四川關愛兒童行動

如題.

可以由此往有關網頁閱覽.

正嘗試聯絡該團體及了解實際運作. 若有最新消息, 將儘快相告.

胡思亂想

媽：

妳知唔知道呢，尋日朝妳同我講果段說話內容，聽完後我幾咁忐忑．

一直諱疾忌醫及堅韌既妳，輕描淡寫地咁將最近既身體狀況話哂我知．

很少很少，妳會那麼主動，又那麼詳盡． 對上一次，應該係妳從巴士樓梯踏錯腳後跌破門牙那次吧？

後來又聽妳講由姨媽聽來既故事． 講真，聽完心情再差一截．

其實，妳心中所想所慮既，我又豈會唔知道呢？不過大家始終冇講出口吧．

咁我都知道妳會既．依一刻，就只有去覆診及向醫生了解及診斷， 再循呢個方向做．

結果都唔重要，重要係無論咩結果，一家人依然喺妳左右，會一直照顧妳啦．

放心，我心情還可以既，平時我大都係樂觀既，不過有時都會胡思亂想吧．而且妳都有講，情況未必如想像般咁差既．咪繼續留意及治療啦．

不過我聽到妳話隻手痛，我又唔開心咁啫.

業

08至09年度

除咗報稅，其實係想講今年度跑步既目標．

上年度，除咗跑咗渣打半馬，仲跑咗另外三個比賽．

今次，希望再挑戰多少少，加碼，當然會繼續參加渣打半馬，走唔甩又已經成為一年一度事件．咁其實一直仲有保持練習，自然又想試下唔同比賽，跑唔同既路線，感受唔同既氣氛．所以就想喺之外，跑多一個半馬，甚至心思思想試跑一次全馬（不過如果真既，就要再再再俾心機同恆心去練習及注意體型囉～～　諗到呢層，好自然就想．．．唉，食野真係好難控制架！）

而且個全馬呀．．．仲要睇下報名成唔成功呀．．真係好想試下異國比賽既心情．

咁，本年度目標如下：

1. Nike 10km賽 (2008.11.16)
2. 聯合國兒童基金賽 10km賽 或；澳門馬拉松 半馬／10km賽
3. 美津濃長跑 半馬
4. 渣打馬拉松 半馬
5. 東京馬拉松 全馬 (2009.3.22)

嘩! 真係要深呼吸一下，希望我得啦！

其實夏季一到，反而對練習添咗難度．因為天氣實在係好熱呀．上星期六已經跟同行既講不如遲啲以南灣做終點，然後索性跑完喺南灣游埋水啦～大家都係想練氣同做帶氧運動啫．真係好難堅持烈日下三十幾度去跑呀跑．換來既可能就係只有將跑步時間愈推愈前，避一避個日頭，唔通真係要朝早六點晨操！？

小童與海

大概聽過甚麼叫「老人與海」...就是未聽過「小童與海」吧?

很少把小童與海連起來.

海，特別是平靜的海，通常被說成深不可測，感覺靜止、滄桑又孤獨．

相反小童，卻與天真、好奇、跟朝氣成為等號．

這樣的對比及感覺，就是拍這一張時的印象．

不過，陽光普照的海，其實又可以令人看得心曠神怡．

捐血一記

又差不多時候去捐血．

不過都唔知幾時開始及咩原因，發現愈來愈怕針．

係諗起都驚．

＊＊＊＊＊＊＊

本來已經諗好咗去捐血．

路途上卻又突然想縮沙（！？）．跟住心裡又同自己講：「咪去緊囉，唔駛餚底喎！又唔係第一次捐血．．．」

到達捐血站樓下，未按電梯，點知一望水牌，無形既又恐懼開始發作．．．

喺準備既過程中，護士講得最多既一句就係：「可以放鬆，唔駛揸實拳頭住．．．慢慢．．．」

而期間其實都冇特別去聽護士講咩同問咩，一味只係識答有同冇咁囉．

（心諗快啲插針啦．．．）（下，已經插咗！？）（４５０毫升即係佔人體血液量幾多呀？）（咦，其實仲要坐幾耐呀？）

＊＊＊＊＊＊＊

捐血過程順利，大約四十分鐘左右就攪掂．

唔知係真定心理作用，今晚身體好似好攰加少少口乾，就算冇踎過低，又似有少少頭暈咁喎．

除咗可以飲紅棗水食紫米露（其實兩樣都冇），咁不如早抖早著啦．

成王敗寇

波係圓既?

