1.8.07

身份對調

尋日同事SB氣沖沖走埋肥龍前面, 一口氣講咗佢對依家公司某個制度非常不滿、失望後, 欲立刻起身拂袖而去.

肥龍問: 「做咩起身呀?」

SB 答: 「我講完咧.」欲再起身而去.

肥龍立刻收起平時從容既面口講: 「我未講喎. 而且我覺得你咁樣好唔尊重我喎! 你既然行得入黎有說話同我講, 就應該聽埋我既回應先走. 否則, 你想同我表達咩訊息呢?」

肥龍喺呢度唔係想講SB如何唔啱, 如何唔識俾面肥龍, , 如何唔咩等負面評論. 更唔係想大家認同肥龍既對或錯. 亦唔係要SB向肥龍認錯, 講對唔住. 喺度, 只係想分享吓自己既睇法.

觀點與角度, 唔同又何妨呢? 反而只係想講如果每個人都可以換過角度, 試吓身份對調, 可能有好多事其實都可以商擬, 更多空間可以傾, 更有餘地去討論.
(雖然話唔講件事, 不過都係講少少…)

- SB覺得舊制度唔得, 結果同事士氣低落. 肥龍完全知道及同意, 所以年初已經著手開始同樓上老細提議, 討論.

- SB覺得如果年初傾到依家都未傾掂, 不如早講唔得就仲好. 肥龍覺得如果件事係重要, 就應該繼續爭取, 繼續討論, 直至有一個答案為止, 唔應該咁易放棄.

- SB覺得樓上老細傾到依家都未肯落實, 有啲拖延既味道. 肥龍只可以話決定權始終喺樓上老細手中, 一日佢唔同意, 一日都唔可以落實. 期間, 都係果句: 要繼續俾壓力樓上老細(唔同形式, 軟硬兼施)!

- SB覺得如果需要更激進先可以令樓上老細意識到問題既嚴重性, 佢願意去做. 肥龍覺得咁做其實幫唔到啲咩, 而且只會係後繼者得益. 況且樓上老細又點會咁易就範呢? 到時露咗底咪仲被動? 而且難聽啲講, 有時真係唔好睇到自己對公司好重要, 真係死路一條. 又肥龍講如果要做烈士, 不如就夠膽做完成件事攪掂先唔做, 仲有型, 唔係似依家咁一走了之咁消極囉.

咁SB衝入黎既目的, 想要咩野, 肥龍心裡有數. 某程度講, 佢都係想件事好及講出感受, 只係大家身份唔同, 手法唔同啫. 不過成件事最令肥龍唔開心既就係肥龍同SB之間既信任關係因為呢件事已經響起紅燈, 或者已經蕩然無存.

由尋晚到依家, 忽然諗起好多呢幾年間同SB共事既畫面, 徘徊喺二三線之間, 肥龍有個決定.

10 則留言:

Unknown 說...

有時打工就係咁架啦,唔滿意,咪唔好do law!等於皇后碼頭,就算班人點叫,最後可唔可以唔拆呀?!我估,SB會在一年或之後,會對自己的行為而後悔,因為我都做過SB,不過唔係講制度不滿,而係因其他事同老細搏火,要問候埋阿媽,事後其實最蝕底係自己。

xiao zhu 說...

哎呀,唔好啦,又講二三線?(C.M.,唔好嬲呀,我冇貶意架!)我覺得現實生活就要講得現實啲,有時未必需要畀太多標籤,冇標籤唔會抹殺事情嘅存在同重要性嘅。要講,我鍾意講底線。

信任同關係當然係需要時間建立,而建立左嘅,又唔代表會成世都喺度。點樣維繫,係會包括好多主觀同外來客觀元素,點會冇衝激架!如果頂唔住啲衝激,可能係基礎嘅問題、係相互了解嘅問題、甚至係人本身都會隨著環境而改變左都唔定。

我有一句口頭禪係做人如果識得同人設身處地、易地而處咁幾好呢。但係,現實裡面我就冇乜期望架,而家呢個世界,都唔係咁敢去要求人哋識得幫你諗咁多,尤其係喺工作環境裡面,上司同下屬(老闆同員工)點好都好,功能上始終都係對立面。總之揸住底線,盡做。所以我都贊成你嘅做法。

另一方面,SB 嘅做法好典型、好正常,唔駛失望,因為佢有佢嘅角色立場,記住,佢嘅角色唔單止係公司裡面一個員工咁簡單。你又身份對調,諗吓佢喇。可能唔會咁唔開心架!^_*

英倫肥龍 說...

Aldous,

你咁激?

不過我真係無怪SB, 而且因為我係企喺中間, 兩面既故事同諗法亦好清楚. 又加埋我自己既立場同想法, 依家好似抽絲剝繭咁嘗試去睇呢個情況, 時間係一個考慮, 利益(同事嗰邊)及成本(老細嗰邊)又係另一個要點.

