26.10.08

我的練習記錄 (10 of 24)

保持運動量及距離

經過上星期既比賽,耐力及狀態獲進一步提升.喺無刻意增加運動量及距離下,今次重點係希望先將上一次比賽既感覺保持.

另外,只係喺折返點既休息時間縮減至一分鐘左右,就立刻再提腿起步回程.

初步感覺唔錯,完成時間亦有所提升.而雙腿喺到終點後感覺唔算特別疲倦.

以10km距離計算,情況應該可以再跑快一點.相比舊年或之前比賽,亦有信心完成時間可以有所提升(2007年Nike 10km完成時間為58分鐘左右及2007年UNICEF 10km完成時間為54分鐘左右).

不過當諗到若希望喺時間上再要有明顯提升或跑超過10km既比賽時,要增強雙腿強度就係目前唯一既正道.

要再努力!





新跑鞋

經過上一次水塘比賽後,再檢查已經著咗近十個月既跑鞋時,發現原來喺鞋底部份(特別近鞋根位置),似乎經過一段時間既使用,已經損耗咗唔少.而鞋膠既彈性,亦覺得比最初時有明顯既分別.

本著【不如用咗佢好過啦!】既想法下,尋日就付諸實行,添置另一對既跑鞋(因為有會員折扣,都係HK$500左右),作往後練習及準備明年渣打半馬時使用.

今朝練習時試跑,新鞋初步感覺幾好.鞋身輕及透氣唔錯.而鞋根位置既GEL亦有唔錯既彈性.另由於肥龍腳板比較闊,並非所有品牌及型號既跑鞋都合適,不過新跑鞋既前部份設計及柔軟既質料,令舒適度及保護性間得到平衡.

而舊有既一對,依然會喺半馬前既比賽中,繼續穿著.待完全適應新跑鞋時,舊有既先再作為後備用途.

2 則留言:

Samsara 說...

哇,昨日咁熱你都照樣跑?

我本來係去行山既,但係實在熱到頂唔住,在水塘坐左陣就算,返到屋企,就睇到新聞話有人行山中暑過身...

我呢,一直都散唔到熱,我汗腺閉塞,係好少流汗既。依樣野一直令我唔取練得太勁。

英倫肥龍 說...

因為早起步及完結,其實都唔算太熱.只係要星期天早起身跑步,就真係需要少少堅持先做得到.:)

若果你因為汗腺閉塞,好少流汗既話,真係要小心留意體溫及跑步時既感覺.或者先做啲輕量既練習及伸展,等遲啲涼啲既時候,再慢慢練啦.