守門員最好既朋友係龍門柱?

咁呢位最好既朋友，呢次，應該係曼聯擁躉．

一人一力 (二)

自從有了【一人一力】念頭之後，跟朋友同事談四川汶川縣地震後情況時候，不時提出有關助養的想法．

激動可能一時，心意卻可持續．有好多事情，災後需要冷靜的去面對．原意是在現實上領養不可行中，希望每月從生活費中抽出一部份，定期兼月復月地，向當地一名孤兒助養．希望在災後重建及成長過程中，幫助重投生活同時，提供有關學習及生活上的金錢支助，直至一個設定年限．而與此同時，希望透過正確渠道，可以跟該名孤兒定期聯繫，送上慰問及關心．說來理想，不過又可謂心靈上的一種寄託．

所聽回來的回應比想像中好．C.M.說得正確，助養，有如養育自己的孩子一樣，同樣需要責任感，又同時需要一份堅持．當然，每人都有本身各種考慮及客觀因素，選擇其他更合適自己的方法表示．而各種方式雖有不同，卻心意一致．

對於可能一時未知或未了解助養所涉及的金額及責任問題，卻又有意思助養的人，其實可以往互聯網搜尋「助養四川孤兒」，就會得到不少相關資料及消息，或許對了解有所幫助．

●助養是社會各界人士關心孤兒和殘童成長的一種形式，助養人與被助養人之間沒有法定撫養和贍養的關係、權利和義務，被助養的孤兒和殘童的姓名不能更改、戶口不準遷移，其法定監護人仍是兒童福利院；

●每捐出1000元，就可助養災區一名孤兒；（註：仍需確定）

●由於地震孤兒的領養條件還沒有明確，因為目前災區孤兒的確切數位還在統計中，有一部分還不能確定父母是否雙亡。由於搶救還在繼續，只能等災後再進一步核實．

不過正如之前留言所提及，若身處香港想要指定助養四川孤兒，目前相信仍要等待災區孤兒資料及情況核實，及有關機構提出有關方案及方式後，資料才會比較明確．如有再新發現，定必相告．

最後，希望如果有人知道有關資料，可以通傳一下．謝！

====================

30.5.2008 後加一段:

在網上見到「四川關愛兒童行動 」, 正嘗試聯絡上該團體及了解實際運作. 若有最新消息, 儘快上佈.