但係SB俾我第一個印象係佢覺得點解有問題唔係要即刻解決, 點解要傾咁耐? 係咪想拖延? SB其實仲講其他人都會有咁既想法, 肥龍覺得無可口非, 但直覺更覺得係佢主觀諗法居多. 不過唔重要, 既然係問題, 就應該要解決, 理得佢係一個人定一班人, 公司大家都有份喺度做.

英倫肥龍 說...

燒豬,

我其實已經好心平氣和同抽離去睇呢件事. 而且尋日整個過程, 肥龍一直好想灌輸俾SB 一個訊息, 就係一個月又好八個月都好, 如果件事係重要, 就應該繼續爭取, 繼續討論, 直至有一個答案為止, 唔應該咁易放棄.

而且呢樣亦正正係佢(包括肥龍)工作上更應該學習既功夫, 另過程中敢講一定會有所領悟. 但如果只係自我中心, 或只須要對自己負責, 其實有幾難啫. 一句唔做就可以.

不過, 如果我唔係企佢(SB)果邊諗, 尋日我老早拍枱, 或者會有更激言論. 但我無, 我仲同SB講我都可以保持自己同佢心平氣和同佢傾, 點解佢唔試吓先聽我講呢?

但係我就真係覺得佢(講完想立刻走)好唔尊重我囉! 我同佢講, 點都好, 呢啲係尊重呀! 你尊重人人地先會同你傾架!

xiao zhu 說...

我當然同意你嘅講法,我意思係其實真係好多人,就算出黎做左嘢好耐都好,都仍然係好唔成熟嘅,我都慣左,所以勸你唔好自己唔開心啫。^^

Gavin 說...

信任關係因為呢件事已經響起紅燈, 或者已經蕩然無存

->唔明, 點解? 佢走黎同您嘈姐?

C.M. 說...

真人真事:

小弟當時是Alan公司的Last Day。

在我的辦公室內,我和三個下屬正討論我離去後,各同事之間相處的問題。突然,我的另一下屬小英走入我未有關上的辦公房,然後把一叠文件“擺”(嘭一聲)在我的桌面,然後說:“我這個問題搞不定呀,你睇下點啦下!”

我,當場扯火:“小英,我平時一向對你沒有意見,因為我一向信任你... 但是我今天要跟你說最後一番話... 你把這些東西放在我的桌面,然後不發一聲就走了,你想我怎樣? 當初我來是替你們解決問題,你現在要我幫你解決問題嗎? 如果是,那你把這些文件放在桌面代表什麼? 是送給我的禮物嗎? 還是你想我一手把他們摔到地上去?! 今天是我最後一天,你這樣對我,明天你如何對你的新上司?”

(全程語氣扯火,但心中無火。帶出的意思應該大概和你一樣)

C.M. 說...

補充:

最後小英當然在告訴我前因後果之後,我著她拿回文件並告訴她如何解決。至於她聽不聽到我的意思,我不知道,但願可以。

英倫肥龍 說...

c.m. 兄,

你所講小英既情況跟SB既情況好相似, 而我想帶出既意思大概同你差唔多.

由呢件事, 我可以睇出SB其實係一個比較微觀既員工 (唔係話佢唔可以宏觀, 係直覺), 但就容易被眼前或短線既利益吸引, 並影響其行為. 本應無對錯之分, 而且問心講, SB所講所問, 亦屬合情合理之範圍. 只係想講如果SB可以嘗試"自己"去望吓事既另一邊, 佢或者會明白多一點. 我可以做既, 除了講出我既想法外, 就係令SB可以開始意識事既另一面.

不過喺呢件事上, 套用貴寶號頂頂果兩句, 相信已經可解釋不少.

From management to administration, there are always trade-offs.

所以就呢件事一日未塵埃落定, 一日都唔應該放棄. 此一時彼一時, 任何變化無人可以預見或確認. 又好似燒豬所講, 守住條底線, 盡做, 似乎係暫時最佳方法.

結果唔重要, 但我堅信過程中(職場上)一定會有覺悟, 會有得著. 至於我既決定, 一早已經喺度提及過, 就係因為我已經歷過呢個過程, 發現自己睇遠咗, 反思自己多咗, 亦了解自己既(事業)位置深咗.

K 說...

>>觀點與角度, 唔同又何妨呢? 反而只係想講如果每個人都可以換過角度, 試吓身份對調, 可能有好多事其實都可以商擬, 更多空間可以傾, 更有餘地去討論.

講就容易, 但很多人都犯上同一毛病----以自己角度去想(尤其講到利益), 所以就有你同CM的situation出現。

CM的名言, 用於解釋番相關的conflict, 亦同一道理。

>>結果唔重要, 但我堅信過程中(職場上)一定會有覺悟, 會有得著.

所以人就是從過程中和錯誤中學習。