你下來我出去

連埋今日，再過多八個工作天，肥龍就要同依家呢個前後工作咗七年既工作及公司講聲再見．

今次既機會及決定，可以話黎得非常突然．與新公司談論過程尚算暢順，再加上自己早有打算，所以唔係花咗好耐時間就有咗決定．其實「轉工」對肥龍絕對唔陌生，畢業後既最初幾年，一直唔知自己適合咩類型工作，於是就曾因為唔同原因差不多每年都有轉工既記錄（冰河時期已經寫過講【辭工(一) 】，【講辭工(二) 】），非常飄忽．後來，可能（心境）老咗又心態穩定咗（其實覺得咁都唔係辦法就真），到及後既時間，只係喺兩份工作間打滾啫．

記得之前有一個同事講過，佢話十年睇一個行業，五年睇一個崗位．如果照咁講法，肥龍都係時候去評估自己身處既行業及職位．肥龍工作既行業主要服務一眾歐美買家及設廠於珠三角一帶既客戶．由於近一兩年營商環境及氣候轉變，加上歐美需求減少，生意上客戶可以話步入嚴寒，前路未明，亦可以話係非常困難經營既一段時間．雖然本身公司業務上按年依然錄有增長，不過大圍環境及條件亦覺大不如前．而長遠計，雖然話依刻情況唔會無限持續而經濟必有回復既一天，但既然已認為行業上發展將有局限，喺呢刻選擇嘗試到另一行業上工作，機會成本睇，未必係太差既轉變．

而講番自身，轉工原因唔想講太多，其實跟上面講既差不多，又可以話為變而變．不過講到底一定係想有更好發展．至於可以去到幾遠，當然就要靠自己．不過當回顧自己喺最近兩年黎既工作表現，又實在覺得自己正在退步，或者講以能力計，其實好多事兩年前已經做到，而工作經驗又一直喺度，更相信有增無減．但問題係，可能因為對工作環境及事件處境太熟悉關係，有事時，腦袋就自然會轉去一啲相對穩陣既方向及措施上，反而創意方面一直下降或者冇咩長進．最失望既仲有覺得自己做野既果團火好似愈來愈細添．

而自己就正正討厭呢個情況及心態．

又可能有人話肥龍犯賤（其實已經有），明明依家個職位及位置已經唔錯，點解要諗轉到另一領域由中間做起先得．或者朋友講得啱，依家個職位及位置的確唔錯，而且亦非常安全．而喺權力及控制方面，現有既工作的確有可以有唔少主動權，同時可以帶黎唔少成功既滿足感．不過呢種滿足感就僅此而矣，兼覺愈來愈細少．情況感覺就如玩遊戲機打爆機一樣，玩完．既唔可以再進一步，但又繼續打，只係重覆做相同既動作，期間可能有細微變化，但邊度有寶物，邊度有陷阱，大概已知一二．但係，對一位已經唔係三十出頭既肥龍黎講，兼累積咗一段人生及工作經驗，前望職場路途漫漫長，但覺長此下去，只有不進則退．

一直有個想法，工作上既權與利，有時可能都係因為你做緊個咩位啫．人走茶涼，唔撈既話自動變回路人甲，對肥龍講，絕對唔意外．但係若果可以喺冇哂權與利之下都可以袒然對話及受到尊重，咁已經算有野落袋，心足啦．而因為權與利而不思長進或者過份享受comfort zone帶黎既好處的話，就唯有講句sorry啦（道不同）.

況且就依家呢個成績，一定未係最好，絕對相信可以更進一步．

早前CK老闆寫既【究竟我有幾叻】就正好寫出自己所疑惑既地方．喺職場上肥龍可以話比較幸運既一位，起碼一直服務喺大機構，可以喺人力及資源上有較大既支持及彈性下工作．又曾遇過一啲好老闆，所以工作上一直尚且順利，而且仲耐唔耐可以跟老闆學習兼偷師添．可能真係人心無厭足或自尋煩惱，有時當自己做得順利時，就會去諗第樣野，就會去諗呢刻所做及所得既，究竟係屬於我既成績，抑或係因為有整間公司或有老闆作後盾下先得出既成績．咁講雖說多數冇咩結果，起碼今次亦唔例外．但喺評估損失風險實在有限既情況下，肥龍就以想打爆機既心態，決定去打第二部機，試下到時又可唔可以又打爆機．(雖然每個人對打爆機既定義可以好唔同)

最後，整個事情，除咗轉換新環境前有啲緊張外，其實肥龍最唔捨得就係一同工作既同事及公司內認識既幾位好友．每次諗起以前大家日以繼夜趕報價或報告，搬辦公室，食晏既畫面，肥龍既心情就會直線往下沉．

天下無不散之筵席，可以講既，最後可就只有此一句．