10.5.09

點解要跑呢?(2009年5月10日更新)

雖然肥龍最近(特別係近大半年)成日喺呢度成日均速前均速後,講到速度或時間就似係一直練習既目標,而且對完成時間好關注及重視!

咁,或者係一種錯覺吧.

點解要跑呢?同埋為咩去跑呢?答案其實始終如一.

雖然肥龍自己要求都幾高,不過重看約三年前既呢一篇,再留意自己最初跑步既原因及喜歡跑步既理由,到今天其實依然冇變.但係,唔可以否認既係,依家跑步既質素,比最初既時候,的確專業多咗,認真多咗及目標大咗.不過,無論情況是否專業認真或大小,肥龍跑步既目標,一直都係鎖定喺決定咗做一件事就要貫徹始終既精神上.而喺呢個過程入面,需要制訂目標,進行反覆練習, 當中又會出發唔同幅度進步及提升.可以話成績及結果絕對係汗水加堅持既產品.

如果答案係咁,咁點解仲係要提及均速既練習呢?呢個問題冇幾耐先同好友傾過,大家得出既結論係當年紀去到某一程度時,速度或者已經變成一種奢侈及次要,而且亦唔可能無止境愈跑愈快.咁喺呢個情況出現之前,喺能力及身體狀況可以支持既情況下,加上適當既練習量,大家都想試下自己究竟可以跑得幾快,及可以再快多少.而呢個過程,可以睇為如何評估自己既極限.

呢種可見既提升感覺,非常良好,同時亦為下一次練習注入動力.

另外,更現實既考慮係,如果真係打算參加一部份需要提交比賽成績去確認比賽資格既比賽時,就別無他法,只好拼命練習去達到要求啦.

而且,撇除貫徹始終既精神及比賽資格,肥龍又特別鍾意感受比賽時既氣氛,更希望可以到(世界)唔同地方,旅遊之餘,更可以運用雙腿去認識世界及了解各地既文化.

Happy running,無論何時何地,由起點一直跑到終點,完成比賽,就會係比賽既目標.至於完成時間嘛,只要用合適既速度去完成就可以啦~

喺有生之年,多得家人支持及諒解,可以做自己開心既事,而且可以健健康康去做,係一件好滿足又幸福既事.

而肥龍自知貪心又心多多,不過生活上既平衡亦好重要!不要為一件事而忽略其他人及事,所以學習分配亦係練習時既目標.

(2009年5月10日更新)

最近睇過一篇有關電影【ULTRAMARATHON】既訪問,導演J.B. BENNA希望成立JOURNEYFILM並拍攝多套有關跑步既紀錄片,完全係因為想鼓勵地球人熱愛身邊既大自然及活得戶外一點,總好過經常留喺室內流連。

「愛上跑步,並有興趣參加世界各地既比賽,不但令你體會跑步既快樂,更令你有更多機會去睇到世界唔同既地方。希望透過我既電影及DEAN JARNAZES, 令更多人愛上跑步,過著簡單直接既生活及保持健康!」(from Milk Magazine, Issue 407)

8 則留言:

Bacakara 說...

龍兄絕對係小弟既偶像....!

呢幾年跑步,由初初為左參加比賽,到變成生活習慣,其實個人越來越懶 (成日踢完波就當跑左步)。

不過看了睇龍兄既跑步文,可以鼓勵同提醒自己,跑步不只一個人,世上還有很多有心人。

要繼續努力!!!

市場維京人 說...

同意 Bacakara 所講吖,肥龍兄嘅 blog post 真係可以鼓勵自己吖。

北區肥龍係我最尊敬嘅 runner 之一,好鬼配服呢。

大家加油!Yeah!

市場維京人 說...

咦?手快快打錯,連南區肥龍都變咗喺北區㖭。
;P

英倫肥龍 說...

兩位真係言重啦,肥龍只不過係將自己練習實際遇到及所思所想點滴稍為記錄。況且路上有心人何其多呀。

至於跑步,各有各忙,不過可以肯定既係,如果你喜歡跑,不論何時何地,自然可以做到。

大家都一齊加油!有機會你地都分享一下啦~

Samsara 說...

因為喜歡。

Juicy Runners 說...

Why you run?

Gump: "Just feel like running!"

Unknown 說...

你個 blog由之前的生活小品 blog,進化到而家一個差唔多完全講跑步的blog,勁!

英倫肥龍 說...

samsara & on dog,

當跑步已成為習慣,呢條問題已經唔再係問題.而且可以做喜歡做既事,已經係一種快樂.

aldous,

小品我都想而且都會寫,不過都唔知由幾時開始,跑步就變成主調.另外,又見有幾位都鍾意跑步,就開始寫下練習及比賽時既點滴呀.講真,勁咩鬼吖~不過勝在全部都係親身經歷,對自己都係一份記錄黎.