知人善任

對於工作上用人，好聽既話有時真係靠經驗，唔好聽就真係好似撞手神一樣，冇咩準則．

就算有如坊間書籍及課程提及既人格分析如九形人格（Enneagrams）、NLP、Myers-Briggs Type Indicator (MBTI)，DISC Profile等工具，但當應用喺實際上工作時，同事間、團隊效率及溝通成效上，又未必會見到有顯著幫助．又如果，單靠分析結果就將個別同事安排到某一崗位，喺風險角度上，未必可以減少或避免錯配情況發生．

最常遇見既情況係，當同事從一個工作範疇（如工程師）轉到另一個工作範疇（工程主管），由於所涉及既技巧可能完全唔一樣，有時需要花一段唔短既時間俾同事適應，甚或等「開竅」．

例如好似肥龍公司內有唔少工程師，奈何亦由於公司大部份員工都係工程師，所以，有時思維上又的確令人感到無話可說．

工程師應屬於邏輯既一群，如果只做內部及特定既有程序工作時（例如唔需要同客戶接觸），問題當然唔會太大．但係當中既思維過程，卻不時出現「前因後果」式邏輯（如「假如．．．就」、「因為．．．所以」、「如果．．．就」）．

所以好多時當遇到一啲系統或程序上未有指引既事情時，大都會傾向尋求程序或其他類似情況既應對方案，更有時趨向找出問題中所有對與錯既部份．

其實咁樣都無可口非，奈何肥龍覺得，大部份既系統或程序其實只不過係記錄緊現有（主要／大部份）既情況，相反咁講就往往係欠缺前瞻性，所以當遇到未涉及既情況或潛在問題時，現有系統或程序必然見得落後，及可能無從入手．

問題係，之前提及既邏輯思維喺呢個情況下未必用得上．而往實際情況去想，有效既答案有時甚至需要脫離呢種邏輯思維先可以得到．呢個情況，就如叫一位單打網球員去踢足球一樣．結果網球員會喺個人與團隊、及用手揮拍跟腳踢之間，充滿火星文及無所適從，感到非常吃力．

結果，就要由從新學習跟改變之間，作出選擇．

另外，耐唔耐肥龍就會見過，甚至曾提升過部份同事，由本來做得出色既崗位，升職到新崗位後，反而變得無以為繼，發揮唔到原有既水準，最後落得黯然無光．其實，呢個情況，對公司對同事都冇好處，最後雙方都做得唔開心．

最後又或者，好似附貼既一篇所講從行為去決定由誰做咩部門／工作　(已經唔記得幾耐之前剪落，不過相信冇一年最少都有九個月啦）．雖然作者話只係博讀者一笑，不過，事實卻又總可能係如此．

而非常同意作者所講，當性格與所做職位／工作唔協調時，效果絕對事倍功半同時，更最重要既就係，呢個可能就係（工作上）令人快樂／唔快樂既力量既源頭．