊, 真係手掌手背都係肉,揀唔落添... 





23.6.2008 後記:



經過八強較量,最終四強終於誕生(德國隊,土耳其隊,西班牙隊及俄羅斯隊).可喜係開賽前所留意既四隊到呢刻尚有三隊留低.



到呢個階段,要估邊隊輸贏其實意義不大.況且除咗實力,相信往後各隊教練既部署將會成為勝負既分水嶺,而呢個要素又要求各教練對其對手有明確既了解.



雖說戰至四強各隊既實力大致見得咁上下,不過兵不厭詐,覺得被睇淡既一方相對比較有利 (俄羅斯隊係俵俵者).



德國隊方面相信續以身材及體力化既打法與土耳其隊周旋,而且有少少「格食格」局面.只要發揮應有水平及唔作出令人驚訝既調動(如後衛贊臣及前鋒高美斯),勝局可期.至於土耳其隊方面,所知實在有限,只知善踢逆境波及其打不死既精神,可以留意奇妙之旅可唔可以再進一級.



相反,另一場西班牙隊要面對俄羅斯隊就比較牙煙.而且唔好唔記得,2002年世界盃,西班牙隊(當年由Camacho帶隊) .就曾經一百二十分鐘後射十二碼輸過俾當時同由Hiddink帶領既南韓隊.雖然現今西班牙隊已由Aragones帶隊兼打法上亦有改變,不過Hiddink對如何應付西班牙隊應該亦有一手.



而且經過初賽大敗於西班牙隊既經驗, 再加上主將復出及針對性既部署(西班牙中場關鍵及防守漏洞), 配以一貫機動既俄羅斯隊打法,將會非常有睇頭.而西班牙隊希望以第一場初賽既氣勢,再勝俄羅斯隊一次.



附加:今朝睇生果報體育版,講返俄羅斯隊對荷蘭隊既賽事,知道原來喺呢場比賽中俄羅斯隊球員全場平均跑動距離為十三公里(荷蘭隊球員為十一公里),實在感到震驚.肥龍一直有跑步,全心跑十三公里大概都要約六十六至六十八分鐘.而實際上足球比賽中球員唔會全場唔停咁跑(如當冇波在腳時,死球時間,受傷時間等),就算職業球員,要踢(及跑)足一百二十分鐘,呢個水平絕對厲害!




27.6.2008 馬後炮:

當你腦海正期待住一架法拉利ENZO時, 迎面駛來卻竟然係一架「法拉利紅」既石油氣的士, 果刻既心情, 真係難以平復, 又充滿十萬個為什麼.

本來期待一場勢均力敵既大戰, 不過俄羅斯隊果真係神奇教練加上神奇球隊, 唔睇過仲以為十一個正選全部都出唔到. 只係事隔幾日啫, 表現完全判若兩隊.


30.6.2008 最後後後評:



今晚射手F.Torres一箭定江山,射入可能(暫時)其足球生涯最重要一球,為西班牙隊勇奪今屆Euro Cup!

發揮只係一般既德國隊相信亦落敗得心服口服.而「阿二王」Ballack 之說又再應驗~

而喺最後電視畫面所見,西班牙隊後衛S.Ramos穿起印有季初因賽事中昏倒而去世
A.Puerta既上衣上台領獎捧盃時,又實在令人感動...!

28.6.08

無心之合

晚霞跟溪間本應風馬牛不相及,不過若將晚霞放埋溪間一齊睇,又會變成咩模樣呢?

無心下既留意,發現之前拍攝過既兩張風景照,原來之間又可以用另一看法.本來兩張單一既相片,經過處理,霎時可以變成一張特別既panorma.

1.(前)原來照片水平並列:


2.(後)並列後再加上軟件過濾效果 (彩色掃描):


3.(後)並列後再加上軟件過濾效果 (水彩黑白):

26.6.08

立法會直播

今晚既直播(仲睇緊),實在好睇!

某幾段真係愈睇愈火,不禁搖頭歎息,

如果有興趣想了解事件既情況,今次不失為聽取各式各樣意見及立論既好機會.

不過,意見歸意見,聽咗而會改善既,先算係進步,先算係上策.

否則,只係爛片大龍鳳一套,角色各有各演,各有各表述,漠視觀眾感受.

