絕不能輸

如果有睇過動畫／漫畫【Slam Dunk】既人，應該會知道上面既呢位叫三井壽既角色．

一個初中時代既MVP (Most Valuable Player)，因為一次比賽中途受咗傷，雖然經過治療，卻又因為心急練球而觸傷舊患，(以為)從此唔可以再打籃球，結果選擇咗自暴自棄，做個不良少年．（自尊受損）新仇舊恨下，更嘗試以激烈行動想令籃球隊失去出席縣大賽既機會，只不過最後並唔成功啫．

但其實，三井心裡果團籃球火，又係唔係咁容易就經已熄滅呢? 結果波折重重，重遇安西教練下，三井重投籃球部訓練，並再次穿上湘北既球衣出戰於籃球場上.

不過可能冇參加正式籃球比賽太耐，喺首次登場既湘北對翔陽既比賽初段，三井未能入狀態，而且更被對方看守球員（長谷川一志）所看扁(長谷川曾語出驚人地說絕不會讓三井壽得分超過5分以上)，完全被對方凍結．

後來因為一次進攻時與長谷川既撞擊，令跌倒既三井忽然感覺到以前作為MVP比賽時既感覺．突然，喺呢刻三井既腦裡入面，一幕幕以前比賽時既畫面不斷重現．而三井更對自己之前所作既事，特別對安西教練而言，感到浪費時間精力及埋怨，感到非常歉意．

「係呢種感覺嘞．．．」

「如果．．．如果我就喺呢一刻放棄，我．．．我就係一個大笨蛋！」

「絕對不能輸！」

再次企起身既三井，嘴角笑了，而眼神更變成另一個人．之前表現忐忑既三井，呢一刻回復成充滿鬥志、初中時代MVP既三井．

最後，三井用驚人既緊迫防守，及連續五個三分球，為本來大為落後既湘北隊，一步一步咁緊追著翔陽隊．．．

*************

最後既比賽結果其實並唔重要(當時既心態，當然唔想主角會輸啦．最後湘北勝翔陽 62:60)．最令肥龍印象深刻既，反而係三井壽跌倒後回憶起既畫面及自言自語既幾句對白．

好多時，失敗，自暴自棄，冇信心等，係因為唔想接受失敗，害怕孤獨．但喺呢個情況出現之前，又有冇反問自己到底有冇盡過力去爭取．好似三井既情況，其實自己亦曾經遇過．當以為．．．甚至認同自己既不是時，十字路口前，要面對既，其實只有自己．而可以令自己振作既，亦都只係自己．

好鍾意呢一句對白：

「如果．．．如果我就喺呢一刻放棄，我．．．我就係一個大笨蛋！」

放棄，其實一啲都唔難．好似之前講過跑半馬拉松，其實要放棄要停步，理由可以一百個都數唔哂．相反，要完成半馬拉松，最需要既，可能只係一個堅持．

可能肥龍比較阿Q，對於珍惜眼前既機會，希望得到成功，唔想成為後知後覺既大笨蛋，所以呢個心態，往往就會成為做各樣事既原動力．結果就係結果，過程中反而令自己更發現自己既潛能．而呢一刻既集中及發揮，實在對得住自己．

三井壽既故事，令肥龍學識何謂振作．當可以袒然面對自己既結果時，亦係成長既開始．

又或者，呢啲都可以叫做「熱血」啩!