11.6.08

(疑似)專家

雖然我好鍾意聽專家講,不過實在好怕再聽到/睇到一啲所謂疑似專家既意見.

觀察所得,疑似專家總喜歡喺人家既說話上,發表所謂既宏觀既想法.若果認真聆聽及分析所描述既論點,唔難發現狹義既註腳. 同時,更覺宏觀想法既重要.世界之大,永遠唔止一把聲音.奈何同類聲音聽多講多,成為主流,成為標準.

不過,甚至唔需要再進一步尋求,有時退一步反而已可以見到事物既真實.就算係(疑似)專家,意見始終係意見,不容否定,只係喺未了解事件既全部前,覺得唔係咁應該兼唔同意太早去prejudice囉.有時別人既良葯,卻可能係自身既批霜.

可惜,所謂既宏觀既潛台詞,往往只係想帶出對某件事「我比你」更早更清楚既訊息,而呢個訊息又只可能建立喺一件單一事件,又或者只係一次個別既經驗吧.另外,又似隔空同你講,風水佬呃你十年八年,照佢既意見去做呢,唔會點你,兼實冇衰.至於呢個所謂經驗,係咪tipping point,可能都未曾知.或只可能係另一個micro-trend.

而(疑似)專家描述既形式,大概都只係話因為曾經咁咁咁,所以就會/攪成咁咁咁.而再加一句話如果咁咁咁,就建議最好(或最唔好)咩咩咩啦.而有時為咗加強說服力,甚至再附加過來人或朋友經歷例子一則,邀請諸君對號入座.看似乾淨俐落,實則又似不負責任.

當然,經驗歸經驗,真實既經驗相信有一定參考性.不過又從來冇人之後話你知,呢個情況,可能只此一次咋.而你既情況,又係個別例子囉.

有時,又有另一種專家,從來一聽事件,自然口若懸河,又會話其實認識邊個同邊個,同邊個邊個係好朋友,知道好多有關資料,總之就梗有一友喺左近.只隨便開句聲,自會話你知攪掂哂.但係,到真係講到需要幫手問開口時,對方可能就消失得無影無踪,音訊全無.

最老土既係,再三請教後,先發現原來佢係未試/見過架.

*******

專家在於我,係一位可以提供對某些事與物有宏觀及big picture了解既人,或甚系統.專家係會知道了解事情本身既來龍去脈,以及各樣環境及設定既唔同及存在下,所得與可能存在既風險.反而,就好少提供「How to」式既建議.

有時,專家既分析,可能比建議更精彩.

而且好欣賞分析力及組織力強既人,有時一席話可以啟發獲益良多.

透過假設及觀點,可以了解明白唔同既思考方式及過程.

*******

可能我燥底啦.講真,如果遇著(疑似)專家時,每次傾野,真係幾眼火爆架.不過...雖然我知我又做唔到啲咩,所以就只好喺度當成無病呻吟事件處理囉.

3 則留言:

匿名 說...

Ah....香港地﹐時時都見到這些人。有時都會覺得無奈。。。

s-pig 說...

肥龍哥哥,

你唔係燥底,係燥爆呀!! hahahaha...

下次再遇到呢d'專家'果陣,唔好啋佢地啦...當自己時運高,睇唔到又聽唔到...呢個世界咁多呢d'專家',你有幾多對眼攞黎爆呀?

英倫肥龍 說...

nelson,

歡迎到來. 其實唔止係無奈唔無奈既問題. 對我自己而言,從其他人身上學習係一種好寶貴及有趣既經驗. 而且天下之大有唔少值得睇既事, 而真既專家,除咗好少單單會最後只講一啲意見/結論, 反而仲會分享假設及觀點, 令其思考方式及過程給人明白.

所以今次遇著(疑似)專家, 經過傾談, 都幾失望架~

s-pig,

當自己時運高,睇唔到又聽唔到>> 又未必得呀....都怪我燥爆囉...