定型料理

最近開始睇"妙手小廚師II"漫畫(即天才小廚師--- 味吉陽一), 讀到一段非常有意思既情節.

情節大致係話拉麵係一種會進化既食物,配合不同時代既嗜好,不斷地變更所使用既材料同調味料...而拉麵可說係一種完全無所謂固定型式及材料既年輕料理. 唔似烏龍(烏東)麵咁已經定型, 由越係經驗老到既廚師,做得越好.

肥龍睇完諗,又真係喎!無怪會有味增、魚、豬骨等湯底,再加上唔同地區既特產/名產如黑豚肉、長脚蟹腳,秋刀魚、北海道牛油呀. 然後用上唔同或獨特既煮法,變成唔同風味既拉麵.

如果要肥龍諗類似既港式食物(定型料理 vs 無所謂固定型料理),應該會係雲吞麵同車仔麵之分.

可能由細食到大,肥龍好鬼鍾意食車仔麵.記得小學時讀下午班,有時龍媽無煮晏飯,就去學校附近車仔麵檔醫肚.五亳子個麵餅,肥龍鍾意一粗一幼,再加十個八個餸,五六蚊攪掂.

然後狂落辣椒醬,粗中帶幼食就最正.如果再飲支媽媽奶,就必定肚疴,萬試萬靈! ^^

另外肥龍有時間時又會好奇周圉貢去唔同地方試吓啲車仔麵咁.

可能因為地緣關係,呢度(南區)會有魚札、魚皮餃,炸魚皮,手打魚旦咁....有陣時諗,喺南區食既車仔麵會唔會同喺九龍新界果邊食既好唔同呢?