31.5.07

工利福利

今日睇信報, 學多咗兩個詞: 「工利」(workfare)及「福利」(welfare).

「福利國家」制度時,倡議以個人的需要(need)代替需求(demand);因此,病人得到醫治是因他們有病,並非因為他們負擔得起費用,失業人士得到援助是因他們沒有收入,並不考慮他們是否有工作能力;單親家庭得到額外協助是因他們需要照顧子女,並不甄別他們個別的情況.

「工利」上, 所採用的手法並非首先抹煞「需要」的重要性,而是強調只有投資於人民、提升他們的競爭能力,這樣才是真正改善每個英國家庭的生活;換言之,權利是要賺回來的,並非由國家賜予,也只有透過工作才可改善自己的福利。

(節錄自時事評論 P30 信報財經新聞-周永新)

其實, 好似肥龍呢類管理夾心階層, 好多時喺工作上, 都會落入「福利」既方向上. 例如當同事剎有介事咁走黎同肥龍講因為咁又因為咁而做唔成某件事,希望肥龍出手相助咁. 對於呢類短期既需求, 肥龍好自然咁就去幫同事諗解決方法, 最後變得頭痛醫頭, 腳痛醫脚. 而同事既參與度及自主權亦因為咁自然降低. 雖然結果每次大都可以解決, 不過漸漸同事就好容易養成依賴既習慣.

正如之前「莫明奇妙」時提過,team buidling 又好, farewell 某某又好, 迎新又好, 達標又好, 肥龍有時可能諗得太多, 又或者所考慮既太流於表面/ 理想化. 結果, 工作上好多野及取向, 肥龍都可能傾向「想同事所想」上面, 繼而做咗唔少表面冠冕堂皇但又實質欠奉既動作.

反而呢, 喺workplace上, 肥龍其實更應該花多啲心思及腦筋去諗同事實際需要咩能力及技巧先可以將崗位上既工作做好. 又或以應以此為目標, 令同事能夠慢慢變得獨立自主咁去做野及去思考.

同時, 亦應透過不同方法, 要同事明白, 可以改變及推動一切既, 就係佢地靠能力爭取既機遇.

所以話呢, 管理上, 肥龍真係仲有排學架.

30.5.07

坂井泉水

上次「藍色能量」講起寶礦力廣告, 其實唔可以唔提呢首主題歌.

尋日睇報紙得知唱呢首歌既ZARD主音坂井泉水近日離世, 實在可惜.



對話一則

L:你相信佢地輸入log sheet既日期係堅既?

肥龍:(微微點頭)梗係信啦.坦白講,佢地呢可能未必做到大家期望既所有要求.不過都係一心去做既, 當然, 有啲因為個別原因有啲遲囉, 咁呢啲你都喺果表睇到啦. 況且,佢地都唔知我地幾時同點睇呢張log sheet.你睇,依家抽check 到既, 大致上都ok!

L:咁...ok啦...

27.5.07

十分理髮

呢個週末, 肥龍貪得意走咗去試「十分鐘理髮」.

整個過程, 令肥龍忽然回憶番以前細路嗰陣喺街邊或樓梯底剪頭髮既經驗.

其實好似肥龍呢亭人, 一向欠缺耐性, 最怕等得耐. 又冇咩要求, 只係好簡單咁想去到時求祈有個師傅快快手剪好個頭即閃就得.

唔知有冇人好似肥龍咁, 其實冇咩特別要求(例如染髮呀, 電髮呀), 只係普通斜剷圈耳唔留「的水」再剪薄少少就得果隻, 兼又冇話一定指定邊個師傅去護理肥龍既秀髮.

其實, 肥龍一直都唔係好明白或享受喺salon洗頭既過程. 兼且洗完頭沖完水後, 肥龍多數都唔多滿意師傅幫肥龍吹出黎既頭. 結果就係每次吹完頭, 俾錢落樓後覺得周身唔自然, 急急脚番屋企再洗多次頭先得囉.

而且, 肥龍雖然鍾意吹水, 但去到剪髮呢, 又真係好少會同師傅有咩傾. 咁, 如果係女師傅呢, 都仲可能. 但係如果係男師傳呢...嘿, 免啦. 仲有, 肥龍對忽週類既「消閒雜誌」興趣不大...