順利完成

肥龍呢段時間，除咗因為工作關係奔走國內唔同辦事處之外，同時，又要為香港辦事處ｘｘ週年晚宴安排而左頻右撲．

上次提到要發邀請信俾一個客，就係想搵對方參與拍攝一段有關短片．

信發出冇耐，加上電話跟進，對方亦好爽快答應及安排時間．

尋日，終於到對方辦事處拍攝，一切順利進行及完成．

而該短片就會喺下星期週年慶祝晚宴上播放．

促成呢件事，其實真係好講時機同關係，相信如果唔係用理事身份，未必可以咁有效聯絡得上．不過對方願意百忙中抽出寶貴時間，亦十分感謝．

又多謝同事細心安排及跟進．

當然，一封有禮及要點清晰既邀請信亦功不可沒，所有亦想再次感謝朋友呢次義務幫助．

而肥龍負責既部份，亦完成得差不多，等待後期工作完成，就可以告一段落．

人性的光輝

整整一個星期，看見慘不忍睹的畫面，生離死別，如此突然，又如此接近及出現．

卻此同時，又見到人性光輝的一頁，聽到看到很多捨己為人的事情，對於那份使命感，深刻感動內心．

＊＊＊＊＊＊＊＊

那些不懼長途跋涉，日以繼夜不斷發掘生還者的軍人士兵；

那些不眠不休，致力為傷者療傷的醫護人員；

那些強忍家人失散，痛失家人卻繼續緊守崗位的工作人員；

那些冒著生命安危又跑到最前，一直將最新情況報導的新聞記者；

那些自告奮勇，自攜藥物食物及各種所需到災區的自願人士及義工；

還有那些遇難一刻捨己救人的遇難者，

還有．．．

＊＊＊＊＊＊＊＊

你們做的，不會白費．

卻已告訴及帶給世人，甚麼是情操及使命．

而同時亦慶幸，至少還有你們．

有一刻，反問為甚麼在幫手的，不是自己．

＊＊＊＊＊＊＊＊

霎時又想起社會是怎樣形成　－－　社會需要各階層，各種專業，各樣崗位的人來支撐及運作．

很難想像，當危難時，一個沒有了各式各樣崗位的社會是怎樣應付所有困難．

大概不是單單只有金錢吧．

很欣慰見到不同人在不同地方，不同語言，不同崗位，不同方式，用自己可以付出的方法，同心協力，做一點事．

用自己的能力幫助別人，就最是簡單．

一人一力

國難在前，除了為遇難者哀傷，救援者尊敬又憂心，更想為地震發生後遺孤做一些事．

要把心意及關注遙遠的送出去，縱使心情是沉重，除了刻時捐款，正在思考如何把自己的關心持續及堅持．

忽然有一個念頭，這刻又想到重建時的事情．希望一切安定以後，可以循有效可靠途徑，助養一名遺孤．

希望付出自己生活上的一部份，雖然（現實上）領養是不可能的，卻可以幫助到遠方另一個需要各方協助的人，及為對方送上關心及支持．

而當自問自己可以做甚麼，正在做甚麼時，可以叫自己堅持一點．

更會把這個念頭跟身邊的朋友介紹，希望可以一人出一分力，一人助養一名遺孤．一個好，十個好，望有心人積沙成塔，只要相信，就能做到．

茫

望住電視螢幕畫面轉動，腦內重複著一條問題．

「在遙遠一方既我，實際上，可以做甚麼？或正在做甚麼？」

我唔覺得因為一直付出，所以過著唔同既生活．

我唔覺得因為身在香港，所以唔會遭遇眼見既危境．

我唔覺得我所擁有既，係應得既．

我唔覺得我所擁有既，一直擁有，唔會失去．

面對著此等環境畫面，心情如此沉重．

悲從中來，沉重，不過生活依然繼續．

等，繼續等．

等待既不單係溫飽般援手，等待既還有精神上支持．

因為我見到無助，茫然既眼神．

．．．．．．

平

電影本身係滿是期待，但講到底可能只不過係一個舊故事新角度既格局．不過本著【三國】情意結，還是急不及待，等著觀賞【赤壁】．

讀【三國】已經係讀預科時既事，當然當時讀過後係愛不釋手．而後來再留意既【三國】資料，大概都只係由（國內）電視劇集，或（實不相瞞）從電腦遊戲及漫畫中接觸到．又只可以話肥龍雖然已經三十出頭，不過講到【三國】情節，講到遊戲機漫畫，自中學預科後，腦袋並冇太大的進步過．

而當中有一些情節，其實一直想問，不過又唔知問邊個或同邊個講好．【三國】中人物眾多，各有特色，而且性格分明，唯獨對周瑜生好奇．初次睇完【三國演義】後，似乎已覺得，作者羅貫中對周瑜有欠一份公允．雖然明知故事七分虛構三分真實，但係，周瑜喺故事裡，屬於悲劇中既英雄，還是一個心胸狹隘既角色呢?　或兩者都唔係呢？

周瑜年輕便成就大功，加上本人謙虛寬容，相貌堂堂，精熟音律，還深得主上孫策、孫權的禮遇器重，他的妻子小喬也稱國色，是後世不少人羨慕追思的英雄形象。

在小說《三國演義》中，周瑜則被描寫為心胸狹隘，與諸葛亮明爭暗鬥的人物。

後來一句「既生瑜，何生亮？」，描寫當時周瑜酸溜溜既心情外，更覺有點時不與我既滋味．但係，反過來說，赤壁既藍本及結果，不正是周瑜之前所設計及預定嗎?　當然功勞唔可以一個人獨攬，何況赤壁一場如此規模既大戰役．但對當中行軍部署，對形勢局勢掌握及分析，又豈有一人可以跟周瑜呢位策劃者可比．