24.6.08

掛與不掛

呢一刻,三號熱帶氣旋警告信號現正生效~

根據肥龍非正常統計,每次當發現南中國海及菲律賓一帶有熱帶氣旋時,如果有機會上天文台既網站留意熱帶氣旋路徑圖時,絕大部份情況(特別較早期時),所預計既路線,好少吹襲香港.

今次都唔例外.其實上星期六日已經知道有熱帶氣旋橫過菲律賓後會吹向香港,但當時既估計就係熱帶氣旋會以轉角90度吹向台灣南部(下次有機會抓圖作實例).

結果當然係不斷修正原定路線,由台灣南部到福建,再由福建到汕頭,再由汕頭到香港.一次比一次接近香港範圍.

而特別既係,如果肥龍留意外國氣候網站時,反而差不多次次都估會吹襲香港.結果係點?當然又唔係次次都咁準啦.

究竟呢類對外公佈既路徑,其實有幾科學同有冇一定標準架?

其實掛與不掛,講真對肥龍影響有限,最多另有安排.但係,呢個估計,就對其他要留意天氣做事既人就有莫大關係啦.而且船家漁民最有智慧,單睇天及水流,大概已經知道未來幾日既天氣,決定泊回避風塘休息.

肥龍亦無謂諗及猜測太多,不過只係質疑以現今科技及經驗,預測熱帶氣旋路徑可唔可能準確及明確一點呢?

愈行愈遠

大故事未明朗下,心裡感覺似逆水行舟,非常吃力兼唔如意.無時無刻得叫人反覆,一刻慶高彩烈,下一刻卻又跌落地獄.眼前既局面又如砌圖般,零零碎碎,一片一小段,後來又從唔同人及渠道,推論出一直模糊既大畫面,於有形與無形間,實情逐漸浮現.

兩個星期前既一件事,在近既一方一直在迴避,在推卸,唔知有心定真係冇心.難得遠既一方充滿誠意,而且非常主動,可謂高低立見,又有新既體會.

而環顧一直聽到見到做到既,縱然曾用心過,曾千方百計過,曾無助過,曾氣餒過,縱有小勝卻又反覆得令人洩氣.望著合作無間既團隊,眼裡有種豁出去既衝動.同時,又充滿歉意.

當嘗試去問及究竟仲可以做咩既時候,對方換來既答案竟然係覺得做得唔夠壞.
所講既「壞」係形象上既壞,兼令人生畏既壞,令人煩厭既壞.
所做既「壞」係令對方受壓,令對方感受到危機,令對方感到渾身唔自在.

好等對方在雙方勢均力敵,勢成水火時充當公正人,為下一步定調既同時,對方更可以作出選擇.這個大故事,實在冇興趣去演.

當事情去到此一個地步,遺下既,就只可有「做與不做」既決定.不過,除咗「做與不做」呢個決定,係咪就別無他法呢?就是有呢個必要,「做」只係理所當然既答案.不過,只憑事件既其中一方去做,治標與治本之間,效果會顯著嗎?或是問題就會愈走愈極端呢?

咁,大故事係咪會咁樣一直寫落去呢?

22.6.08

いのちの名前 (千與千尋)

炎熱懶洋洋既周日,忽然腦海口裡滿哼著此曲既旋律.

此刻不如安安靜靜,享受此曲所帶來既意境.

(從畫面中,又想起白龍...)

21.6.08

有聲冇畫面?

親愛既電視機:


點解,點解你會喺呢個時候,先至黎發生故障呢!?

(其實我接受有畫面冇聲架...)

咁今晚場荷蘭對俄羅斯,同聽晚場西班牙對意大利,你話點算好呢?

(嗚...嗚...嗚...)

你試下打開眼啦啦~

(喂,試下用力啦~再堅持一下啦~黎,一二三,再試!)



常跟你面對面既肥龍上

20.6.08

玩物


又係忍到與忍唔到既問題時候.

咦,除咗志偉同南葛隊成員,仲有武藏隊既三杉淳,立花兄弟,吉良教練,大頭妹早苗喎...

咁隻特別版就應該係插袋倒掛既盧比度叔叔呀.

今次呢套只係小學篇啫,仲有中學篇,歐洲篇,世青篇...仲有好多好多人物架.

嘩,睇黎跟住又要儲定錢搵好地方啦.

冇辦法,對住呢類童年回憶,往往情感戰勝理智,只有舉手投降.

19.6.08

去馬!


噢!原來個官方網頁已經更新咗,  兼出埋報名及比賽詳情.


都係果句,報咗名先,睇下有冇機會參與啦(要抽籤).