「十分鐘理髮」既出現, 彷彿就係針對肥龍呢亭客, 正正滿足簡單既要求(快/簡單)及減省咗作為消費者不必要或唔重視既需要(染髮/電髮/指定師傅/吹水/雜誌/洗頭/吹頭). 喺呢個前提下, 減低成本及收費, 簡化流程及選擇.

而且呢個客户Segment可能唔細, 有可能有得做架. 初步觀察, 好似受男人及學生歡迎多啲.

剪完出黎, 又見有兩位新客人喺度等. 五十蚊、十分鐘, 剪充出黎效果及感覺都唔錯喎.

一於遲啲再試多次, 睇吓點.

26.5.07

寧尖莫小

如果兩鐵現有既附屬法例經合併並通過後, 日後打你尖者既罰二千, 但你用粗口鬧果位仁兄/仁姐反被罰監禁六個月及罰五千.

有冇咁搞鬼? 呢個問題及情況, 可唔可以交俾公民教育委員會去諗諗?

另外點解附屬法例可以凌駕法例? 例如肥龍住所既管理公司可唔可以話如果有人喺電梯小便就會被罰監禁或罰款? 又例如如果肥龍因為服務公司人員死蠢而發脾四然後爆粗又最後而被罰款?

咁係咪個個都加啲附例就得呢? 咁大眾可唔可以反對先?

肥龍唔曉法律, 有冇人可以話我知?

25.5.07

心湖當中

一個陌生既廣告, 一段熟悉既旋律. 喺某大地產公司廣告裡面, 再次聽到以學友既《愛是永恆》既配樂.

廣告畫面細緻, 但又恰到好處. 睇既舒服, 加上原曲旋律優美, 算係近期廣告佳作.

原來歌詞其中幾句, 更可謂神來之筆 (可惜「洋葱頭」林振强先生已離世).

「兩手雖似空 其實抱著你 其實你沒有別離 在我心湖中」

所寫既係一種好豁達既生活態度, 講得容易, 但做到好難.

捉得緊, 又未必放得低. 特別係每日忙呢樣忙果樣, 習慣multi-tasking既人(如肥龍), 要做到更難.

相反, 每日擦身而過, 唔(識)去抓緊/ 把握既情形更多.

有時可能停一停, 放慢腳步細心留意周圍及身邊人, 或者會發現到意想不到.

22.5.07

再逐歐聯

心情再差, 轉吓話題, 不如講吓波.

講過, 仲有兩場, 肥龍就會去抖暑. 上星期六FA CUP踢完, 車路士成為今季雙料冠軍.

今季最後一場, 就係後晚場歐聯決賽.

如果有人喺十六强抽籤時信賓尼迪斯講決賽會係利物浦對AC米蘭的話, 肥龍除咗話你有「天眼通」之外, 實在冇第二個形容詞.

兩隊進級過程相似, 一樣喺一致睇淡下過吓一關, 又一關.

今次兩隊再對賽, 肥龍發誓就算上半場是但一隊領先十比零都唔會再鬆懈而瞓著. 上次就係因為AC上半場已經入咗三粒, 以為下半場都唔會點之下, 結果喺休息時間期間肥龍呼呼入睡.

睡眼朦朧間驟見利物浦追吓一球又一球, 最後射十二碼贏埋, 仲以為係發夢啦... 後來到第朝醒來再睇新聞先知原來係真.

問利物浦同AC米蘭邊隊好, 就好似問路人究竟平治好定寶馬好. 比咩先? 總之各有各擁啦. 而且兩隊都係傳統既勁旅, 各自有喺本土及歐聯有良好既歷史及戰績.

唔係騎牆, 肥龍兩隊各有所好.

不過AC 今季就褪色咗少少, 除咗加度素同七勞八損既尼斯達外, 就有今季歐聯發熱發亮, 但又十分內斂既卡卡. 其餘既, 比較老咗些少, 活力可能差啲(特別係下半場末段), 但就經驗搭夠.

相反, 利物浦喺賓尼迪斯近三季既領導下, 變得整體水平平均及陣式變化多端. 再加埋精神領袖隊長謝拉特, 勝在平均、後生兼機動. 而且今季利物浦早就穩入英超頭四位, 所以其後季尾大部份時間都可以專心備戰歐聯.

