【摘自明報】提出近10年的香港仔「漁人碼頭」計劃有新進展。港府推出發展概念設計，主要提出把香港仔海濱打造成「漁人碼頭」，讓遊人在海濱露天茶座或露天節慶廣場，感受漁港傳統氣氛；對岸的鴨脷洲海濱，則會包裝成為「漁人匯」休憩區，接連毗鄰的鴨脷洲「手信街」。港府傾向由私營機構參與整個項目的設計、建造及營運，以發揮市場靈活性。
_________________
唉~~~! 點解? 點解? 講黎講去, 都仲係得呢啲點子?三年後好, 五年後又好, 如果「你」話興建漁人碼頭只係多咗啲如昂平360之流既人造景點呀, 購物街呀, 避風塘特色食店呀, 又或者懶有特色、氣氛咁整埋啲"唧"出黎既漁港景色呀...老實講, 真係唔攪好過攪.
從來從來, 「你」話有幾多人(包括香港人)係因為被「漁港景色」呢個點子而吸引而去遊覽香港仔呢?
如果如果, 「你」有去過香港仔避風塘睇每日有幾多遊人搭舢舨遊覽漁港景色, 及留意兩岸有特色既建築物時, 係咪真係靠呢啲果啲新建設就可以令四周煥然一新呢?
又膽敢問一句, 何謂「漁港景色」? 何謂「漁港文化」?
不過不過, 有冇諗過, 香港仔同市區及其他地區有咩唔同既地方?
肥龍喺度又再長氣講多次. 香港仔或者南區吸引人既地方就係夠LOCAL, 夠街坊, 仲有大量户外空間例如水塘, 郊野公園, 漁港, 沙灘(深水灣, 淺水灣, 南灣, 赤柱等),如果有時間, 仲可以坐街渡去南丫島. 周圍都係山同海, 真係硬SELL自然環境同寧靜.
以上呢啲點子, 可唔可以利用及發揮呢? 係咪只要曾經係「漁港」既...就只可以發展為「漁人碼頭」, 別無其他呢?
咁, 以香港仔為中心, 加埋鄰近周邊, 發展為假日休閒及户外活動區又有冇得諗呢?
5 則留言:
我諗其也區嘅 "原居民" 都有同感. 我有d觀塘長大嘅朋友, 佢地都覺得重建裕民坊係抺剎咗集體回憶. 點解香港政府好似成日都好心做壞事?!
絕對同意啦！
肥龍兄，若虛都係土生土長南區人，講真，漁港景色何處尋？鴨脷洲街渡我間中都有搭，全程五分鐘有找，沿途係一堆堆大漁船、舢舨同垃圾。
政府班官，個個高幹子弟，錦衣華服，邊度識Ｄ街坊文化丫。
若虛君,
原來係街坊, 多謝到訪, 失敬失敬.^^
你講得啱呀, 就算俾你舢舨遊, 除咗海鮮舫外, 真係冇咩睇啦. 雖然近距離睇啲漁船都仲還可以, 不過都係果句 - 「一陣睇哂」!
香港仔中心一帶地方所餘無幾，給一條香港仔海旁道阻隔了避風塘和中心，恍若兩個地方，反而如果執一執巴士總站同海濱公園到魚市場整條通道，等人行得舒暢一點，已經足夠，至於什麼手信街之類，冇必要。
kevin,
所言甚是. 亦同意.
而且覺得現在建議流於視覺上既地標, 內裏實質文化欠奉. 最反感可能係藉著「漁港景色」為幌子, 實際又係講經濟、旅遊業.
講經濟、旅遊業本無不妥, 但究竟如何吸引遊人及演變成地區特色, 絕非現有建議所能達成. 譬如赤柱大街上既商鋪就係由最初的聚集慢慢發展成今日的熱鬧. 相反不遠處既美利樓始終為視覺上既映象罷.
如果真係想保留「漁港文化」, 為何不干趣設立漁事博物館好等參觀人士了解本港漁業發展及習俗.
發佈留言