華麗一族

本來仲想繼續講夏天, 不過啱啱睇完「華麗一族」呢套日劇, 想講番幾句.

無可否認, 作為慶祝電視台週年既"台慶劇", 肥龍總係覺得「華麗一族」"差啲差啲". 不過唔好誤會唔好睇喎,反而肥龍就幾滿意個結局.

肥龍未睇過山崎豐子「華麗一族」既原著. 相比之前既日劇「白色巨塔」(共二十集), 日劇「華麗一族」有點"到喉唔到肺"既感覺. 而呢種感覺, 就由第一集開始一直喺肥龍既腦海徘徊, 直至最後一集先知呢種感覺係咩一回事.

相信導演事先已經有個取決, 就係邊條係主線條係副線, 而且邊樣係全劇既重點. 雖然全劇既節奏同劇情尚且流暢, 但可能因為只可以用短短九集既篇幅去講內裡既複雜既人物關係而同時又要令劇情繼續演進, 結果有啲唔錯既情節及細節只好放棄或簡化咗. 而因為咁樣有啲本應可以再發揮既地方變得走馬看花, 亦缺少咗應有既張力及劇力.

肥龍諗, 若果可以用二十集去拍「華麗一族」, 會唔會更好睇啲呢? (係咪木村片酬太貴呢? 嘻^^!)

至於點解肥龍話直至最後一集先知呢種感覺係咩一回事, 就係因為當大部份情節已經交代並出現咗既時候, 反而可以專心咁喺最後一集用兩三場戲為全劇主線同重點做個大總結. 場口雖然唔多,但反而更有張力及意思, 並且交待得好細緻同深入.

睇完全套劇, 對「宿命」二字有另方面既想法. (仲有配樂好正!)