我的練習記錄番外篇の東京(馬拉松)賽前準備

距離三月二十二日尚餘六日，喺完成埋黎緊既星期二最後一課既練習後，練習正式告一段落。而星期五就已經係出發既日子，亦係時候為各方面小處著手，開始要為旅途及比賽細節做好準備。

良好既準備係比賽既一部份。翻閱之前從講座時寫低既筆記，從飲食到賽前準備，到比賽路面情況，逐一重溫。

飲食方面，比賽前兩天，食適量牛肉（補血），碳水化合物（米飯、薯仔、意大利粉、生果）及蔬菜。及後喺比賽前一天，食適量肉類保持熱能（特別天冷地區比賽），以碳水化合物及蔬菜為主。另外就要戒飲冰冷飲品! 因為冰冷飲品可以令能量降低。而可樂及咖啡有興奮及利尿情況，令鈣質流失。到比賽前數小時，就食一些熱既食物（如飯、粥或通心粉），提升熱能，支持比賽時所需。

其次，對比賽路面及起伏情況之認識亦非常重要！不過。。。雖然去過東京好幾次，但係東京比賽路面情況實際係點既呢？真係唔知喎。。。好在官方網頁有有關資料，仲拍埋全程路線VIDEO，自然一目了然。初段約五公里主要係落斜，然後大部份路段都以平路居多，應該唔似渣打後段多斜路咁難應付。

喺比賽前喺腦海中幻想一下路面情況，可以令心理上準備加強一點。

至於天氣方面，預計比賽當日天氣有雲，氣溫介乎7至14度之間。其實都幾適合跑步及自己既身體狀況。不過，如果比賽開始時（早上9點正）氣溫較低的話，可能要做多啲熱身，並喺比賽初段儘量用鼻呼吸，以防因冷空氣冷傷肺部，等到之後開始進入狀態時先至轉換番慣常既口部呼吸。

另外，黎緊呢個星期，除咗瞓覺之前要做多啲拉筋運動之外，就係要早睡早起，儲足精神！

一切既準備，希望可以令自己跑畢全程，完成人生第一個馬拉松！

"GIFT" by Mr.Children