唔記得係喺中二定中三開始, 好興喺長假期(例如聖誕或暑假)就一大班書友仔去宿營.
點解唔會喺農歷新年就唔駛多講, 冇理由斷自己財路. 至於復活節喎, 因為好近大考(年終試), 除非你讀書好鬼醒又或者諗住放棄, 否則揾到隻蚤"蘇"你先奇!
而宿營既地點, 大部份都係去啲偏遠既離島. 肥龍同書友仔就留吓唔少腳毛喺長洲既東堤, 大嶼山既塘福、長沙同貝澳. 另外記得有次就去咗個朋友喺東涌既祖屋玩.
宿營既經驗對當年肥龍都幾大衝擊. 話哂咁大個仔都未試過唔番屋企瞓,而且仲可以喺龍爸龍媽既視線範圍外活動. 咁既環境下, 唔玩到癲就假啦!
開始時候, 基本係全男班(肥龍係讀男女校),活動因此剛陽味十足. 由到沙灘打排球、撲浪, 到坐足半日岸邊釣魚. 又有到空曠地方放風箏,或者租架單車四圉"片". 至於膳食方面, 就非常簡單, 主要靠罐頭同公仔麵. 如果自己煮自己嗰份的話,問題唔大. 但係要煮咁多人份量喎...就真係頭都大埋. 結果就演變成打邊爐同燒野食呢啲例餐. 起碼鍾意幾時食都得,随時加入! 另外鍾意食幾多悉随尊便, 幾咁free!
到最後整煲糖水又或者到鄰近士多整支雪條都唔錯架.
後來, 隨著女書友仔既加入,女書友仔將佢地平時喺家政堂所學揮盡渾身解數將廚房變成御膳廚房後, 飲食問題得以改善.有啲仲好好食添呀!
晚飯後既活動,就會玩吓啤牌,鋤吓D、十三張咁, 又或者打吓牌. 另外有啲書友仔就鍾意走出露台或上天台吹水及炸吓機!
如是者, 當大家玩到傾到咁上吓啦, 夜咯, 就自己番番房揾個位瞓...
不過最精彩既部份就正正由呢一刻開始.
喺呢一刻, 通常最夜瞓既書友A 就會喺佢帶黎既背包裏面攞出已預先準備好既鑽地龍, 然後好巧妙咁將燃點著既鑽地龍拋入嗰間有一堆已經瞓到死豬既房, 再跟手閂門.
之後既情形係點相信肥龍唔喺呢度寫都可以喺腦內想像出黎,所欠既可能就係聽唔到房內傳黎既躲避聲、慘叫聲同粗口.
結果,亦由唔知邊一次宿營開始, "鑽地龍特襲"成為每次大家唔(敢)入睡既節目啦. ^^
13 則留言:
第一次去宿營是F5 Summer Holiday!三日兩放，長州。家人批准去時，興奮到 ... 難以形容！
有次同班同學去Lantau宿營打麻雀，殺得興起，竟然可以20分鐘打完一圈，快得黎回味無窮！
man 兄,
F5咁遲? 咁果次宿營好唔好玩? 有冇踏單車遊長洲?
c.m.兄,
最顛一次, 肥龍試過將書友仔條底橫放入雪櫃冰格雪足一晚. 第二日發現時已經硬哂!
最搞笑係底橫既擁有者竟然扮無事發生,繼續跳舞!
Sorry，係20分鐘打完 4 圈，即大約一分鐘就過莊！
緊係好玩啦！我參加左教會團。我一直都沒有宗教信仰的。成150人一齊玩D集體遊戲，勁正！
預科時，同同學去lantau，約8個人，全男，好鬼悶，佢地個個都掛住聽discman。好在都有落水玩，吾係就無咩回憶了。
最記得就係游完水，見到條大莽蛇，好大個肚，好似食左隻牛仔，地下重有牛屎天。食到走不動！比人5花大磅！
大莽蛇都敢玩？嘩，Man，你好勁！
不是我玩呀！只不過見到條蛇時，已經比D村民五花大磅了，動彈不得，所以先夠膽行過去，當時都係第一次見大莽蛇，吾知D村民有無食左佢呢？
man兄,
好奇問句, 咁最後有無"劏蛇(正經)"先?
另外, 肥龍試過喺長洲有單野仲奇個迷離境界"...
就係喺踏單車遊長洲時咁啱有人出殯, 而身故者竟然係同肥龍同名同姓!
果一刻見到真係打個"突"...最後望番張相先確認唔係自己先無咁驚.
Man：
d村民應該無食條蛇，因為犯法（最衰比你地班友仔見到）。嘩，不過呢個蛇吞牛既奇景，真係羡慕。
肥龍兄：
你個情景好驚嚇！好有靈幻片feel，親歷其境真係會好得人驚...睬睬睬！
The Twilight Zone ....
我吾知道條蛇最後點，但應該吾會放生佢 (係當地) ，假設如果當時真係劏左佢，都幾X心，會見到隻牛仔的屍 ...
如果我係村民，梗係食左佢啦，我知犯法，但會說保障村民安全呀，如果佢食左個小朋友，米好大獲！
肥龍兄
比著我當時都好驚！講開同名同姓，我都試過！係醫院。當時有人叫名，米去報道羅，點知叫的人不是我，不過都係小事。
發佈留言