寫得太多

平時見麥浚龍及其消息都主要從報刊得知，而且都以負面居多．至於其他，實在好少留意．不過如果認真聽下，其實都會發現偶有佳作既．

人好多時都係憑印象去認知一件事或一個人．麥呢個情況，事實上喺生活上及工作上好普遍．事實上唔少對麥有負面想法既人當中，大部份人都唔知佢既工作有咩，更甚未曾聽過佢既歌．

尋晚回家路途上從收音機聽到麥喺電台既訪問（同場仲有倫永亮）．麥講到與倫今次合作既因由及過程．由於麥對倫既音樂既欣賞，麥就喺冇唱片公司安排下，親自打電話俾素不相識既倫提出今次合作既想法及請求．

而麥所以決定選擇親自打電話既原因，除咗想表示出誠意及對倫既尊重，更覺得由自己親自講出想法比由公司安排下既合作，更有意義及可以直接講出心中所想．

可以知道自己既想法，更會付諸實行去爭取機會，呢種態度，特別喺聽到唔少懷才不遇既今時，實在難得及可取．

如果連自己想得到既，都唔識自己爭取，反而期盼其他人既安排及幫助時，得唔到機會，又有咩好講呢？

另外，喺今日大眾習慣使用sms，email及其他文字媒體溝通既時候，有時一個短暫但直接既對話，可能比一篇長篇大論既文字，更可能詞簡意駭，令人感覺更深刻．

可能有人會話呢個係文字媒體既特色及局限，不過反而覺得如何選擇及利用適合媒體更為關鍵．

唔少人喺msn，facebook， blog， twitter．．．各式各樣既網上媒體寫上自己既profile，一舉一動，睇落好似令親朋戚友更了解自己既一切事件、情感及對事物既睇法時，事實上又係咪真係咁樣呢．

有時只怪寫得太多，卻忽略或少咗與人溝通既感覺．

抄一句周耀輝既歌詞:「文字沒有了 人類突然啞了」

講到底，除咗傳遞訊息及意思，溝通中既「感覺」亦重要．



(後記: 唔知係咪Blogger系統問題，之前寫完按下“Publish post”後，內文竟然無影無踪! 呢篇已經係第三次寫，如果仲係post唔到，決定摺blog! >_<")

Shooting Games

肥龍認自己鍾意打機，除咗winning同賽車games之外，就一定係Shooting Games．

唔知係已經脫節定其他原因，硬係覺得以前既games不論造型、畫面及玩法都比依家既出色．

(隔離呢張係今日忍唔住買既Fantasy Zone主機連16T既bomb!)





而肥龍既五款心水選擇就有(排名分先後)：
1. Twin Bee
2. 1943
3. Fantsay Zone
4. R-Type
5. 沙羅曼蛇

【Twin Bee 畫面】


【Fantasy Zone 畫面】

爭拗

今晚，同兩位舊同事相約食飯，講開辦公室內團隊中同事間因公事上既爭拗，其中一位，醒咗肥龍兩句．

*************************************

當同事間有爭拗時：

好既團隊就係，大家係以解決問題為依歸，最後得到共識，不斷改善．

差既團隊就係，大家係以自己立場為重心，最後問題依舊，不斷重複．

*************************************

兩類既團隊，肥龍都曾參與其中．亦曾為過堅持所謂既立場，喺相同既問題上，討論一次又一次，結果情況未得解決之前，浪費咗唔少精神及時間．

工作上既爭拗有時無可避免，除咗堅持立場，肥龍又眼見唔少人抱住「相嗌唔好口」或「多一事不如少一事」既心態，又可能覺得自己既論點有不足或與身份不符，最後選擇沉默，啞忍．其實，咁既心態及手法，選擇唔去討論，亦只會令問題延續，而問題唔會解決及消失．

有時爭拗（或者講為“討論”更為合適），未必只係要說服他人，反而喺過程中可以不斷反覆反問自己既觀點，未知彼先知己，可以清晰去表達自己(有時甚至突然明白對方唔同意既地方及理由！聽落好似好矛盾，但就係一次親身經歷），對個人言，獲益可能更大．

