點解要練跑

講真，如果唔駛練都可以兩個鐘內完成半馬，我諗我應該唔會好似依家咁用心練習．

因為星期日有比賽，尋晚晚飯後休息之後，就到附近海傍練習．開始前腦海不斷掙扎，不如返屋企休息下仲好啦．

最近，從呢度知道有呢本書．書只係睇到三分一左右．不過讀到描寫跑步心態時，愈睇愈會心微笑，又非常有同感．

又有bloggers話肥龍有恆心去練習．其實，相比好多好多跑者，肥龍目前所付出既，只不過九牛一毛啫．肥龍認識一位年過五十既的士司機，每日落更後就由大埔至沙田練跑，風雨不改．而其全馬時間為四個鐘頭內(勁！).

不過真實既係，肥龍好鍾意跑步時既感覺，及感受完成一刻既虛脫．

另就如書中所寫，跑步係一種好個人運動，業餘跑手如肥龍，從來唔存在競爭及輸贏，鬥既往往係自己，及如何達成或超越自己所定既目標．但係，又唔需要太認真既，時間慢咗咯，下次再黎過囉．

始終相信，只要肯練習，目標不會遠，終有一日可以成功．

另外，喺書入面，睇到呢一句：

At least he never walked

簡單不過既一句話，或者除咗時間之外，就係一直練跑堅持想達到既一個重要目標．

2009年既半馬，已經係第四次參加．頭兩次(2005年及2006年)因為練習及準備不足，除咗完成時間差之外，途中亦因為水泡及氣力問題，行完咗一段又一段．雖然最後好歹都叫做完成，但係實情如何，自然心裡有數．

往後既一年決定加緊練習．結果，今年2008年既半馬，終於可以由頭跑到落尾，冇行過一步下，完成21公里．咁又可以阿Q啲咁講：

Finally, in my 3rd SC half marathon, I never walked.

而往後既每一項比賽，希望不論時間，都可以由頭跑到落尾，完成過終點．