五個月後的這一天： 依依不捨

由去年十月開始計算，經過五個月既練習及參加不同的比賽，終於到了這一天．

一行五人，全部安全完成半馬賽事，其中好友Ｈ，更於兩小時內完成．

肥龍完成時間約為兩小時零五分鐘（非官方），官方時間要遲啲先知．

雖然未能喺兩小時內完成半馬賽事，主要目標落空，不過有兩樣次目標還係可以做到．（一）由開始一直跑，跑到終點，中間未有停過步；（二）首二十公里路程可以兩小時內完成．

對於未能兩小時內完成半馬賽事，主要原因應該與肌肉鍛鍊不足有關．最後兩公里，其實已經開始腳軟，全靠意志方可以保持一直跑，一直以應有速度到終點．而最後洛克道至維園一段，沿途路人既打氣及支持，感覺好正，為呢段路注入無窮動力．

衝線一刻既感覺依然瀝瀝在目．心情很矛盾，一方面為自己能夠完成賽事及所完成既時間而高興．另一方面，似乎又是一件事情既的完結．

這段期間，眼見自己既努力不斷從完成時間上正面反映出來，越跑，便就越覺得自己可以跑得更快，體能上可以跑得更長．能夠這樣感受到身體傳俾自己既回應，其實算做一種好特別既過程及感覺．

五個月既練習，說實話，其實一點都不辛苦，而且樂在其中．只係在臨近比賽日期前一段寒冷時間，要一面保持應有既比賽狀態外，同時要盡量保護自己身體健康．說得直接一點，就是從來未有過一次，如此這麼著緊自己既身體狀況及飲食習慣．當然，除了身體狀況，本身嗜吃既嘴巴，都要因為這段時候既練習，極唔願意循規蹈矩呜一段不短既日子．雖然偶然會有破戒既時刻，但很快，就會化成為一股動力，好叫自己再加緊去練習．

五個月既磨練，最後就係証明咗自己既規律、努力及堅持．不過，完成過後，到咗呢一刻，原來最後既感覺就係依依不捨．

＊＊＊＊＊＊＊＊＊＊＊

不過有結局，先會有新開始．

下一站，目標可能就係更多既馬拉松．

＊＊＊＊＊＊＊＊＊＊＊

依依不捨既其實仲有一件事.

講真（定講假），我仲有好多野想同大家分享，想同大家討論．而又原來呢個地盤，不知不覺咁已經寫咗接近十八個月（約三百篇）．而寫扑呢個過程，絕對係一個好特別既經驗．

寫扑及睇扑既過程，令我領略都好多平時生活工作上未曾接觸及知道既經驗，見解及故事．而扑友中又似有神乎其技，各自表現精彩及真摰既一面．

咁肥龍既文筆只係一般，而分享既，都只係身邊發生既生活事．

但對於肥龍自己，突然發覺喺題材上，寫工作，寫生活，寫南區，寫旅遊，寫馬拉松．．要寫既，原來已經寫得差不多．又突然覺得，如果再寫，只不過係舊既一個延續的話，只會令人食之無味，不如早歸．

啱啱喺上面先講完，有結局，先會有新開始．雖然突然放棄有啲可惜，不過思緒呢，就真係唔知飛咗去邊．況且其實我唔識鍊金術變魔術，唔會突然間多咗樣新野．無奈新東西，新思維，又非一朝一夕可以培養或爆出來．所以自己都有話而說不出話來．

覺得不進則退．

除咗跑步，肥龍希望喺各方面都有更多既突破．

於是，喺未知下一步情況下．呢篇，應該係我呢個地盤入面（暫時）既最後一篇．

又，如果日後有新既題材，甚至形式，或者再會有一個新既開始.

不過到時大家再見到既，可能係「另一面肥龍」咧．

＊＊＊＊＊＊＊＊＊＊＊

最後，我想借呢度多謝咁多位曾經到過【老sell遊記】光臨、留言、及路過既各路英雄俠女.

因為冇你地既留言及到訪，相信我唔可以保持動力寫到今日呢一刻．而且，每當接收到電郵通知有新留言，早就已經歡天喜地，立刻打開電郵細心閱讀，又再回覆．就算素未謀面，每一次大家既說話及支持，就彷如親耳聽到一樣，非常親切．

另外，更加多謝（曾）有將呢個地盤連結既扑友，多謝你地既交流及連結．令我呢個扑可以喺你既blogroll上出現，實在係我既榮幸．Thanks!

＊＊＊＊＊＊＊＊＊＊＊

祝大家生活愉快，繼續　Happy Blogging! ^^

大家再會了！

星期日，你得唔得閒?

準備好未?