所以肥龍一直對“爭拗／討論”抱有正面既看待．隨著工作及職位上既需要，經常要求自己及鼓勵同事講出心中想法及感受，然後一齊嘗試搵出做到／做唔到某件事既原因．

而呢個過程，亦變成職場上一項好重要既技巧及經驗．

擱淺

上星期五打風時南區究竟大風大浪成點呢？

其實我都唔知．

不過，睇完呢張相就會明白多少少．

斷估隻船四十呎應該冇走雞，而且可能係由一公里以外既海面吹過黎，吹到石灘上．

今日下晝跑步往深水灣時見到應該係船主既男士企喺船旁，個樣超無奈．

不過又真係冇咩可以幫手（不過有時間影相～）．

回程已見有三位警察到現場了解．

報告完畢．

每個月多少個工作天

起身開電視，睇到天文台宣佈預計喺今日上午8 時或以前發出八號熱帶氣旋警告信號．即係話，有多一日額外假期．

講起打風，喺 CK 果邊肥龍有以下留言．

唔講成本，其實跑數情況都差不多，跑少一日就係少一日，有數得計．所以有段時間，真係好矛盾．

而呢種矛盾心情，喺啱啱轉咗工既肥龍身上，分別特別明顯．

有段時間，肥龍對每個月有多少個工作天特別留心．點解？因為跑數囉．譬如說某一個月個人既銷售目標係80萬，如有20個工作天，平均計算每日至少要搵約4萬先會到數.

所以月曆肥龍除咗一個月一個月咁睇之外，仲會留意每個月大約有幾多個工作天．有時望住二月五月十月（農曆新年，五一黃金周及十一國慶）既月曆時，都會覺得幾頭痛．甚至要喺前後諗定啲promotion，希望可以追番呢啲時候缺少咗既數．

可能有人話咁訂單銀碼有大有少，咁拉上補下，影響應該唔係好大．咁對一啲冇零售，只接外國訂單既公司，或者可以咁睇既．不過對於肥龍呢類要對中港客既老銷，情況就好唔一樣．因為大部份交易，除咗個別大客舊客，都需要同客戶面談．有時辛辛苦苦去cold call，都係想成功約一個會面既機會，再進行銷售，週而復始直至有比較穩定交易既客戶群出現．而且做銷售有一個局限，就算你真係真係好努力去見客，做好每一次銷售，不過決定權始終落返喺客戶身上，老銷可以做就係促銷及做好份pipeline，令手頭上既prospects有更大把握．

因此，喺呢個mechanism出現之前，每個月有多少個工作天就變得非常敏感．

正如CK所計算，少左一日做生意，一個月既銷售生產力就係咁唔見左接近4%．又如果個別公司既commission scheme係要到數9成先開始有錢收既話，呢4%就可以好決定性啦．好似今個月已經因為打風而額外放假2日，跑數既壓力都咪話唔大囉．

相比其他手停口停既老銷（即主要靠佣金收入），肥龍已經算係待遇比較好既一群．

而講到呢度，都只不過講緊一個老銷既情況及數字．可以想像一下，當一位要管理有十個二十個三十個．．．銷售員既銷售經理或老闆，呢個情況有幾重要及擔憂，可想而知，又似要望天打卦，心情好鬼矛盾．

又黎...中哂!

本來安排咗聽晚去澳門睇【ZAIA】，睇怕今次要「泡湯」囉．．．

(8月21日晚更新)