******** Course Details ********

Marathon: Tokyo Metropolitan Government building -- Iidabashi -- Imperial Palace -- Hibiya -- Shinagawa -- Ginza -- Nihombashi -- Asakusa Kaminari-mon -- Tsukiji -- Ariake (Toyosu) -- Tokyo Big Sight10km Race:Tokyo Metropolitan Government building-- Iidabashi -- Imperial Palace -- Hibiya Park


Time Limit


Marathon : 7 hours
10km Race : 1 hour 40 minutes

Maximum number of entrants


Marathon : 30,000 runners
10km Race 5,000 runners

Application


1) Procedure: Through Internet
2) Application Period: From July 22, 2008 to September 22, 2008
3) Screening: In case the number of applicants exceeds the prescribed number, entrants will be decided by a lottery.
4) Payment: Selected applicants must pay the entry fee.
- Marathon : 12000 Yen
- 10km Race : 6000 Yen

17.6.08

唔係九龍人

由於趕時間出席一個重要會議(香港島),望天又似想落雨,別無選擇下,決定就喺公司(肥龍公司喺九龍)樓下截的士前往目的地.

不出兩分鐘,就見一輛冇乘客既的士正由遠處駛來,二話不說,截車-上車-同司機(後來知道司機姓黃)講想到既目的地.

肥龍:「銅鑼灣,xx道吖,唔該.」

司機:「咦先生,你好少過黎呢邊哩?睇你都唔似九龍人呀.其實冇幾遠前面有個過海的士站架,喺果度上車過海可以慳一程過海隧道費呀.」

肥龍:「咁...」

司機:「同埋,先生你頭先企等車既位置好危險架~耐唔耐都有啲搵食車經過,揸(車)得好狼死架!唔小心好易俾佢地撞到架.嗱,你睇後面,又有架大車...」

肥龍又往車尾望.

雖然短暫,直至呢一刻,其實司機仲未落旗.喺交通燈位前.

司機:「不如咁啦,我送你到前面個過海的士站啦,咁你唔駛再行,唔駛浪費時間呀...」

差不多到達過海的士站,的士慢慢停車.落車前,表示謝意.

肥龍:「師傅,如果個個的士司機好似你咁客氣兼好態度,真係貴啲都扺呀.今次真係唔該哂你呀.生意搵多啲呀!再見!」

司機:「嘻,再見!小心啲慢慢落車呀!」

黃師傅,真係好多謝同唔該你呀!

註(1): 肥龍之前有好多搭的士不快既經驗.最激試過叫表示不滿既司機揸去警局理論,咁最後當然冇去啦.
註(2): 肥龍係知道該過海的士站既存在兼一直都會喺果度上車.只不過今次真係好趕時間,都唔理得咁多啫.

註(3): 呢件事上,司機俾肥龍既感覺係先從客戶想,再往行業(如果方便客戶前提下,誰去提供服務)想,最後才往自己想.

11.6.08

(疑似)專家

雖然我好鍾意聽專家講,不過實在好怕再聽到/睇到一啲所謂疑似專家既意見.

觀察所得,疑似專家總喜歡喺人家既說話上,發表所謂既宏觀既想法.若果認真聆聽及分析所描述既論點,唔難發現狹義既註腳. 同時,更覺宏觀想法既重要.世界之大,永遠唔止一把聲音.奈何同類聲音聽多講多,成為主流,成為標準.

不過,甚至唔需要再進一步尋求,有時退一步反而已可以見到事物既真實.就算係(疑似)專家,意見始終係意見,不容否定,只係喺未了解事件既全部前,覺得唔係咁應該兼唔同意太早去prejudice囉.有時別人既良葯,卻可能係自身既批霜.

可惜,所謂既宏觀既潛台詞,往往只係想帶出對某件事「我比你」更早更清楚既訊息,而呢個訊息又只可能建立喺一件單一事件,又或者只係一次個別既經驗吧.另外,又似隔空同你講,風水佬呃你十年八年,照佢既意見去做呢,唔會點你,兼實冇衰.至於呢個所謂經驗,係咪tipping point,可能都未曾知.或只可能係另一個micro-trend.

而(疑似)專家描述既形式,大概都只係話因為曾經咁咁咁,所以就會/攪成咁咁咁.而再加一句話如果咁咁咁,就建議最好(或最唔好)咩咩咩啦.而有時為咗加強說服力,甚至再附加過來人或朋友經歷例子一則,邀請諸君對號入座.看似乾淨俐落,實則又似不負責任.

