29.9.08

租漫畫書

其實都唔算係咩新事物大發現,只不過自中學時代之後,最近又再次投入呢種消費模式.

由於家中空間實在有限兼珍貴(寸金尺土嘛~),而有時又聽友人傳來謂邊套邊套漫畫好鬼好睇,又呢樣果樣,搞到自己又心思思想攞/買本黎睇.咁喺未知好唔好睇之前,又唔想一套咁買,結果就決定往附近既租漫畫書鋪去租漫畫書,經濟又實際.

漫畫一本借一日,二本借二日,三本借三日,然後再多都只係借三日.

又租漫畫五蚊一本,同時借五本第六本免費.

以此推斷,一套約四十集既漫畫,租金平均一百八十蚊左右.換轉買全新漫畫,一百八十蚊大概只可以買六本左右.

呢個模式,既可以睇多啲唔同類型既漫畫,又可以慳返家中擺放漫畫既空間,實在唔錯.

睇完可能立即會有人話,其實上網都有得睇啦,而且仲要係免費添,連租書錢都慳番.呢層我知吖,不過講起都係鍾意有書上手一頁一頁揭既感覺(雖然其實都對N手書有些少保留,不過又唔係睇好耐,算啦~),而且坐車時睇冇咁悶囉.

咁其實最近睇緊邊套漫畫?就係呢本囉...

28.9.08

做得不夠...

做得不夠...

因為轉工關係,從新工作中發現唔少由舊工作帶來既壞習慣.

講為壞習慣,或者字眼上比較嚴重.問題反而覺得每件事做得不夠完整或盡心盡力既原因,不外乎自己將情況睇得太簡單或太輕,及對自己應付唔同情況及應變能力既高估.

講真,呢個感覺,及感受到呢個感覺既感覺,心中絕對難受,又確實令自己一時間迷失.

當見到其他人比自己表現好及準備充足時,就算不問最後結果,再回望自己所作所準備,相形見拙.

要知道,就算係一個再簡單既動作及問題,要表現出熟練及一致,背後可能係日積月累既成果.呢個道理,自己當然知道,反問既係點解今日自己竟會睇輕如此既一件事.

以前常提基本功既重要,今日明白到對基本功既重視,如出一轍.

珍惜每次表現既機會,讓自己盡心令對方留下深刻印象,達成目標,就係今時今刻既首要任務.

又,再諗起呢一幕.Wish me good luck!

27.9.08

我的練習記錄 (4 of 24)

新路線

由於起步點推遠至黃竹坑運動場,若要保持差不多既練習距離,今朝折返點改為南灣.

而且淺水灣至南灣段除咗沿途景色優美兼冇咩車外,後段既上落斜為唔錯既耐力練習.

距離第一場比賽仲有4個星期.

49.5km/h?

圖中所表示既最高速度,應該係GPS既接收或干擾之誤,試問又點可能跑出49.5km/h既速度呢?

20.9.08

回郵信封


依照上述說明,如果根據a)親身交表格回專門店,是否需要付上「回郵信封」呢?

*****************

呢段【報名辦法】,睇完好似冇咩特別,講咗又好似冇講,各位參加者自當要心領神會.

*****************

事緣上星期五放工後,因為喺銅鑼灣附近,於是就帶到報名表格到專門店交表啦.

到達專門店,向店員表示想交表格報名後,店員既第一個反應竟然係如下.

店員:「先生,你有帶兩個回郵信封嗎?」

肥龍:「下?....(手指表格)呢度唔係咁寫固喎...」

店員:「唔係呀,要回郵信封架.不過親身交表可以慳番寄表格既郵費啫...」

肥龍:「(再手指表格)唔係喎,呢度真係唔係咁寫架喎~呢度寫郵遞表格先要付上兩個回郵信封呀.咁我依家係親身遞交表格喎...」

店員:「玩開都知架啦~」

肥龍:「玩開都知?咁呢份表格係咪只俾玩開既人睇既呢?」

*****************

有一刻真係想過唔報名就算.

不過奈何自己想參加,最後肥龍決定放下自我,離開專門店,走到商場其他店舖買郵票及信封,填上回郵地址.

再到專門店遞交表格.

*****************

再到專門店時,先前交談既店員已經唔見人.可能怕肥龍返轉頭老笠佢都唔定...

*****************

事實上,整件事,肥龍只係想講,份表格寫得唔清唔楚又或者真係自己理解能力有問題都唔緊要,最重要係當有問題想向店員反映情況時,希望店員可以耐心聽及解釋一下個情況啫.

況且肥龍又冇話唔肯/唔會交回郵信封.

*****************

另外,on-dog兄所講既,又好有道理喎!

“如已自動銷毀, 仲要個回封, 寄D咩呢? 係咪有回封就寄啦, 冇就"燒"啦?”

好玄...

呢隻其實都好經典 - DARIUS



不過當年好貴,應該三蚊一鋪,加上機身巨大,唔係好多機鋪有得玩,所以好少玩.

- 海洋生物為首既BOSS機械設定;
- 由三個畫面連續連接既超長畫面;
- 雙打 shooting game;
- 變化無窮既過版版圖及情節 (要玩哂所有版圖,少啲技術同金錢都唔駛諗!)



有興趣可以上呢個網頁,描述資料應有盡有,睇完實在覺得開發此Game之精彩.

我的練習記錄 (3 of 24)

時間一般...仍需努力~

13.9.08

我的練習記錄 (2 of 24)

時間同上星期差不多.

