26.8.08

爭拗

今晚,同兩位舊同事相約食飯,講開辦公室內團隊中同事間因公事上既爭拗,其中一位,醒咗肥龍兩句.

*************************************

當同事間有爭拗時

好既團隊就係,大家係以解決問題為依歸,最後得到共識,不斷改善.

差既團隊就係,大家係以自己立場為重心,最後問題依舊,不斷重複.


*************************************

兩類既團隊,肥龍都曾參與其中.亦曾為過堅持所謂既立場,喺相同既問題上,討論一次又一次,結果情況未得解決之前,浪費咗唔少精神及時間.

工作上既爭拗有時無可避免,除咗堅持立場,肥龍又眼見唔少人抱住「相嗌唔好口」或「多一事不如少一事」既心態,又可能覺得自己既論點有不足或與身份不符,最後選擇沉默,啞忍.其實,咁既心態及手法,選擇唔去討論,亦只會令問題延續,而問題唔會解決及消失.

有時爭拗(或者講為“討論”更為合適),未必只係要說服他人,反而喺過程中可以不斷反覆反問自己既觀點,未知彼先知己,可以清晰去表達自己(有時甚至突然明白對方唔同意既地方及理由!聽落好似好矛盾,但就係一次親身經歷),對個人言,獲益可能更大.

所以肥龍一直對“爭拗/討論”抱有正面既看待.隨著工作及職位上既需要,經常要求自己及鼓勵同事講出心中想法及感受,然後一齊嘗試搵出做到/做唔到某件事既原因.

而呢個過程,亦變成職場上一項好重要既技巧及經驗.

2 則留言:

安諾勿斯 說...

人與人關係千絲萬縷,當有利益衝突,爭拗其實已係最後o既手段。

唔係唔想正面看待爭拗,不過人實在有太多hidden agenda。要清楚知道人地o既需要,等如揭人底牌。在缺乏互信o既情況下,畀人知道心中o既真正需要,談何容易。

英倫肥龍 說...

安諾勿斯,

你既講法,或許係假設每件事都會有hidden agenda.不過我既睇法會有少少出入(特別係工作上),如果無可避免,反而係諗如何要令呢類hidden agenda變得次要.

有時我會諗其實會唔會有辦法可以令各類公私既要素都列哂出黎.公事上既爭拗,始終覺得唔掂可以講到掂.問題係各方可唔可以揾出一個立足點(唔一定要係共識),然後再喺之上建立討論既基礎.而呢個立足點又要客觀.

咁講可能太抽象.譬如說銷售區域劃分,可以有好多個方法去處理.而每個老銷,又可能覺得有一個會對自己有利或某一啲方法對自己冇利.喺決定如何劃分之前,喺我既情況中,要留意既反而係究竟劃分既重點係咩.

係希望達成“公平”分配?定係大家尋求有一個基制去分配?...甚至其他著眼點,結果反應可以好唔同.

又如果用番“公平”做例子,相信每個人既睇法都有偏差,而呢個“偏差”可能就係你所提到既,可以就係hidden agenda既結果.

而如果爭拗可以令hidden agenda表面化,其實都未必係壞事.雖然我唔同意,不過亦都聽過有人利用conflicts去達成管理既例子.

另外,我都同意你講互信既重要,所以文中我就話我會(1)要求自己及(2)鼓勵同事,講出心中想法及感受既做法.

其實我呢篇加上你既comment,又令我忽然諗起「團隊文化」.不過我既著眼點係呢個「團隊文化」如何係領導者性格既伸延上.始終我都係相信果句說話:「有咁樣既老闆,自然有咁樣既下屬」囉.