當然,經驗歸經驗,真實既經驗相信有一定參考性.不過又從來冇人之後話你知,呢個情況,可能只此一次咋.而你既情況,又係個別例子囉.

有時,又有另一種專家,從來一聽事件,自然口若懸河,又會話其實認識邊個同邊個,同邊個邊個係好朋友,知道好多有關資料,總之就梗有一友喺左近.只隨便開句聲,自會話你知攪掂哂.但係,到真係講到需要幫手問開口時,對方可能就消失得無影無踪,音訊全無.

最老土既係,再三請教後,先發現原來佢係未試/見過架.

*******

專家在於我,係一位可以提供對某些事與物有宏觀及big picture了解既人,或甚系統.專家係會知道了解事情本身既來龍去脈,以及各樣環境及設定既唔同及存在下,所得與可能存在既風險.反而,就好少提供「How to」式既建議.

有時,專家既分析,可能比建議更精彩.

而且好欣賞分析力及組織力強既人,有時一席話可以啟發獲益良多.

透過假設及觀點,可以了解明白唔同既思考方式及過程.

*******

可能我燥底啦.講真,如果遇著(疑似)專家時,每次傾野,真係幾眼火爆架.不過...雖然我知我又做唔到啲咩,所以就只好喺度當成無病呻吟事件處理囉.

10.6.08

公司問題

如果有日返到公司,老細突然捉住我講因為佢覺得業務範圍愈趨複雜,又覺得啲經理們平日日理萬機,忙到不得了,好難專注喺應有既課題上面,好應該幫佢地搵番個襟錫或助理幫下手,令效率提高.

又同時,老細希望訓練第二梯隊而考慮想搞番過succession plan的話,我諗我都唔會覺得好意外既.

始終,當負責兼顧既範圍愈大,涉及既工作就會愈多.不過問題係,喺呢個決定之前,點解/有冇考慮到現存既團隊,究竟/可唔可以擴大工作範圍或提高效率呢?又如果所講既範圍或工作,係唔係一啲新或者專門既知識,必要外求人才呢? 咁如果係新/專門知識,又應該搵個富有經驗既人比較合適.

呢一連串既問題,睇落繁複,卻又成本效益下必要考慮.

而且總覺得呢個係「質」既問題多于「量」既問題.

換個角度,其實部門之下,應該會有一兩位有能之仕可以勝任吧.需知道管理除咗需要能力,與上下層溝通技巧/能力,及了解公司文化作風,對往後既工作都好重要.所以內部提升會係一個唔錯既選擇.況且市僧啲咁諗,就算要head hunt,相比高職位,較下一層既職位比較易去搵及化算啦.而咁樣亦更合乎職位架構.否則喺下面既見到玻璃天花板既話,好難留人啫.

另外,若果老細真係喺以上前題下,有此意思,想再喺管理層內,再設立一個副管理層及管理層助理團隊時,卻又暗示現存各部門團隊唔受聽命於呢個新團隊(副經理及助理)的話,咁樣,只會令chain of command 及unity of command變得矛盾,更顯得不倫不類.

試問若果管理層唔需要同團隊合作,又或者唔可以指示團隊工作,咁其實呢個管理層(可以)做咩呢?實質工作又係做咩呢?咁佢幫經理做咩呢?

最後老細都未講(打算)用咗幾多錢請班人返黎做野呀~

8.6.08

龍舟競渡


端午節冇去游龍舟水,但就趁聽日仲係公眾假期,一於湊熱鬧,上晝到赤柱下晝再到香港仔避風塘,一日走兩地睇下龍舟競渡,感覺又係兩種截然不同既氣氛.

唔可以唔讚喺赤柱正灘舉辦既國際龍舟錦標賽,氣氛實在一流,難得參加者又肯悉心打扮,叫囂聲打氣聲不絕,投入感十足,彷彿置身另一個嘉年華會.而原來將龍舟競渡轉成為錦標賽,保留傳統之餘又可增加比賽氣氛,全日五十六場賽事,真係目不暇給,總之船上船下,打成一片.另外因為賽事係喺沙灘舉行,如果唔介意濕腳,更可以走落水上作近距離拍攝,將比賽氣氛放入相片內.