最近不論喺公司或打開電視，不時都會聽到呢句說話．準備好咩野？咪就係「渣打馬拉松」囉！

其實距離比賽日仲有４日，可以準備到練習既，都已經做得差不多，只係希望喺最後關頭，要保持身體健康狀況，注意飲食，盡量休息，同埋做好一啲細微既準備功夫．因為平日肥龍跟一同練習既友人已經習慣咗早上練習，所以對比賽時間（早上７時正）既適應，應該唔會有太大問題，只係喺比賽當日要再早少少起床．

另外，由今日起，肥龍開始準備早上６點左右就起床，然後就到樓下附近地方做些少（約３０分鐘）緩步跑及伸縮動作，再先去返工．

而今晚放工後，就會到維園領取比賽當日所需既號碼布及晶片．

再睇天氣，天文台預報話２月１７日(星期日)天氣如下：

風 　 ：東至東北風5級，間中6級
天 氣 ：多雲，有幾陣雨
氣 溫 ：13至15度
相對濕度：百分之75至95

照咁睇，當日除咗氣溫一般外，亦準備好要同其他跑手一齊風雨同路．準備好，大家都加油！

幾個百份率

放假前，一位同事拿著一份似計劃書既文件見肥龍，打開一望，原來係一份有關喺呢個農曆新年期間為長者服務既計劃，希望肥龍可以捐款支持一下．而同事主要負責為幫助長者喺過年前打掃家居，同埋安排及與長者一齊食年飯，順道問候一下，令長者感受到節日氣氛及其他人既關懷．

又，肥龍其中一位親戚參加咗苗圃行動舉行，展開為期約一星期既【新春助學行北京】活動．由初三日起，經已出發到北京，依家應該仲係在路途上努力緊．

同事親戚，出錢又出力，有時間參與，當然最好．其他人就算因為工作所限，未必可以出力，咁其實出錢都可以係一種支持，一份心意．而肥龍就係多數係後者．

相信各位每年農曆新年都有機會派同收利是．除咗個別情況（如公司老闆或大富之家），一般利是銀碼大概約幾千至一萬元左右，如果折合計，又大概為年薪中幾個百份率．當然，派同收利都是講意頭，而習俗亦有其可觀性，但如果各位願意把呢幾個百份率中既部份或全部捐俾其他更有需要既人士，呢個意頭可能更大更好更有意義．

而有其中幾項肥龍覺得一直非常重要更需要大家持續既幫助，（絕對分次序）分別係（一）老人健康及生活，（二）各級教育及（三）傷殘人士醫療及生活．因為，喺歌舞昇平中，老人小童及傷殘人士所遇到既情況，大都唔會隨經濟轉好而變好，卻又往往會被社會忽略既一群（一環）．

Run, Fat Boy, Run

望著日曆在倒數，跟賽前最後既兩次練習．

戲及內容其實無關，不過戲名夠catchy.

但就要等到三月先上映．到時，空閒唔練習既日子就去睇．

小數怕長計

其實自從第一次到日本到已經去過幾次既今天，腦袋一直有一個問題在思考．．．就係「點解喺日本街上，咁少垃圾桶既？」

有人話日本人普遍公民意識高，加上習慣將垃圾收好並帶回家處理．而且更會將垃圾分類，再各自回收，所以咪咁少垃圾桶囉．咁事實係咪真係咁樣，又或者只係講咗一半呢？於是，肥龍就往搜尋器輸入 "garbage bin usage in Japan" 試下手氣．結果，搵到從一個叫【Japan for Sustainability】既網頁上睇到呢篇．從報告上睇,相信喺推動公民意識之餘，喺日本(起碼在Hino City)，為咗減少廢棄物，正在提倡「用者自(負/付)」既概念，從而希望國民減少製造垃圾. 不過肥龍今次著眼點並非在於減少廢棄物量方面，反而想帶出兩個情況，然後從成本及規模去思考．

情況（一）
喺人多人口稠密既地方設立垃圾桶，並且定期定時，會有工作人員會到垃圾桶所在位置收集垃圾，放進垃圾車，駛往垃圾處理中心／堆田區處理．

情況（二）
不設立或盡量減少設立垃圾桶位置，定期定時工作人員會到民居住所或辦公室附近垃圾收集處收集垃圾，放進垃圾車，駛往垃圾處理中心／堆田區處理．

如果睇番兩個情況，可能會覺得差不多，始終都要搵工作人員定期定時去收集垃圾，送去垃圾處理中心／堆田區處理．但係情況（一）跟情況（二）既最大分別，就係垃圾桶既數量．不論使用任何物資，製造垃圾桶始終有一個成本，而且仲有保養及損壞既情況，如果只係講緊一兩個，當然唔係大問題．　不過如果講到係一個城市甚至於一個國家所需要既數量，大概已經心裡有數，可以係一個好龐大既數目（金錢）．另外，單單設立一個垃圾桶只係一個收集垃圾既工具，但當中使用既消耗品如垃圾袋，垃圾車因為行走路線加長而使用能源增加等，都會計算入收集垃圾費用當中．即係話，垃圾桶數量愈多，收集垃圾費用亦相對愈多．

