電腦
因為使用開既電腦HD瓜咗，而另一部電腦既中文輸入又極之唔方便，結果就係少咗寫文，亦少咗留言．本來都有幾樣野想寫，結果可能都係不了了之．
馬拉松
自己都控制唔到，不過氣力同狀態正由渣打半馬後迅速回落．雖然唔可以話係藉口，之但係喺濕度超高既天氣下練習，只可以講一句：「濕哂～」
距離比賽尚有廿三天，未來既練習，除咗要逐步加長距離及耐力，更要喺心態上加強一點．
因為初次跑全馬，心理上覺得目標應該放得保守一點、低一點，最緊要完成全程，完成時間反而定得鬆一點．不過發現問題係當目標定得保守時，準備時既心情亦隨之而放鬆，最後反而影響番完成既確定性．
所以，可能都係果句，態度最重要．
舊同事
如果有留意開之前喺度肥龍講過工作間與同事既舊文. 曾經有位舊同事因為工作上做法上既問題，與肥龍互相開火．
跟住過咗個零月，呢位同事就向肥龍提出辭職．
雖然同事冇講出辭職背後既真正原因，不過．．．肥龍心裡有數．但肥龍覺得既然公事公辦，公司有公司既程序及應有資源，非一個人主觀地可以話變就變，立即執行．況且處理上自問亦冇任何偏私情況，最後選擇冇刻意去解釋．
最近與該舊同事再見面．席間舊同事透露今天正再套入當年既處境，只不過，今次唔同在身份對調咗． 自己做咗當年肥龍既角色．
及後，舊同事向肥龍講咗幾句，今日終於明白當日肥龍所講及所想．
聽完，心中感到一份欣然．
與舊同事相約及後再見面．
6 則留言:
嗯，講到態度嘛，唔知我又係唔係太hea，太鍚身呢？我永遠都同自己講，我仲有排跑嫁，所以永遠都係安全第一，完成次之，時間排最後...但係，在我今次發現呢，十公里已經太易啦，我實完成到但係又從來無認真地time過，我連練習時都從來唔計時，咁又點可能會在一小時之內完成呢？
我覺得，個態度既掌握同埋平衡，真係好難呢...所以，乾脆上半馬，由頭來過！
大佬, 小9反而係呢個又濕又滯既一個2月...開始左想實行既好耐但又一路斎講既習慣, 就係每朝都跑完步先返工!
事在人為, 態度最重要!
人生, 要去搞掂自己, 亦都只係會可以搞掂自己。
samsara,
態度真係好重要．好多時，你會發現，講能力，其實係有既，甚至已經卓卓有餘．不過最後點解都會做唔好，或者會半途而廢呢？
如果對作為興趣既跑步而言，咁講，可能重咗．但係千真萬確既係，明明一月份做到既成績，就算keep住練習（雖然距離減少至10公里），點解到二月尾反而做唔返一樣既成績呢？
最攞命係，跑到11公里左右，真係再跑唔郁．
當然客觀環境在改變（如天氣、溫度），不過我覺得差別唔應該咁大囉．
又咁，喺星期六練習完後，自己都唔多滿意．於是，決定的起心肝尋日再跑，而且係一課16公里．結果係．．．又得喎！而且時間比之前既練習仲要快，身體感覺仲要好！
我同自己講：「認真去練習，盡情去比賽！凡事皆可以，分別在態度！」聽落好鬼老土，而且咁大個人先咁講，不過喺跑步上，我又的確明白呢個心態．
on dog,
每朝都跑完步先返工！？呢樣我都有諗過，不過都係同你之前既情況一樣，停留喺斎講既層次囉．不過如果以10公里計，如果要跑的話，最遲朝早6點半就要起步．否則就算返到公司先食早餐時間都好緊呀～
加油呀！
另外，其他野理唔到太多，都係搞掂自己先．
肥龍哥哥：
多謝你呀，我又諗通左ｄ野。
人生苦短，一係唔做，要做就要認真。
所以，選擇自己真真正正喜歡的，努力地堅持落去。
而且，如果唔認真既野，就無謂做啦，留返ｄ時間比真正重要同喜歡既事同人啦。
samsara,
你講到如果唔認真既野，就無謂做啦，留返ｄ時間比真正重要同喜歡既事同人啦.
我認同呀～ 而我自己又一套方法，就係每次做事既時候，都會把呢件事看成最後一次機會去處理，盡力去做，更唔希望要番手去做．
咁樣，雖然有時壓力會隨之而增加，不過可以盡力做既感覺又真係好正架！更重要係，如果咁樣做，因為已經盡咗力，反而對之後既得失看得比以前輕咗．
一個人能力有限，又有技不如人既時候．重點反而係對得住自己，向自己負責．
另外，我仲覺得城市人實在太多野忙啦．不過當中有幾多係必需或重要，一切在各人心中．問題係，大部份人都充滿好奇，不時諗住可以提升生活水準既方法（我已經寫得好正面架啦），所以好忙囉．
發佈留言