11.8.07

生活體驗

畫面係一間日式拉麵店內, 經理(定老板娘呢?)正喺度炳緊(應該)新黎既侍應. 而呢個侍應應該係二十出頭.

「我有冇教你點裝飯? 有冇? 之前我點講? 都話咗......%#$&*!!」

正喺度食緊麵既肥龍, 心諗: 「裝飯咋喎, 都要人教? 唔係呀嘛....唔通屋企有工人未裝過飯?」

******************

又畫面轉到一間銀行入面, 客户主任Leo正為面前既(肥)客户介紹服務詳情, 更新安排事宜. 從外表睇, Leo應該係畢業出黎做咗幾年野, 廿零歲果種熱血青年.

「肥龍先生, 咦你星期六唔駛返工呀? 」

「咁好既? 呀睇你既装束(肥龍著住運動衫)你應該都鍾意運動喎, 你有冇睇波架? 今晚英超開咧......我呢.....」

就係咁, Leo 一路同肥龍講, 一路幫肥龍填表格. 期間, 肥龍見咁大叠表格, Leo又真幾好心機幫肥龍填喎...

又講真, 除咗介紹產品清楚外, 又冇填錯野下, Leo又幾好傾喎, 特別係講波果陣時.

******************

畫面再轉到肥龍屋企. 「叮噹!」打開門見到既係送pizza黎既送遞員. 咁啱, 又係二十出頭既年青人喎.

送上pizza, 退回找續時, 年青人微微笑同肥龍講咗句說話.

「先生, 多謝哂, 希望你地食得開心啲, 下次再幫襯我地(公司名)吖, 拜拜!」

而肥龍又真係覺得佢係發之內心去講, 咁肥龍亦報以微笑同佢講聲拜拜.

*****************

講咗咁耐, 肥龍其實想講, 装飯好, 同客吹水又好,同客微笑講野都好, 有好多野相信唔係單靠有冇在職訓練, 有冇工作手冊/ 程序可以做到, 更唔好講做得好唔好. 有啲野係靠發自內心同上唔上心上面.

肥龍平時做老銷, 到自己做番客, 真係好想見番啲人性(Human)啲既野, 並唔想要千篇一律既一號笑客, 二號對答咁. 但諗如果要做到咁, 對方可唔可以俾到呢個感覺, 就真係要靠對方平時既生活體驗. 例如有冇多留意身邊事, 見得多, 聽得多, 又諗多啲.

況且太陽底下無新事, 唔識唔知咪開口問囉, 咁可以慳番唔少時間去揾料同去學習.

另外就真係要嘗試去接受份工. 不過就唔知點解, 可能真係做果行厭果行, 好多人做得耐熱情過咗高峯, 又好似滑哂牙咁, 無厘生氣 (肥龍亦係其一).

有機會, 有工做就應該去發揮啦. 而且咁樣諗, 做野應該會開心啲啩.

14 則留言:

xiao zhu 說...

好多時當講起服務態度,我都一定會諗起大家樂啲清潔阿嬸。我真係好欣賞,無論個訓練點好都好,都要佢地肯用心去講,佢地好多(我見嘅)真係做得到。啲讀好多書嘅後生仔女都要跟佢地學嘢。

英倫肥龍 說...

燒豬,

唔怕同你講, 我不時喺公司讚阿姐做野細心, 勤奮, 有交帶, 又好禮貌. 因為佢真係做得到兼做得好.

有時問心講工作態度亦自愧不如. 咁學歷就唔應該講咧. 所以, 我仲學緊野架.

而其實肥龍之前有篇都講過. 再睇番, 都係咁諗. 覺得每個人只係起點唔同, 際遇唔同. 不過就應該俾番credit呢班會默默耕耘既人.

http://alchemysales.blogspot.com/2006/12/blog-post_08.html

野蠻郡主 說...

係因為佢地知足常樂..我都好想自己容易妥協,有咁好既工作態度同心態呀!

咁我諗…做人會開心好多,少d壓力!

xiao zhu 說...

郡主,知足常樂,同容易妥協,似乎係講緊唔同嘅嘢喎。唔知我有沒有誤會你嘅意思呢? :P

Karmen 說...

我公司阿姐都係好到無得頂, 我諗佢係全公司最受歡迎員工. 記得一兩年前佢個衰上司(現己離職)想氹阿姐轉做合約外判身份, 蝦佢唔識野, 又比d難搞野留難佢, 搞到阿姐要走. 我地眼見但又幫唔到, 幾個女同事激氣之餘又唔捨得阿姐, 竟然一齊喊... 哈哈...

好彩, 公道自在人心, 阿姐確實係一個好員工, 依加都重係公司, 開開心心...

Gavin 說...

呢篇野...我get到d 好有用既野

英倫肥龍 說...

Gavin,

望住Leo, (因為銀行)就諗起你呀.

你Interview 結果點? 有無受打風影響呀?

月尾期考試加油呀!^^

英倫肥龍 說...

野蠻郡主,

共勉之.

Gavin 說...

係咪諗起架~ 您咁講我好開心。

interview, 果日in 1.15pm, in到2.30出黎. 一落香港站地鐵站好多人, 問問地鐵職員先知掛緊8號, 迫左好耐至轉到火車, 再迫一個鐘至番到屋企

可能我之前既offer太易得到, 好耐冇in過. in得好似not very good. 1st interview 都係同hr 傾下計講下點解要做呢行,有咩contribution,勁串我咁~

然後hr再扮落分行既客人,對我無理取鬧,我要試點handle之餘再cross sell下佢bank product, 呢part俾佢問到o哂咀:p

3星期內等news睇有冇written test 同panel in

anyway, 我冇咩擔心,決心試銀行就plan好哂. 呢份唔請就做一年counter teller, 再升番上去咁

您老闆新插入您條team既人呢排點呀?

英倫肥龍 說...

Gavin,

真係咁諗架.無呃你架. 嘩, 聽你咁講依家interview真係好tough咁喎. 又要過HR, 又考角色扮演仲要cross-selling, 然後仲有written test 同panel in? 實實在在過五關呀!

不過如果已經決定好, 就繼續努力啦. 俾啲心機啦.

我果邊? 慣哂啦. 咪搵啲tasks俾佢自己去跟吓, 再同佢跟進啦. 慢慢啦~~(我指佢) ^^

C.M. 說...

肥龍兄:

查實你呢篇同對上堅記個篇,令小弟感受甚深... 好有人性。

英倫肥龍 說...

c.m.兄,

身同感受. 又似一面鏡, 不過係俾自己照.

不過...唔通之前果啲唔夠人性? ^^

野蠻郡主 說...

講起面試,除左對住hr,中英文,打字寫文,仲有group in,真係款式多到數唔到,有自信又話你太hill,唔夠又話你冇信心…

野蠻郡主 說...

xiao zhu ,可能我做野仲係有怨言,唔知其實自己有份工已經比好多人好,所以咪令到自己唔開心,><