尋晚肥龍做東, 請同事食飯, 順便大家聯誼一下.
唔知係真係有代溝丫定係依家啲廿幾年青人大部份都係咁, 竟然成晚可以掛住自己打機就得.
席間都有啲同事搖頭歎息. 講真, 肥龍都見怪不怪, 因為發現就算係公司年飯呀, 同事喜宴呀, 佢地都係咁樣. 不過既然已經放咗工, relax吓都可以理解. 雖然肥龍都有打機, 不過真係唔會咁囉. 唔明.
最妙就係有位已婚同事話返到屋企都係咁, 兩公婆身處同一室, 但就各有各打機.
另有一位已婚同事就話老婆唔鍾意佢打機, 所以唔喺屋企啲話就搏命去打, 打到番屋企門口一刻方休.
雖然做野還做野, 私事咯, 得個知字就算. 但肥龍諗如果結咗婚既生活係咁, 真係唔知為乜囉.
另外如果以上既情況係代表一部份既人, 喺溝通方面及人際關係, 可以期望啲咩呢?
講番轉頭, 可能正如肥龍個朋友講,其實啲同事可能冇興趣食餐飯囉...下次可以慳番. ^^
2 則留言:
肥龍兄，請你唔好怪小弟，查實呢個情況，你之前係《俾面派對》都有所感受。
拿，當你代入相關角色，你就明白你班下屬點諗。
不過，知道佢地點諗之後，Team Building又好，剷佢地一鑊又好，你應該都有不少辦法。
祝你成功！
c.m. 兄,
你講得啱, 多謝! 亦正係肥龍寫呢兩段既原因, 加以自省. 好似照鏡咁, 你點睇人, 人又點睇你啫.
team buidling 又好, farewell 某某又好, 迎新又好, 達標又好, 有時可能自己諗得太多, 又或者太過表面/ 理想化. 方法可能有好多種, 而且每人工作目標亦有不同, 反而花多啲時間同心思喺workplace 上可能成效仲顯著.
喺管理方面, 每日肥龍都在「學習」及「感受」. 都不為過.
反而c.m.兄, 如不嗇賜教, 肥龍必虛心學習.
發佈留言