不過至於後晚兩隊邊隊贏呢, 其實肥龍無咩所謂喎. 最緊要係兩隊踢番場好波, 唔好辜負肥龍零晨三點爬起身捱眼瞓睇波.

而且肥龍唔係咩足智彩, 對估咩比數賽果毫無興趣.

另外,主觀願望一旦講咗出黎就唔靈, 不如睇睇相.

21.5.07

心情亂了

記得以前睇過有本書講, 謂頭髮亂了, 可以用髮夾將頭髮再固定.

咁心情亂了, 可以用咩呢?

20.5.07

人生團隊

有時肥龍諗: 三十出頭, 究竟係「三十而立」丫, 定係「三十不惑」呢?

人年紀愈大, 愈發覺愈唔能夠欺騙自己. 就算點, 覺得最起碼都要知道自己做緊乜, 做緊個咩既決定, 行緊條咩既路.過得自己先過得人. 而且能力既野, 自己有多少自己最清楚.

事業上, 可以話有啲方向, 但最近又好似有啲不明朗. 而且肥龍對自己都仲有要求, 諗過想走出去, 不過又有所慮.

有好多友人以為肥龍做咗老銷一段時間, 一定交遊廣闊. 咁, 喺工作上識得比較多人, 係事實. 但值得欣賞及學習既人少, 相反, 反面教材倒見到不少, 或者可以叫「曲線學習」啦. 有時呢, 學做少十樣錯事可能快過學做一件正確事嘛.

另肥龍又諗: 俾著肥龍上「一擲千金」個節目, 會揾阿邊個同邊個上去做智囊團呢?

有時回望轉頭, 肥龍個人都幾悶, 單調, 見黎見去, 都係果兩三堆朋友. 但的而且確, 除咗呢班人, 肥龍又真係唔係咁容易同新相識去交深喎. 況且朋友呢, 唔係逐個逐個數, 數得多就好.

有幾位不時約埋行綠色力量呀, 渣打馬拉松呀. 雖然明知攞苦黎辛, 但又樂在其中. 一年復一年.

另外每次同呢班朋友見面食飯, 肥龍都覺得好輕鬆, 好自在, 冇乜芥蒂. 又可能因為冇咩介心關係, 席間好既又講, 慘既又講, 結果咩都可以講一餐, 更周不時飲醉.

人雖醉, 聽到既卻一直記在心中. 如果冇咗呢啲彩色畫面, 喺工作事業上未必有咩影響, 但生活上就肯定變番黑白畫面,無咁好fun 囉. 而且可能仲係剩得畫面冇聲添.

屋企人就更加唔少得.

三十呢個關口呢...真係要再諗諗. 睇黎, 又係時候要揾人出黎再聚一聚. 為咩? 是但啦...

19.5.07

消暑佳品

對音樂節奏白痴既肥龍一大挑戰...


校報風波

不吐不快.

bad taste 又好, 內容露骨又好, 不過如果話因為喺大學出版校報而惹上官非或將整件事情政治化又確實意料之外.

肥龍唔係贊同bad taste (講真,提及「人獸交」真係好差勁!), 不過同時又覺得大眾喺咪應該將成件事件交番俾由校方及同學們自己去解決會好啲呢.

方法、道理及好多野, 肥龍相信係愈辯愈明. 而好多野, 自有各自既平衡點.

同學們點解選呢個題材, 出版前定必心裏有數及理由.

不過...如果唔係為求出位而刻意離經叛道、嘩眾取寵, 導出與現有既道德所違背的題目及內容. 雖然敏感, 但亦唔至於要禁絕. 而整份校報內容, 亦不涉及人身攻擊及誹謗, 只係把為某個題材去討論, 奈何大眾只係著題材既道德與不道德?

反而肥龍諗社會係咪未有準備可以去討論呢類題材? 道德啦, 學生心智啦, 社會接受程度啦, 性別因素啦...

但如果係因為提出題材時已經自我審查及過濾, 肥龍相信往後見到及社會獲得既只會係一式一樣既大學產品.

再老套啲講, 係咪唔播唔講唔寫唔提就等如呢啲題材喺地球上從來唔存在呢? 另外, 如果要攝取有關呢的題材既資訊, 校報係咪唯一途徑? 正如性工作者, 係咪唔講就唔會喺社會上出現? 而大眾又唔知佢既存在呢?

唉...都唔知搞乜鬼...

