睇開黑柴, 諗番起打「士轆架」.讀書果陣時體育世界開始引入英式桌球, 而好多桌球既知識同規則, 都係喺節目裡面學番黎. 另外喺節目入面,肥龍開始認識同知道當時既世界冠軍就係戴維斯, 仲有白旋風韋德,後來仲有眼鏡好似上下調轉戴既泰萊. 無幾耐之後又有個靚仔既享特利.
肥龍鍾意韋德, 因為佢好鬼神經刀, 風格快、狠、 準. 一盤波, 隨手起Q兼起break, 一陣就打完. 勁起上黎好多球手根本唔係對手. 而且佢又係左撇子, 加埋長曲髮, 型!
讀中學放學後, 除咗鍾意蒲機鋪外, 有時就會跟啲村友仔去波樓打「士轆架」. 當然唔會只係打波, 有時除咗打牙骹戰外, 有時仲會打波鐘, 慶起上黎更會打波鐘加五毫子一度.
果陣, 喺球技進步以外, 最想擁有既就係一支私家Q. 攞住佢落波樓, 打開Q套拎支Q出黎果個畫面, 不知幻想過幾次.
不過最近已經好少睇, 之前搞既桌球錦標賽又因為有事唔得閒去睇. 依家只認識奧蘇李雲一個, 再加埋傳家俊咁. 咁啱奧蘇李雲又係神經刀一名, 不過更可以左右開弓, 更好似(唔肯定)擁有最短時間打147度(最高分)既記錄.
諗起好好玩, 有時間再去打.
5 則留言:
乜你又鍾意打Snooker架? Jimmy White D波真係好睇. 我以前時常打Snooker打到屋企都唔返架. 哈哈
叫做打過吓啦...依家就睇多囉.
做咩打到屋企都唔返? 你曳啦...嘿嘿!!
還有個中國神童丁俊輝。我近排都幾鍾意睇，尤其在大陸出trip時。
aldous,
小丁其實都ok, 不過就可能性格關係, 好似平平穩穩少咗啲球味同星味, 咁站喺觀賞角度睇, 就差少少囉. ^^
我都好鍾意睇卓球，好鍾意聽球與球嘅撞擊聲，而且覺得打士碌架好有型。我都鍾意打，不過唔識，同埋從來都唔裝載係點計分嘅。
係呀，丁俊輝唔夠台型、冇星味。
發佈留言