美知留－瑠可－小武

當每次聽到此曲旋律就會浮現起【美知留－瑠可－小武】同場既畫面．

未必係心中日劇首選，不過似乎好耐冇睇過一套情節細膩而且深刻既日劇．

五個人既故事睇落平凡，輕輕淡淡，擦身而過．

不過每個角色背後，卻一直存在心底既困擾，舉步維艱．

Love - Liberation - Agony - Solitude - Contraction

而角色間之關係、遭遇與對白，實在深刻，又令人傷感．

難得，劇情與曲旋律又如此配合．

餘暉

重溫

慶幸曾經跟唔同風格，又各有背景既上司合作．

每次當工作上覺得迷惑，猶豫咁準備下一步時，自然想起當天唔同上司身體力行既教誨及指導．

又回想當時佢地如何面對，如何處理，完成所要做既任務．

當閉目重溫，畫面就如慢鏡一樣，一舉一動重現一次．

至呢一刻，心裡自然感到放鬆，信心又不自覺咁建立起來．

超強

M.Phelps真係超強～

一屆八面金牌絕對係前無古人，而且當中包含七個世界紀錄加一個奧運紀錄．

實在無懈可擊！

女子馬拉松

當第一名選手（羅馬尼亞選手）跑入鳥巢一刻，近全場觀眾站起來拍掌打氣既畫面同氣勢，真係冇得頂呀！

雖然由後段先開始睇，不過只係睇選手既體能及堅韌，個過程都已經好好睇．

亞季軍之爭（兩名中國選手對兩名肯亞選手），咁長既距離（全程約42公里），最後只係兩秒多之差，中國選手只得第三及第四．

題外話：
賽前就算留意空氣指數及天氣，怕會影響選手呼吸系統．不過沿途留意，點解會有咁多工作人員車輛喺選手（群）前後出現既？數落既就有標示比賽時間車輛，又有工作人員車輛，仲有拍攝車輛．．．

咁講，有時雖然唔可以避免，不過可以既話就應該儘量減少使用．

莫講話跑步路線及安全，咁如果沿途不斷有車輛前前後後出現（甚至過線），排放出黎既廢氣，其實會好影響後面跟隨既選手呼吸系統呀．

飲到臉紅紅

多得朋友G相贈既入場卷，今日下晝去咗灣仔會展舉行，已經到咗最後一日既國際美酒展．到達門口，到指定位置領取用黎試酒既酒杯後，就立即飛身進場．

初步感覺呢個美酒展辦得都幾成功，除咗吸引一批專家及愛好者，又可以聚集一班來自世界各地既業內人仕（酒莊、代理及零售商）．現場所見都幾人來人往，好鬼熱鬧．而呢種場合，特別對好似自己呢類門外漢，喺有限預算下（銀包及酒量），提供一個非常良好兼（接近）免費既機會，去認識及淺嘗由唔同產區，兼唔同口味既佳釀，真係幾好架～

而參展商又可以從中探視一下本地市場及口味，兼可以同本地顧客直接面談，未嘗不好．另外場中亦展示各種配件及手工精巧既玻璃製品，更加有各類範疇既試酒講座，方便增進有關知識．

可以話，呢個文化及市場，相信喺香港只會繼續更專門化及增長．

講返試酒既情況．近期已經好少飲紅酒，反而對白酒愈來愈感興趣，特別係德國既出品．不過正如「人地出雞，你出豉油」所講，就算每個酒區試一試，酒量普通既肥龍，行咗一半經已飲得臉紅紅．

而沿途又見有唔少人一樣飲到臉紅紅囉．

另外，食日本菜就多，除非去日本旅行，平時好少會點日本燒酒，一路食一路飲．咁喺亞洲區既攤位，就試咗唔少日本各地釀製既清酒，一杯又一杯（雖然好細杯）．味道咯，就一字記之曰：「烈」．

咁當然冇空手而回，買咗三枝酒．最後滿心歡喜帶著半醉咁坐車返屋企．

1. Dr. Wagner - 2007 Ockfener Bockstein Riesling Kabinett （留返下個月同舊老闆及同事飯局時開）
2. 梅本家 - 日本梅酒　（同屋企人飲）
3. 越の磯　- 「一期一會」純米大吟釀（同好友遲啲食日本菜時開）

