球來球往

大約兩星期前左右喺留言先講過，溫布頓網球賽開鑼，球來球往，草地王Roger Federer如果今次（六連冠）斷纜的話，就戥佢唔抵．　

本來呢場由Roger Federer 對Rafael Nadal 合演既單男決賽，事因只係場地唔同（由泥地轉至草地）卻又熟口熟面關係，所以並冇抱太大期待．不過始終都係大滿貫賽事決賽，最後都係坐定定於電視機前收睇．

戰情唔再喺度多講，有興趣既可以上官方網站或其他報導繼續留意．對於戰至天昏地暗既程度，賽前完全意料不及．如果包括埋期間因天雨關係而暫停既時間，足足進行咗七個多小時．唔好話兩位球手喺場中激戰多時至筋疲力竭，就算只係坐喺電視機前做觀眾既肥龍，睇都睇到兩眼青筋暴現，更不時要趁廣告休息時間企起身鬆下筋骨．

呢場賽後被評為又一經典既決賽，兩位球手無時無刻都表現出全心全意去贏每一分，水準之高，屬近年少見．

比賽勝負自然有，而Roger Federer 喺溫布頓網球男單既五連勝之告一段落．不過最尾既一盤，實在係扣人心弦．無論那一方既支持者，都緊張得令人壓不過氣．雖然已經激鬥五個多小時，難得係當時兩位依然保持著高度既集中，非常佩服．

而勝出既Rafael Nadal喺賽後對Roger Federer所講既一番說話，實在值得欣賞．字裡行間，聽得出Rafael Nadal除咗勝不驕及謙虛外，更顯出其對Roger Federer這位對手既欣賞及尊重．

"He's still the number one, he's still the best, he's five times champion, now I have one."

呢種惺惺相惜既風度及運動精神，莫過如此之餘又令人感動!