莫明奇妙

尋晚肥龍做東, 請同事食飯, 順便大家聯誼一下.

唔知係真係有代溝丫定係依家啲廿幾年青人大部份都係咁, 竟然成晚可以掛住自己打機就得.

席間都有啲同事搖頭歎息. 講真, 肥龍都見怪不怪, 因為發現就算係公司年飯呀, 同事喜宴呀, 佢地都係咁樣. 不過既然已經放咗工, relax吓都可以理解. 雖然肥龍都有打機, 不過真係唔會咁囉. 唔明.

最妙就係有位已婚同事話返到屋企都係咁, 兩公婆身處同一室, 但就各有各打機.

另有一位已婚同事就話老婆唔鍾意佢打機, 所以唔喺屋企啲話就搏命去打, 打到番屋企門口一刻方休.

雖然做野還做野, 私事咯, 得個知字就算. 但肥龍諗如果結咗婚既生活係咁, 真係唔知為乜囉.

另外如果以上既情況係代表一部份既人, 喺溝通方面及人際關係, 可以期望啲咩呢?

講番轉頭, 可能正如肥龍個朋友講,其實啲同事可能冇興趣食餐飯囉...下次可以慳番. ^^

14.5.07

電影票尾


肥龍今晚收拾書櫃時, 無意發現一叠應該好耐之前留起既舊電影票尾, 喜出望外, 又小心慢慢欣賞.

肥龍細路時, 肥媽就係好鍾意叫肥龍做「垃圾佬」, 意謂係又儲唔係又儲, 總之儲埋成屋都係肥龍既野.肥龍唔否認. 但細心諗吓如果唔係之前收埋先, 依家又點會有得揾番出黎睇.

相比起依家大部份電腦打印機印出黎既戲票, 以前用人手寫上位置既戲票(堂座一叠, 超等特等又另一叠)又表現出另一種感覺. 肥龍感覺好原始, 好人性化.

記得以前就讀中學期間, 三月過後, 學校就開始放下令時間. 每逢星期四、五放學後就係咁夷食幾啖麵包,立刻坐巴士趕到灣仔影藝及新華戲院睇下午二點半特別場, 學生票一律廿蚊. 至於睇咩戲, 都唔係好記得, 有得睇就睇, 而且有冷氣涼, 都幾好架.

又大班人走去睇卡通「北斗之拳」電影, 好勁!

亦由於肥龍住喺港島區, 所留既電影票尾大都為港島區既戲院. 最特別竟然有利舞臺同碧麗宮既票尾. 而碧麗宮既票尾仲要係特等 (應該係指二樓高層). 最記得當年睇「與狼共舞」, 由於片長關係, 好似睇歌劇咁, 有中間休息時間, 俾觀眾飲杯水去埋廁所咁. 好鬼特別, 又印象深刻呀!

不過再睇番啲票尾, 發現票價包含稅架. 仲有, 原來有關戲院全部都拆哂囉!

13.5.07

睡眠時間

隨著今週英超煞科戲, 及各大聯賽、盃賽步入尾聲, 再睇多兩場(19號既 FA CUP 同24號既歐聯), 肥龍就可以進入抖暑狀態.

講真, 肥龍係果啲只要俾一分鐘就立刻瞓得著嗰種人. 都唔知係咪患有渴睡症, 但就肯定成日都唔夠精神.

夠瞓有幾重要? 唔駛人講都知. 不過睇埋今晚「明珠檔案」, 知道啲反面教材及後果, 有所警惕囉.

亦由呢刻起, 肥龍打算把握黎緊呢兩個月時間, 調節一吓生理時鐘, 爭取睡眠時間. 短期目標就係回復早睡早起既規律. 費事成日人格分裂咁日捱夜捱(唔係為工作, 而係為咗玩同睇波), 另一方面又猛呻工作多壓力大, 又脾氣壞.

雖然一日得二十四粒鐘, 點講都係瞓番八粒鐘至夠數架啦.

