租漫畫書

其實都唔算係咩新事物大發現，只不過自中學時代之後，最近又再次投入呢種消費模式．

由於家中空間實在有限兼珍貴（寸金尺土嘛～），而有時又聽友人傳來謂邊套邊套漫畫好鬼好睇，又呢樣果樣，搞到自己又心思思想攞／買本黎睇．咁喺未知好唔好睇之前，又唔想一套咁買，結果就決定往附近既租漫畫書鋪去租漫畫書，經濟又實際．

漫畫一本借一日，二本借二日，三本借三日，然後再多都只係借三日．

又租漫畫五蚊一本，同時借五本第六本免費．

以此推斷，一套約四十集既漫畫，租金平均一百八十蚊左右．換轉買全新漫畫，一百八十蚊大概只可以買六本左右．

呢個模式，既可以睇多啲唔同類型既漫畫，又可以慳返家中擺放漫畫既空間，實在唔錯．

睇完可能立即會有人話，其實上網都有得睇啦，而且仲要係免費添，連租書錢都慳番．呢層我知吖，不過講起都係鍾意有書上手一頁一頁揭既感覺（雖然其實都對N手書有些少保留，不過又唔係睇好耐，算啦～），而且坐車時睇冇咁悶囉．

咁其實最近睇緊邊套漫畫？就係呢本囉．．．