防範

最近既金融海嘯及毒奶事件，發展到今日，除留意有關既跟進及善後工作外，間中都會聽到有關如果預防及防範既討論上．

不過如果細心去諗，關於防範，特別係加強監管一類，究竟係咪一個適當及有效既方法呢？或只係治標不治本既對策呢？

2002年時既Sarbanes Oxley為一例子．事實上，有幾多企業因為執行此條例而真正達致有效公司治理(corporate governance)，一直抱有懷疑．

又另外近一兩年，歐美國家不斷質疑國內生產產品既質量及使用物質，然後進行入口加強監管及產品回收．而事實上，究竟多少產品有問題，除非進行全檢，否則冇一個保障．

所舉既例子，當然唔係反對監管及對監管既重要性質疑．

所關心既，就係從工作性質上既認知，知道喺冇水晶球既情況下，好多時所講既防範，奈何魔高一丈，往往只可以停留喺已發生既情況及細節上進行．而對監管機構而言，當然因為同類事件出現，令其重要性似突然一刻間變得大咗．不過做到既所謂監管，只可能做到監察層面上. 而監管機構及其專業人員，喺缺乏前瞻性及持續既研究下，同時又要兼顧市場及客戶壓力，最後好多時好多事，只有事後孔明或似外行人管內行人，所知有限．又或者，只可以做到「知道一樣就做一樣」．最後，信心盡失，換來三輸之局（企業，監管機構及客戶）．

可能喺呢件事上想法比較負面. 能夠利用best practice 去教育及說服客戶執行某類監管既，已屬幸運既一群. 現實中，又有幾多企業主動進行內部監管或會把內部要求設於標準之上，或者監管機構主動要求客戶進行額外監管，真係唔常見．

忽然又諗起，喺全球化下，企業毛利不斷下降或追求營利時，加上產品週期縮短，各樣成本趨升，兼為滿足監管既產生而增加成本下，反而更覺令呢類情況繼續發生．就如今晚睇【新聞透視】所講，內地奶販正因為掌握監管標準下，利用個別做法，可以瞞天過海，從中獲利．只不過今次係三聚氰胺，下次又可能係另一種物質．

講返最有效既方法，當然係對企業人員及從業員既（商業）道德方面上著手，只不過問題係談何容易．