20.8.07

人地就呢

「頭先第二條好深好難答啊呵?」讀書時, 每逢考試, 肥龍身邊總會有一兩個同學好鍾意喺考完某一科目之後, 立刻走過黎同肥龍對答案, 又問你頭先果條點答. 而同學所期待既答案, 往往唔係想聽肥龍同佢講識答呢條果條, 反而係希望肥龍話同佢差不多情況又或者講只係識作答某幾條罷 (最好差過佢!), 覺得大家都唔識答, 咁佢就會好滿足咁離開.

勢估唔到, 離開中學十幾年後既今天, 肥龍喺工作上依然見到呢類行為, 更不時喺同事間出現.

例如, 每次肥龍把同行既報價(當然比肥龍公司出既價低)俾同事睇時, 同事既第一個反應往往唔係睇自己同同行報價內容既差別, 反而一開口就係話人亂報價, 好多野無報出黎又唔寫清楚兼落錯reference, 甚至有時仲話人地唔夠經驗做錯野添. 總之, 一句講哂, 唔係佢份報價問題. 做唔到, 只係人地唔跟規舉做野, 個價錢咁低, 佢都無能為力.

咁又當肥龍有時講開同行既動向及客戶既情況, 講起某同行/客戶出現咗問題時, 必定會有人走出黎馬後砲一餐. 然後佢就會話一早都講咗咁咁咁啦, 個客依家至知死, 如果一早搵肥龍公司做咪無問題啦. 彷彿, 好似係個客唔識貨, 又或者其他同行都比敝公司平庸, 俾唔到客要既野. 而且有時仲講同行都錯咯, 咁就算敝公司錯都唔係好大問題啫.

結果咁就真係大問題. 而事實上, 又係咪真係咁咩? 肥龍當然唔同意啦.

雖然同行市場佔有率可能比敝公司細少少 (或甚至更大), 又未細到睇唔到無威脅果隻. 又或者簡單講敝公司未到生意唔憂做, 等住慢慢做果種層次, 仲係粒粒皆辛苦, 唔做真係唔駛(再)做囉. 而且實際咁諗唔通喺同行工作既人, 個個都係揸流灘, 無經驗, 又不停犯錯既咩? 如果真係咁, 同行一早已經摺埋收擋咗啦. 況且, 敝公司其實有唔少人都係喺同行過檔黎做, 莫非佢地之前既問題黎咗呢處做就無哂呢咩? 係就咁神奇咧.

肥龍只想講阿Q還阿Q, 不過唔好變成藉口, 結果唔去認真思考, 改善同努力. 否則, 有問題, 唔識野果個, 可能係自己囉.

5 則留言:

Old Cake 說...

"It is always somebody else's mistake!"
Guys like that are all over the place. What can you do? :{

xiao zhu 說...

大有人在,大有人在,係冇咩可以做架。好多都唔細架,都係咁。其實係需要有呢啲人嘅存在,平衡吖嘛。

英倫肥龍 說...

old cake,

無架, 真係無咩可以做到. 不過如果有機會, 呢類人, 我會試吓俾佢打前鋒, 等客幫手"提"吓佢.

咁我又阿Q 啫 :P

英倫肥龍 說...

燒豬,

我諗喺平衡呢啲人嘅存在之前, 我更需要心理上既平衡囉. :(

C.M. 說...

肥龍兄,呢篇夠警世,呢個哥哥仔無論係咪真唔知,定係馬後砲,比佢出去見下世面,真係可以一舉兩得。