可惜字裡行間，只覺得作者對周瑜既描寫及出現，且說陪了夫人又折兵，似為帶出諸葛亮既段落，作鋪路罷．

手中既【INK】雜誌，就有一篇為周瑜討公道既文章．雖然篇幅不多(都係唔打算喺度寫內容出黎，有興趣既話可以買本睇睇，另仲有其他有關該電影訪問呀～），文中就列出不少有關周瑜喺赤壁一戰中重要及決定性既要點，睇完後似有種「出一口氣／正是正是」既感覺．

或者有人話睇書啫，唔駛咁認真啩? 嗯，我只可以答，因為喜歡，所以投入　－　投入當中既世界中．

註:(相片) 金城武飾演既諸葛亮.

我們是這樣在大自然活動

「你地做咩跨越圍欄呀？知唔知好危險架！」　「因為我地想走過去捉草蜢昆蟲呀嘛！」

「呀樂樂（別名）呀，你唔好用手捉住啦，你好似表姐咁將啲草蜢放入膠袋嘛！如果唔係佢地好易死架！」

「媽咪，點解蜘蛛有八隻腳既？」「呀樂樂呀，你知唔知黃蜂有六隻腳，所以呢．．．！？」

「你睇你吖，咁少做運動唔願郁，唔得架！快啲食埋啲薯片立刻去跑一陣呀！」

「不如你試下將隻風箏向個風車果邊飛，睇吓會點咯！」「好呀！」

「你地唔好放生啲草蜢喺呢度啦，如果唔係好易俾其他人踏死架！」

「（高八度聲線）嘩～～見到啦！風力出發站呀！你睇！好大座呀！係咪呀？快啲啦～」

「點解呢度冇燒烤爐架？個景咁靚．．．」

向風采出發

一直已留心只係一海之隔既南丫島上既「風采發電站」，卻左顧右盼，遲遲未有行動到此一遊．最近，見s-pig既風采遊記 ，被文中風光明媚既畫面及賞心悅目既描述所吸引，一心前往．

趁今日佛誕假期，肥龍見天氣好轉放晴，今朝立刻攞起相機，直標香港仔至榕樹灣碼頭，向南丫島風采發電站出發！

s-pig所寫非虛（峰迴路轉，有物翼然，臨於大嶺者，風采發電站也。），離碼頭步行約四十分鐘．果真見風采發電站迄立於大嶺上．除咗用身體眼睛去感受眼前事物風景，當然唔會少得舉機拍攝．

遊覽完畢，回途時吃過豆腐花，再喺島上午膳後，乘船回香港仔．

後期：返到屋企，將所拍攝到既相片一覽，特別係風采發電站有關相片，總覺得比s-pig所發佈有所出入（可能先入為主，覺得s-pig拍得比較好），但又一時搵唔出分別．最後發現除咗兩日天色既分別之外，原來葉片既方向大不同．構圖上，如果想要拍張合心意既相片，隨咗天氣，下次可能仲要留意埋風向咧！

更多照片．

【Red Hot Hits系列】

寫開「火熱動感La La La」，唔可以唔提【Red Hot Hits系列】．

相信唔少好似肥龍一樣三十出頭既人（當然其他人年代都會，我指後生過肥龍果啲呀～ ^_*），當年都有睇/聽過下面既歌曲MV. 其實點解會有呢個系列出現既原因都唔係好清楚，不過肥龍斷估冇痛苦，大概可能係同政府立例唔準煙草商直接賣香煙廣告有關，咁除咗戲院廣告之外，繼而用另一方式出現電視螢幕既“合法”途徑啩！？(如果有錯或知道真正原因請更正，謝謝！）

當年每次新作出品時大家有幾期待同覺得幾震撼？相信可以話用史無前例黎形容．廣告鋪天蓋地當然不在話下，而且好多時更會先預告MV首播日期/時間，咁到時大家就會準時安坐家中，金睛火眼喺電視機前收睇新作播出．而且仲好留心咁睇．除咗睇偶像，睇MV，就係如果真係冇睇的話，隨時第日返到學校同其他同學冇哂話題囉．．．