12.5.07

忽然交響

相信肥龍同好多唔(識)聽或唔鍾意聽交響樂既朋友一樣, 覺得但凡係交響樂呀, 古典樂呀, 必定係高深, 係沉悶, 係嚴肅...係咁樣咁樣既, 都係咪攪, 都係聽番啲流行曲好啲啦. 況且喺大眾投射入面, 凡聽交響樂或古典樂係需要有一套「高音準、低音甜」既音響組合, 絕非肥龍屋企果類all-in-one 既HiFi仔可立亂充數,否則又會有條(扮勁)友會問閣下部機係咩、啲設定應該又點咁(講真, 肥龍明既, 工欲善其事,必先利其器麻, 不過聽歌啫...都係咪鬼煩!).因此, 肥龍屋企既CD架上從來都唔會見到有交響樂同古典音樂既蹤影.

甚至到呢一刻, 肥龍對交響樂同古典音樂之間既界定同分別都仲係一頭霧水, 演奏樂器就更加唔駛講添.

不過又發現, 好多時就算唔係刻意去聽, 其實都唔難有機會接觸到交響樂/古典音樂. 近近地既算有麥兜既「仲有最靚既豬腩肉」, 又有陳奕迅既「給愛麗斯」, 更有「Billy Elliot」裡頭既「天鵝湖」等, 應該仲有好多好多.

過, 就算點好聽, 肥龍都只係會停留喺「有得聽就聽」既階段, 更加唔知其實邊首打邊首. 不過最近一套日劇「交響情人夢」令向來唔聽交響樂既肥龍開始對呢樣野有所改變及感興趣. 主要原因, 係因為劇裏帶出一個就算肥龍呢類初哥都覺得好易明白去聽交響樂既方法. (如果肥龍有錯莫見怪!) 就係作為聽眾, 如果喺聽之前嘗試去認識作曲者創作樂曲時既喜怒哀樂或背後既故事後, 然後去欣賞演奏者如何利用樂器、技巧及音律高低去將呢個意境演譯出來, 聽多幾次就ok啦. 況且有好多交響樂/古典音樂既旋律其實都幾好聽, 有時喺屋企當背景音樂聽都幾正囉.

上星期日, 肥龍去開公共圖書館, 貪得意咁借咗幾張交響樂/古典音樂CD番屋企聽 (古典音樂CD貴嘛~~), 忽然「交響」起黎. 番到屋企, 立刻放張CD入部all-in-one度, 喇叭開始漸漸傳黎不同既旋律. 聲音輕快時輕快, 哀傷時哀傷, 激昂時激昂...肥龍果一刻彷彿就係置身於樂曲既旋律中.

1. Rachmaninov- Complete Piano Concertos
2. Bach 2000
3. Swan Lake Sleeping Beauty Romeo & Juliet

嗯, 又ok 好聽噃!

11.5.07

門另一邊

早幾晚既一個飯局入面, 肥龍同友人天南地北、雞啄唔斷, 好似好多野傾之際, 傾傾吓,友人突然彈句:「你睇吓你吖, 開口又講公司, 埋口又講公事, 其實你有冇第二啲野講架? 乜你唔悶既咩? 放鬆啲啦」

呢句說話, 對平日口多多既肥龍黎講, 尤如當頭棒喝.

又係喎,原來喺肥龍既生活入面, 工作喺肥龍既作息時間表及精神狀態上不知不覺佔去大部份空間. 而且有時假日做呢做嚕, 以為自己好鬼健康, 原來原來都只係為咗減壓及放鬆.

後來, 友人再加一句謂: 「其實你每日做得咁辛苦, 究竟為咩呢?」

咁實情究竟又為咩呢? 肥龍反覆思量內心既真實答案. 又諗今時面對既壓力, 又有幾多係自己攞黎.

喺家庭、親人方面, 肥龍有非常堅定既答覆. 但係喺工作及學習方面, 肥龍感覺到力不從心既困惑.

每件事與物, 肥龍追尋、努力、付出又再追尋, 看似無盡, 又彷彿沒完沒了.

身體、精神狀况呢, 雖然可以維持及支持下去, 但日積月累, 始終需要揾番個平衡點. 否則俾你做到曉飛都係咁話. 而且所追尋既, 又有幾多係因為自己好勝呢?

講到呢度, 忽然諗起喺「鋼之鍊金術師」入面, 提及到若要尋找「賢者之石」, 往往須要去到「門」既另一邊, 先會揾到答案.

咁現實生活裡, 乜野係肥龍既「賢者之石」呢? 而「門」既另一邊又係咩呢? 又或者根本唔需要「賢者之石」呢?