鏡頭一轉,返到香港仔避風塘繼續睇本地既龍舟競渡.始終香港仔依然保留唔少漁港傳統及風貌,避風塘兩旁泊滿漁船,旗幟飄揚,加上不少漁民參與,帶出好地道既感覺.特別係壓軸既「大龍」邀請賽,參加既隊伍都係實力強橫既地頭虫,五龍齊出(合和龍,聯魚龍,南鷹,漁業龍,同慶龍),臨場壓迫速度感十足,非常刺激.

難得尋日黑雨過後,今日天公做美,渡過咗個唔錯既端午節.

後記:如果有興趣,可以去呢度睇埋其他今日所拍既相片.

7.6.08

決賽喇!



相比起男單方面熟口熟面既局面(又係Federer對Nadal),隨著球手既可觀性愈來愈高,新舊交替及東歐崛起,而且喺打法上(愈趨速度體力化)既改變,站喺觀眾立場,覺得女單反而仲有睇頭.

而且男單比賽閒閒地一打就成兩三個鐘(如果打足五局更加唔好講!),咁睇女單三局好多時都只係兩個鐘左右,確實睇得比較舒服.

今晚就係女單決賽,Ivanovic對Safina,牌面及排名上當然Ivanovic比較佔上風,不過Safina今次扮演巨人殺手,而且愈打愈有.

Ivanovic: 第二年打法網決賽,經驗相對比較足,打法全面,今年狀態一直唔錯(特別今次,至今只曾失一局.而且如果留意冇錯,身形上應該有刻意鍛鍊,明確已收身,比之前更加扎實),而且心理質素平穩,正手抽擊準繩.靚~(呢樣同打波冇關,係我自己加上去!) 

Safina: 善打泥地,鬥心一流,特別後上凌厲,體能力量上佔優,反手厲害.由於普遍被睇低,反而心理上會冇咩包袱,可望打得放開一啲(如果唔怯場~).打法上偏向屬有球味個性一類(唔知點解見到佢打到有火就愈覺好睇),令人振奮!缺點係身形比較大隻,速度上比較輸蝕,不利長久戰!

除咗希望一場好波,賽前無謂作太多預測.由於兩位球手決賽經驗較淺,臨場如何應付壓力應該成為勝負關鍵.不過純今次賽事而言,比較希望Safina獲勝,可以完成今次「神奇之旅」!


至於聽晚男單決賽?呵欠~~

6.6.08

細胞樣子

雖然自知生物科既知識只係停留喺會考程度,不過對細胞既形狀及樣子,倒是知道及認識的.

又係無聊既原故,有時腦內又會游著一啲不切實際既低能想法.

耐唔耐,就會諗/幻想如果每個自己既細胞,都會有容貌的話,到底(可以)會係咩樣子呢?上一次有呢個念頭,就係上次捐血躺臥喺座位上時所發生.

或者睇得太多卡通片及漫畫,想法中難免有時帶點浮誇及有漫畫法既表達.究竟佢地(細胞)會唔會好似我咁既樣呢?咁,當諗起成千上萬上億,有我既樣子既血細胞正去同一方向一齊流動時,其實畫面都幾壯觀.

另外,細胞分裂時,咪又可以變瘦囉!?不過可能及後又會被打回原形喎...想著一變二,二變四...呵呵,果真無窮無盡,生生不息...

又見食壽司時,望住面前既兩件魚子壽司,忽然會諗,佢地會唔會好似佢咁肥咁亮澤呢?其實飛魚子都唔錯,只係細粒咗啲~

(實在抱歉,如果因為咁影響咗大家日後對魚子壽司及飛魚子既食慾,懇請見諒!)

3.6.08

無聊

一件無聊事係由好幾樣無聊既元素所做成的.
無聊既人喺無聊既時間,做著一啲無聊既行徑,又無聊地感到心情愉快.

無聊買同睇自己覺得好有意思既書同電影DVD;
無聊時到沙灘曬太陽;
無聊時放工有一程車唔坐而偏為要睇沿途風景特登轉幾程車先返到屋企;
無聊時到尖沙咀坐天星小輪到中環;
無聊時到博物館走走涼冷氣;
無聊時四處影相;
無聊走去玩唔知以為好勁,知咗原來好爛既魔術;
無聊去執書櫃衣櫃同一切雜物;
無聊會喺耳機聽住 Pet Shop Boys 既【Being Boring】;
無聊...

不過,正如一開始講,做以上種種,其實會感到心情愉快架!