咁之後相關既CD專輯，又多數會買個滿堂紅．肥龍到依家就仲有保存著「火熱動感La La La」既CD 呀！

喺寫呢篇既過程中，肥龍特地喺網上及youtube搜尋有關資料．咁講，各首歌出現既次序（時候）已經唔係咁肯定，只希望冇搞錯及搵漏就好啦！

Enjoy~~

P.S. 除咗「火熱動感La La La」，最鍾意聽既就係學友同王菲唱既「非常夏日」．依家再聽，曲調輕快，夏日節拍，歌舞形式既表達，舞蹈員踢水及有好多個有王菲既畫面，再睇都係咁High咁正！ Yeah！

打開天空 - 陳慧琳 陳曉東 陳建穎 邱穎欣
熱力節拍Wou Bom Ba - 草蜢 關淑怡 湯寶如 劉小慧
非常夏日- 張學友 王菲
愛情傻戀La La La - 許志安 鄭秀文 梁漢文 陳浩民 李美琳 車婉婉
爲全世界歌唱 - 群星
鼓舞飛揚 - 關淑怡 張學友 黎明
我愛I Chi Ban - 黎明
火舞艷陽 - 黎明
愛火花 - 張學友
餓狼傳說 - 張學友

其他有關Red Hot Hits既文(不分先後):
Marlboro Red Hot Hits - dosss
Red Hot Hits - 網絡暴民 Jacky’s Blog
萬X路RED HOT HITS - 小小二打六

一到夏季

夏天，令我諗起好多美事．回憶都係開心事，及充滿活力動感既畫面．

除咗曬太陽同pocari，一到夏季，就自然聯想起輕快既歌曲．

好! 呢個長週末，一於再去戶外走一趟~

恬靜

好想親口講句 thank you

突如其來，滾水漉腳要出封邀請信俾一個客．

可惜自己寫極都寫唔好，負責既同事又一時唔知閃咗去邊．

只有．．．搵。人。幫。手。

最後搵水泡求救，腦海諗到你．

你又確實係專業及細心，經你一提，原來早前又真係忽略咗唔少要點．

之後既，當然靠自己．雖然你口口聲聲話舉手之勞，其實你已經幫咗（我）個大忙．而你今日放假仲要你幫手，始終覺得唔係咁好意思．

雖然電話中已經講左，不過有機會，一定再親口講句，先夠誠懇．

thank you　你呀! (都話你掂架啦～）

鸚鵡學舌

噢！Prosumer

有次同國內同事傾閒計，佢話發現唔少香港人都鍾意工餘後做運動．其實都係架，而且更留意到，身邊都存在唔少prosumers．除咗衣著講究，仲非常有系統及認真去練習同做運動．　

而「一剔」就係瞄中呢個市場，自從由PLUS開始，已經將呢個情況推向專家化，而且仲愈來愈貼身，總有一款裝備合乎你既準備．而且仲搞埋上網平台，方便用家把訓練進度及情況儲存記錄，再進行練習分析，又數字又圖表，總之好鬼pro．

有興趣既，更可以將自己數據上傳，聽落同打機一樣，之後會知道自己屬於邊一個水平及跟來自世界各地既用家進行比較添．

其實對呢個項目既關注，唔係單單同內容有關．但係當發現搵本地運動員推廣項目時，由佢地去講，又覺得特別親切喎．雖則入面講既體能訓練同內容，又的確幾實用架．而且都係果句，做運動好個人啫，冇咩好比較，又唔會期望可以攞獎既．只不過想做好啲再好啲，好正常啫．．．講到呢度，咁咪入局囉！

另外，又唔知咩原因，不限本地外地男女運動員，練習同比賽時，都覺得佢地好charm．

P.S. 支持本地運動員呀！

遲來的【投名狀】

又一次說明本人既效率．呢個星期週末，終於有時間，睇咗【投名狀】．

好耐之前睇過有人寫話：睇咗【投名狀】，覺得「兄弟不可信！」

我反過來覺得，又唔一定既．做得兄弟（所指真正交心朋友，唔係依家所謂「巴打」！），又點會唔信對方呢！而且做人防呢個果個都好辛苦啫．

從戲裡，細看所描寫既兄弟情，覺得兄弟間既婆媽，不在事事計算，反而係當一個二個覺得自己（因為唔同理由／理想／目標）背後付出許多，如何經歷腦交戰，再加一句就等時間証明，以昭兄弟兩脇插刀之情之時，及一切所為及所慮，（口中）都係話為對方好之上．