會唔會到達「門」既另一邊後, 亦如劇情一樣, 先知道之前一直追尋既, 原來係另一回事呢?

8.5.07

俾面派對

耐唔耐, 肥龍都會參加一啲所謂俾面派對.

好似上星期中有日, 隔離部門頭頭阿T走過黎問肥龍(上)星期六晚得唔得閒賞面參加佢個生日派對. 聽完後,心裡不自覺咁”唉”咗一聲, 因為參加呢個派對除咗表示呢個星期又少一晚休息 (肥龍之前兩個星期都去咗喜宴), 更慘既就係會錯過好幾場季尾英超大戰.

但為咗同鄰近部門設立邦交及可持續發展, 點都要蒲吓頭現身. 其實呢類場合, 出席固然要出席啦, 但除咗俾面兩字, 肥龍都諗唔到第二個更好既形容詞. 除非好熟, 否則有幾想去, 心裡早有個數.

雖則話飲飲食食, 嘻嘻哈哈, 時間好鬼快就過又一晚. 奈何呢類場合喺任何情況下, 都唔可以鬆懈. 因為往往背後有幾對眼睇住你呢場戲.

老細喺度唔在講, 雖然佢未必會走埋黎同肥龍寒暄幾句, 但下意識地, 佢地都會留意吓多唔多人出席, 又或者邊個邊個無到. 唔去一兩次就梗係無問題啦, 但隨著活動增加,久而久之,如果你次次都唔蒲頭, 咁慢慢就唔覺意建立咗"唔合群"既形象, 到時就非常不妙啦.

所以肥龍一律有早退而無缺席. 而且每次開始盡量把握機會先同啲老細傾兩咀, 之後咯, 咪見機行事, 借意潛水囉.

另外, 衣著又係另一個課題, 隆重時當然要隆重啦. 但casual時未必真係casual喎. 就算你平日放假著開咩, 如果太過激或者敏感, 都係可免則免, 留番平日著好啦. 肥龍就試過俾德國老細問咩解究會著住英格蘭國家足球隊球衣...而且水上活動更要打醒十二分精神, 因為肥龍見過太多慘痛既例子.

至於話題咯, 只可講句要當心, 小心及留心, 適可而止.

都係果句, 職場上, 一秒鐘都唔可以放鬆.

7.5.07

漁港景色

香港仔漁人碼頭 發展概念設計曝光 盼09年動工 料3年後完成

【摘自明報】提出近10年的香港仔「漁人碼頭」計劃有新進展。港府推出發展概念設計,主要提出把香港仔海濱打造成「漁人碼頭」,讓遊人在海濱露天茶座或露天節慶廣場,感受漁港傳統氣氛;對岸的鴨脷洲海濱,則會包裝成為「漁人匯」休憩區,接連毗鄰的鴨脷洲「手信街」。港府傾向由私營機構參與整個項目的設計、建造及營運,以發揮市場靈活性。

_________________

唉~~~! 點解? 點解? 講黎講去, 都仲係得呢啲點子?

三年後好, 五年後又好, 如果「你」話興建漁人碼頭只係多咗啲如昂平360之流既人造景點呀, 購物街呀, 避風塘特色食店呀, 又或者懶有特色、氣氛咁整埋啲"唧"出黎既漁港景色呀...老實講, 真係唔攪好過攪.

從來從來, 「你」話有幾多人(包括香港人)係因為被「漁港景色」呢個點子而吸引而去遊覽香港仔呢?

如果如果, 「你」有去過香港仔避風塘睇每日有幾多遊人搭舢舨遊覽漁港景色, 及留意兩岸有特色既建築物時, 係咪真係靠呢啲果啲新建設就可以令四周煥然一新呢?

又膽敢問一句, 何謂「漁港景色」? 何謂「漁港文化」?

不過不過, 有冇諗過, 香港仔同市區及其他地區有咩唔同既地方?

肥龍喺度又再長氣講多次. 香港仔或者南區吸引人既地方就係夠LOCAL, 夠街坊, 仲有大量户外空間例如水塘, 郊野公園, 漁港, 沙灘(深水灣, 淺水灣, 南灣, 赤柱等),如果有時間, 仲可以坐街渡去南丫島. 周圍都係山同海, 真係硬SELL自然環境同寧靜.

以上呢啲點子, 可唔可以利用及發揮呢? 係咪只要曾經係「漁港」既...就只可以發展為「漁人碼頭」, 別無其他呢?