**********

因為實在無聊,早兩日花咗五蚊扭咗圖中呢卷厠紙.
更無聊咁,與現實中既厠紙一齊比對拍照.  呢卷厠紙好袖珍,闊大概兩厘米吧,全長拉直亦只有八十厘米. 厠紙本身設有五種味道,所得到既,竟然係咖喱味!?

最抵死既,係仲可以扭埋refill既厠紙,咁用完一卷後,可以再補充.

幻想如果放喺公司,無聊時拉呀拉呀,除咗實用(咁細張可以用喺邊?),應該會好攪笑.

**********

好理性咁諗,其實五蚊可能可以喺超級市場買到兩卷真實既厠紙. 絕對唔係理性消費. 忽然又諗起好耐之前電視新聞講既黑色厠紙.因為反傳統(傳統厠紙係淺色),推出後大受歡迎.甚麼係物件價值?物價?潛在價格?「等價交換」喺呢兩件事中完全唔成立.

會唔會「無聊」有價呢? 咁當無聊有價既話,仲算唔算係「無聊」呢?

**********

因為好奇,因為無聊,耐唔耐我就做埋唔少如此無謂無聊既事. 而且呢次只係冰山一角(都幾肯定),相信有唔少事可能自己一直循同一思維去想,配合行動,一直在做. 過後,又是一個循環.

用五蚊買咗件明知唔值五蚊既物件返黎,傻笑過後,竟然仲要寫一篇. 你話...我其實真係幾咁無聊呢?!

其實諗真啲,我寫扑吹水排洪記事又咪其實都係差唔多囉.

"Cause we were never being boring
We had too much time to find for ourselves
And we were never being boring
We dressed up and fought, then thought: "Make amends"
And we were never holding back or worried that
Time would come to an end"

2.6.08


早前睇過samsara寫有關樹(一)(二)既文章,相當有趣味性,亦都有寫對樹既留言
喺屋所附近及沿線,特別從香港仔往深水灣既路程中,可以見到有唔少生長得好靚既樹.而唔難發現鳳凰木既踪影,當然其他都生長得好茂盛,只不過視線總停留喺每日返工必經之道既呢一棵之上.拍攝時天色昏暗,影得比較暗.不過若果影得再近一啲,可以發現樹頂之茂盛及花之艷紅.
呢棵樹,喜歡原因因為高而且樹蔭好大好闊,又樹型非常對稱.每個週末跑步經過時,就算不過係從遠處見到一刻,心情自必會感到放鬆.
有時甚至停步觀看.當陽光普照時,可以從樹底下見到滲透樹蔭既陽光,感覺非常懶洋洋.
如果,有時會諗,喺唔少人話香港(特別係市區)係石屎森林,好少綠化及生活怱忙既同時,如果肯花少少時間留步欣賞一下周遭既樹木,幾咁好呢!咁,大自然其實距離唔係好遠呀!

1.6.08

海南雞飯

平時對食要求唔特別高(特別午飯時候), 但求味道唔差兼賣相可以就過骨.不過就有一偏好,就是每當首次光臨某食肆時,假若留意到餐牌上列有「海南雞飯」一道食物的話,不再他想,食指定必停留,點點以品嚐一下.

工作地方附近既食肆,已經試得七七八八,當然仲有其他地方及居住附近既食肆,加起來都有十幾廿間,同行同事經常笑說話,如果加以整理,話唔定可以搞個類似「漢堡飽指數」既「海南雞飯指數」出黎做參考.

事實上,當然冇咁做啦,不過到處試食既習慣依然繼續.

咁其實喺香港都有食過個別好味道既海南雞飯,不過就唔係咁易搵到囉.普遍都係雞好味時,飯就唔可以,或者係相反,甚至兩者都做得唔好.而每想到呢一點,就會特別諗起及懷念曾到新加坡工作時食過既海南雞飯.

海南雞飯果然係新加坡一道地道有名食物(名菜?),隨處可見,而且水準之平均及味道上,真係可以話隨便一間,都甚少會失望而回.記得曾到酒店附近商場既food court(隨便去到)既小店,點一個約六元坡幣既海南雞飯,未必係頂級,不過水準已經可以話好食到不得了.至於到當地有名既文華酒店食既海南雞飯,更唔駛多講,真係好好味.另外,當地同事帶到大排檔食到既,一樣咁好味咁香滑.

滲出淡淡鮮雞香味既飯,新鮮香滑既雞肉,伴以經焗過既花生及醬油,既平民又簡單. 每一啖,都係咁滋味,好可口.