結果，從整個關係鏈上只要從起點著手或者因為著眼點不同，初步睇（希望之後有時間可以搵到啲實質數據去支持），可以把問題帶到精簡及高效益上面．咁小數怕長計，諗如果可以將省落黎既錢再放入綠化項目或其他更有用既資源上，呢個，可能係一個唔錯既政策．

咁以後喺諗「點解咁少垃圾桶？」既時候，或者可以從另一個方向諗．

電話鈴聲 - 入歌仔

喺差不多一人一手提電話既今日，加上音樂檔案非常方便形成及個人化設定下，唔同人使用既手提電話可能都已經裝上唔同喜好及形式既電話鈴聲．而且好多人既手提電話已經變成MP3機，通常使用最流行既歌曲作鈴聲．

不過其實喺冇幾耐之前，因為NOKIA開發既緣故, 曾經，曾經流行過輸入電話鈴聲這種玩意．除了可以自行創作，更可以攜帶手提電話到販賣手提電話店舖花每首十元八塊輸入預設既樂曲，更甚至可以買本印滿當時得令樂曲既書刊返屋企自行輸入．

咁有錢既，當然可以花幾十元去店舖輸入樂曲啦．不過喺資源所限既情況下，又想搞搞新意思，有時唯有去諗一啲辦法，可以為自己既手提電話輸入與眾不同既電話鈴聲．除咗上面講既方法去獲得心目中樂曲既曲譜外，有時就要做少少功課，就係要先搵心目中樂曲既原來五線樂譜，然後根據五線譜上音符，一個一個咁記成手提電話既曲譜．不過呢個方法，對充滿音樂(死)細胞既肥龍，真係唔係一件容易既事．而且，又會為過程用上不少時間及精神．講真，有時做功課都未必會有咁勤力同上心．

又由於當時手提電話內置記憶有限，通常唔可以成首歌入哂(除少部份歌如「有隻雀仔跌落水」等)，所以現實往往只可以放其中一段比較搶耳既去輸入. 不過始終記憶位置有限，結果有時就會發生播到一半就停(唔夠記憶位置)或跳音（Skip咗部份音符）既情況出現.

肥龍就曾經因為肥媽想輸入「帝女花」已諗爆頭．最後始終要同肥媽解釋記憶容量既問題，不過就唔知佢有幾明白．後來，因為一些software可以將原來MP3檔轉成電話鈴聲，過程改善咗唔少，起碼唔啱音既情況減少咗多，而且時間上亦方便快捷咗好多．

如果按照上面表示音符去輸入, 以下會是甚麼歌曲呢?

Temp = 125

58 6 29* (7)** 7 18* 2 3 (6)9** 6 18* 7** 6 (5)9 2 68 5 4# 4#9 (3) 48# 4# 3 4#9 78 6 69 4#8 599 588 6 7 (3)*9 78** 1*9 28 7**9 69

後記：原來有位高手：杜Ｂ記事 －電話鈴聲估歌仔之解迷編

Leap years

無意中往月曆看，發現2008年原來是「閏年」．

其實多一日少一日，生活上沒有分別，只是代表日曆上多了一張(2月29日).

今天相信所有電腦程式已經顧及這個情況，不會有甚麼問題．

不過記得有年讀書上電腦課堂時，曾經因為要寫那個與萬年曆有關連的程式，就是為了要準確計算那「閏一日」，要去自己設定計算測試寫下的方程式．

錯了，又再寫．不過最後，還是可以完成，可以準確計算閏年的．

不過，很好奇這個情形，(機械)手錶上的日曆又是怎樣操作呢?

酎

肥龍雖不勝酒意，不過還是貪玩兼好試．上次仙台一行，初試當地燒酒及果實酒，味覺不錯，特別是柚子酒．

於是，特意買了兩支不同的果實酒回港，等今個農曆新年，朋友到訪時可以一同淺嘗．

希望大家都有個快樂既農曆新年！

寒冷下堅持

距離2月17日仲有差不多兩星期，理應把握時間，加緊練習．奈何遇著持續既冷鋒，更下著雨，令本來已經賴床既軀殼更不想動身，想個藉口，不去練習．

就算已經準備充足，做了熱身，不過就著雨跑，更覺寒冷，更需要保持一份堅持．

就是練習完畢幾位坐在茶餐廳吃著熱騰騰的早餐，感覺還是一樣．

嗚～～真冷！