咁, 以香港仔為中心, 加埋鄰近周邊, 發展為假日休閒及户外活動區又有冇得諗呢?

6.5.07

認真背後

關於最低工資, 其實肥龍冇乜卓越之見. 而且正如好些扑客所言, 相比為「買家」, 肥龍自覺身份為「賣家」更為合適. 因此肥龍以下所講既觀感只可以憑平日所聽所見所聞黎推理.

之前肥龍都有文講過, 每次遇見一啲(社會普遍認為)看似職位低既人認真工作既模樣時,心中硬係有種戚戚然既感受.而大家所相差既, 可能只係一個機會. 但工資咯, 就可能天淵之別.

除咗供求關係外, 技術/經濟轉型、機會成本都可能係造成現有情況既原因.

譬如有人因為想提高自己既競爭力, 主動願意接受較低既工資.

又例如有人因為社會技術/經濟轉型, 本來既知識或/及技能未能跟上現今既工作需求, 喺選擇不多既情形下, "被逼"流向一啲所謂低知識/技能既工作. 而呢類工作, 一般工資亦趨向喺偏低水平.

而肥龍相信仲有好多唔同既理由, 繼續有人會為生計接受不同既待遇.

咁在商言商, 弱肉强食, 至為現實. 但又會有人謂無奸不成商, 話唔少人打著「汰弱留强」、「自由市場」黎做盾牌, 有意識地去剝削工人工資、福利及保障.

但係就算係咁, 咁又可以點?

講到呢度, 可能有人話肥龍兩頭蛇. 但試問依家有冇老細願意用月薪一萬蚊請一個打字員? 相反, 對於擁有一啲有能力提高自身公司競爭力既員工既老細, 又會唔會毫無顧忌咁刻意壓價呢?

不過, 一切計劃經濟或干預市場無形之手, 及減低商業活動自由調節能力既措施, 肥龍一概反對.

所以, 肥龍反對由政府硬性規定設立最低工資.

5.5.07

叔叔都笑

睇今期「茶CUP」雜誌講開「特區麻甩中佬症候群」, 圖文並茂, 羅列出特區麻甩大千相, 非常搞笑.

先有穿三個骨爛牛仔褲, 一對波鞋, 唔着襪, 斜孭一隻旅行袋;

再有帶CAP帽, 唔攝入褲脚既恤衫, 邊行邊玩手機Game.

肥龍三十出頭, 諗諗都係時候要留意吓儀容. 避免日後壯志未酬, 歲月流逝, 肚腩湧現, 患上麻甩中佬症候群時, 咁就真係鞭長莫及啦.

過喺肥龍未開始任何行動之前, 今晚就先黎一野挫折.

話說今晚肥龍喺樓下大堂入Lift時, 同時有幾個十五、六既年青人走埋入黎. 期間有位年青人喺電梯內低低能能咁講咗幾個爛Gap, 咁肥龍聽到咪「咪咪」嘴笑囉, 點知其中一位竟然彈咗句:「叔叔都笑」...

肥龍聽完直情係即場雙眼反白!

年青人, 咩「叔叔」? 你估你仲細呀? 叫「哥哥」呀~~~!

3.5.07

迷離境界

今日, 肥龍有個同事話上星期日, 佢竟然有三個親人(舅仔,仔,老表)同一日分別喺唔同地方(德國,香港,新加坡)跌斷骨, 謂有無咁橋呀?

之前肥龍講起宿營, 其實有件事唔單止橋, 仲真係奇個迷離境界...

話說中四果年暑假肥龍同成班書友走咗去長州宿營. 咁第二朝早醒咗, 食完早餐, 無咩野搞, 於是咪搵埋另一個書友仔去租單車玩啦...

咁果日風和日麗, 景色怡人. 一路同另一個書友仔鬥快, 穿插於街頭巷尾都幾好玩架.

後來, 因為前面有大群人, 好自然咪停低等啦.

原來咁啱有人出殯.

肥龍好奇, 向人群留意八卦一下啦, 唔睇尢自可, 嚇然發現身故者竟然係同肥龍同名同姓!

果一刻肥龍真係打個"突", 心諗唔係呀化?

最後, 到再望番張相, 確認咗唔係自己, 至無咁驚咋.