講開水塘,提及石澗,唔可以唔提石澗之樂. 不過先旨聲明, 呢段只係肥龍童年往事一則, 千祈咪模仿或跟住做.
講番到石澗有咩既同幾好玩? 重點大概有三: 接觸大自然、與別不同及魚樂無窮.
果陣其實肥龍年紀都仲細, 大約十一二歲左右. 講真,如果唔係有啲年長既邨友陪同, 真係唔敢貿貿然行上去. 唔知點解, 每次都係逆流而上. 可能係同上游啲水清啲有關.
而且每次去石澗玩, 都好有冒險既味道. 因為眼前所見, 往往随住地形既同而變化, 從而諗出或對應出唔同既玩意.
如果去到淺水既小溪,如果有帶装備(養魚魚網及膠袋), 咪去撈吓魚,捉吓蝌蚪,跟住攞番屋企養. 又或者攞落下游或水壩放生.
另外,石澗之"游"非一般喺泳池及海灘之"游"可比.
有時如果行到一啲水深或叫"潭"既地方, 就索性剝哂衫褲剝哂鞋去游水 . 間中仲會喺因應地形關係而產生既高處作高台跳水,非常剌激好玩.
有時又會發現一啲水流比較猛既位置, 就會坐或者"埃"落去做番個自然版既水力按摩.
暑假悠長,夏日炎炎, 有時甚至帶埋西瓜, 一於享受浸水歎西瓜既時刻. 有時又吹吓水,游吓水, 總之一個下晝話咁快就過.
不過依家諗番, 其實都覺得幾危險. 不過細路仔唔識死, 福大命大至無事囉.
而且果陣都唔知唔知邊到黎既智慧, 通常落雨打風或之後既一星期內, 都唔會去石澗玩. 咁夏季雨量偏少, 一直好彩冇發生過咩意外(突如其來既急流).
此外又冇遇著咩變形蟲随水入耳而導致其他病(腦膜炎?), 反而耐唔耐就有人比蜜蜂針過.
2 則留言:
肥龍兄：
哈哈。小弟年少時怕水，未知石澗好玩之處，只係鍾意玩山。
年幼時，曾住筲箕灣愛秩序村（木屋區），亦因有親戚在油塘高超道村居住，所以亦有經常跑山。現時兩個村都已經人面全非。
當時約8-9歲，帶著弟弟等，在木屋區的山邊小巷探險，遇到有狗攔路就閃；無路向前就試圖穿過人家的木屋，看看有沒有路；太黑的路不敢試（例如兩邊木屋的瓦頂已經遮蓋了整條路）。木屋區山上有個“垃圾池”，有人把垃圾倒進去，然後慢慢燒（好臭！），仲有d蟲蟲爬下爬下，所以再往上走都不敢。總之，不亦樂乎。
係油塘有個所謂“少警山”（少年警訊），也經常去跑，小弟之胞弟更是爬山高手，以年紀來說，幾乎可以比美徒手攀山專家。（好彩未有事發生過，佢細個真係唔識驚）而且也曾採金絲貓同人鬥、吸大紅花蜜、食崗秥（Sorry唔識寫）。從油塘試過翻山走到慈雲山附近，當時又有一個木屋區係度，但之後點返去，就唔記得勒。
諗番起，都好想帶小妹同小女舊地重遊。...
肥龍都鐘意玩山架, c.m.兄你多數去邊處玩?
其實依家有時(非常偶然),肥龍都會走返去以前往果屋邨八卦吓. 雖然好多舊街坊都搬走咗, 但當見番以前大致一樣既景象, 自我感覺都幾良好架.(不過唔知點解, 每次返去都好靜! 以前一大班細路周圉走既畫面巳不復見! 又或者依家啲細路玩法變咗?)
而且有時仲特登走去以前住果個單位, 往事一幕自然浮現, 幾正呀!
所以c.m.兄唔好諗啦, 一於帶小妹同小女舊地重遊, 雖然未必能意會你既感受, 不過相信那裏亦係你既人生既一塊痕跡.係咪?
發佈留言