電影票尾

肥龍今晚收拾書櫃時, 無意發現一叠應該好耐之前留起既舊電影票尾, 喜出望外, 又小心慢慢欣賞.

肥龍細路時, 肥媽就係好鍾意叫肥龍做「垃圾佬」, 意謂係又儲唔係又儲, 總之儲埋成屋都係肥龍既野.肥龍唔否認. 但細心諗吓如果唔係之前收埋先, 依家又點會有得揾番出黎睇.

相比起依家大部份電腦打印機印出黎既戲票, 以前用人手寫上位置既戲票(堂座一叠, 超等特等又另一叠)又表現出另一種感覺. 肥龍感覺好原始, 好人性化.

記得以前就讀中學期間, 三月過後, 學校就開始放下令時間. 每逢星期四、五放學後就係咁夷食幾啖麵包,立刻坐巴士趕到灣仔影藝及新華戲院睇下午二點半特別場, 學生票一律廿蚊. 至於睇咩戲, 都唔係好記得, 有得睇就睇, 而且有冷氣涼, 都幾好架.

又大班人走去睇卡通「北斗之拳」電影, 好勁!

亦由於肥龍住喺港島區, 所留既電影票尾大都為港島區既戲院. 最特別竟然有利舞臺同碧麗宮既票尾. 而碧麗宮既票尾仲要係特等 (應該係指二樓高層). 最記得當年睇「與狼共舞」, 由於片長關係, 好似睇歌劇咁, 有中間休息時間, 俾觀眾飲杯水去埋廁所咁. 好鬼特別, 又印象深刻呀!

不過再睇番啲票尾, 發現票價包含稅架. 仲有, 原來有關戲院全部都拆哂囉!