5.4.09

東京馬拉松見聞(四)



Everyone is No. 1~

歌仔都有得唱。不過,比賽第一從來只有一個,況且每一個參加者可能各有各自參加比賽既目的。 所謂「第一」既感覺,比較貼近既想法,或者應該係對比賽既重視及獲得其他人尊重吧。

衝過終點既一刻,代表比賽既完結。同時,不論多與少,代表過往付出既時間及努力,加上比賽間既專注,到一刻得以完成。

以數量計,肥龍過往參加過不多不少既比賽。通常,喺比賽途中,特別係比賽尾段,從沿途支持者及工作人員既支援聲,從不間斷,更令比賽充滿氣氛,又令跑手注入比賽動力。今次,東京馬拉松令肥龍有更深既體會。上一篇已經講過,從沿途既支援聲如何令肥龍熱血沸騰(實不相瞞,肥龍真係曾經因為沿途既支援聲感動得雙眼通紅~)。不過,衝過終點後一幕幕既畫面,及工作人員對所有完成比賽既跑手既尊重,更令今次經驗劃上完好既句號。

其實,喺最後四至五百米既時候,肥龍身旁附近一直都有幾位正一樣趕衝刺既跑手,果時,心態及目標好簡單,就係盡情享受及完成眼前最後一段既路段。體能上,每一步一樣疲累,心態上,卻一步比一步來得輕盈,又愈來愈激動!

肥龍雙手振臂一呼,衝過終點,感覺非常美妙!同樣地,身旁既跑手做著差不多既動作。大家四眼交投,臉上流露滿足神情,更互相握手道賀!另身旁有位跑手完成後,回身臉向終點躬身,表示完成及感謝。更有不少與同為完成比賽既朋友互相擁抱高呼!喺呢一刻,各人正用自己既方式去為完成比賽而慶祝。

通過終點後既一段路,工作人員正為每一位完成者遞上毛巾、食品,並解除比賽時間晶片。雖然簡單,卻又意義重大,大會就為每一位完成者準備及為掛上刻有完成比賽日期既獎牌,為每個完成者留念。雖然參加並完成比賽既參加者為數不少,可是,每一位工作人員既態度及表情卻非千篇一律,更不斷向完成者道賀及鼓掌!就算語言不通,亦可以感到充滿人情味及尊重。

而呢遍聲響,更完全充滿最後取回個人物品既地方,道賀聲及鼓掌聲,此起彼落。

喺果一刻,肥龍覺得自己就(似)係比賽既No. 1,樂在其中!

4 則留言:

C.M. 說...

龍兄,

日本與香港人情冷暖的對比,真的很強烈。(另,觀乎日本工作人員的衣服,天氣好像很冷)

Bacakara 說...

日本果然服務一流.....

反觀渣打...感覺似集中營差不多...哈哈

Karen 說...

>>反觀渣打...感覺似集中營差不多

唔止, 係機場保安就真! XD

肥龍兄:

好耐唔o黎您度, 點知話咁快真係完成到東京馬拉松, 真係替您高興!

希望唔好怪我咁遲至恭賀您啦!

南區肥龍 說...

最近忙於搬屋,兼冇得上網,依家先可以覆.

CM,

你提到人情冷暖,我又覺得呢個情況跟日本傳統及文化有關.例如喺日劇呀,漫畫呀,動畫呀時常提及學界運動比賽時,除咗比賽本身描寫外,另一個亮點通常就係現場觀眾及支持者既打氣.又例如係甲子園比賽時既應援團.所以「為比賽者打氣」呢方面,當地人可能已經駕輕就熟,又非常投入.而日本人對比賽者既支持及尊重又係肯定既,呢層可以從呢兩篇表達出來,又自己係親身感受到.

另一方面,從呢個經驗中,我感覺到日本人好主動好願意將自己對比賽者既支持及投入,好直接表達出來!(呢層其實同日本人做生意時好大分別~通常果陣比較含蓄及間接)

腦海入面,自然浮起一堆「鬥志」、「鬥魂」、「堅持(頑張)」、「熱血」等正面既詞.

雖然去過好多次日本,呢次印象及感受真係好深,又從呢個活動中,認識日本深一啲,立體一啲.

所以「讀萬卷書不如行萬里路」呢句真係好啱.睇到別人既長處及認識自己,係一個難得既過程.

觀乎日本工作人員的衣服,天氣好像很冷>>

係呀,十一二度左右啦,加上途中不時大風大雨,真係幾凍~

Bacakara,

雖然我都唔想咁樣直接比較(亦非本文目的),不過如果喺呢啲細微地方再做好啲,細心啲,可以令整個比賽更值得回味,及喺完成比賽時感受更深.

Karen,

多謝呀~又點會遲呢?我去過你果邊,知道你好忙,你都加油呀!