*值得一提係大會既海報，利用倒酒一刻既畫面，造一個亞洲既地圖（雖然冇咗歐洲美洲），訊息簡潔易明．

我想睇李靜喎 >_<

真係激死呀～仲好話支持香港運動員喎．．．

電視正直播緊李靜場男子乒乓球單打第一場，打到第五局決勝局，非常緊張之際，竟然轉哂去中國對古巴既女排賽上．．．

我明中國女排受歡迎，受注視．

我又明如果隔離台開始直播中國女排，俾人搶咗頭啖湯就唔扺囉～最怕到時個個坐定唔轉台影響收視就唔好啦．．．所以唔立刻跟住播會蝕桌．

不過就算繼續直播場男子乒乓球單打，斷估都係打多五分鐘左右啫．

最慘係五分鐘後仲未搵到有台播緊男子乒乓球單打呀～

李靜加油呀！

（最新消息，李靜最後既第五局贏咗囉！）

塞先生

呢篇本來上星期已經寫好咗，不過一直未「送出」，原因係心裡仲掙扎緊係咪仲寫呢件事．

始終涉及男人最痛嘛．

當然，對上星期果位仁兄既遭遇及所發生既情況，真係好匪夷所思，一時間仲以為佢練緊神打．只不過，感覺喺行事之前，佢可能冇做好有關風險評估囉．

唔係講失手後會唔會見報既風險，而係講稍一不慎皮開肉裂既風險．更加唔好講「卡住」既風險．呢個或然率，好可能好細添．

睇完報導一笑置之後，心諗實情係咪咁發生呢？肥龍想講既係，若果唔依報導所諗既方向，再換到另一角度去諗，話呢位仁兄完全因為好奇想知個窿有幾大，一時間冇其他「架生」（忽然又諗起好耐之前喵睇到有關厠紙筒既留言），於是靈光一閃唯有膽粗粗用血肉之驅去試，咁講又算唔算合理解釋呢？

呢個解釋，如果依肥龍細路果時既心態，其實都算可以完全理解架．

不過都成42歲都仲敢咁搏就真係．．．

奧運淨土

就算心中有唔同想法及其他理由，尋晚看過既奧運開幕禮，還是覺得非常感動．

整個開幕禮感覺萬金所砌，不惜人力物力，視覺訊息上務求做到盡善盡美．只不過對於祖國奧運夢及今次主題既意義及描寫，除咗最後一幕外，其他環節交待唔多或只係輕輕帶過，心中若有所失．

或者話中國歷史文化悠長，想講既實在太多，非一個多小時可以兼顧．

至於開幕後既比賽及各項成績，雖然作為主菜，亦只可以話係整個奧運各環中既其中一部份．當然，就情意結上，自己所屬既國家獲得更多獎牌及成績固然係好，不過對所有一直努力不懈，堅持練習既運動員及團隊黎講，發揮出自己既實力及潛能，更應及值得從心加許．

比賽成績上，更需要有比賽精神．體育屬於肥龍心中少有既淨土，而對國際奧委會主席J. Rogge　喺開幕禮時對運動員既一番說話，非常認同．

"Athletes, the Games were created for you by our founder, Pierre de Coubertin. These Games belong to you. Let them be the athletes' Games."

"Remember that they are about much more than performance alone. They are about the peaceful gathering of 204 National Olympic Committees - regardless of ethnic origin, gender, religion or political system. Please compete in the spirit of the Olympic values: excellence, friendship and respect."

"Dear athletes, remember that you are role models for the youth of the world. Reject doping and cheating. Make us proud of your achievements and your conduct."

而呢樣，就係肥龍心中，對同一“體育”世界下，既一個夢想．

深思熟慮

其實，自覺唔係一個深思熟慮既人．

譬如話今次轉行，其實整個思考過程及時間，只係用咗大約十天就下咗決定．

又例如好耐之前選擇舊行業時，其實都冇認真諗當時行業既優勢及其他，只係覺得大學畢業後轉過幾次工，so far 做得比較好，節奏比較適合自己，於是就加入之前既公司，一做就喺行業打滾咗十年．

到後來覺得走到樽頸，唯有坐低謀定往後再點走．

經常有句說話喺腦裡同自己講．

「如果只係以已知既能力去決定做定唔做某一件事的話，最後可以做到既事，可能真係有限．」

所以，耐唔耐就會同自己講，唔試過，又點知到最後唔得呢？結果得唔得？做完先知囉．

而呢份好奇心往往超過理性既思考．源於貪玩，好奇，同完成後既滿足感，到最後，心口掛個「勇」字，就決定去馬．

又好似最初跑半馬拉松，唔怕老實講，喺報名之前，其實自己一次都未跑過，更加唔好講練習，只係心理上覺得自己得，就一頭栽咗入去．如果報名之前知道會咁辛苦，可能一早已經決定唔參加．

