17.8.07

頭文精神

講起「最佳位置」同漫畫, 自然令肥龍諗起【頭文字D】. 喺【頭文字D】入面, 未知原作者係咪話中有話(定又係肥龍諗多咗),除咗漂移外, 有兩個概念, 肥龍特別感興趣亦十分受落. 第一個概念就係用車之道(升級)同第二既最佳路線. 相信好多讀者包括肥龍, 喺未睇過【頭文字D】之前, 真係連有架車叫AE86都未知. 又如果將車比喻成人, 咁AE86既外表就可以叫做其貌不揚既人. 起碼, 當一眾已經揸緊GTR, RX-7, Type-R既車手不屑一顧, 甚至笑呢架係古董, 估佢跑唔郁添.

**********************

用車之道(升級)

但又有無人估到, 原來喺平凡及陳舊既外殼內, 竟然係放咗副賽車級既引擎呢? 而且其實喺未安裝呢副引擎前, 拓海所駕駛既AE86每次勝出其實係靠tune車既成果及駕駛者(拓海)既技術加埋對路面既熟悉既結果. 不過漫畫中更指出每架車都有極限, tune車只可以配合駕駛者既風格(即人控制車), 但唔可以令駕駛者力量更大(即車惡過人). 喺極限未出現之前, 無必要無謂咁去有(再)升級甚至換車. 更覺得用車最高境界就係可以tune好及平衡好, 令一部車性能上既優點可以表現出黎.

咁喺工作上, 大家又有無見過某啲其貌不揚既人, 合作落先發現原來係好鬼勁同能幹呢? 無錯, 人靠衣妝, 邊個唔想又叻, 又聰明兼靚仔? 而且就算有哂咧, 又係咪你呢? 咁如果無是但一樣, 咁又點呢? 肥龍就真係見過有人真係好認真去裝備自己(tune車)同了解所做工作(熟悉路面情況). 不過就見到更多人只係怨天尤人, 又話呢樣果樣, 總之唔關佢事. 又有人只係著眼自己做大公司同細公司, 覺得大公司有限度, 資源多, 支援足夠, 總會發揮得好啲. 但細公司呢? 咩都要自己落手落腳, 要親力親為, 咪搞.

肥龍覺得就算喺大公司做得叻, 喺細公司做又未必搞得掂. 有時甚至覺得喺細公司打工, 因為支援少, 但空間大, 可能工作能力要求比大公司更高. 只不過, 喺大公司做, 除咗要有能力之外, 仲要識用手腕囉.

另外喺嗜好活動上面, 例如攝影, 打球, 肥龍亦見好多人一味買最好既裝備, 又補品又呢樣果樣, 不過如果問(或睇)本身技術咩? 就真係要睇過先知.

所以, 有好多野, 有時間真係要好好tune 吓自己.

******************

最佳路線

而一直以來, 肥龍對「最佳路線」既理解就係任何賽道必定有一條最好(optimal)既路線, 而駕駛者只要跟住呢條路線走, 配合應有技術, 自然可以跑出最佳時間. 但前題係所有車既性能係一樣.

但喺第四輯入面, 劇情終於對「最佳路線」有一個幾完滿既解釋. 原本基本上對同一條路線, 每一部車都會有自己既最佳路線. 而所謂最佳路線係相對, 而唔係絕對既(簡單講就如A車正常比B車快, 咁喺行同一條路線上, A 車一定比B車快). 所以真正既最佳路線就係A車用自己既極限, 配合應跑既路線, 跑出最佳時間.

咁套入番工作上, 「最佳路線」就等同上次講既「最佳位置」. 咁就算同一個工作崗位, 基於每個人既能力, 經驗下, 手法不盡相同, 又各師各法, 何謂「最佳」, 真係無人可以話到俾你知. 而且通常呢啲所謂經驗, 好難可以三言兩語講得明, 又或者對方可以一時間吸收到.

肥龍就不時會俾同事問點樣先可以做個老銷.通常肥龍就會叫同事睇肥龍做一(幾)次, 留心重點, 加埋自己一啲能力同經驗, 再加努力, 觀察力, 睇多啲問多啲, 嘗試去搵出自己既方法. 肥龍果套只係參考, 千祈唔好照跟, 因為可能會害死佢, 後果自負. 再叻啲既, 見到肥龍既缺點就唔好再學(不過唔駛話俾肥龍知, 因為肥龍小氣). 況且因為物以類聚關係, 肥龍覺得每個人都有潛質做老銷. 但好同差既老銷既分別係, 好既老銷可以有幾個(多個)面具及經驗, 迎合唔同客戶需求及模式. 而差既老銷可能只得一種方法, 或只可以對同一類人. 不過如果性格怕同人溝通或表達能力有問題, 又係另一回事.

咁肥龍諗同事應該因應自己既資質, 加埋能力同經驗,去搵出自己最自然及最有效率既手法, 可能仲實際. 唔係講笑, 其實肥龍既「最佳位置」自己都未知!

4 則留言:

Gavin 說...

除左電影版
冇睇過ANIME 版
您講到我好想睇添!

喂肥龍, 寫左一年, 唔好停. 冇人迫您定期寫野架. 幾星期一篇都唔緊要, 但唔好學渣老闆出MEMO走人呀...好DEPRESSED呀冇左個朋友咁

xiao zhu 說...

我好鍾意你呢篇,本來都有嘢想回應,不過呢幾日實在冇乜力氣寫太多。^_

英倫肥龍 說...

Gavin,

如果有時間許可又有興趣, 特別係第一輯及四輯, 絕對推介收看動畫版.

好奇問句, 唔通我喺度俾錯signal? 放心, 我未(亦未曾)諗過唔寫. 事實上呢度亦係自己一個暢所欲言及有時排洪既地方. 而且喺度及網上認識到唔同朋友, 好正架喎!

英倫肥龍 說...

燒豬,

多謝你鍾意呢篇. 冇乜力氣唔緊要, 休息要緊. 而且你既好意已經心領. 你都加油呀! ^^

其實呢篇早喺半年前已經想寫, 但自己又懶兼未整理好思緒, 一直未有落筆. 而且全篇係以另一角度去睇漫畫, 所以可能真係會諗多咗, 但又睇完(動畫)真係咁諗過, 咪膽粗粗寫出黎啦.

另外, 肥龍覺得生活中充滿智慧, 靈感亦無處不在. 不過有人覺得漫畫動畫只係娛樂,只係俾小朋友睇既副產物. 書本上既先係知識(起碼有唔少家長係咁諗). 呢點肥龍絕不苟同, 咁除咗娛樂之外, 喺當中看到唔少喜怒哀樂又喺成長路上得到唔少智慧及支持. 所以想喺呢度分享一下自己既見解, 又希望引來同好交流啦.

燒豬你又鍾唔鍾意睇漫畫動畫呢?