15.3.09

我的練習記錄番外篇の東京(馬拉松)賽前準備

距離三月二十二日尚餘六日,喺完成埋黎緊既星期二最後一課既練習後,練習正式告一段落。而星期五就已經係出發既日子,亦係時候為各方面小處著手,開始要為旅途及比賽細節做好準備。

良好既準備係比賽既一部份。翻閱之前從講座時寫低既筆記,從飲食到賽前準備,到比賽路面情況,逐一重溫。

飲食方面,比賽前兩天,食適量牛肉(補血),碳水化合物(米飯、薯仔、意大利粉、生果)及蔬菜。及後喺比賽前一天,食適量肉類保持熱能(特別天冷地區比賽),以碳水化合物及蔬菜為主。另外就要戒飲冰冷飲品! 因為冰冷飲品可以令能量降低。而可樂及咖啡有興奮及利尿情況,令鈣質流失。到比賽前數小時,就食一些熱既食物(如飯、粥或通心粉),提升熱能,支持比賽時所需。

其次,對比賽路面及起伏情況之認識亦非常重要!不過。。。雖然去過東京好幾次,但係東京比賽路面情況實際係點既呢?真係唔知喎。。。好在官方網頁有有關資料,仲拍埋全程路線VIDEO,自然一目了然。初段約五公里主要係落斜,然後大部份路段都以平路居多,應該唔似渣打後段多斜路咁難應付。

喺比賽前喺腦海中幻想一下路面情況,可以令心理上準備加強一點。

至於天氣方面,預計比賽當日天氣有雲,氣溫介乎7至14度之間。其實都幾適合跑步及自己既身體狀況。不過,如果比賽開始時(早上9點正)氣溫較低的話,可能要做多啲熱身,並喺比賽初段儘量用鼻呼吸,以防因冷空氣冷傷肺部,等到之後開始進入狀態時先至轉換番慣常既口部呼吸。

另外,黎緊呢個星期,除咗瞓覺之前要做多啲拉筋運動之外,就係要早睡早起,儲足精神!

一切既準備,希望可以令自己跑畢全程,完成人生第一個馬拉松!

"GIFT" by Mr.Children

10 則留言:

Juicy Runners 說...

嘩~! 段路程VIDEO好吸引播~!
睇左先知都是在市區裡跑吧!?
咁有冇櫻花可以睇到呢?

>>完成人生第一個馬拉松!

Should be one of the GREAT issue in life!

英倫肥龍 說...

係架~主要係喺市區裡跑.咁去到淺草雷門(20km-30km)一段,或者有機會沿途見到櫻花.

又,我應該會喺比賽前一日,去上野公園附近影下櫻花呀.

Samsara 說...

櫻花!櫻花!櫻花!

就跑啦,我都好緊張呀!

又,你有朋友H同朋友G咁樣由細識到大既朋友,真係令人感恩!

市場維京人 說...

個人其實幾 jealous of you 呀,可以請假過去東京,又跑又玩。

唔好俾自己咁大壓力呀!總之加油!

Cheers!

英倫肥龍 說...

samsara,

你真係好鍾意櫻花喎!盡可能的話,拍番啲櫻花相返黎,同你share一下.

又,其實除咗H同G,仲有幾個從中學到依家都聯絡見面既好友(LCO, LKL...),感覺真係好正!

你都有吖~

市場維京人,

多謝鼓勵! 呢次出外比賽,就當係送俾自己一份(挑戰+見識)既禮物.有曰:「讀萬卷書不如行萬里路」,咁如果係跑四十二公里用腳去認識一個地方應該會係一個唔錯既經驗.

雖然星期日先跑,不過可以講既係,就算幾業餘業餘都好,準備一次馬拉松(時間、體力、堅持)真係唔簡單.不過既已到咗最後一星期,可以就係放鬆及盡情去享受比賽既一切.

Samsara 說...

櫻花係....欺騙識日文既csc去既利器,我仲tum緊lhy一齊去添,來一個暴飲暴食櫻花馬拉松!

Yes,中學同學可以成班人既傻瓜指數達99.9%,真係幸福。

你呀,要幫我sell佢地去呀吓,大家都等緊既既報告嫁吓!

Bacakara 說...

多餘既說話唔講,送太短片同龍兄 打打氣

http://www.youtube.com/watch?v=m1YSVCXPr4A

英倫肥龍 說...

哎!哎!哎!哎!渾身是勁!!

哈哈,多謝哂!

Marshmallow 說...

加油呀, 跑完係東京刷餐勁既!

英倫肥龍 說...

謝謝~其實已經諗好咗比賽完後果晚食「蟹宴」...學你話刷餐勁既!