就係到跑完之後，先知道原來21.7km　，係唔短既距離．結果，又一跑連續三年．相信還會繼續，一直再跑落去，更希望可以愈跑愈遠，愈跑愈快．

依照呢個邏輯，到開始覺得悶既時候，就再試下跑其他比賽囉．

都係一句，唔試過又點知到最後唔得呢．

按照現時路線的話...

聽朝八點最接近本港．．．所以呢．．．

最後...都係交返個波俾天文台啦～

返學心態與學野心態

其實都係之前同一位朋友A 傾偈後先發覺呢個情況．


朋友A 係一位對人生、事業好積極既人，覺得人生充滿學習機會，身邊有唔少有能力有經驗有智慧既人值得去學習．如是者, 朋友A 不斷去學習, 不斷去追求自己所想, 包括工作方面. 譬如說, 朋友A 因為係讀工程出身, 一直埋頭喺硬件數字中, 自覺對人與人之間既相處及溝通, 相對比較少及未能掌握. 就因為咁既原因及好奇心驅使下, 就認為應該試下做銷售, 希望藉呢個機會, 可以嘗試企喺另一角度去睇同一問題, 更改善自己與人溝通技巧.


結果, 朋友A 當時就喺公司安排下, 由工程部轉職到銷售部工作. 不過做咗大約半年, 朋友A 辭去銷售部既工作, 轉到另一公司工程部(負責唔同範疇) 工作 .不過從今次傾談中, 朋友A 透露辭去銷售部工作既原因, 主要係覺得喺呢半年間, 大概已經了解及掌握與客戶既銷售技巧, 更重要係與他人溝通技巧亦有所提升. 就係咁, 覺得又係時候去學習另外既技巧, 所以就有所決定.


其實朋友A 咁樣做，都冇咩唔妥．不過當再細心諗呢個情況，意見又未必跟最初一樣．肥龍問朋友A, 雖然話上咗手啫, 咁其實又真真正正學咗啲咩呢? 又, 學咗既, 期間又有幾多用過出黎呢 ? 另外, 呢啲技巧又幾常用呢? 聽完似乎肥龍有好多問題．而肥龍之所以有咁多問題，主要係因為朋友A既答案及想法，令肥龍聯想以前返學既心態．


老實講，年少讀書返學果陣時，有幾多人好似肥龍咁，以為讀完某科考試合格後，就覺得自己已經掌握呢科既內容或技術一樣呢？而對朋友A 而言，唔同既部門、知識及技巧，可能就等同唔同既學科，分別可能係一年一科定一年幾科，總之喺仲有野學既情形下，讀完一科再繼續學習下一科，到攞夠學分，就可以畢業一樣．


肥龍依家既答案當然唔同．知道隨住升班既情況及年紀增長，及到往後出黎社會做事，明白呢個往往只係開始，真正既，可能需要用年月既接觸，經驗累積後，朝著既方向．所以依家既肥龍，絕對唔介意，或者應該話願意用兩三年或更長時間去專注一件事或物．


但問題係，朋友A 既思維模式，最終目標只係「學習」．不過對肥龍黎講，欠缺實質經驗既知識及技巧，都係未經琢磨，未受考驗一樣．而喺呢個條件出現之前，呢啲表面既知識及技巧，都仲未算係你既．


而呢個情況及想法，肥龍擔心到朋友A 踏入年過三十，講求經驗及實戰既時刻時，變得周身刀冇張利，流於表面，更顯得吃虧． 老套咁講，肥龍向朋友A 坦白講出上述想法. 不過，最終朋友A 明唔明白，或決定點，都係交返俾佢自己諗啦．始終係佢既事．

接尾遊戲

幾時都覺得有童心好緊要．

特別當小童大人玩成一片時，真係好開心～

呢個．．．睇落好好玩呀~