神奈川第一

「我要成為神奈川第一!」

呢句【Slam Dunk】入面，主角櫻木花道既口頭禪，其實喺肥龍身處既職場，耐唔耐都會聽得到．

上個星期，肥龍就同一位前下屬食晚飯，席上，肥龍當然照例大噴口水花．期間講起「上位」問題，大致結論特別升職，係欲速則不達既．

記得都已經唔止一次，每當有新同事上工，經過一段時間相處合作，就曾有同事會同肥龍講，希望若干年之後，可以坐喺肥龍既職位上．第一次聽到呢類說話既時候，心中其實都會覺得呢位同事好有目標，好有鬥心．

內心某程度上亦覺得如果可以既話，加上同事都表現唔錯既話，都應該盡量幫助一把，及俾多啲機會及提點，多一啲學習機會．但現實係，通常到最後，呢類同事都做唔夠三年，就已經呻話做緊既野好單調好悶冇野學咁，再隔一陣就話要辭工走人．所以直至依家，只曾有兩位晉升為部門主管．

而隨時間過去，之後若再有新同事上工講差唔多既說話時，肥龍既反應已經唔再一樣，起碼比以前冷淡．唔記得之前喺咩環境下曾經對其中一位講過，大意話係呢類說話，講多無謂，到做到野果陣時，先再同肥龍講啦．可能同事聽完會覺得肥龍喺度淋佢冷水，不近人情，不過現實就往往係咁囉．

問題係，同事喺佢講呢句說話之前，其實會唔會或有冇諗過實際上佢要付出幾多及達成咩先事項可以完成此所想．有目標，有鬥心，當然係好，不過如果太刻意咯，就唔好啦．或者咁講，呢類說話放喺心入面講就夠啦！對肥龍呢類管理新手，咁或者仲有啲用處，會受到初步注視．不過若果遇著啲係管理老手，莫講話唔理你唔幫你不特止，到時行咗枉路，甚至死咗都未知咩事添．邊個敢講自己好清楚自己個老細先?況且你既老細都係受薪打緊工啫．

肥龍咁諗係咪偏見同有問題呢?

老老實實，同事如果真係想受到上司注視或想藉此搵機會時，除咗要基本功扎實，可以再諗下點樣可以令老細知道其最近工作進度及亮點，再同老細檢討工作表現及得到評語，可能更直接有效兼正途．