分別主要係因為喺深水灣往淺水灣早段,明顯加快步伐,最後總時間快咗約一分鐘左右,而均速都係9km左右.

依家練習喺計算均速之上,再喺個別分段嘗試加速.最後令均速慢慢提升.

目標係可以喺三十分鐘內完成相同路段(約5km).況且真正比賽距離係10km,一定要加把勁去練習.

又,除咗練習,應該開始要留意一下減磅情況.

始終體重及速度有相互既關係.

12.9.08

又係報名既時候

一味掛住練習,差啲唔記得要報名添!

(1)Nike 10km (11月23日)

竟然新加3km組.不過經已超齡,冇得諗.

都係10km啱跑啲,
雖然得5,000個名額.或者好難報名,最多9月16日果朝伏起電腦前上好網準備!


9月16日後記

呢頭講話報名,竟然已經失手,因為今日報名時間為上班時間兼今早有例會,加上公司電腦上唔到官方網站....

到開完會再搵到好友相助幫忙上網登記時(約中午12點),原來名額已滿!註定無緣再跑Nike 10km 比賽~~嗚嗚...灰爆!

唯有下年請早!

(2) AVOHK The Reservoir Series(10月19日,12月7日及2月22日)

呢個系列好特別,中等距離(11-15km),而且跑水塘,感覺應該幾新鮮.

仲係十五十六,未知好友們會唔會參加.

如果參加,有三個月賽程(今年十月、十二月及明年二月)經已有著落,咁到其時唔駛周圍搵比賽去報名.
(註:跟舊年差不多,目標係喺渣打半馬前,可以一個月跑一個比賽作練習)




(3)Macau Galaxy Entertainment International Marathon(12月7日)

衝出香港既第一步!

不過就算跑都係半馬.
如果參加,就會同上面AVOHK第二場撞期,又要過夜喎~

嗯,都係要同各好友們商量諗諗先!

11.9.08

熱血勝利學

Image of 灌籃高手熱血勝利學

見客前趁有空檔,逛書店時無意發現既一本寫有關Slam Dunk既書.

睇咗一半,可能又係(再)重溫漫畫既時候.

6.9.08

我的練習記錄 (1 of 24)


最近換咗部內置GPS既手機,順理成章,就用黎試下練習既情況,希望除咗完成時間外,可以了解一下自己既平均速度及分段時間.

第一組記錄,均速約9km/h.考慮到跑步方法及只係用咗9成力左右,再加上天熱關係,(對自己而言)時間算不過不失.喺未來5個月,目標係希望由練習量(距離)及頻率著手,逐漸增加程度,可以令均速可以提升至約11km/h或以上.
















又如果以上目標可以達成,完成10公里及半馬拉松時間估計為約54分鐘及116分鐘(2小時內).

1.9.08

選舉

最近睇咗兩個選舉論壇及個別候選人介紹政綱既片段,對個別候選人介紹政綱時既表現,實在令肥龍聯想起中學時代學生會選舉/或選班代表既畫面.原來接近廿年過後既今日,仲有機會觀賞到表達形式單調俗套(例如同一名單候選人一字排開、緊握拳頭、義正詞嚴咁講出預先背誦好既政綱),及唔少(空洞如無物)口號式既吶喊.

再留意政綱內容時,只會得出以下結論:觀點新瓶舊酒,來去三幅被.熱門話題如保育、環保、公平法、領滙等等課題從來不缺,卻善有候選人講出自己參政理念.至於如何利用本身思維及方法去監察政府、收集社會市民大眾等民生問題,令問題得到注視及處理,協助市民大眾解決困難等課題上,一律欠奉.

更唔好講如何提升香港(人)競爭力,如何喺與內地接軌中突顯香港既優勢,及世界大趨勢等課題.有時真係頓感等到花兒也謝了.

至於討論?唔提也罷...就算安坐家中,只會聽到「同意/唔同意」、「會/唔會」既質問.但點解「同意/唔同意」或「會/唔會」,從來冇人關心或提問.

基於此類政綱、思維及手法均熟口熟面既候選人既出現,肥龍最後喺今次候選人選擇上,傾向投去年紀及經驗較輕既候選人.

肥龍相信喺現有既政治大氣候中,議會既效率,由現有既立法會議議員與年輕經驗較少既議員去執行,可能分別不大.而由年紀及經驗較輕既候選人參與,主要係期望可以令更多參政人士了解及參與議會運作,及吸收相關議會經驗.而且肥龍亦相信,喺太多固有既思想及制度下,(縱然未必係成熟既動議)有新及多元既思維沖擊,亦未嘗係壞事.

另外肥龍亦相信議會既質素,亦在於唔同聲音既平衡.眼見保皇黨議席已有一定數量時,實在有必要有唔同既聲音、思想去制衡,否則任何單一及傾斜既聲音,對社會最後未必帶來好既一面.而且當遇到一些大是大非既議題上,相信來自唔同背景既議員亦可以得到共識.

而喺在任既四年間,肥龍亦可以監察所投既候選人既表現.年紀輕、經驗少喺投票前已經知道,關心既反而係所投既候選人喺在任四年間可唔可以兌現候選時既承諾.可以好肯定講一句,若果所投既候選人無法把候選時既承諾提出、執行,四年後選舉,肥龍一定唔再投同一位候選人/有關名單.

究竟係帶來新氣象定係最後被同化,市民眼睛係雪亮既.要知道,機會係爭取得來,唔係給予既.而機會亦只會俾有努力,有準備既人.

另外,附今日施老闆C觀點對選舉既想法.