五日的雜碎

刻意喺轉工前預留既九日假期，原來話咁快已經到咗第五日．

之前本來打算趁呢個空檔，相約正放暑假既好友，到大潭水塘或蒲台島走走兼拍番輯戶外景色照片，奈何近日天氣非常唔穩定，一唔係熱死就係怕落大雨，所以就不了了之，只有另搵節目．之前自己都冇實際諗過、計劃過去邊或做啲咩，又冇打算外遊．反正覺得難得有假期，只要有心hea，做咩其實唔係咁重要，開心舒服就可以啦．

又本來都有諗過抽一日時間到廣州或深圳約舊公司同事食餐晏同傾下偈．不過睇完新聞報導話由於臨近奧運關係，內地各關卡及要道正加緊檢查，搞到周圍塞車兼麻煩，諗落都係咪搞，食餐晏啫，唔好太複雜，最多遲啲再相約呀．

結果，左度右度，呢幾日，肥龍就走咗去游水，行書展，聽講座(講SME同Design)，睇戲同留喺屋企煲日劇【CHANGE】．

因為天氣實在太熱，除非真係想同自己過唔去又或者想成為港聞一則，否則烈日當空下去跑步，其實同自殺冇咩大分別．結果，另一個運動既選擇就係去游水．但係可能太耐冇游標準池，兼身體個別肌肉少郁動，第一次只係游咗八百米左右就已經頂唔順咯．游完返到屋企夜晚兩個膊頭仲攰到死添！到第二／三日可能習慣咗，去游完已經冇咩呢啲問題啦．

至於書展呢，本來都唔諗住去．反正大部份書籍，去附近書局都可以買到．而且肥龍比較鍾意打書釘，而書展既環境就．．．咁都係趁熱鬧心態去行囉～　肥龍揀咗啱啱過咗既星期一中午去，諗住已經係第六日及食晏時間，應該冇咁迫啦，點知都係好鬼多人，Hall 1　簡直連行都成問題，莫講話可以走入攤位睇下有咩書或打書釘．Hall 2 相對比較ok．最後買咗幾本書俾自己，又幫朋友買咗渣sir既【迷失追揸沽】，行咗兩個半鐘左右就走咗．

原來平日唔駛返工有個好處，就係去睇早場．就算如IMAX　如此難買飛既戲院，一樣可以好從容咁買到好位置（其實．．．買一張飛有幾難呢？而且睇9:45am．．．哈哈～）．結果喺朋友笑out爆既情況下（因為朋友一早睇咗），終於睇咗【蝙蝠俠 - 黑夜之神 (IMAX 巨幕版)】及【太空奇兵．威E】．考慮到兩劇可能仲有人未睇，劇情都係唔講住．不過【蝙蝠俠】個故事及演員都真係好好，特別係故事內既對白及所帶出既訊息，值得回味及深思．遲啲有時間再寫下感受先．

而且IMAX真係好正，實在要鄭重推介睇【蝙蝠俠】呢類重視覺既影片，必定不負所望．除咗畫面大壓迫感強外，音響更加係一流．只不過可能首三五分鐘眼睛焦距要適應一下大畫面，但係適應咗就唔會有太大問題.

哈，講咗咁耐，都未有時間講木村既【CHANGE】～而且仲有緊接既【LAST FRIENDS】添．．．

仲有，大家如果對藍天碧海郊野景色有興趣的話，有本由郊野公園之友會、 三聯書店出版既書值得介紹一下．書名係：《Hong Kong Nature Vol.2 – From the Sky》‧同一般既相片集有好大分別既就係，本書內所有刊登既照片，都係由千呎高空，用鳥俯角度所拍攝．除咗了解及欣賞下原來香港有咁多靚景之外，仲有啲相真係影得好靚架～