但係可能轉頭就心諗：「你問我係咪唔當係兄弟先？幫就一定幫，不過講你都唔明架啦，唔好問咁多啦～時間可以做証．而我，又唔打算及覺得依一刻有需要解釋喎．完．」

結果，有時未達成果，咪先失感情囉．本覺得其實之間冇咩衝突，只係有時一句慷慨就義既「在心中」，卻唔留意或淡化內裡始終係兩個心，期望唔一致既現實．係咪好矛盾呢？

講返套戲，幾好睇呀其實，雖謂大片格局，但睇得出有心拍（故事／畫面／選角／配樂）．兩個鐘左右，故事直接（唔代表流暢，起碼徐靜蕾果幾段就覺得一般）．又,可能角色關係，始終覺得劉德華發揮得比較到肉及好啲．

東京馬拉松?

馬拉松 ＋ 櫻花季節 ＋ 旅遊 ＋ 日本料理 ＋ ．．．(發夢中)．．．^^

好吸引咁喎．．．不過，唔知幾時有得報名呢?

(同埋希望唔會同渣打馬拉松撞期啦．．．)

不如．．．

如果，連你自己都未知你既規格或者決定點樣去做既話，老老實實，我又真係唔知可以點樣幫到你，就算我係你口中所謂既「專業」（實情我唔係！）．

又如果，你話數據愈多愈好，咁我都同意既，不過你始終要明白，數據愈多通常同時間及成本係有相關關係既，起碼，人工成本，燈油火臘都唔少得啦．況且，你所提出既「畢直」，如果照做，可能敝公司只可以滿足到你十分之一既願望，而餘下既十分之九，相信就只有落空．

另外，如果連你自己都唔知道要花幾耐時間，先可以得到一組數據既話，我可以好大胆咁講，其實，你都未試過呢個方法．要不然，當我問你其實十組數據夠唔夠時，你又可以同我講，其實呢個項目好簡單，可以好快做完，唔會花多好多時間．更唔明白點解個費用有如此分別．

通常，聽到係老銷叫個客，用十倍價錢買同一件產品．而後話付出多咗既部份，走咗去brand identity　同與眾不同既values.

而你就喺我面前示範咗，點樣付出一件產品既價錢，叫供應商俾十件產品你．

而且，我留意到你好相信自己既說話．我又發覺，可能你係一位好勁既老銷．

不如咁啦，我今日放工前掉低鎖匙俾你，而且一亳子都唔收，好等你星期六日上黎敝公司，任砌任做餘下既十分之九．

咁，你會唔會同意呢？

叉燒煎蛋飯

日日做到冇停手，總有食飯既時候．

每日時針搭正十二點，又係開飯既時刻．肥龍工作地方雖說食店林立，不過大都流於ＡＢＣＤ餐或兩餸套飯之流，千篇一律，欠缺鑊氣．而且餐牌多數係由星期一至五都係果幾樣，好食既，食得一頭半個月又已經好似冇咩選擇．

最近，無意發現原來公司附近有個大食堂（真係好大．．．），食物款式包羅萬有，可以話梗有一款啱口味．當然呢度同其他食店都一樣會有快餐常餐ＡＢＣＤ餐，不過就仲可以叫炒粉麵飯，而且即叫即炒，火候十足．

星州炒米，豉油王炒麵，乾炒牛河，揚州炒飯．．．諗起都想食（結果每次去到都三心兩意，因為樣樣都想試）．不過，最愛食點既食物，始終都係叉燒煎蛋飯．半熟既蛋，加上豉油，混埋一齊，沾上熱騰騰既白飯．．．夾埋半肥瘦叉燒，再放落口．嗯，真好味！

相同既感覺，彷彿回到讀書時代，準備食午飯先返學一樣．

呢碟叉燒煎蛋飯，除咗好味，當然唔黯然，更勾起少時既回憶．